| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༡༨. ཨཊྛཱརསམཝགྒོ
18. Aṭṭhārasamavaggo
(༡༨༡) ༥. ཨེཀམགྒཀཐཱ
(181) 5. Ekamaggakathā
༨༡༠. ཨེཀེན ཨརིཡམགྒེན ཙཏྟཱརི སཱམཉྙཕལཱནི སཙྪིཀརོཏཱིཏི? ཨཱམནྟཱ། ཙཏུནྣཾ ཕསྶཱནཾ…པེ॰… ཙཏུནྣཾ སཉྙཱནཾ སམོདྷཱནཾ ཧོཏཱིཏི? ན ཧེཝཾ ཝཏྟབྦེ…པེ॰… ཨེཀེན ཨརིཡམགྒེན ཙཏྟཱརི སཱམཉྙཕལཱནི སཙྪིཀརོཏཱིཏི? ཨཱམནྟཱ། སོཏཱཔཏྟིམགྒེནཱཏི ? ན ཧེཝཾ ཝཏྟབྦེ…པེ॰… སཀདཱགཱམི…པེ॰… ཨནཱགཱམིམགྒེནཱཏི? ན ཧེཝཾ ཝཏྟབྦེ…པེ॰…།
810. Ekena ariyamaggena cattāri sāmaññaphalāni sacchikarotīti? Āmantā. Catunnaṃ phassānaṃ…pe… catunnaṃ saññānaṃ samodhānaṃ hotīti? Na hevaṃ vattabbe…pe… ekena ariyamaggena cattāri sāmaññaphalāni sacchikarotīti? Āmantā. Sotāpattimaggenāti ? Na hevaṃ vattabbe…pe… sakadāgāmi…pe… anāgāmimaggenāti? Na hevaṃ vattabbe…pe….
ཀཏམེན མགྒེནཱཏི? ཨརཧཏྟམགྒེནཱཏི། ཨརཧཏྟམགྒེན སཀྐཱཡདིཊྛིཾ ཝིཙིཀིཙྪཾ སཱིལབྦཏཔརཱམཱསཾ ཛཧཏཱིཏི? ན ཧེཝཾ ཝཏྟབྦེ…པེ॰… ཨརཧཏྟམགྒེན སཀྐཱཡདིཊྛིཾ ཝིཙིཀིཙྪཾ སཱིལབྦཏཔརཱམཱསཾ ཛཧཏཱིཏི? ཨཱམནྟཱ། ནནུ ཏིཎྞཾ སཾཡོཛནཱནཾ པཧཱནཾ སོཏཱཔཏྟིཕལཾ ཝུཏྟཾ བྷགཝཏཱཏི? ཨཱམནྟཱ། ཧཉྩི ཏིཎྞཾ སཾཡོཛནཱནཾ པཧཱནཾ སོཏཱཔཏྟིཕལཾ ཝུཏྟཾ བྷགཝཏཱ, ནོ ཙ ཝཏ རེ ཝཏྟབྦེ – ‘‘ཨརཧཏྟམགྒེན སཀྐཱཡདིཊྛིཾ ཝིཙིཀིཙྪཾ སཱིལབྦཏཔརཱམཱསཾ ཛཧཏཱི’’ཏི།
Katamena maggenāti? Arahattamaggenāti. Arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatīti? Na hevaṃ vattabbe…pe… arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatīti? Āmantā. Nanu tiṇṇaṃ saṃyojanānaṃ pahānaṃ sotāpattiphalaṃ vuttaṃ bhagavatāti? Āmantā. Hañci tiṇṇaṃ saṃyojanānaṃ pahānaṃ sotāpattiphalaṃ vuttaṃ bhagavatā, no ca vata re vattabbe – ‘‘arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatī’’ti.
ཨརཧཏྟམགྒེན ཨོལཱ༹རིཀཾ ཀཱམརཱགཾ ཨོལཱ༹རིཀཾ བྱཱཔཱདཾ ཛཧཏཱིཏི? ན ཧེཝཾ ཝཏྟབྦེ…པེ॰… ཨརཧཏྟམགྒེན ཨོལཱ༹རིཀཾ ཀཱམརཱགཾ ཨོལཱ༹རིཀཾ བྱཱཔཱདཾ ཛཧཏཱིཏི? ཨཱམནྟཱ། ནནུ ཀཱམརཱགབྱཱཔཱདཱནཾ ཏནུབྷཱཝཾ སཀདཱགཱམིཕལཾ ཝུཏྟཾ བྷགཝཏཱཏི? ཨཱམནྟཱ། ཧཉྩི ཀཱམརཱགབྱཱཔཱདཱནཾ ཏནུབྷཱཝཾ སཀདཱགཱམིཕལཾ ཝུཏྟཾ བྷགཝཏཱ, ནོ ཙ ཝཏ རེ ཝཏྟབྦེ – ‘‘ཨརཧཏྟམགྒེན ཨོལཱ༹རིཀཾ ཀཱམརཱགཾ ཨོལཱ༹རིཀཾ བྱཱཔཱདཾ ཛཧཏཱི’’ཏི།
Arahattamaggena oḷārikaṃ kāmarāgaṃ oḷārikaṃ byāpādaṃ jahatīti? Na hevaṃ vattabbe…pe… arahattamaggena oḷārikaṃ kāmarāgaṃ oḷārikaṃ byāpādaṃ jahatīti? Āmantā. Nanu kāmarāgabyāpādānaṃ tanubhāvaṃ sakadāgāmiphalaṃ vuttaṃ bhagavatāti? Āmantā. Hañci kāmarāgabyāpādānaṃ tanubhāvaṃ sakadāgāmiphalaṃ vuttaṃ bhagavatā, no ca vata re vattabbe – ‘‘arahattamaggena oḷārikaṃ kāmarāgaṃ oḷārikaṃ byāpādaṃ jahatī’’ti.
ཨརཧཏྟམགྒེན ཨཎུསཧགཏཾ ཀཱམརཱགཾ ཨཎུསཧགཏཾ བྱཱཔཱདཾ ཛཧཏཱིཏི? ན ཧེཝཾ ཝཏྟབྦེ…པེ॰… ཨརཧཏྟམགྒེན ཨཎུསཧགཏཾ ཀཱམརཱགཾ ཨཎུསཧགཏཾ བྱཱཔཱདཾ ཛཧཏཱིཏི? ཨཱམནྟཱ ། ནནུ ཀཱམརཱགབྱཱཔཱདཱནཾ ཨནཝསེསཔྤཧཱནཾ ཨནཱགཱམིཕལཾ ཝུཏྟཾ བྷགཝཏཱཏི? ཨཱམནྟཱ། ཧཉྩི ཀཱམརཱགབྱཱཔཱདཱནཾ ཨནཝསེསཔྤཧཱནཾ ཨནཱགཱམིཕལཾ ཝུཏྟཾ བྷགཝཏཱ, ནོ ཙ ཝཏ རེ ཝཏྟབྦེ – ‘‘ཨརཧཏྟམགྒེན ཨཎུསཧགཏཾ ཀཱམརཱགཾ ཨཎུསཧགཏཾ བྱཱཔཱདཾ ཛཧཏཱི’’ཏི།
Arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti? Na hevaṃ vattabbe…pe… arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti? Āmantā . Nanu kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatāti? Āmantā. Hañci kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatā, no ca vata re vattabbe – ‘‘arahattamaggena aṇusahagataṃ kāmarāgaṃ aṇusahagataṃ byāpādaṃ jahatī’’ti.
༨༡༡. ན ཝཏྟབྦཾ – ‘‘ཨེཀེན ཨརིཡམགྒེན ཙཏྟཱརི སཱམཉྙཕལཱནི སཙྪིཀརོཏཱི’’ཏི? ཨཱམནྟཱ། བྷགཝཏཱ སོཏཱཔཏྟིམགྒོ བྷཱཝིཏོཏི? ཨཱམནྟཱ ། བྷགཝཱ སོཏཱཔནྣོཏི? ན ཧེཝཾ ཝཏྟབྦེ…པེ॰… བྷགཝཏཱ སཀདཱགཱམི…པེ॰… ཨནཱགཱམིམགྒོ བྷཱཝིཏོཏི? ཨཱམནྟཱ། བྷགཝཱ ཨནཱགཱམཱིཏི? ན ཧེཝཾ ཝཏྟབྦེ…པེ॰…།
811. Na vattabbaṃ – ‘‘ekena ariyamaggena cattāri sāmaññaphalāni sacchikarotī’’ti? Āmantā. Bhagavatā sotāpattimaggo bhāvitoti? Āmantā . Bhagavā sotāpannoti? Na hevaṃ vattabbe…pe… bhagavatā sakadāgāmi…pe… anāgāmimaggo bhāvitoti? Āmantā. Bhagavā anāgāmīti? Na hevaṃ vattabbe…pe….
༨༡༢. བྷགཝཱ ཨེཀེན ཨརིཡམགྒེན ཙཏྟཱརི སཱམཉྙཕལཱནི སཙྪིཀརོཏི, སཱཝཀཱ ཙཏཱུཧི ཨརིཡམགྒེཧི ཙཏྟཱརི སཱམཉྙཕལཱནི སཙྪིཀརོནྟཱིཏི? ཨཱམནྟཱ། སཱཝཀཱ བུདྡྷསྶ བྷགཝཏོ ཨདིཊྛཾ དཀྑནྟི ཨནདྷིགཏཾ ཨདྷིགཙྪནྟི ཨསཙྪིཀཏཾ སཙྪིཀརོནྟཱིཏི? ན ཧེཝཾ ཝཏྟབྦེ…པེ॰…།
812. Bhagavā ekena ariyamaggena cattāri sāmaññaphalāni sacchikaroti, sāvakā catūhi ariyamaggehi cattāri sāmaññaphalāni sacchikarontīti? Āmantā. Sāvakā buddhassa bhagavato adiṭṭhaṃ dakkhanti anadhigataṃ adhigacchanti asacchikataṃ sacchikarontīti? Na hevaṃ vattabbe…pe….
ཨེཀམགྒཀཐཱ ནིཊྛིཏཱ།
Ekamaggakathā niṭṭhitā.
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༥. ཨེཀམགྒཀཐཱཝཎྞནཱ • 5. Ekamaggakathāvaṇṇanā
