| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
८. एकपसादनियत्थेरअपदानवण्णना
8. Ekapasādaniyattheraapadānavaṇṇanā
नारदो इति मे नामन्तिआदिकं आयस्मतो एकपसादनियत्थेरस्स अपदानं। अयम्पि पुरिमबुद्धेसु कताधिकारो अनेकासु जातीसु कतकुसलो अत्थदस्सिस्स भगवतो काले ब्राह्मणकुले निब्बत्तो केसवोति पाकटो हुत्वा विञ्ञुतं पत्वा घरावासं पहाय पब्बजित्वा वसन्तो एकदिवसं सत्थु धम्मदेसनं सुत्वा पसन्नमानसो अञ्जलिं पग्गय्ह अतिविय पीतिसोमनस्सजातो पक्कामि। सो यावतायुकं ठत्वा तेनेव सोमनस्सेन कालं कत्वा देवेसु निब्बत्तो तत्थ दिब्बसम्पत्तिं अनुभवित्वा मनुस्सेसु उप्पन्नो तत्थ सम्पत्तियो अनुभवित्वा इमस्मिं बुद्धुप्पादे अञ्ञतरस्मिं कुलगेहे निब्बत्तो वुद्धिप्पत्तो सत्थरि पसीदित्वा पब्बजितो नचिरस्सेव अरहा अहोसि।
Nārado iti me nāmantiādikaṃ āyasmato ekapasādaniyattherassa apadānaṃ. Ayampi purimabuddhesu katādhikāro anekāsu jātīsu katakusalo atthadassissa bhagavato kāle brāhmaṇakule nibbatto kesavoti pākaṭo hutvā viññutaṃ patvā gharāvāsaṃ pahāya pabbajitvā vasanto ekadivasaṃ satthu dhammadesanaṃ sutvā pasannamānaso añjaliṃ paggayha ativiya pītisomanassajāto pakkāmi. So yāvatāyukaṃ ṭhatvā teneva somanassena kālaṃ katvā devesu nibbatto tattha dibbasampattiṃ anubhavitvā manussesu uppanno tattha sampattiyo anubhavitvā imasmiṃ buddhuppāde aññatarasmiṃ kulagehe nibbatto vuddhippatto satthari pasīditvā pabbajito nacirasseva arahā ahosi.
५५. सो अपरभागे अत्तनो कतकुसलकम्मं सरित्वा सोमनस्सजातो पुब्बचरितापदानं पकासेन्तो नारदो इति मे नामन्तिआदिमाह। तत्थ नारदोति जातिवसेन सुद्धसरीरत्ता नत्थि रजो धूलि मलं एतस्साति नारदो, ज-कारस्स द-कारं कत्वा नारदोति कुलदत्तिकं नामं। केसवोति किसवच्छगोत्ते जातत्ता केसवो नारदकेसवो इति मं जना विदू जानन्तीति अत्थो। सेसं पाकटमेवाति।
55. So aparabhāge attano katakusalakammaṃ saritvā somanassajāto pubbacaritāpadānaṃ pakāsento nārado iti me nāmantiādimāha. Tattha nāradoti jātivasena suddhasarīrattā natthi rajo dhūli malaṃ etassāti nārado, ja-kārassa da-kāraṃ katvā nāradoti kuladattikaṃ nāmaṃ. Kesavoti kisavacchagotte jātattā kesavo nāradakesavo iti maṃ janā vidū jānantīti attho. Sesaṃ pākaṭamevāti.
एकपसादनियत्थेरअपदानवण्णना समत्ता।
Ekapasādaniyattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ८. एकपसादनियत्थेरअपदानं • 8. Ekapasādaniyattheraapadānaṃ
