| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১৩. একপুগ্গলৰগ্গো
13. Ekapuggalavaggo
১৭০. ‘‘একপুগ্গলো , ভিক্খৰে, লোকে উপ্পজ্জমানো উপ্পজ্জতি বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং । কতমো একপুগ্গলো? তথাগতো অরহং সম্মাসম্বুদ্ধো। অযং খো, ভিক্খৰে, একপুগ্গলো লোকে উপ্পজ্জমানো উপ্পজ্জতি বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সান’’ন্তি।
170. ‘‘Ekapuggalo , bhikkhave, loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṃ . Katamo ekapuggalo? Tathāgato arahaṃ sammāsambuddho. Ayaṃ kho, bhikkhave, ekapuggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussāna’’nti.
১৭১. ‘‘একপুগ্গলস্স, ভিক্খৰে, পাতুভাৰো দুল্লভো লোকস্মিং। কতমস্স একপুগ্গলস্স? তথাগতস্স অরহতো সম্মাসম্বুদ্ধস্স। ইমস্স খো, ভিক্খৰে, একপুগ্গলস্স পাতুভাৰো দুল্লভো লোকস্মি’’ন্তি।
171. ‘‘Ekapuggalassa, bhikkhave, pātubhāvo dullabho lokasmiṃ. Katamassa ekapuggalassa? Tathāgatassa arahato sammāsambuddhassa. Imassa kho, bhikkhave, ekapuggalassa pātubhāvo dullabho lokasmi’’nti.
১৭২. ‘‘একপুগ্গলো, ভিক্খৰে, লোকে উপ্পজ্জমানো উপ্পজ্জতি অচ্ছরিযমনুস্সো। কতমো একপুগ্গলো? তথাগতো অরহং সম্মাসম্বুদ্ধো। অযং খো, ভিক্খৰে, একপুগ্গলো লোকে উপ্পজ্জমানো উপ্পজ্জতি অচ্ছরিযমনুস্সো’’তি।
172. ‘‘Ekapuggalo, bhikkhave, loke uppajjamāno uppajjati acchariyamanusso. Katamo ekapuggalo? Tathāgato arahaṃ sammāsambuddho. Ayaṃ kho, bhikkhave, ekapuggalo loke uppajjamāno uppajjati acchariyamanusso’’ti.
১৭৩. ‘‘একপুগ্গলস্স, ভিক্খৰে, কালকিরিযা বহুনো জনস্স অনুতপ্পা 1 হোতি। কতমস্স একপুগ্গলস্স? তথাগতস্স অরহতো সম্মাসম্বুদ্ধস্স। ইমস্স খো, ভিক্খৰে, একপুগ্গলস্স কালকিরিযা বহুনো জনস্স অনুতপ্পা হোতী’’তি।
173. ‘‘Ekapuggalassa, bhikkhave, kālakiriyā bahuno janassa anutappā 2 hoti. Katamassa ekapuggalassa? Tathāgatassa arahato sammāsambuddhassa. Imassa kho, bhikkhave, ekapuggalassa kālakiriyā bahuno janassa anutappā hotī’’ti.
১৭৪. ‘‘একপুগ্গলো, ভিক্খৰে, লোকে উপ্পজ্জমানো উপ্পজ্জতি অদুতিযো অসহাযো অপ্পটিমো অপ্পটিসমো অপ্পটিভাগো অপ্পটিপুগ্গলো অসমো অসমসমো দ্ৰিপদানং অগ্গো। কতমো একপুগ্গলো? তথাগতো অরহং সম্মাসম্বুদ্ধো। অযং খো, ভিক্খৰে, একপুগ্গলো লোকে উপ্পজ্জমানো উপ্পজ্জতি অদুতিযো অসহাযো অপ্পটিমো অপ্পটিসমো অপ্পটিভাগো অপ্পটিপুগ্গলো অসমো অসমসমো দ্ৰিপদানং অগ্গো’’তি।
174. ‘‘Ekapuggalo, bhikkhave, loke uppajjamāno uppajjati adutiyo asahāyo appaṭimo appaṭisamo appaṭibhāgo appaṭipuggalo asamo asamasamo dvipadānaṃ aggo. Katamo ekapuggalo? Tathāgato arahaṃ sammāsambuddho. Ayaṃ kho, bhikkhave, ekapuggalo loke uppajjamāno uppajjati adutiyo asahāyo appaṭimo appaṭisamo appaṭibhāgo appaṭipuggalo asamo asamasamo dvipadānaṃ aggo’’ti.
১৭৫-১৮৬. ‘‘একপুগ্গলস্স , ভিক্খৰে, পাতুভাৰা মহতো চক্খুস্স পাতুভাৰো হোতি, মহতো আলোকস্স পাতুভাৰো হোতি, মহতো ওভাসস্স পাতুভাৰো হোতি, ছন্নং অনুত্তরিযানং পাতুভাৰো হোতি, চতুন্নং পটিসম্ভিদানং সচ্ছিকিরিযা হোতি, অনেকধাতুপটিৰেধো হোতি, নানাধাতুপটিৰেধো হোতি, ৰিজ্জাৰিমুত্তিফলসচ্ছিকিরিযা হোতি, সোতাপত্তিফলসচ্ছিকিরিযা হোতি, সকদাগামিফলসচ্ছিকিরিযা হোতি, অনাগামিফলসচ্ছিকিরিযা হোতি, অরহত্তফলসচ্ছিকিরিযা হোতি। কতমস্স একপুগ্গলস্স? তথাগতস্স অরহতো সম্মাসম্বুদ্ধস্স। ইমস্স খো, ভিক্খৰে, একপুগ্গলস্স পাতুভাৰা মহতো চক্খুস্স পাতুভাৰো হোতি, মহতো আলোকস্স পাতুভাৰো হোতি, মহতো ওভাসস্স পাতুভাৰো হোতি, ছন্নং অনুত্তরিযানং পাতুভাৰো হোতি, চতুন্নং পটিসম্ভিদানং সচ্ছিকিরিযা হোতি, অনেকধাতুপটিৰেধো হোতি, নানাধাতুপটিৰেধো হোতি, ৰিজ্জাৰিমুত্তিফলসচ্ছিকিরিযা হোতি, সোতাপত্তিফলসচ্ছিকিরিযা হোতি, সকদাগামিফলসচ্ছিকিরিযা হোতি, অনাগামিফলসচ্ছিকিরিযা হোতি, অরহত্তফলসচ্ছিকিরিযা হোতী’’তি।
175-186. ‘‘Ekapuggalassa , bhikkhave, pātubhāvā mahato cakkhussa pātubhāvo hoti, mahato ālokassa pātubhāvo hoti, mahato obhāsassa pātubhāvo hoti, channaṃ anuttariyānaṃ pātubhāvo hoti, catunnaṃ paṭisambhidānaṃ sacchikiriyā hoti, anekadhātupaṭivedho hoti, nānādhātupaṭivedho hoti, vijjāvimuttiphalasacchikiriyā hoti, sotāpattiphalasacchikiriyā hoti, sakadāgāmiphalasacchikiriyā hoti, anāgāmiphalasacchikiriyā hoti, arahattaphalasacchikiriyā hoti. Katamassa ekapuggalassa? Tathāgatassa arahato sammāsambuddhassa. Imassa kho, bhikkhave, ekapuggalassa pātubhāvā mahato cakkhussa pātubhāvo hoti, mahato ālokassa pātubhāvo hoti, mahato obhāsassa pātubhāvo hoti, channaṃ anuttariyānaṃ pātubhāvo hoti, catunnaṃ paṭisambhidānaṃ sacchikiriyā hoti, anekadhātupaṭivedho hoti, nānādhātupaṭivedho hoti, vijjāvimuttiphalasacchikiriyā hoti, sotāpattiphalasacchikiriyā hoti, sakadāgāmiphalasacchikiriyā hoti, anāgāmiphalasacchikiriyā hoti, arahattaphalasacchikiriyā hotī’’ti.
১৮৭. ‘‘নাহং ভিক্খৰে, অঞ্ঞং একপুগ্গলম্পি সমনুপস্সামি যো এৰং তথাগতেন অনুত্তরং ধম্মচক্কং পৰত্তিতং সম্মদেৰ অনুপ্পৰত্তেতি যথযিদং, ভিক্খৰে, সারিপুত্তো। সারিপুত্তো, ভিক্খৰে, তথাগতেন অনুত্তরং ধম্মচক্কং পৰত্তিতং সম্মদেৰ অনুপ্পৰত্তেতী’’তি।
187. ‘‘Nāhaṃ bhikkhave, aññaṃ ekapuggalampi samanupassāmi yo evaṃ tathāgatena anuttaraṃ dhammacakkaṃ pavattitaṃ sammadeva anuppavatteti yathayidaṃ, bhikkhave, sāriputto. Sāriputto, bhikkhave, tathāgatena anuttaraṃ dhammacakkaṃ pavattitaṃ sammadeva anuppavattetī’’ti.
একপুগ্গলৰগ্গো তেরসমো।
Ekapuggalavaggo terasamo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১৩. একপুগ্গলৰগ্গৰণ্ণনা • 13. Ekapuggalavaggavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১৩. একপুগ্গলৰগ্গৰণ্ণনা • 13. Ekapuggalavaggavaṇṇanā
