| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೪. ಏಕಮೂಲಸುತ್ತವಣ್ಣನಾ
4. Ekamūlasuttavaṇṇanā
೪೪. ಪತಿಟ್ಠಟ್ಠೇನ ಅವಿಜ್ಜಾಸಙ್ಖಾತಂ ಏಕಂ ಮೂಲಂ ಏತಿಸ್ಸಾತಿ ಏಕಮೂಲಾ। ತಂ ಏಕಮೂಲಂ। ಯಥಾ ಸಂಯೋಜನೀಯೇಸು ಅಸ್ಸಾದಾನುಪಸ್ಸನಾವಸೇನ ತಣ್ಹಾಸಮುಪ್ಪಾದೋ, ಏವಂ ತಣ್ಹಾಭಿಭವವಸೇನ ಅನವಬೋಧೋತಿ ಅವಿಜ್ಜಾ ತಣ್ಹಾಯ ಮೂಲಂ, ತಣ್ಹಾ ಚ ಅವಿಜ್ಜಾಯ ಮೂಲಂ। ಅಯಞ್ಹಿ ನಯೋ ಉಪನಿಸ್ಸಯತಾವಸೇನ ವುತ್ತೋ, ಸಹಜಾತವಸೇನ ಚಾಯಂ ಅಞ್ಞಮಞ್ಞಂ ಮೂಲಭಾವೋ ಪಾಕಟೋಯೇವ। ಇಧ ಪನ ಇಮಿಸ್ಸಂ ಗಾಥಾಯಂ ಅಧಿಪ್ಪೇತಾ ‘‘ಏಕಮೂಲ’’ನ್ತಿ ಸಾ ತಣ್ಹಾ। ತತ್ಥ ಯಾ ಭವತಣ್ಹಾ, ಸಾ ಸಸ್ಸತದಿಟ್ಠಿವಸೇನ ಆವಟ್ಟತಿ ಪರಿವತ್ತತಿ, ವಿಭವತಣ್ಹಾ ಉಚ್ಛೇದದಿಟ್ಠಿವಸೇನ, ಏವಂ ದ್ವಿರಾವಟ್ಟಂ। ಸಹಜಾತಕೋಟಿಯಾತಿ ಸಹಜಾತಕೋಟಿಯಾಪಿ, ಪಗೇವ ಸಮ್ಮುಯ್ಹಂ ಆಪನ್ನಸ್ಸ ಪನ ವತ್ತಮಾನಾಯ ತಣ್ಹಾಯ ಬಲವಭಾವೇನ ಮಲೀನತಾ ಸಿಯಾ। ಉಪನಿಸ್ಸಯಕೋಟಿಯಾತಿ ಉಪನಿಸ್ಸಯಕೋಟಿಯಾವ ಸಹಜಾತಕೋಟಿಯಾ ಅಸಮ್ಭವತೋ। ಪತ್ಥರಣಟ್ಠಾನಾತಿ ವಿತ್ಥತಾ ಹುತ್ವಾ ಪವತ್ತಿಟ್ಠಾನಭೂಮಿ । ತೇನಾಹ ‘‘ತೇಸು ಸಾ ಪತ್ಥರತೀ’’ತಿ। ಸಮುದ್ದನಟ್ಠೇನ ಸಮುದ್ದೋ। ಉತ್ತರಿತುಂ ಅಸಕ್ಕುಣೇಯ್ಯತಾಯ ಪತಾಯ ಅಲಂ ಪರಿಯತ್ತೋತಿ ಪಾತಾಲೋ, ಅಯಂ ಪನ ಪಾತಾಲೋ ವಿಯಾತಿ ಪಾತಾಲೋ। ತೇನಾಹ ‘‘ಅಪ್ಪತಿಟ್ಠಟ್ಠೇನಾ’’ತಿ। ಅಗಾಧಗಮ್ಭೀರತಾಯಾತಿ ಅತ್ಥೋ।
44. Patiṭṭhaṭṭhena avijjāsaṅkhātaṃ ekaṃ mūlaṃ etissāti ekamūlā. Taṃ ekamūlaṃ. Yathā saṃyojanīyesu assādānupassanāvasena taṇhāsamuppādo, evaṃ taṇhābhibhavavasena anavabodhoti avijjā taṇhāya mūlaṃ, taṇhā ca avijjāya mūlaṃ. Ayañhi nayo upanissayatāvasena vutto, sahajātavasena cāyaṃ aññamaññaṃ mūlabhāvo pākaṭoyeva. Idha pana imissaṃ gāthāyaṃ adhippetā ‘‘ekamūla’’nti sā taṇhā. Tattha yā bhavataṇhā, sā sassatadiṭṭhivasena āvaṭṭati parivattati, vibhavataṇhā ucchedadiṭṭhivasena, evaṃ dvirāvaṭṭaṃ. Sahajātakoṭiyāti sahajātakoṭiyāpi, pageva sammuyhaṃ āpannassa pana vattamānāya taṇhāya balavabhāvena malīnatā siyā. Upanissayakoṭiyāti upanissayakoṭiyāva sahajātakoṭiyā asambhavato. Pattharaṇaṭṭhānāti vitthatā hutvā pavattiṭṭhānabhūmi . Tenāha ‘‘tesu sā pattharatī’’ti. Samuddanaṭṭhena samuddo. Uttarituṃ asakkuṇeyyatāya patāya alaṃ pariyattoti pātālo, ayaṃ pana pātālo viyāti pātālo. Tenāha ‘‘appatiṭṭhaṭṭhenā’’ti. Agādhagambhīratāyāti attho.
ಏಕಮೂಲಸುತ್ತವಣ್ಣನಾ ನಿಟ್ಠಿತಾ।
Ekamūlasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೪. ಏಕಮೂಲಸುತ್ತಂ • 4. Ekamūlasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೪. ಏಕಮೂಲಸುತ್ತವಣ್ಣನಾ • 4. Ekamūlasuttavaṇṇanā
