| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
5. එකසඤ්‌ඤකත්‌ථෙරඅපදානවණ්‌ණනා
5. Ekasaññakattheraapadānavaṇṇanā
ඛණ්‌ඩො නාමාසි නාමෙනාතිආදිකං ආයස්‌මතො එකසඤ්‌ඤකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ කුලගෙහෙ නිබ්‌බත්‌තො විඤ්‌ඤුතං පත්‌තො රතනත්‌තයෙ පසන්‌නමානසො තස්‌ස සත්‌ථුනො ඛණ්‌ඩං නාම අග්‌ගසාවකං භික්‌ඛාය චරමානං දිස්‌වා සද්‌දහිත්‌වා පිණ්‌ඩපාතමදාසි. සො තෙන පුඤ්‌ඤකම්‌මෙන දෙවමනුස්‌සසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ සාවත්‌ථියං එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌තො සත්‌ථු ධම්‌මදෙසනං සුත්‌වා පටිලද්‌ධසද්‌ධො පබ්‌බජිත්‌වා නචිරස්‌සෙව අරහා අහොසි. සො එකදිවසං පිණ්‌ඩපාතස්‌ස සඤ්‌ඤං මනසිකරිත්‌වා පටිලද්‌ධවිසෙසත්‌තා එකසඤ්‌ඤකත්‌ථෙරොති පාකටො.
Khaṇḍonāmāsi nāmenātiādikaṃ āyasmato ekasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle kulagehe nibbatto viññutaṃ patto ratanattaye pasannamānaso tassa satthuno khaṇḍaṃ nāma aggasāvakaṃ bhikkhāya caramānaṃ disvā saddahitvā piṇḍapātamadāsi. So tena puññakammena devamanussasampattiyo anubhavitvā imasmiṃ buddhuppāde sāvatthiyaṃ ekasmiṃ kulagehe nibbatto viññutaṃ patto satthu dhammadesanaṃ sutvā paṭiladdhasaddho pabbajitvā nacirasseva arahā ahosi. So ekadivasaṃ piṇḍapātassa saññaṃ manasikaritvā paṭiladdhavisesattā ekasaññakattheroti pākaṭo.
18. සො අපරභාගෙ අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො ඛණ්‌ඩො නාමාසි නාමෙනාතිආදිමාහ. තත්‌ථ තස්‌ස අග්‌ගසාවකත්‌ථෙරස්‌ස කිලෙසානං ඛණ්‌ඩිතත්‌තා ඛණ්‌ඩොති නාමං. සෙසං සබ්‌බත්‌ථ උත්‌තානමෙවාති.
18. So aparabhāge attano pubbakammaṃ saritvā somanassajāto pubbacaritāpadānaṃ pakāsento khaṇḍo nāmāsi nāmenātiādimāha. Tattha tassa aggasāvakattherassa kilesānaṃ khaṇḍitattā khaṇḍoti nāmaṃ. Sesaṃ sabbattha uttānamevāti.
එකසඤ්‌ඤකත්‌ථෙරඅපදානවණ්‌ණනා සමත්‌තා.
Ekasaññakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 5. එකසඤ්‌ඤකත්‌ථෙරඅපදානං • 5. Ekasaññakattheraapadānaṃ
