| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༥. ཨེཀནྟདུཀྑསུཏྟཾ
5. Ekantadukkhasuttaṃ
༡༡༨. སཱཝཏྠིཡཾ ཝིཧརཏི…པེ॰… ‘‘པཐཝཱིདྷཱཏུ ཙེ 1 ཧིདཾ, བྷིཀྑཝེ, ཨེཀནྟདུཀྑཱ ཨབྷཝིསྶ དུཀྑཱནུཔཏིཏཱ དུཀྑཱཝཀྐནྟཱ ཨནཝཀྐནྟཱ སུཁེན, ནཡིདཾ སཏྟཱ པཐཝཱིདྷཱཏུཡཱ སཱརཛྫེཡྻུཾ། ཡསྨཱ ཙ ཁོ, བྷིཀྑཝེ, པཐཝཱིདྷཱཏུ སུཁཱ སུཁཱནུཔཏིཏཱ སུཁཱཝཀྐནྟཱ ཨནཝཀྐནྟཱ དུཀྑེན, ཏསྨཱ སཏྟཱ པཐཝཱིདྷཱཏུཡཱ སཱརཛྫནྟི’’།
118. Sāvatthiyaṃ viharati…pe… ‘‘pathavīdhātu ce 2 hidaṃ, bhikkhave, ekantadukkhā abhavissa dukkhānupatitā dukkhāvakkantā anavakkantā sukhena, nayidaṃ sattā pathavīdhātuyā sārajjeyyuṃ. Yasmā ca kho, bhikkhave, pathavīdhātu sukhā sukhānupatitā sukhāvakkantā anavakkantā dukkhena, tasmā sattā pathavīdhātuyā sārajjanti’’.
‘‘ཨཱཔོདྷཱཏུ ཙེ ཧིདཾ, བྷིཀྑཝེ…པེ॰… ཏེཛོདྷཱཏུ ཙེ ཧིདཾ, བྷིཀྑཝེ… ཝཱཡོདྷཱཏུ ཙེ ཧིདཾ, བྷིཀྑཝེ, ཨེཀནྟདུཀྑཱ ཨབྷཝིསྶ དུཀྑཱནུཔཏིཏཱ དུཀྑཱཝཀྐནྟཱ ཨནཝཀྐནྟཱ སུཁེན, ནཡིདཾ སཏྟཱ ཝཱཡོདྷཱཏུཡཱ སཱརཛྫེཡྻུཾ། ཡསྨཱ ཙ ཁོ, བྷིཀྑཝེ, ཝཱཡོདྷཱཏུ སུཁཱ སུཁཱནུཔཏིཏཱ སུཁཱཝཀྐནྟཱ ཨནཝཀྐནྟཱ དུཀྑེན, ཏསྨཱ སཏྟཱ ཝཱཡོདྷཱཏུཡཱ སཱརཛྫནྟི།
‘‘Āpodhātu ce hidaṃ, bhikkhave…pe… tejodhātu ce hidaṃ, bhikkhave… vāyodhātu ce hidaṃ, bhikkhave, ekantadukkhā abhavissa dukkhānupatitā dukkhāvakkantā anavakkantā sukhena, nayidaṃ sattā vāyodhātuyā sārajjeyyuṃ. Yasmā ca kho, bhikkhave, vāyodhātu sukhā sukhānupatitā sukhāvakkantā anavakkantā dukkhena, tasmā sattā vāyodhātuyā sārajjanti.
‘‘པཐཝཱིདྷཱཏུ ཙེ ཧིདཾ, བྷིཀྑཝེ, ཨེཀནྟསུཁཱ ཨབྷཝིསྶ སུཁཱནུཔཏིཏཱ སུཁཱཝཀྐནྟཱ ཨནཝཀྐནྟཱ དུཀྑེན, ནཡིདཾ སཏྟཱ པཐཝཱིདྷཱཏུཡཱ ནིབྦིནྡེཡྻུཾ། ཡསྨཱ ཙ ཁོ, བྷིཀྑཝེ, པཐཝཱིདྷཱཏུ དུཀྑཱ དུཀྑཱནུཔཏིཏཱ དུཀྑཱཝཀྐནྟཱ ཨནཝཀྐནྟཱ སུཁེན, ཏསྨཱ སཏྟཱ པཐཝཱིདྷཱཏུཡཱ ནིབྦིནྡནྟི།
‘‘Pathavīdhātu ce hidaṃ, bhikkhave, ekantasukhā abhavissa sukhānupatitā sukhāvakkantā anavakkantā dukkhena, nayidaṃ sattā pathavīdhātuyā nibbindeyyuṃ. Yasmā ca kho, bhikkhave, pathavīdhātu dukkhā dukkhānupatitā dukkhāvakkantā anavakkantā sukhena, tasmā sattā pathavīdhātuyā nibbindanti.
‘‘ཨཱཔོདྷཱཏུ ཙེ ཧིདཾ, བྷིཀྑཝེ…པེ॰… ཏེཛོདྷཱཏུ ཙེ ཧིདཾ, བྷིཀྑཝེ… ཝཱཡོདྷཱཏུ ཙེ ཧིདཾ, བྷིཀྑཝེ, ཨེཀནྟསུཁཱ ཨབྷཝིསྶ སུཁཱནུཔཏིཏཱ སུཁཱཝཀྐནྟཱ ཨནཝཀྐནྟཱ དུཀྑེན, ནཡིདཾ སཏྟཱ ཝཱཡོདྷཱཏུཡཱ ནིབྦིནྡེཡྻུཾ། ཡསྨཱ ཙ ཁོ, བྷིཀྑཝེ, ཝཱཡོདྷཱཏུ དུཀྑཱ དུཀྑཱནུཔཏིཏཱ དུཀྑཱཝཀྐནྟཱ ཨནཝཀྐནྟཱ སུཁེན, ཏསྨཱ སཏྟཱ ཝཱཡོདྷཱཏུཡཱ ནིབྦིནྡནྟཱི’’ཏི། པཉྩམཾ།
‘‘Āpodhātu ce hidaṃ, bhikkhave…pe… tejodhātu ce hidaṃ, bhikkhave… vāyodhātu ce hidaṃ, bhikkhave, ekantasukhā abhavissa sukhānupatitā sukhāvakkantā anavakkantā dukkhena, nayidaṃ sattā vāyodhātuyā nibbindeyyuṃ. Yasmā ca kho, bhikkhave, vāyodhātu dukkhā dukkhānupatitā dukkhāvakkantā anavakkantā sukhena, tasmā sattā vāyodhātuyā nibbindantī’’ti. Pañcamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༥. ཨེཀནྟདུཀྑསུཏྟཝཎྞནཱ • 5. Ekantadukkhasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༥. ཨེཀནྟདུཀྑསུཏྟཝཎྞནཱ • 5. Ekantadukkhasuttavaṇṇanā
