| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၈. ဧကပသာဒနိယတ္ထေရအပဒာနဝဏ္ဏနာ
8. Ekapasādaniyattheraapadānavaṇṇanā
နာရဒော ဣတိ မေ နာမန္တိအာဒိကံ အာယသ္မတော ဧကပသာဒနိယတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော အနေကာသု ဇာတီသု ကတကုသလော အတ္ထဒသ္သိသ္သ ဘဂဝတော ကာလေ ဗ္ရာဟ္မဏကုလေ နိဗ္ဗတ္တော ကေသဝောတိ ပာကဋော ဟုတ္ဝာ ဝိညုတံ ပတ္ဝာ ဃရာဝာသံ ပဟာယ ပဗ္ဗဇိတ္ဝာ ဝသန္တော ဧကဒိဝသံ သတ္ထု ဓမ္မဒေသနံ သုတ္ဝာ ပသန္နမာနသော အဉ္ဇလိံ ပဂ္ဂယ္ဟ အတိဝိယ ပီတိသောမနသ္သဇာတော ပက္ကာမိ။ သော ယာဝတာယုကံ ဌတ္ဝာ တေနေဝ သောမနသ္သေန ကာလံ ကတ္ဝာ ဒေဝေသု နိဗ္ဗတ္တော တတ္ထ ဒိဗ္ဗသမ္ပတ္တိံ အနုဘဝိတ္ဝာ မနုသ္သေသု ဥပ္ပန္နော တတ္ထ သမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ အညတရသ္မိံ ကုလဂေဟေ နိဗ္ဗတ္တော ဝုဒ္ဓိပ္ပတ္တော သတ္ထရိ ပသီဒိတ္ဝာ ပဗ္ဗဇိတော နစိရသ္သေဝ အရဟာ အဟောသိ။
Nārado iti me nāmantiādikaṃ āyasmato ekapasādaniyattherassa apadānaṃ. Ayampi purimabuddhesu katādhikāro anekāsu jātīsu katakusalo atthadassissa bhagavato kāle brāhmaṇakule nibbatto kesavoti pākaṭo hutvā viññutaṃ patvā gharāvāsaṃ pahāya pabbajitvā vasanto ekadivasaṃ satthu dhammadesanaṃ sutvā pasannamānaso añjaliṃ paggayha ativiya pītisomanassajāto pakkāmi. So yāvatāyukaṃ ṭhatvā teneva somanassena kālaṃ katvā devesu nibbatto tattha dibbasampattiṃ anubhavitvā manussesu uppanno tattha sampattiyo anubhavitvā imasmiṃ buddhuppāde aññatarasmiṃ kulagehe nibbatto vuddhippatto satthari pasīditvā pabbajito nacirasseva arahā ahosi.
၅၅. သော အပရဘာဂေ အတ္တနော ကတကုသလကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော နာရဒော ဣတိ မေ နာမန္တိအာဒိမာဟ။ တတ္ထ နာရဒောတိ ဇာတိဝသေန သုဒ္ဓသရီရတ္တာ နတ္ထိ ရဇော ဓူလိ မလံ ဧတသ္သာတိ နာရဒော, ဇ-ကာရသ္သ ဒ-ကာရံ ကတ္ဝာ နာရဒောတိ ကုလဒတ္တိကံ နာမံ။ ကေသဝောတိ ကိသဝစ္ဆဂောတ္တေ ဇာတတ္တာ ကေသဝော နာရဒကေသဝော ဣတိ မံ ဇနာ ဝိဒူ ဇာနန္တီတိ အတ္ထော။ သေသံ ပာကဋမေဝာတိ။
55. So aparabhāge attano katakusalakammaṃ saritvā somanassajāto pubbacaritāpadānaṃ pakāsento nārado iti me nāmantiādimāha. Tattha nāradoti jātivasena suddhasarīrattā natthi rajo dhūli malaṃ etassāti nārado, ja-kārassa da-kāraṃ katvā nāradoti kuladattikaṃ nāmaṃ. Kesavoti kisavacchagotte jātattā kesavo nāradakesavo iti maṃ janā vidū jānantīti attho. Sesaṃ pākaṭamevāti.
ဧကပသာဒနိယတ္ထေရအပဒာနဝဏ္ဏနာ သမတ္တာ။
Ekapasādaniyattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၈. ဧကပသာဒနိယတ္ထေရအပဒာနံ • 8. Ekapasādaniyattheraapadānaṃ
