| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[303] 3. ஏகராஜஜாதகவண்ணனா
[303] 3. Ekarājajātakavaṇṇanā
அனுத்தரே காமகு³ணே ஸமித்³தே⁴தி இத³ங் ஸத்தா² ஜேதவனே விஹரந்தோ அஞ்ஞதரங் கோஸலராஜஸேவகங் ஆரப்³ப⁴ கதே²ஸி. பச்சுப்பன்னவத்து² ஹெட்டா² ஸெய்யஜாதகே (ஜா॰ 1.3.94 ஆத³யோ) கதி²தமேவ. இத⁴ பன ஸத்தா² ‘‘ந த்வஞ்ஞேவ அனத்தே²ன அத்த²ங் ஆஹரி, போராணகபண்டி³தாபி அத்தனோ அனத்தே²ன அத்த²ங் ஆஹரிங்ஸூ’’தி வத்வா அதீதங் ஆஹரி.
Anuttare kāmaguṇe samiddheti idaṃ satthā jetavane viharanto aññataraṃ kosalarājasevakaṃ ārabbha kathesi. Paccuppannavatthu heṭṭhā seyyajātake (jā. 1.3.94 ādayo) kathitameva. Idha pana satthā ‘‘na tvaññeva anatthena atthaṃ āhari, porāṇakapaṇḍitāpi attano anatthena atthaṃ āhariṃsū’’ti vatvā atītaṃ āhari.
அதீதே பா³ராணஸிரஞ்ஞோ உபட்டா²கோ அமச்சோ ராஜந்தேபுரே து³ப்³பி⁴. ராஜா பச்சக்க²தோவ தஸ்ஸ தோ³ஸங் தி³ஸ்வா தங் ரட்டா² பப்³பா³ஜேஸி. ஸோ து³ப்³பி⁴ஸேனங் நாம கோஸலராஜானங் உபட்ட²ஹந்தோதி ஸப்³ப³ங் மஹாஸீலவஜாதகே (ஜா॰ 1.1.51) கதி²தமேவ. இத⁴ பன து³ப்³பி⁴ஸேனோ மஹாதலே அமச்சமஜ்ஜே² நிஸின்னங் பா³ராணஸிராஜானங் க³ண்ஹாபெத்வா ஸிக்காய பக்கி²பாபெத்வா உத்தரும்மாரே ஹெட்டா²ஸீஸகங் ஓலம்பா³பேஸி. ராஜா சோரராஜானங் ஆரப்³ப⁴ மெத்தங் பா⁴வெத்வா கஸிணபரிகம்மங் கத்வா ஜா²னங் நிப்³ப³த்தேஸி, ப³ந்த⁴னங் சி²ஜ்ஜி, ததோ ராஜா ஆகாஸே பல்லங்கேன நிஸீதி³. சோரராஜஸ்ஸ ஸரீரே தா³ஹோ உப்பஜ்ஜி, ‘‘ட³ய்ஹாமி ட³ய்ஹாமீ’’தி பூ⁴மியங் அபராபரங் பரிவத்ததி. ‘‘கிமேத’’ந்தி வுத்தே ‘‘மஹாராஜ, தும்ஹே ஏவரூபங் த⁴ம்மிகராஜானங் நிரபராத⁴ங் த்³வாரஸ்ஸ உத்தரும்மாரே ஹெட்டா²ஸீஸகங் ஓலம்பா³பேதா²’’தி வதி³ங்ஸு. தேன ஹி வேகே³ன க³ந்த்வா மோசேத² நந்தி. புரிஸா க³ந்த்வா ராஜானங் ஆகாஸே பல்லங்கேன நிஸின்னங் தி³ஸ்வா ஆக³ந்த்வா து³ப்³பி⁴ஸேனஸ்ஸ ஆரோசேஸுங். ஸோ வேகே³ன க³ந்த்வா தங் வந்தி³த்வா க²மாபேதுங் பட²மங் கா³த²மாஹ –
Atīte bārāṇasirañño upaṭṭhāko amacco rājantepure dubbhi. Rājā paccakkhatova tassa dosaṃ disvā taṃ raṭṭhā pabbājesi. So dubbhisenaṃ nāma kosalarājānaṃ upaṭṭhahantoti sabbaṃ mahāsīlavajātake (jā. 1.1.51) kathitameva. Idha pana dubbhiseno mahātale amaccamajjhe nisinnaṃ bārāṇasirājānaṃ gaṇhāpetvā sikkāya pakkhipāpetvā uttarummāre heṭṭhāsīsakaṃ olambāpesi. Rājā corarājānaṃ ārabbha mettaṃ bhāvetvā kasiṇaparikammaṃ katvā jhānaṃ nibbattesi, bandhanaṃ chijji, tato rājā ākāse pallaṅkena nisīdi. Corarājassa sarīre dāho uppajji, ‘‘ḍayhāmi ḍayhāmī’’ti bhūmiyaṃ aparāparaṃ parivattati. ‘‘Kimeta’’nti vutte ‘‘mahārāja, tumhe evarūpaṃ dhammikarājānaṃ niraparādhaṃ dvārassa uttarummāre heṭṭhāsīsakaṃ olambāpethā’’ti vadiṃsu. Tena hi vegena gantvā mocetha nanti. Purisā gantvā rājānaṃ ākāse pallaṅkena nisinnaṃ disvā āgantvā dubbhisenassa ārocesuṃ. So vegena gantvā taṃ vanditvā khamāpetuṃ paṭhamaṃ gāthamāha –
9.
9.
‘‘அனுத்தரே காமகு³ணே ஸமித்³தே⁴, பு⁴த்வான புப்³பே³ வஸி ஏகராஜ;
‘‘Anuttare kāmaguṇe samiddhe, bhutvāna pubbe vasi ekarāja;
ஸோதா³னி து³க்³கே³ நரகம்ஹி கி²த்தோ, நப்பஜ்ஜஹே வண்ணப³லங் புராண’’ந்தி.
Sodāni dugge narakamhi khitto, nappajjahe vaṇṇabalaṃ purāṇa’’nti.
தத்த² வஸீதி வுத்தோ². ஏகராஜாதி போ³தி⁴ஸத்தங் நாமேனாலபதி. ஸோதா³னீதி ஸோ த்வங் இதா³னி. து³க்³கே³தி விஸமே. நரகம்ஹீதி ஆவாடே. ஓலம்பி³தட்டா²னங் ஸந்தா⁴யேதங் வுத்தங். நப்பஜ்ஜஹே வண்ணப³லங் புராணந்தி ஏவரூபே விஸமட்டா²னே கி²த்தோபி போராணகவண்ணஞ்ச ப³லஞ்ச நப்பஜஹஸீதி புச்ச²தி.
Tattha vasīti vuttho. Ekarājāti bodhisattaṃ nāmenālapati. Sodānīti so tvaṃ idāni. Duggeti visame. Narakamhīti āvāṭe. Olambitaṭṭhānaṃ sandhāyetaṃ vuttaṃ. Nappajjahe vaṇṇabalaṃ purāṇanti evarūpe visamaṭṭhāne khittopi porāṇakavaṇṇañca balañca nappajahasīti pucchati.
தங் ஸுத்வா போ³தி⁴ஸத்தோ ஸேஸகா³தா² அவோச –
Taṃ sutvā bodhisatto sesagāthā avoca –
10.
10.
‘‘புப்³பே³வ க²ந்தீ ச தபோ ச மய்ஹங், ஸம்பத்தி²தா து³ப்³பி⁴ஸேன அஹோஸி;
‘‘Pubbeva khantī ca tapo ca mayhaṃ, sampatthitā dubbhisena ahosi;
தங்தா³னி லத்³தா⁴ன கத²ங் நு ராஜ, ஜஹே அஹங் வண்ணப³லங் புராணங்.
Taṃdāni laddhāna kathaṃ nu rāja, jahe ahaṃ vaṇṇabalaṃ purāṇaṃ.
11.
11.
‘‘ஸப்³பா³ கிரேவங் பரினிட்டி²தானி, யஸஸ்ஸினங் பஞ்ஞவந்தங் விஸய்ஹ;
‘‘Sabbā kirevaṃ pariniṭṭhitāni, yasassinaṃ paññavantaṃ visayha;
யஸோ ச லத்³தா⁴ புரிமங் உளாரங், நப்பஜ்ஜஹே வண்ணப³லங் புராணங்.
Yaso ca laddhā purimaṃ uḷāraṃ, nappajjahe vaṇṇabalaṃ purāṇaṃ.
12.
12.
‘‘பனுஜ்ஜ து³க்கே²ன ஸுக²ங் ஜனிந்த³, ஸுகே²ன வா து³க்க²மஸய்ஹஸாஹி;
‘‘Panujja dukkhena sukhaṃ janinda, sukhena vā dukkhamasayhasāhi;
உப⁴யத்த² ஸந்தோ அபி⁴னிப்³பு³தத்தா, ஸுகே² ச து³க்கே² ச ப⁴வந்தி துல்யா’’தி.
Ubhayattha santo abhinibbutattā, sukhe ca dukkhe ca bhavanti tulyā’’ti.
தத்த² க²ந்தீதி அதி⁴வாஸனக²ந்தி. தபோதி தபசரணங். ஸம்பத்தி²தாதி இச்சி²தா அபி⁴கங்கி²தா . து³ப்³பி⁴ஸேனாதி தங் நாமேனாலபதி. தங்தா³னி லத்³தா⁴னாதி தங் பத்த²னங் இதா³னாஹங் லபி⁴த்வா. ஜஹேதி கேன காரணேன அஹங் ஜஹெய்யங். யஸ்ஸ ஹி து³க்க²ங் வா தோ³மனஸ்ஸங் வா ஹோதி, ஸோ தங் ஜஹெய்யாதி தீ³பேதி.
Tattha khantīti adhivāsanakhanti. Tapoti tapacaraṇaṃ. Sampatthitāti icchitā abhikaṅkhitā . Dubbhisenāti taṃ nāmenālapati. Taṃdāni laddhānāti taṃ patthanaṃ idānāhaṃ labhitvā. Jaheti kena kāraṇena ahaṃ jaheyyaṃ. Yassa hi dukkhaṃ vā domanassaṃ vā hoti, so taṃ jaheyyāti dīpeti.
‘‘ஸப்³பா³ கிரேவங் பரினிட்டி²தானீ’’தி அனுஸ்ஸவவஸேன அத்தனோ ஸம்பத்திங் த³ஸ்ஸெந்தோ ஆஹ . இத³ங் வுத்தங் ஹோதி – ஸப்³பா³னேவ மம கத்தப்³ப³கிச்சானி தா³னஸீலபா⁴வனாஉபோஸத²கம்மானி புப்³பே³வ நிட்டி²தானீதி. யஸஸ்ஸினங் பஞ்ஞவந்தங் விஸய்ஹாதி பரிவாரஸம்பத்தியா யஸஸ்ஸி, பஞ்ஞாஸம்பதா³ய பஞ்ஞவந்த, அஸய்ஹஸாஹிதாய விஸய்ஹ. ஏவங் தீணிபேதானி ஆலபனானேவ. நந்தி பனெத்த² நிபாதோ . ப்³யஞ்ஜனஸிலிட்ட²தாவஸேனந்தகாரஸ்ஸ ஸானுனாஸிகதா கதாதி பச்சேதப்³பா³. யஸோ சாதி யஸஞ்ச, அயமேவ வா பாடோ². லத்³தா⁴ புரிமந்தி லபி⁴த்வா புரிமங் புப்³பே³ அலத்³த⁴புப்³ப³ங். உளாரந்தி மஹந்தங். கிலேஸவிக்க²ம்ப⁴னமெத்தாபா⁴வனாஜா²னுப்பத்தியோ ஸந்தா⁴யேவமாஹ. நப்பஜ்ஜஹேதி ஏவரூபங் யஸங் லத்³தா⁴ கிங்காரணா புராணவண்ணப³லங் ஜஹிஸ்ஸாமீதி அத்தோ².
‘‘Sabbā kirevaṃ pariniṭṭhitānī’’ti anussavavasena attano sampattiṃ dassento āha . Idaṃ vuttaṃ hoti – sabbāneva mama kattabbakiccāni dānasīlabhāvanāuposathakammāni pubbeva niṭṭhitānīti. Yasassinaṃ paññavantaṃ visayhāti parivārasampattiyā yasassi, paññāsampadāya paññavanta, asayhasāhitāya visayha. Evaṃ tīṇipetāni ālapanāneva. Nanti panettha nipāto . Byañjanasiliṭṭhatāvasenantakārassa sānunāsikatā katāti paccetabbā. Yaso cāti yasañca, ayameva vā pāṭho. Laddhā purimanti labhitvā purimaṃ pubbe aladdhapubbaṃ. Uḷāranti mahantaṃ. Kilesavikkhambhanamettābhāvanājhānuppattiyo sandhāyevamāha. Nappajjaheti evarūpaṃ yasaṃ laddhā kiṃkāraṇā purāṇavaṇṇabalaṃ jahissāmīti attho.
து³க்கே²னாதி தயா உப்பாதி³தேன நரகம்ஹி கி²பனது³க்கே²ன மம ரஜ்ஜஸுக²ங் பனுதி³த்வா. ஸுகே²ன வா து³க்க²ந்தி ஜா²னஸுகே²ன வா தங் து³க்க²ங் பனுதி³த்வா. உப⁴யத்த² ஸந்தோதி யே ஸந்தோ ஹொந்தி மாதி³ஸா, தே த்³வீஸுபி ஏதேஸு கொட்டா²ஸேஸு அபி⁴னிப்³பு³தஸபா⁴வா மஜ்ஜ²த்தா ஸுகே² ச து³க்கே² ச ப⁴வந்தி துல்யா, ஏகஸதி³ஸா நிப்³பி³காராவ ஹொந்தீதி.
Dukkhenāti tayā uppāditena narakamhi khipanadukkhena mama rajjasukhaṃ panuditvā. Sukhena vā dukkhanti jhānasukhena vā taṃ dukkhaṃ panuditvā. Ubhayattha santoti ye santo honti mādisā, te dvīsupi etesu koṭṭhāsesu abhinibbutasabhāvā majjhattā sukhe ca dukkhe ca bhavanti tulyā, ekasadisā nibbikārāva hontīti.
இத³ங் ஸுத்வா து³ப்³பி⁴ஸேனோ போ³தி⁴ஸத்தங் க²மாபெத்வா ‘‘தும்ஹாகங் ரஜ்ஜங் தும்ஹேவ காரேத², அஹங் வோ சோரே படிபா³ஹிஸ்ஸாமீ’’தி வத்வா தஸ்ஸ து³ட்டா²மச்சஸ்ஸ ராஜாணங் காரெத்வா பக்காமி. போ³தி⁴ஸத்தோபி ரஜ்ஜங் அமச்சானங் நிய்யாதெ³த்வா இஸிபப்³ப³ஜ்ஜங் பப்³ப³ஜித்வா ப்³ரஹ்மலோகபராயணோ அஹோஸி.
Idaṃ sutvā dubbhiseno bodhisattaṃ khamāpetvā ‘‘tumhākaṃ rajjaṃ tumheva kāretha, ahaṃ vo core paṭibāhissāmī’’ti vatvā tassa duṭṭhāmaccassa rājāṇaṃ kāretvā pakkāmi. Bodhisattopi rajjaṃ amaccānaṃ niyyādetvā isipabbajjaṃ pabbajitvā brahmalokaparāyaṇo ahosi.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ து³ப்³பி⁴ஸேனோ ஆனந்தோ³ அஹோஸி, பா³ராணஸிராஜா பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā dubbhiseno ānando ahosi, bārāṇasirājā pana ahameva ahosi’’nti.
ஏகராஜஜாதகவண்ணனா ததியா.
Ekarājajātakavaṇṇanā tatiyā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 303. ஏகராஜஜாதகங் • 303. Ekarājajātakaṃ
