| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[238] 8. ஏகபத³ஜாதகவண்ணனா
[238] 8. Ekapadajātakavaṇṇanā
இங்க⁴ ஏகபத³ங், தாதாதி இத³ங் ஸத்தா² ஜேதவனே விஹரந்தோ ஏகங் குடும்பி³கங் ஆரப்³ப⁴ கதே²ஸி. ஸாவத்தி²வாஸீ கிரேஸ குடும்பி³கோ, அத²ஸ்ஸ ஏகதி³வஸங் அங்கே நிஸின்னோ புத்தோ அத்த²ஸ்ஸ த்³வாரங் நாம பஞ்ஹங் புச்சி². ஸோ ‘‘பு³த்³த⁴விஸயோ ஏஸ பஞ்ஹோ, ந தங் அஞ்ஞோ கதே²துங் ஸக்கி²ஸ்ஸதீ’’தி புத்தங் க³ஹெத்வா ஜேதவனங் க³ந்த்வா ஸத்தா²ரங் வந்தி³த்வா ‘‘ப⁴ந்தே, அயங் மே தா³ரகோ ஊரும்ஹி நிஸின்னோ அத்த²ஸ்ஸ த்³வாரங் நாம பஞ்ஹங் புச்சி², அஹங் தங் அஜானந்தோ இதா⁴க³தோ, கதே²த², ப⁴ந்தே, இமங் பஞ்ஹ’’ந்தி. ஸத்தா² ‘‘ந கோ², உபாஸக, அயங் தா³ரகோ இதா³னேவ அத்த²க³வேஸகோ, புப்³பே³பி அத்த²க³வேஸகோவ ஹுத்வா இமங் பஞ்ஹங் பண்டி³தே புச்சி², போராணகபண்டி³தாபிஸ்ஸ கதே²ஸுங், ப⁴வஸங்கே²பக³தத்தா பன ந ஸல்லக்கே²ஸீ’’தி வத்வா தேன யாசிதோ அதீதங் ஆஹரி.
Iṅghaekapadaṃ, tātāti idaṃ satthā jetavane viharanto ekaṃ kuṭumbikaṃ ārabbha kathesi. Sāvatthivāsī kiresa kuṭumbiko, athassa ekadivasaṃ aṅke nisinno putto atthassa dvāraṃ nāma pañhaṃ pucchi. So ‘‘buddhavisayo esa pañho, na taṃ añño kathetuṃ sakkhissatī’’ti puttaṃ gahetvā jetavanaṃ gantvā satthāraṃ vanditvā ‘‘bhante, ayaṃ me dārako ūrumhi nisinno atthassa dvāraṃ nāma pañhaṃ pucchi, ahaṃ taṃ ajānanto idhāgato, kathetha, bhante, imaṃ pañha’’nti. Satthā ‘‘na kho, upāsaka, ayaṃ dārako idāneva atthagavesako, pubbepi atthagavesakova hutvā imaṃ pañhaṃ paṇḍite pucchi, porāṇakapaṇḍitāpissa kathesuṃ, bhavasaṅkhepagatattā pana na sallakkhesī’’ti vatvā tena yācito atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ ஸெட்டி²குலே நிப்³ப³த்தித்வா வயப்பத்தோ பிது அச்சயேன ஸெட்டி²ட்டா²னங் லபி⁴. அத²ஸ்ஸ புத்தோ த³ஹரோ குமாரோ ஊரும்ஹி நிஸீதி³த்வா ‘‘தாத, மய்ஹங் ஏகபத³ங் அனேகத்த²னிஸ்ஸிதங் ஏகங் காரணங் கதே²தா²’’தி புச்ச²ந்தோ பட²மங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto seṭṭhikule nibbattitvā vayappatto pitu accayena seṭṭhiṭṭhānaṃ labhi. Athassa putto daharo kumāro ūrumhi nisīditvā ‘‘tāta, mayhaṃ ekapadaṃ anekatthanissitaṃ ekaṃ kāraṇaṃ kathethā’’ti pucchanto paṭhamaṃ gāthamāha –
175.
175.
‘‘இங்க⁴ ஏகபத³ங் தாத, அனேகத்த²பத³ஸ்ஸிதங்;
‘‘Iṅgha ekapadaṃ tāta, anekatthapadassitaṃ;
கிஞ்சி ஸங்கா³ஹிகங் ப்³ரூஸி, யேனத்தே² ஸாத⁴யேமஸே’’தி.
Kiñci saṅgāhikaṃ brūsi, yenatthe sādhayemase’’ti.
தத்த² இங்கா⁴தி யாசனத்தே² சோத³னத்தே² வா நிபாதோ. ஏகபத³ந்தி ஏகங் காரணபத³ங், ஏகங் காரணூபஸஞ்ஹிதங் வா ப்³யஞ்ஜனபத³ங். அனேகத்த²பத³ஸ்ஸிதந்தி அனேகானி அத்த²பதா³னி காரணபதா³னி நிஸ்ஸிதங். கிஞ்சி ஸங்கா³ஹிகங் ப்³ரூஸீதி கிஞ்சி ஏகபத³ங் ப³ஹூனங் பதா³னங் ஸங்கா³ஹிகங் ப்³ரூஹி, அயமேவ வா பாடோ². யேனத்தே² ஸாத⁴யேமஸேதி யேன ஏகேன பதே³ன அனேகத்த²னிஸ்ஸிதேன மயங் அத்தனோ வுட்³டி⁴ங் ஸாதெ⁴ய்யாம, தங் மே கதே²ஹீதி புச்சி².
Tattha iṅghāti yācanatthe codanatthe vā nipāto. Ekapadanti ekaṃ kāraṇapadaṃ, ekaṃ kāraṇūpasañhitaṃ vā byañjanapadaṃ. Anekatthapadassitanti anekāni atthapadāni kāraṇapadāni nissitaṃ. Kiñci saṅgāhikaṃ brūsīti kiñci ekapadaṃ bahūnaṃ padānaṃ saṅgāhikaṃ brūhi, ayameva vā pāṭho. Yenatthe sādhayemaseti yena ekena padena anekatthanissitena mayaṃ attano vuḍḍhiṃ sādheyyāma, taṃ me kathehīti pucchi.
அத²ஸ்ஸ பிதா கதெ²ந்தோ து³தியங் கா³த²மாஹ –
Athassa pitā kathento dutiyaṃ gāthamāha –
176.
176.
‘‘த³க்கெ²ய்யேகபத³ங் தாத, அனேகத்த²பத³ஸ்ஸிதங்;
‘‘Dakkheyyekapadaṃ tāta, anekatthapadassitaṃ;
தஞ்ச ஸீலேன ஸஞ்ஞுத்தங், க²ந்தியா உபபாதி³தங்;
Tañca sīlena saññuttaṃ, khantiyā upapāditaṃ;
அலங் மித்தே ஸுகா²பேதுங், அமித்தானங் து³கா²ய சா’’தி.
Alaṃ mitte sukhāpetuṃ, amittānaṃ dukhāya cā’’ti.
தத்த² த³க்கெ²ய்யேகபத³ந்தி த³க்கெ²ய்யங் ஏகபத³ங். த³க்கெ²ய்யங் நாம லாபு⁴ப்பாத³கஸ்ஸ சே²கஸ்ஸ குஸலஸ்ஸ ஞாணஸம்பயுத்தங் வீரியங். அனேகத்த²பத³ஸ்ஸிதந்தி ஏவங் வுத்தப்பகாரங் வீரியங் அனேகேஹி அத்த²பதே³ஹி நிஸ்ஸிதங். கதரேஹீதி? ஸீலாதீ³ஹி. தேனேவ ‘‘தஞ்ச ஸீலேன ஸஞ்ஞுத்த’’ந்திஆதி³மாஹ. தஸ்ஸத்தோ² – தஞ்ச பனேதங் வீரியங் ஆசாரஸீலஸம்பயுத்தங் அதி⁴வாஸனக²ந்தியா உபேதங் மித்தே ஸுகா²பேதுங் அமித்தானஞ்ச து³க்கா²ய அலங் ஸமத்த²ங். கோ ஹி நாம லாபு⁴ப்பாத³கஞாணஸம்பயுத்தகுஸலவீரியஸமன்னாக³தோ ஆசாரக²ந்திஸம்பன்னோ மித்தே ஸுகா²பேதுங், அமித்தே வா து³க்கா²பேதுங் ந ஸக்கோதீதி.
Tattha dakkheyyekapadanti dakkheyyaṃ ekapadaṃ. Dakkheyyaṃ nāma lābhuppādakassa chekassa kusalassa ñāṇasampayuttaṃ vīriyaṃ. Anekatthapadassitanti evaṃ vuttappakāraṃ vīriyaṃ anekehi atthapadehi nissitaṃ. Katarehīti? Sīlādīhi. Teneva ‘‘tañca sīlena saññutta’’ntiādimāha. Tassattho – tañca panetaṃ vīriyaṃ ācārasīlasampayuttaṃ adhivāsanakhantiyā upetaṃ mitte sukhāpetuṃ amittānañca dukkhāya alaṃ samatthaṃ. Ko hi nāma lābhuppādakañāṇasampayuttakusalavīriyasamannāgato ācārakhantisampanno mitte sukhāpetuṃ, amitte vā dukkhāpetuṃ na sakkotīti.
ஏவங் போ³தி⁴ஸத்தோ புத்தஸ்ஸ பஞ்ஹங் கதே²ஸி. ஸோபி பிது கதி²தனயேனேவ அத்தனோ அத்த²ங் ஸாதெ⁴த்வா யதா²கம்மங் க³தோ.
Evaṃ bodhisatto puttassa pañhaṃ kathesi. Sopi pitu kathitanayeneva attano atthaṃ sādhetvā yathākammaṃ gato.
ஸத்தா² இமங் த⁴ம்மதே³ஸனங் ஆஹரித்வா ஸச்சானி பகாஸெத்வா ஜாதகங் ஸமோதா⁴னேஸி, ஸச்சபரியோஸானே பிதாபுத்தா ஸோதாபத்திப²லே பதிட்டி²தா. ‘‘ததா³ புத்தோ அயமேவ புத்தோ அஹோஸி, பா³ராணஸிஸெட்டி² பன அஹமேவ அஹோஸி’’ந்தி.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne pitāputtā sotāpattiphale patiṭṭhitā. ‘‘Tadā putto ayameva putto ahosi, bārāṇasiseṭṭhi pana ahameva ahosi’’nti.
ஏகபத³ஜாதகவண்ணனா அட்ட²மா.
Ekapadajātakavaṇṇanā aṭṭhamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 238. ஏகபத³ஜாதகங் • 238. Ekapadajātakaṃ
