| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
५. एकसञ्ञकत्थेरअपदानवण्णना
5. Ekasaññakattheraapadānavaṇṇanā
खण्डो नामासि नामेनातिआदिकं आयस्मतो एकसञ्ञकत्थेरस्स अपदानं। अयम्पि पुरिमबुद्धेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो विपस्सिस्स भगवतो काले कुलगेहे निब्बत्तो विञ्ञुतं पत्तो रतनत्तये पसन्नमानसो तस्स सत्थुनो खण्डं नाम अग्गसावकं भिक्खाय चरमानं दिस्वा सद्दहित्वा पिण्डपातमदासि। सो तेन पुञ्ञकम्मेन देवमनुस्ससम्पत्तियो अनुभवित्वा इमस्मिं बुद्धुप्पादे सावत्थियं एकस्मिं कुलगेहे निब्बत्तो विञ्ञुतं पत्तो सत्थु धम्मदेसनं सुत्वा पटिलद्धसद्धो पब्बजित्वा नचिरस्सेव अरहा अहोसि। सो एकदिवसं पिण्डपातस्स सञ्ञं मनसिकरित्वा पटिलद्धविसेसत्ता एकसञ्ञकत्थेरोति पाकटो।
Khaṇḍonāmāsi nāmenātiādikaṃ āyasmato ekasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle kulagehe nibbatto viññutaṃ patto ratanattaye pasannamānaso tassa satthuno khaṇḍaṃ nāma aggasāvakaṃ bhikkhāya caramānaṃ disvā saddahitvā piṇḍapātamadāsi. So tena puññakammena devamanussasampattiyo anubhavitvā imasmiṃ buddhuppāde sāvatthiyaṃ ekasmiṃ kulagehe nibbatto viññutaṃ patto satthu dhammadesanaṃ sutvā paṭiladdhasaddho pabbajitvā nacirasseva arahā ahosi. So ekadivasaṃ piṇḍapātassa saññaṃ manasikaritvā paṭiladdhavisesattā ekasaññakattheroti pākaṭo.
१८. सो अपरभागे अत्तनो पुब्बकम्मं सरित्वा सोमनस्सजातो पुब्बचरितापदानं पकासेन्तो खण्डो नामासि नामेनातिआदिमाह। तत्थ तस्स अग्गसावकत्थेरस्स किलेसानं खण्डितत्ता खण्डोति नामं। सेसं सब्बत्थ उत्तानमेवाति।
18. So aparabhāge attano pubbakammaṃ saritvā somanassajāto pubbacaritāpadānaṃ pakāsento khaṇḍo nāmāsi nāmenātiādimāha. Tattha tassa aggasāvakattherassa kilesānaṃ khaṇḍitattā khaṇḍoti nāmaṃ. Sesaṃ sabbattha uttānamevāti.
एकसञ्ञकत्थेरअपदानवण्णना समत्ता।
Ekasaññakattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ५. एकसञ्ञकत्थेरअपदानं • 5. Ekasaññakattheraapadānaṃ
