| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. ஏகஞ்ஜலிகத்தே²ரஅபதா³னவண்ணனா
9. Ekañjalikattheraapadānavaṇṇanā
ஸுவண்ணவண்ணந்திஆதி³கங் ஆயஸ்மதோ ஏகஞ்ஜலிகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ ரதனத்தயே பஸன்னோ பிண்டா³ய சரந்தங் விபஸ்ஸிங் ப⁴க³வந்தங் தி³ஸ்வா பஸன்னமானஸோ அஞ்ஜலிங் பக்³க³ஹெத்வா அட்டா²ஸி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ ஸப்³ப³த்த² பூஜனீயோ ஹுத்வா உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே குலே நிப்³ப³த்தித்வா ஸாஸனே பஸீதி³த்வா பப்³ப³ஜித்வா விபஸ்ஸனங் வட்³டெ⁴த்வா அரஹத்தே பதிட்டா²ஸி. புப்³பே³ கதபுஞ்ஞவஸேன ஏகஞ்ஜலிகத்தே²ரோதி பாகடோ.
Suvaṇṇavaṇṇantiādikaṃ āyasmato ekañjalikattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto viññutaṃ patto ratanattaye pasanno piṇḍāya carantaṃ vipassiṃ bhagavantaṃ disvā pasannamānaso añjaliṃ paggahetvā aṭṭhāsi. So tena puññakammena devamanussesu saṃsaranto sabbattha pūjanīyo hutvā ubhayasampattiyo anubhavitvā imasmiṃ buddhuppāde vibhavasampanne kule nibbattitvā sāsane pasīditvā pabbajitvā vipassanaṃ vaḍḍhetvā arahatte patiṭṭhāsi. Pubbe katapuññavasena ekañjalikattheroti pākaṭo.
180. ஸோ அத்தனோ புப்³ப³கம்மங் ஸரித்வா தங் ஹத்த²தலே ஆமலகங் விய தி³ஸ்வா உதா³னவஸேன புப்³ப³சரிதாபதா³னங் பகாஸெந்தோ ஸுவண்ணவண்ணந்திஆதி³மாஹ. விபஸ்ஸிங் ஸத்த²வாஹக்³க³ந்தி வாணிஜே கந்தாரா வஹதி தாரேதீதி ஸத்த²வாஹோ . வாளகந்தாரா சோளகந்தாரா து³ப்³பி⁴க்க²கந்தாரா நிருத³ககந்தாரா யக்க²கந்தாரா அப்பப⁴க்க²கந்தாரா ச தாரேதி உத்தாரேதி பதாரேதி நித்தாரேதி கே²மந்தபூ⁴மிங் பாபேதீதி அத்தோ². கோ ஸோ? வாணிஜஜெட்ட²கோ. ஸத்த²வாஹஸதி³ஸத்தா அயம்பி ப⁴க³வா ஸத்த²வாஹோ. ததா² ஹி ஸோ திவித⁴ங் போ³தி⁴ங் பத்த²யந்தே கதபுஞ்ஞஸம்பா⁴ரே ஸத்தே ஜாதிகந்தாரா ஜராகந்தாரா ப்³யாதி⁴கந்தாரா மரணகந்தாரா ஸோகபரிதே³வது³க்க²தோ³மனஸ்ஸுபாயாஸகந்தாரா ச ஸப்³ப³ஸ்மா ஸங்ஸாரகந்தாரா ச தாரேதி உத்தாரேதி பதாரேதி நித்தாரேதி நிப்³பா³னத²லங் பாபேதீதி அத்தோ². ஸத்த²வாஹோ ச ஸோ அக்³கோ³ ஸெட்டோ² பதா⁴னோ சாதி ஸத்த²வாஹக்³கோ³, தங் ஸத்த²வாஹக்³க³ங் விபஸ்ஸிங் ஸம்பு³த்³த⁴ந்தி ஸம்ப³ந்தோ⁴. நரவரங் வினாயகந்தி நரானங் அந்தரே அஸிதி²லபரக்கமோதி நரவீரோ, தங். விஸேஸேன கதபுஞ்ஞஸம்பா⁴ரே ஸத்தே நேதி நிப்³பா³னபுரங் பாபேதீதி வினாயகோ, தங்.
180. So attano pubbakammaṃ saritvā taṃ hatthatale āmalakaṃ viya disvā udānavasena pubbacaritāpadānaṃ pakāsento suvaṇṇavaṇṇantiādimāha. Vipassiṃ satthavāhagganti vāṇije kantārā vahati tāretīti satthavāho . Vāḷakantārā coḷakantārā dubbhikkhakantārā nirudakakantārā yakkhakantārā appabhakkhakantārā ca tāreti uttāreti patāreti nittāreti khemantabhūmiṃ pāpetīti attho. Ko so? Vāṇijajeṭṭhako. Satthavāhasadisattā ayampi bhagavā satthavāho. Tathā hi so tividhaṃ bodhiṃ patthayante katapuññasambhāre satte jātikantārā jarākantārā byādhikantārā maraṇakantārā sokaparidevadukkhadomanassupāyāsakantārā ca sabbasmā saṃsārakantārā ca tāreti uttāreti patāreti nittāreti nibbānathalaṃ pāpetīti attho. Satthavāho ca so aggo seṭṭho padhāno cāti satthavāhaggo, taṃ satthavāhaggaṃ vipassiṃ sambuddhanti sambandho. Naravaraṃ vināyakanti narānaṃ antare asithilaparakkamoti naravīro, taṃ. Visesena katapuññasambhāre satte neti nibbānapuraṃ pāpetīti vināyako, taṃ.
181. அத³ந்தத³மனங் தாதி³ந்தி ராக³தோ³ஸமோஹாதி³கிலேஸஸம்பயுத்தத்தா காயவசீமனொத்³வாரேஹி அத³ந்தே ஸத்தே த³மேதீதி அத³ந்தத³மனோ, தங். இட்டா²னிட்டே²ஸு அகம்பியதாதி³கு³ணயுத்தோதி தாதீ³, தங். மஹாவாதி³ங் மஹாமதிந்தி ஸகஸமயபரஸமயவாதீ³னங் அந்தரே அத்தனா ஸமதி⁴கபுக்³க³லவிரஹிதத்தா மஹாவாதீ³ , மஹதீ பத²விஸமானா மேருஸமானா ச மதி யஸ்ஸ ஸோ மஹாமதி, தங் மஹாவாதி³ங் மஹாமதிங் ஸம்பு³த்³த⁴ந்தி இமினா துல்யாதி⁴கரணங். ஸேஸங் ஸுவிஞ்ஞெய்யமேவாதி.
181.Adantadamanaṃ tādinti rāgadosamohādikilesasampayuttattā kāyavacīmanodvārehi adante satte dametīti adantadamano, taṃ. Iṭṭhāniṭṭhesu akampiyatādiguṇayuttoti tādī, taṃ. Mahāvādiṃ mahāmatinti sakasamayaparasamayavādīnaṃ antare attanā samadhikapuggalavirahitattā mahāvādī , mahatī pathavisamānā merusamānā ca mati yassa so mahāmati, taṃ mahāvādiṃ mahāmatiṃ sambuddhanti iminā tulyādhikaraṇaṃ. Sesaṃ suviññeyyamevāti.
ஏகஞ்ஜலிகத்தே²ரஅபதா³னவண்ணனா ஸமத்தா.
Ekañjalikattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. ஏகஞ்ஜலிகத்தே²ரஅபதா³னங் • 9. Ekañjalikattheraapadānaṃ
