| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೮. ಏಕಪಸಾದನಿಯತ್ಥೇರಅಪದಾನವಣ್ಣನಾ
8. Ekapasādaniyattheraapadānavaṇṇanā
ನಾರದೋ ಇತಿ ಮೇ ನಾಮನ್ತಿಆದಿಕಂ ಆಯಸ್ಮತೋ ಏಕಪಸಾದನಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ಅನೇಕಾಸು ಜಾತೀಸು ಕತಕುಸಲೋ ಅತ್ಥದಸ್ಸಿಸ್ಸ ಭಗವತೋ ಕಾಲೇ ಬ್ರಾಹ್ಮಣಕುಲೇ ನಿಬ್ಬತ್ತೋ ಕೇಸವೋತಿ ಪಾಕಟೋ ಹುತ್ವಾ ವಿಞ್ಞುತಂ ಪತ್ವಾ ಘರಾವಾಸಂ ಪಹಾಯ ಪಬ್ಬಜಿತ್ವಾ ವಸನ್ತೋ ಏಕದಿವಸಂ ಸತ್ಥು ಧಮ್ಮದೇಸನಂ ಸುತ್ವಾ ಪಸನ್ನಮಾನಸೋ ಅಞ್ಜಲಿಂ ಪಗ್ಗಯ್ಹ ಅತಿವಿಯ ಪೀತಿಸೋಮನಸ್ಸಜಾತೋ ಪಕ್ಕಾಮಿ। ಸೋ ಯಾವತಾಯುಕಂ ಠತ್ವಾ ತೇನೇವ ಸೋಮನಸ್ಸೇನ ಕಾಲಂ ಕತ್ವಾ ದೇವೇಸು ನಿಬ್ಬತ್ತೋ ತತ್ಥ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ಮನುಸ್ಸೇಸು ಉಪ್ಪನ್ನೋ ತತ್ಥ ಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಅಞ್ಞತರಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಪ್ಪತ್ತೋ ಸತ್ಥರಿ ಪಸೀದಿತ್ವಾ ಪಬ್ಬಜಿತೋ ನಚಿರಸ್ಸೇವ ಅರಹಾ ಅಹೋಸಿ।
Nārado iti me nāmantiādikaṃ āyasmato ekapasādaniyattherassa apadānaṃ. Ayampi purimabuddhesu katādhikāro anekāsu jātīsu katakusalo atthadassissa bhagavato kāle brāhmaṇakule nibbatto kesavoti pākaṭo hutvā viññutaṃ patvā gharāvāsaṃ pahāya pabbajitvā vasanto ekadivasaṃ satthu dhammadesanaṃ sutvā pasannamānaso añjaliṃ paggayha ativiya pītisomanassajāto pakkāmi. So yāvatāyukaṃ ṭhatvā teneva somanassena kālaṃ katvā devesu nibbatto tattha dibbasampattiṃ anubhavitvā manussesu uppanno tattha sampattiyo anubhavitvā imasmiṃ buddhuppāde aññatarasmiṃ kulagehe nibbatto vuddhippatto satthari pasīditvā pabbajito nacirasseva arahā ahosi.
೫೫. ಸೋ ಅಪರಭಾಗೇ ಅತ್ತನೋ ಕತಕುಸಲಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ನಾರದೋ ಇತಿ ಮೇ ನಾಮನ್ತಿಆದಿಮಾಹ। ತತ್ಥ ನಾರದೋತಿ ಜಾತಿವಸೇನ ಸುದ್ಧಸರೀರತ್ತಾ ನತ್ಥಿ ರಜೋ ಧೂಲಿ ಮಲಂ ಏತಸ್ಸಾತಿ ನಾರದೋ, ಜ-ಕಾರಸ್ಸ ದ-ಕಾರಂ ಕತ್ವಾ ನಾರದೋತಿ ಕುಲದತ್ತಿಕಂ ನಾಮಂ। ಕೇಸವೋತಿ ಕಿಸವಚ್ಛಗೋತ್ತೇ ಜಾತತ್ತಾ ಕೇಸವೋ ನಾರದಕೇಸವೋ ಇತಿ ಮಂ ಜನಾ ವಿದೂ ಜಾನನ್ತೀತಿ ಅತ್ಥೋ। ಸೇಸಂ ಪಾಕಟಮೇವಾತಿ।
55. So aparabhāge attano katakusalakammaṃ saritvā somanassajāto pubbacaritāpadānaṃ pakāsento nārado iti me nāmantiādimāha. Tattha nāradoti jātivasena suddhasarīrattā natthi rajo dhūli malaṃ etassāti nārado, ja-kārassa da-kāraṃ katvā nāradoti kuladattikaṃ nāmaṃ. Kesavoti kisavacchagotte jātattā kesavo nāradakesavo iti maṃ janā vidū jānantīti attho. Sesaṃ pākaṭamevāti.
ಏಕಪಸಾದನಿಯತ್ಥೇರಅಪದಾನವಣ್ಣನಾ ಸಮತ್ತಾ।
Ekapasādaniyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೮. ಏಕಪಸಾದನಿಯತ್ಥೇರಅಪದಾನಂ • 8. Ekapasādaniyattheraapadānaṃ
