| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
13. එකපුග්‌ගලවග්‌ගො
13. Ekapuggalavaggo
170. ‘‘එකපුග්‌ගලො , භික්‌ඛවෙ, ලොකෙ උප්‌පජ්‌ජමානො උප්‌පජ්‌ජති බහුජනහිතාය බහුජනසුඛාය ලොකානුකම්‌පාය අත්‌ථාය හිතාය සුඛාය දෙවමනුස්‌සානං . කතමො එකපුග්‌ගලො? තථාගතො අරහං සම්‌මාසම්‌බුද්‌ධො. අයං ඛො, භික්‌ඛවෙ, එකපුග්‌ගලො ලොකෙ උප්‌පජ්‌ජමානො උප්‌පජ්‌ජති බහුජනහිතාය බහුජනසුඛාය ලොකානුකම්‌පාය අත්‌ථාය හිතාය සුඛාය දෙවමනුස්‌සාන’’න්‌ති.
170. ‘‘Ekapuggalo , bhikkhave, loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṃ . Katamo ekapuggalo? Tathāgato arahaṃ sammāsambuddho. Ayaṃ kho, bhikkhave, ekapuggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussāna’’nti.
171. ‘‘එකපුග්‌ගලස්‌ස, භික්‌ඛවෙ, පාතුභාවො දුල්‌ලභො ලොකස්‌මිං. කතමස්‌ස එකපුග්‌ගලස්‌ස? තථාගතස්‌ස අරහතො සම්‌මාසම්‌බුද්‌ධස්‌ස. ඉමස්‌ස ඛො, භික්‌ඛවෙ, එකපුග්‌ගලස්‌ස පාතුභාවො දුල්‌ලභො ලොකස්‌මි’’න්‌ති.
171. ‘‘Ekapuggalassa, bhikkhave, pātubhāvo dullabho lokasmiṃ. Katamassa ekapuggalassa? Tathāgatassa arahato sammāsambuddhassa. Imassa kho, bhikkhave, ekapuggalassa pātubhāvo dullabho lokasmi’’nti.
172. ‘‘එකපුග්‌ගලො, භික්‌ඛවෙ, ලොකෙ උප්‌පජ්‌ජමානො උප්‌පජ්‌ජති අච්‌ඡරියමනුස්‌සො. කතමො එකපුග්‌ගලො? තථාගතො අරහං සම්‌මාසම්‌බුද්‌ධො. අයං ඛො, භික්‌ඛවෙ, එකපුග්‌ගලො ලොකෙ උප්‌පජ්‌ජමානො උප්‌පජ්‌ජති අච්‌ඡරියමනුස්‌සො’’ති.
172. ‘‘Ekapuggalo, bhikkhave, loke uppajjamāno uppajjati acchariyamanusso. Katamo ekapuggalo? Tathāgato arahaṃ sammāsambuddho. Ayaṃ kho, bhikkhave, ekapuggalo loke uppajjamāno uppajjati acchariyamanusso’’ti.
173. ‘‘එකපුග්‌ගලස්‌ස, භික්‌ඛවෙ, කාලකිරියා බහුනො ජනස්‌ස අනුතප්‌පා 1 හොති. කතමස්‌ස එකපුග්‌ගලස්‌ස? තථාගතස්‌ස අරහතො සම්‌මාසම්‌බුද්‌ධස්‌ස. ඉමස්‌ස ඛො, භික්‌ඛවෙ, එකපුග්‌ගලස්‌ස කාලකිරියා බහුනො ජනස්‌ස අනුතප්‌පා හොතී’’ති.
173. ‘‘Ekapuggalassa, bhikkhave, kālakiriyā bahuno janassa anutappā 2 hoti. Katamassa ekapuggalassa? Tathāgatassa arahato sammāsambuddhassa. Imassa kho, bhikkhave, ekapuggalassa kālakiriyā bahuno janassa anutappā hotī’’ti.
174. ‘‘එකපුග්‌ගලො, භික්‌ඛවෙ, ලොකෙ උප්‌පජ්‌ජමානො උප්‌පජ්‌ජති අදුතියො අසහායො අප්‌පටිමො අප්‌පටිසමො අප්‌පටිභාගො අප්‌පටිපුග්‌ගලො අසමො අසමසමො ද්‌විපදානං අග්‌ගො. කතමො එකපුග්‌ගලො? තථාගතො අරහං සම්‌මාසම්‌බුද්‌ධො. අයං ඛො, භික්‌ඛවෙ, එකපුග්‌ගලො ලොකෙ උප්‌පජ්‌ජමානො උප්‌පජ්‌ජති අදුතියො අසහායො අප්‌පටිමො අප්‌පටිසමො අප්‌පටිභාගො අප්‌පටිපුග්‌ගලො අසමො අසමසමො ද්‌විපදානං අග්‌ගො’’ති.
174. ‘‘Ekapuggalo, bhikkhave, loke uppajjamāno uppajjati adutiyo asahāyo appaṭimo appaṭisamo appaṭibhāgo appaṭipuggalo asamo asamasamo dvipadānaṃ aggo. Katamo ekapuggalo? Tathāgato arahaṃ sammāsambuddho. Ayaṃ kho, bhikkhave, ekapuggalo loke uppajjamāno uppajjati adutiyo asahāyo appaṭimo appaṭisamo appaṭibhāgo appaṭipuggalo asamo asamasamo dvipadānaṃ aggo’’ti.
175-186. ‘‘එකපුග්‌ගලස්‌ස , භික්‌ඛවෙ, පාතුභාවා මහතො චක්‌ඛුස්‌ස පාතුභාවො හොති, මහතො ආලොකස්‌ස පාතුභාවො හොති, මහතො ඔභාසස්‌ස පාතුභාවො හොති, ඡන්‌නං අනුත්‌තරියානං පාතුභාවො හොති, චතුන්‌නං පටිසම්‌භිදානං සච්‌ඡිකිරියා හොති, අනෙකධාතුපටිවෙධො හොති, නානාධාතුපටිවෙධො හොති, විජ්‌ජාවිමුත්‌තිඵලසච්‌ඡිකිරියා හොති, සොතාපත්‌තිඵලසච්‌ඡිකිරියා හොති, සකදාගාමිඵලසච්‌ඡිකිරියා හොති, අනාගාමිඵලසච්‌ඡිකිරියා හොති, අරහත්‌තඵලසච්‌ඡිකිරියා හොති. කතමස්‌ස එකපුග්‌ගලස්‌ස? තථාගතස්‌ස අරහතො සම්‌මාසම්‌බුද්‌ධස්‌ස. ඉමස්‌ස ඛො, භික්‌ඛවෙ, එකපුග්‌ගලස්‌ස පාතුභාවා මහතො චක්‌ඛුස්‌ස පාතුභාවො හොති, මහතො ආලොකස්‌ස පාතුභාවො හොති, මහතො ඔභාසස්‌ස පාතුභාවො හොති, ඡන්‌නං අනුත්‌තරියානං පාතුභාවො හොති, චතුන්‌නං පටිසම්‌භිදානං සච්‌ඡිකිරියා හොති, අනෙකධාතුපටිවෙධො හොති, නානාධාතුපටිවෙධො හොති, විජ්‌ජාවිමුත්‌තිඵලසච්‌ඡිකිරියා හොති, සොතාපත්‌තිඵලසච්‌ඡිකිරියා හොති, සකදාගාමිඵලසච්‌ඡිකිරියා හොති, අනාගාමිඵලසච්‌ඡිකිරියා හොති, අරහත්‌තඵලසච්‌ඡිකිරියා හොතී’’ති.
175-186. ‘‘Ekapuggalassa , bhikkhave, pātubhāvā mahato cakkhussa pātubhāvo hoti, mahato ālokassa pātubhāvo hoti, mahato obhāsassa pātubhāvo hoti, channaṃ anuttariyānaṃ pātubhāvo hoti, catunnaṃ paṭisambhidānaṃ sacchikiriyā hoti, anekadhātupaṭivedho hoti, nānādhātupaṭivedho hoti, vijjāvimuttiphalasacchikiriyā hoti, sotāpattiphalasacchikiriyā hoti, sakadāgāmiphalasacchikiriyā hoti, anāgāmiphalasacchikiriyā hoti, arahattaphalasacchikiriyā hoti. Katamassa ekapuggalassa? Tathāgatassa arahato sammāsambuddhassa. Imassa kho, bhikkhave, ekapuggalassa pātubhāvā mahato cakkhussa pātubhāvo hoti, mahato ālokassa pātubhāvo hoti, mahato obhāsassa pātubhāvo hoti, channaṃ anuttariyānaṃ pātubhāvo hoti, catunnaṃ paṭisambhidānaṃ sacchikiriyā hoti, anekadhātupaṭivedho hoti, nānādhātupaṭivedho hoti, vijjāvimuttiphalasacchikiriyā hoti, sotāpattiphalasacchikiriyā hoti, sakadāgāmiphalasacchikiriyā hoti, anāgāmiphalasacchikiriyā hoti, arahattaphalasacchikiriyā hotī’’ti.
187. ‘‘නාහං භික්‌ඛවෙ, අඤ්‌ඤං එකපුග්‌ගලම්‌පි සමනුපස්‌සාමි යො එවං තථාගතෙන අනුත්‌තරං ධම්‌මචක්‌කං පවත්‌තිතං සම්‌මදෙව අනුප්‌පවත්‌තෙති යථයිදං, භික්‌ඛවෙ, සාරිපුත්‌තො. සාරිපුත්‌තො, භික්‌ඛවෙ, තථාගතෙන අනුත්‌තරං ධම්‌මචක්‌කං පවත්‌තිතං සම්‌මදෙව අනුප්‌පවත්‌තෙතී’’ති.
187. ‘‘Nāhaṃ bhikkhave, aññaṃ ekapuggalampi samanupassāmi yo evaṃ tathāgatena anuttaraṃ dhammacakkaṃ pavattitaṃ sammadeva anuppavatteti yathayidaṃ, bhikkhave, sāriputto. Sāriputto, bhikkhave, tathāgatena anuttaraṃ dhammacakkaṃ pavattitaṃ sammadeva anuppavattetī’’ti.
එකපුග්‌ගලවග්‌ගො තෙරසමො.
Ekapuggalavaggo terasamo.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 13. එකපුග්‌ගලවග්‌ගවණ්‌ණනා • 13. Ekapuggalavaggavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 13. එකපුග්‌ගලවග්‌ගවණ්‌ණනා • 13. Ekapuggalavaggavaṇṇanā
