| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๓๕. เอกปทุมิยวโคฺค
35. Ekapadumiyavaggo
๑. เอกปทุมิยเตฺถรอปทานํ
1. Ekapadumiyattheraapadānaṃ
๑.
1.
‘‘ปทุมุตฺตโร นาม ชิโน, สพฺพธมฺมาน ปารคู;
‘‘Padumuttaro nāma jino, sabbadhammāna pāragū;
ภวาภเว วิภาเวโนฺต, ตาเรสิ ชนตํ พหุํฯ
Bhavābhave vibhāvento, tāresi janataṃ bahuṃ.
๒.
2.
‘‘หํสราชา ตทา โหมิ, ทิชานํ ปวโร อหํ;
‘‘Haṃsarājā tadā homi, dijānaṃ pavaro ahaṃ;
ชาตสฺสรํ สโมคยฺห, กีฬามิ หํสกีฬิตํฯ
Jātassaraṃ samogayha, kīḷāmi haṃsakīḷitaṃ.
๓.
3.
‘‘ปทุมุตฺตโร โลกวิทู, อาหุตีนํ ปฎิคฺคโห;
‘‘Padumuttaro lokavidū, āhutīnaṃ paṭiggaho;
ชาตสฺสรสฺส อุปริ, อาคจฺฉิ ตาวเท ชิโนฯ
Jātassarassa upari, āgacchi tāvade jino.
๔.
4.
‘‘ทิสฺวานหํ เทวเทวํ, สยมฺภุํ โลกนายกํ;
‘‘Disvānahaṃ devadevaṃ, sayambhuṃ lokanāyakaṃ;
วเณฺฎ เฉตฺวาน ปทุมํ, สตปตฺตํ มโนรมํฯ
Vaṇṭe chetvāna padumaṃ, satapattaṃ manoramaṃ.
๕.
5.
๖.
6.
‘‘ปทุมุตฺตโร โลกวิทู, อาหุตีนํ ปฎิคฺคโห;
‘‘Padumuttaro lokavidū, āhutīnaṃ paṭiggaho;
อนฺตลิเกฺข ฐิโต สตฺถา, อกา เม อนุโมทนํฯ
Antalikkhe ṭhito satthā, akā me anumodanaṃ.
๗.
7.
‘‘‘อิมินา เอกปทุเมน, เจตนาปณิธีหิ จ;
‘‘‘Iminā ekapadumena, cetanāpaṇidhīhi ca;
กปฺปานํ สตสหสฺสํ, วินิปาตํ น คจฺฉสิ’ฯ
Kappānaṃ satasahassaṃ, vinipātaṃ na gacchasi’.
๘.
8.
‘‘อิทํ วตฺวาน สมฺพุโทฺธ, ชลชุตฺตมนามโก;
‘‘Idaṃ vatvāna sambuddho, jalajuttamanāmako;
มม กมฺมํ ปกิเตฺตตฺวา, อคมา เยน ปตฺถิตํฯ
Mama kammaṃ pakittetvā, agamā yena patthitaṃ.
๙.
9.
‘‘สตสหสฺสิโต กเปฺป, ยํ กมฺมมกริํ ตทา;
‘‘Satasahassito kappe, yaṃ kammamakariṃ tadā;
ทุคฺคติํ นาภิชานามิ, พุทฺธปูชายิทํ ผลํฯ
Duggatiṃ nābhijānāmi, buddhapūjāyidaṃ phalaṃ.
๑๐.
10.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
อิตฺถํ สุทํ อายสฺมา เอกปทุมิโย เถโร อิมา คาถาโย อภาสิตฺถาติฯ
Itthaṃ sudaṃ āyasmā ekapadumiyo thero imā gāthāyo abhāsitthāti.
เอกปทุมิยเตฺถรสฺสาปทานํ ปฐมํฯ
Ekapadumiyattherassāpadānaṃ paṭhamaṃ.
Footnotes:
