| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. একমূলসুত্তৰণ্ণনা
4. Ekamūlasuttavaṇṇanā
৪৪. পতিট্ঠট্ঠেন অৰিজ্জাসঙ্খাতং একং মূলং এতিস্সাতি একমূলা। তং একমূলং। যথা সংযোজনীযেসু অস্সাদানুপস্সনাৰসেন তণ্হাসমুপ্পাদো, এৰং তণ্হাভিভৰৰসেন অনৰবোধোতি অৰিজ্জা তণ্হায মূলং, তণ্হা চ অৰিজ্জায মূলং। অযঞ্হি নযো উপনিস্সযতাৰসেন ৰুত্তো, সহজাতৰসেন চাযং অঞ্ঞমঞ্ঞং মূলভাৰো পাকটোযেৰ। ইধ পন ইমিস্সং গাথাযং অধিপ্পেতা ‘‘একমূল’’ন্তি সা তণ্হা। তত্থ যা ভৰতণ্হা, সা সস্সতদিট্ঠিৰসেন আৰট্টতি পরিৰত্ততি, ৰিভৰতণ্হা উচ্ছেদদিট্ঠিৰসেন, এৰং দ্ৰিরাৰট্টং। সহজাতকোটিযাতি সহজাতকোটিযাপি, পগেৰ সম্মুয্হং আপন্নস্স পন ৰত্তমানায তণ্হায বলৰভাৰেন মলীনতা সিযা। উপনিস্সযকোটিযাতি উপনিস্সযকোটিযাৰ সহজাতকোটিযা অসম্ভৰতো। পত্থরণট্ঠানাতি ৰিত্থতা হুত্ৰা পৰত্তিট্ঠানভূমি । তেনাহ ‘‘তেসু সা পত্থরতী’’তি। সমুদ্দনট্ঠেন সমুদ্দো। উত্তরিতুং অসক্কুণেয্যতায পতায অলং পরিযত্তোতি পাতালো, অযং পন পাতালো ৰিযাতি পাতালো। তেনাহ ‘‘অপ্পতিট্ঠট্ঠেনা’’তি। অগাধগম্ভীরতাযাতি অত্থো।
44. Patiṭṭhaṭṭhena avijjāsaṅkhātaṃ ekaṃ mūlaṃ etissāti ekamūlā. Taṃ ekamūlaṃ. Yathā saṃyojanīyesu assādānupassanāvasena taṇhāsamuppādo, evaṃ taṇhābhibhavavasena anavabodhoti avijjā taṇhāya mūlaṃ, taṇhā ca avijjāya mūlaṃ. Ayañhi nayo upanissayatāvasena vutto, sahajātavasena cāyaṃ aññamaññaṃ mūlabhāvo pākaṭoyeva. Idha pana imissaṃ gāthāyaṃ adhippetā ‘‘ekamūla’’nti sā taṇhā. Tattha yā bhavataṇhā, sā sassatadiṭṭhivasena āvaṭṭati parivattati, vibhavataṇhā ucchedadiṭṭhivasena, evaṃ dvirāvaṭṭaṃ. Sahajātakoṭiyāti sahajātakoṭiyāpi, pageva sammuyhaṃ āpannassa pana vattamānāya taṇhāya balavabhāvena malīnatā siyā. Upanissayakoṭiyāti upanissayakoṭiyāva sahajātakoṭiyā asambhavato. Pattharaṇaṭṭhānāti vitthatā hutvā pavattiṭṭhānabhūmi . Tenāha ‘‘tesu sā pattharatī’’ti. Samuddanaṭṭhena samuddo. Uttarituṃ asakkuṇeyyatāya patāya alaṃ pariyattoti pātālo, ayaṃ pana pātālo viyāti pātālo. Tenāha ‘‘appatiṭṭhaṭṭhenā’’ti. Agādhagambhīratāyāti attho.
একমূলসুত্তৰণ্ণনা নিট্ঠিতা।
Ekamūlasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. একমূলসুত্তং • 4. Ekamūlasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. একমূলসুত্তৰণ্ণনা • 4. Ekamūlasuttavaṇṇanā
