| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. ஏகத்த²ம்பி⁴கத்தே²ரஅபதா³னவண்ணனா
2. Ekatthambhikattheraapadānavaṇṇanā
ஸித்³த⁴த்த²ஸ்ஸ ப⁴க³வதோதிஆதி³கங் ஆயஸ்மதோ ஏகத்த²ம்ப⁴தா³யகதே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே வனகம்மிகோ ஹுத்வா ஏகஸ்மிங் விப⁴வஸம்பன்னே குலே நிப்³ப³த்தோ. தஸ்மிங் ஸமயே ஸப்³பே³ ஸத்³தா⁴ பஸன்னா உபாஸகா ஏகச்ச²ந்தா³ ‘‘ப⁴க³வதோ உபட்டா²னஸாலங் கரோமா’’தி த³ப்³ப³ஸம்பா⁴ரத்தா²ய வனங் பவிஸித்வா தங் உபாஸகங் தி³ஸ்வா ‘‘அம்ஹாகங் ஏகங் த²ம்ப⁴ங் தே³தா²’’தி யாசிங்ஸு. ஸோ தங் பவத்திங் ஸுத்வா ‘‘தும்ஹே மா சிந்தயித்தா²’’தி தே ஸப்³பே³ உய்யோஜெத்வா ஏகங் ஸாரமயங் த²ம்ப⁴ங் க³ஹெத்வா ஸத்து² த³ஸ்ஸெத்வா தேஸங்யேவ அதா³ஸி. ஸோ தேனேவ ஸோமனஸ்ஸஜாதோ ததே³வ மூலங் கத்வா அஞ்ஞானி தா³னாதீ³னி புஞ்ஞானி கத்வா ததோ சுதோ தே³வலோகே நிப்³ப³த்தோ அபராபரங் ச²ஸு காமாவசரேஸு தி³ப்³ப³ஸம்பத்தியோ அனுப⁴வித்வா மனுஸ்ஸேஸு ச அக்³க³சக்கவத்திஸம்பத்திங் அனேகவாரங் அனுப⁴வித்வா அஸங்க்²யெய்யங் பதே³ஸரஜ்ஜஸம்பத்திஞ்ச அனுப⁴வித்வா இமஸ்மிங் பு³த்³து⁴ப்பாதே³ ஸத்³தா⁴ஸம்பன்னே ஏகஸ்மிங் குலே நிப்³ப³த்தோ மாதாபிதூஹி ஸத்³தி⁴ங் ப⁴க³வதோ ஸந்திகே த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜித்வா லத்³தூ⁴பஸம்பதோ³ கம்மட்டா²னங் க³ஹெத்வா மனஸிகரொந்தோ நசிரஸ்ஸேவ அரஹா அஹோஸி.
Siddhatthassa bhagavatotiādikaṃ āyasmato ekatthambhadāyakatherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle vanakammiko hutvā ekasmiṃ vibhavasampanne kule nibbatto. Tasmiṃ samaye sabbe saddhā pasannā upāsakā ekacchandā ‘‘bhagavato upaṭṭhānasālaṃ karomā’’ti dabbasambhāratthāya vanaṃ pavisitvā taṃ upāsakaṃ disvā ‘‘amhākaṃ ekaṃ thambhaṃ dethā’’ti yāciṃsu. So taṃ pavattiṃ sutvā ‘‘tumhe mā cintayitthā’’ti te sabbe uyyojetvā ekaṃ sāramayaṃ thambhaṃ gahetvā satthu dassetvā tesaṃyeva adāsi. So teneva somanassajāto tadeva mūlaṃ katvā aññāni dānādīni puññāni katvā tato cuto devaloke nibbatto aparāparaṃ chasu kāmāvacaresu dibbasampattiyo anubhavitvā manussesu ca aggacakkavattisampattiṃ anekavāraṃ anubhavitvā asaṅkhyeyyaṃ padesarajjasampattiñca anubhavitvā imasmiṃ buddhuppāde saddhāsampanne ekasmiṃ kule nibbatto mātāpitūhi saddhiṃ bhagavato santike dhammaṃ sutvā paṭiladdhasaddho pabbajitvā laddhūpasampado kammaṭṭhānaṃ gahetvā manasikaronto nacirasseva arahā ahosi.
13. ஸோ ஏவங் பத்தஅரஹத்தோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸித்³த⁴த்த²ஸ்ஸாதிஆதி³மாஹ. தத்த² ஸித்³த⁴த்த²ஸ்ஸ ப⁴க³வதோ ப⁴க்³யஸம்பன்னஸ்ஸ ஸம்மாஸம்பு³த்³த⁴ஸ்ஸ. மஹாபூக³க³ணோதி மஹாஉபாஸகஸமூஹோ அஹு அஹோஸீதி அத்தோ². ஸரணங் க³தா ச தே பு³த்³த⁴ந்தி ‘‘பு³த்³த⁴ங் ஸரண’’ந்தி க³தா ப⁴ஜிங்ஸு ஜானிங்ஸு வா தே உபாஸகா. ததா²க³தங் ஸத்³த³ஹந்தி பு³த்³த⁴கு³ணங் அத்தனோ சித்தஸந்தானே ட²பெந்தீதி அத்தோ².
13. So evaṃ pattaarahatto attano pubbakammaṃ saritvā somanassajāto pubbacaritāpadānaṃ pakāsento siddhatthassātiādimāha. Tattha siddhatthassa bhagavato bhagyasampannassa sammāsambuddhassa. Mahāpūgagaṇoti mahāupāsakasamūho ahu ahosīti attho. Saraṇaṃ gatā ca te buddhanti ‘‘buddhaṃ saraṇa’’nti gatā bhajiṃsu jāniṃsu vā te upāsakā. Tathāgataṃ saddahanti buddhaguṇaṃ attano cittasantāne ṭhapentīti attho.
14. ஸப்³பே³ ஸங்க³ம்ம மந்தெத்வாதி ஸப்³பே³ ஸமாக³ம்ம ஸன்னிபதித்வா மந்தெத்வா அஞ்ஞமஞ்ஞங் ஸஞ்ஞாபெத்வா ஏகச்ச²ந்தா³ ஹுத்வா மாளங் உபட்டா²னஸாலங் ஸத்து²னோ அத்தா²ய குப்³ப³ந்தி கரொந்தீதி அத்தோ². த³ப்³ப³ஸம்பா⁴ரேஸு ஏகத்த²ம்ப⁴ங் அலப⁴ந்தா ப்³ரஹாவனே மஹாவனே விசினந்தீதி ஸம்ப³ந்தோ⁴.
14.Sabbe saṅgamma mantetvāti sabbe samāgamma sannipatitvā mantetvā aññamaññaṃ saññāpetvā ekacchandā hutvā māḷaṃ upaṭṭhānasālaṃ satthuno atthāya kubbanti karontīti attho. Dabbasambhāresu ekatthambhaṃ alabhantā brahāvane mahāvane vicinantīti sambandho.
15. தேஹங் அரஞ்ஞே தி³ஸ்வானாதி அஹங் தே உபாஸகே அரஞ்ஞே தி³ஸ்வான க³ணங் ஸமூஹங் உபக³ம்ம ஸமீபங் க³ந்த்வா அஞ்ஜலிங் பக்³க³ஹெத்வான த³ஸங்கு³லிஸமோதா⁴னங் அஞ்ஜலிங் ஸிரஸி கத்வா அஹங் க³ணங் உபாஸகஸமூஹங் ‘‘தும்ஹே இமங் வனங் கிமத்த²ங் ஆக³தத்தா²’’தி ததா³ தஸ்மிங் காலே பரிபுச்சி²ந்தி ஸம்ப³ந்தோ⁴.
15.Tehaṃaraññe disvānāti ahaṃ te upāsake araññe disvāna gaṇaṃ samūhaṃ upagamma samīpaṃ gantvā añjaliṃ paggahetvāna dasaṅgulisamodhānaṃ añjaliṃ sirasi katvā ahaṃ gaṇaṃ upāsakasamūhaṃ ‘‘tumhe imaṃ vanaṃ kimatthaṃ āgatatthā’’ti tadā tasmiṃ kāle paripucchinti sambandho.
16. தே ஸீலவந்தோ உபாஸகா மே மயா புட்டா² ‘‘மாளங் மயங் கத்துகாமா ஹுத்வா ஏகத்த²ம்போ⁴ அம்ஹேஹி ந லப்³ப⁴தீ’’தி வியாகங்ஸு விஸேஸேன கத²யிங்ஸூதி ஸம்ப³ந்தோ⁴.
16.Te sīlavanto upāsakā me mayā puṭṭhā ‘‘māḷaṃ mayaṃ kattukāmā hutvā ekatthambho amhehi na labbhatī’’ti viyākaṃsu visesena kathayiṃsūti sambandho.
17. மமங் மய்ஹங் ஏகத்த²ம்ப⁴ங் தே³த², அஹங் தங் த³ஸ்ஸாமி ஸத்து²னோ ஸந்திகங் அஹங் த²ம்ப⁴ங் ஆஹரிஸ்ஸாமி, தே ப⁴வந்தோ த²ம்ப⁴ஹரணே அப்பொஸ்ஸுக்கா உஸ்ஸாஹரஹிதா ப⁴வந்தூதி ஸம்ப³ந்தோ⁴.
17.Mamaṃ mayhaṃ ekatthambhaṃ detha, ahaṃ taṃ dassāmi satthuno santikaṃ ahaṃ thambhaṃ āharissāmi, te bhavanto thambhaharaṇe appossukkā ussāharahitā bhavantūti sambandho.
24. யங் யங் யோனுபபஜ்ஜாமீதி யங் யங் யோனிங் தே³வத்தங் அத² மானுஸங் உபக³ச்சா²மீதி அத்தோ². பு⁴ம்மத்தே² வா உபயோக³வசனங், யஸ்மிங் யஸ்மிங் தே³வலோகே வா மனுஸ்ஸலோகே வாதி அத்தோ². ஸேஸங் உத்தானத்த²மேவாதி.
24.Yaṃ yaṃ yonupapajjāmīti yaṃ yaṃ yoniṃ devattaṃ atha mānusaṃ upagacchāmīti attho. Bhummatthe vā upayogavacanaṃ, yasmiṃ yasmiṃ devaloke vā manussaloke vāti attho. Sesaṃ uttānatthamevāti.
ஏகத்த²ம்பி⁴கத்தே²ரஅபதா³னவண்ணனா ஸமத்தா.
Ekatthambhikattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. ஏகத்த²ம்பி⁴கத்தே²ரஅபதா³னங் • 2. Ekatthambhikattheraapadānaṃ
