| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২. একত্থম্ভিকত্থেরঅপদানৰণ্ণনা
2. Ekatthambhikattheraapadānavaṇṇanā
সিদ্ধত্থস্স ভগৰতোতিআদিকং আযস্মতো একত্থম্ভদাযকথেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে ৰনকম্মিকো হুত্ৰা একস্মিং ৰিভৰসম্পন্নে কুলে নিব্বত্তো। তস্মিং সমযে সব্বে সদ্ধা পসন্না উপাসকা একচ্ছন্দা ‘‘ভগৰতো উপট্ঠানসালং করোমা’’তি দব্বসম্ভারত্থায ৰনং পৰিসিত্ৰা তং উপাসকং দিস্ৰা ‘‘অম্হাকং একং থম্ভং দেথা’’তি যাচিংসু। সো তং পৰত্তিং সুত্ৰা ‘‘তুম্হে মা চিন্তযিত্থা’’তি তে সব্বে উয্যোজেত্ৰা একং সারমযং থম্ভং গহেত্ৰা সত্থু দস্সেত্ৰা তেসংযেৰ অদাসি। সো তেনেৰ সোমনস্সজাতো তদেৰ মূলং কত্ৰা অঞ্ঞানি দানাদীনি পুঞ্ঞানি কত্ৰা ততো চুতো দেৰলোকে নিব্বত্তো অপরাপরং ছসু কামাৰচরেসু দিব্বসম্পত্তিযো অনুভৰিত্ৰা মনুস্সেসু চ অগ্গচক্কৰত্তিসম্পত্তিং অনেকৰারং অনুভৰিত্ৰা অসঙ্খ্যেয্যং পদেসরজ্জসম্পত্তিঞ্চ অনুভৰিত্ৰা ইমস্মিং বুদ্ধুপ্পাদে সদ্ধাসম্পন্নে একস্মিং কুলে নিব্বত্তো মাতাপিতূহি সদ্ধিং ভগৰতো সন্তিকে ধম্মং সুত্ৰা পটিলদ্ধসদ্ধো পব্বজিত্ৰা লদ্ধূপসম্পদো কম্মট্ঠানং গহেত্ৰা মনসিকরোন্তো নচিরস্সেৰ অরহা অহোসি।
Siddhatthassa bhagavatotiādikaṃ āyasmato ekatthambhadāyakatherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle vanakammiko hutvā ekasmiṃ vibhavasampanne kule nibbatto. Tasmiṃ samaye sabbe saddhā pasannā upāsakā ekacchandā ‘‘bhagavato upaṭṭhānasālaṃ karomā’’ti dabbasambhāratthāya vanaṃ pavisitvā taṃ upāsakaṃ disvā ‘‘amhākaṃ ekaṃ thambhaṃ dethā’’ti yāciṃsu. So taṃ pavattiṃ sutvā ‘‘tumhe mā cintayitthā’’ti te sabbe uyyojetvā ekaṃ sāramayaṃ thambhaṃ gahetvā satthu dassetvā tesaṃyeva adāsi. So teneva somanassajāto tadeva mūlaṃ katvā aññāni dānādīni puññāni katvā tato cuto devaloke nibbatto aparāparaṃ chasu kāmāvacaresu dibbasampattiyo anubhavitvā manussesu ca aggacakkavattisampattiṃ anekavāraṃ anubhavitvā asaṅkhyeyyaṃ padesarajjasampattiñca anubhavitvā imasmiṃ buddhuppāde saddhāsampanne ekasmiṃ kule nibbatto mātāpitūhi saddhiṃ bhagavato santike dhammaṃ sutvā paṭiladdhasaddho pabbajitvā laddhūpasampado kammaṭṭhānaṃ gahetvā manasikaronto nacirasseva arahā ahosi.
১৩. সো এৰং পত্তঅরহত্তো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সিদ্ধত্থস্সাতিআদিমাহ। তত্থ সিদ্ধত্থস্স ভগৰতো ভগ্যসম্পন্নস্স সম্মাসম্বুদ্ধস্স। মহাপূগগণোতি মহাউপাসকসমূহো অহু অহোসীতি অত্থো। সরণং গতা চ তে বুদ্ধন্তি ‘‘বুদ্ধং সরণ’’ন্তি গতা ভজিংসু জানিংসু ৰা তে উপাসকা। তথাগতং সদ্দহন্তি বুদ্ধগুণং অত্তনো চিত্তসন্তানে ঠপেন্তীতি অত্থো।
13. So evaṃ pattaarahatto attano pubbakammaṃ saritvā somanassajāto pubbacaritāpadānaṃ pakāsento siddhatthassātiādimāha. Tattha siddhatthassa bhagavato bhagyasampannassa sammāsambuddhassa. Mahāpūgagaṇoti mahāupāsakasamūho ahu ahosīti attho. Saraṇaṃ gatā ca te buddhanti ‘‘buddhaṃ saraṇa’’nti gatā bhajiṃsu jāniṃsu vā te upāsakā. Tathāgataṃ saddahanti buddhaguṇaṃ attano cittasantāne ṭhapentīti attho.
১৪. সব্বে সঙ্গম্ম মন্তেত্ৰাতি সব্বে সমাগম্ম সন্নিপতিত্ৰা মন্তেত্ৰা অঞ্ঞমঞ্ঞং সঞ্ঞাপেত্ৰা একচ্ছন্দা হুত্ৰা মাল়ং উপট্ঠানসালং সত্থুনো অত্থায কুব্বন্তি করোন্তীতি অত্থো। দব্বসম্ভারেসু একত্থম্ভং অলভন্তা ব্রহাৰনে মহাৰনে ৰিচিনন্তীতি সম্বন্ধো।
14.Sabbe saṅgamma mantetvāti sabbe samāgamma sannipatitvā mantetvā aññamaññaṃ saññāpetvā ekacchandā hutvā māḷaṃ upaṭṭhānasālaṃ satthuno atthāya kubbanti karontīti attho. Dabbasambhāresu ekatthambhaṃ alabhantā brahāvane mahāvane vicinantīti sambandho.
১৫. তেহং অরঞ্ঞে দিস্ৰানাতি অহং তে উপাসকে অরঞ্ঞে দিস্ৰান গণং সমূহং উপগম্ম সমীপং গন্ত্ৰা অঞ্জলিং পগ্গহেত্ৰান দসঙ্গুলিসমোধানং অঞ্জলিং সিরসি কত্ৰা অহং গণং উপাসকসমূহং ‘‘তুম্হে ইমং ৰনং কিমত্থং আগতত্থা’’তি তদা তস্মিং কালে পরিপুচ্ছিন্তি সম্বন্ধো।
15.Tehaṃaraññe disvānāti ahaṃ te upāsake araññe disvāna gaṇaṃ samūhaṃ upagamma samīpaṃ gantvā añjaliṃ paggahetvāna dasaṅgulisamodhānaṃ añjaliṃ sirasi katvā ahaṃ gaṇaṃ upāsakasamūhaṃ ‘‘tumhe imaṃ vanaṃ kimatthaṃ āgatatthā’’ti tadā tasmiṃ kāle paripucchinti sambandho.
১৬. তে সীলৰন্তো উপাসকা মে মযা পুট্ঠা ‘‘মাল়ং মযং কত্তুকামা হুত্ৰা একত্থম্ভো অম্হেহি ন লব্ভতী’’তি ৰিযাকংসু ৰিসেসেন কথযিংসূতি সম্বন্ধো।
16.Te sīlavanto upāsakā me mayā puṭṭhā ‘‘māḷaṃ mayaṃ kattukāmā hutvā ekatthambho amhehi na labbhatī’’ti viyākaṃsu visesena kathayiṃsūti sambandho.
১৭. মমং ময্হং একত্থম্ভং দেথ, অহং তং দস্সামি সত্থুনো সন্তিকং অহং থম্ভং আহরিস্সামি, তে ভৰন্তো থম্ভহরণে অপ্পোস্সুক্কা উস্সাহরহিতা ভৰন্তূতি সম্বন্ধো।
17.Mamaṃ mayhaṃ ekatthambhaṃ detha, ahaṃ taṃ dassāmi satthuno santikaṃ ahaṃ thambhaṃ āharissāmi, te bhavanto thambhaharaṇe appossukkā ussāharahitā bhavantūti sambandho.
২৪. যং যং যোনুপপজ্জামীতি যং যং যোনিং দেৰত্তং অথ মানুসং উপগচ্ছামীতি অত্থো। ভুম্মত্থে ৰা উপযোগৰচনং, যস্মিং যস্মিং দেৰলোকে ৰা মনুস্সলোকে ৰাতি অত্থো। সেসং উত্তানত্থমেৰাতি।
24.Yaṃ yaṃ yonupapajjāmīti yaṃ yaṃ yoniṃ devattaṃ atha mānusaṃ upagacchāmīti attho. Bhummatthe vā upayogavacanaṃ, yasmiṃ yasmiṃ devaloke vā manussaloke vāti attho. Sesaṃ uttānatthamevāti.
একত্থম্ভিকত্থেরঅপদানৰণ্ণনা সমত্তা।
Ekatthambhikattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ২. একত্থম্ভিকত্থেরঅপদানং • 2. Ekatthambhikattheraapadānaṃ
