| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೪. ಏಕಾಸನಿಯತ್ಥೇರಅಪದಾನವಣ್ಣನಾ
4. Ekāsaniyattheraapadānavaṇṇanā
ವರುಣೋ ನಾಮ ನಾಮೇನಾತಿಆದಿಕಂ ಆಯಸ್ಮತೋ ಏಕಾಸನಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಅತ್ಥದಸ್ಸಿಸ್ಸ ಭಗವತೋ ಕಾಲೇ ವರುಣೋ ನಾಮ ದೇವರಾಜಾ ಹುತ್ವಾ ನಿಬ್ಬತ್ತಿ। ಸೋ ಭಗವನ್ತಂ ದಿಸ್ವಾ ಪಸನ್ನಮಾನಸೋ ಗನ್ಧಮಾಲಾದೀಹಿ ಗೀತವಾದಿತೇಹಿ ಚ ಉಪಟ್ಠಯಮಾನೋ ಸಪರಿವಾರೋ ಪೂಜೇಸಿ। ತತೋ ಅಪರಭಾಗೇ ಭಗವತಿ ಪರಿನಿಬ್ಬುತೇ ತಸ್ಸ ಮಹಾಬೋಧಿರುಕ್ಖಂ ಬುದ್ಧದಸ್ಸನಂ ವಿಯ ಸಬ್ಬತೂರಿಯತಾಳಾವಚರೇಹಿ ಸಪರಿವಾರೋ ಉಪಹಾರಮಕಾಸಿ। ಸೋ ತೇನ ಪುಞ್ಞೇನ ತತೋ ಕಾಲಙ್ಕತ್ವಾ ನಿಮ್ಮಾನರತಿದೇವಲೋಕೇ ಉಪ್ಪಜ್ಜಿ। ಏವಂ ದೇವಸಮ್ಪತ್ತಿಮನುಭವಿತ್ವಾ ಮನುಸ್ಸೇಸು ಚ ಮನುಸ್ಸಭೂತೋ ಚಕ್ಕವತ್ತಿಸಮ್ಪತ್ತಿಂ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ವಾ ಸತ್ಥು ಸಾಸನೇ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Varuṇonāma nāmenātiādikaṃ āyasmato ekāsaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle varuṇo nāma devarājā hutvā nibbatti. So bhagavantaṃ disvā pasannamānaso gandhamālādīhi gītavāditehi ca upaṭṭhayamāno saparivāro pūjesi. Tato aparabhāge bhagavati parinibbute tassa mahābodhirukkhaṃ buddhadassanaṃ viya sabbatūriyatāḷāvacarehi saparivāro upahāramakāsi. So tena puññena tato kālaṅkatvā nimmānaratidevaloke uppajji. Evaṃ devasampattimanubhavitvā manussesu ca manussabhūto cakkavattisampattiṃ anubhavitvā imasmiṃ buddhuppāde kulagehe nibbatto viññutaṃ patvā satthu sāsane pabbajitvā nacirasseva arahā ahosi.
೩೧. ಸೋ ಪಚ್ಛಾ ಸಕಕಮ್ಮಂ ಸರಿತ್ವಾ ತಂ ತಥತೋ ಞತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ವರುಣೋ ನಾಮ ನಾಮೇನಾತಿಆದಿಮಾಹ। ತತ್ಥ ಯದಾ ಅಹಂ ಸಮ್ಬೋಧನತ್ಥಾಯ ಬುದ್ಧಂ ಬೋಧಿಞ್ಚ ಪೂಜೇಸಿಂ, ತದಾ ವರುಣೋ ನಾಮ ದೇವರಾಜಾ ಅಹೋಸಿನ್ತಿ ಸಮ್ಬನ್ಧೋ।
31. So pacchā sakakammaṃ saritvā taṃ tathato ñatvā somanassajāto pubbacaritāpadānaṃ pakāsento varuṇo nāma nāmenātiādimāha. Tattha yadā ahaṃ sambodhanatthāya buddhaṃ bodhiñca pūjesiṃ, tadā varuṇo nāma devarājā ahosinti sambandho.
೩೪. ಧರಣೀರುಹಪಾದಪನ್ತಿ ಏತ್ಥ ರುಕ್ಖಲತಾಪಬ್ಬತಸತ್ಥರತನಾದಯೋ ಧಾರೇತೀತಿ ಧರಣೀ, ತಸ್ಮಿಂ ರುಹತಿ ಪತಿಟ್ಠಹತೀತಿ ಧರಣೀರುಹೋ। ಪಾದೇನ ಪಿವತೀತಿ ಪಾದಪೋ, ಸಿಞ್ಚಿತಸಿಞ್ಚಿತೋದಕಂ ಪಾದೇನ ಮೂಲೇನ ಪಿವತಿ ರುಕ್ಖಕ್ಖನ್ಧಸಾಖಾವಿಟಪೇಹಿ ಆಪೋರಸಂ ಪತ್ಥರಿಯತೀತಿ ಅತ್ಥೋ, ತಂ ಧರಣೀರುಹಪಾದಪಂ ಬೋಧಿರುಕ್ಖನ್ತಿ ಸಮ್ಬನ್ಧೋ।
34.Dharaṇīruhapādapanti ettha rukkhalatāpabbatasattharatanādayo dhāretīti dharaṇī, tasmiṃ ruhati patiṭṭhahatīti dharaṇīruho. Pādena pivatīti pādapo, siñcitasiñcitodakaṃ pādena mūlena pivati rukkhakkhandhasākhāviṭapehi āporasaṃ patthariyatīti attho, taṃ dharaṇīruhapādapaṃ bodhirukkhanti sambandho.
೩೫. ಸಕಕಮ್ಮಾಭಿರದ್ಧೋತಿ ಅತ್ತನೋ ಕುಸಲಕಮ್ಮೇನ ಅಭಿರದ್ಧೋ ಪಸನ್ನೋ ಉತ್ತಮೇ ಬೋಧಿಮ್ಹಿ ಪಸನ್ನೋತಿ ಸಮ್ಬನ್ಧೋ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
35.Sakakammābhiraddhoti attano kusalakammena abhiraddho pasanno uttame bodhimhi pasannoti sambandho. Sesaṃ sabbattha uttānamevāti.
ಏಕಾಸನಿಯತ್ಥೇರಅಪದಾನವಣ್ಣನಾ ಸಮತ್ತಾ।
Ekāsaniyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೪. ಏಕಾಸನಿಯತ್ಥೇರಅಪದಾನಂ • 4. Ekāsaniyattheraapadānaṃ
