| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
ஏகவித⁴ரூபஸங்க³ஹோ
Ekavidharūpasaṅgaho
இதா³னி தங் வித்தா²ரதோ த³ஸ்ஸேதுங் ஏகவிதா⁴தீ³ஹி ஏகாத³ஸஹி ஸங்க³ஹேஹி மாதிகங் ட²பெந்தோ ஸப்³ப³ங் ரூபங் ந ஹேதூதிஆதி³மாஹ.
Idāni taṃ vitthārato dassetuṃ ekavidhādīhi ekādasahi saṅgahehi mātikaṃ ṭhapento sabbaṃ rūpaṃ na hetūtiādimāha.
தத்த² ‘ஸப்³ப³ங் ரூப’ந்தி இத³ங் பத³ங் ‘ஸப்³ப³ங் ரூபங் ந ஹேது’ ‘ஸப்³ப³ங் ரூபங் அஹேதுக’ந்தி ஏவங் ஸப்³ப³பதே³ஹி ஸத்³தி⁴ங் யோஜேதப்³ப³ங். ஸப்³பா³னேவ சேதானி ‘ந ஹேதூ’திஆதீ³னி தேசத்தாலீஸபதா³னி உத்³தி³ட்டா²னி. தேஸு படிபாடியா சத்தாலீஸபதா³னி மாதிகதோ க³ஹெத்வா ட²பிதானி, அவஸானே தீணி மாதிகாமுத்தகானீதி. ஏவங் தாவ பட²மே ஸங்க³ஹே பாளிவவத்தா²னமேவ வேதி³தப்³ப³ங். ததா² து³தியஸங்க³ஹாதீ³ஸு.
Tattha ‘sabbaṃ rūpa’nti idaṃ padaṃ ‘sabbaṃ rūpaṃ na hetu’ ‘sabbaṃ rūpaṃ ahetuka’nti evaṃ sabbapadehi saddhiṃ yojetabbaṃ. Sabbāneva cetāni ‘na hetū’tiādīni tecattālīsapadāni uddiṭṭhāni. Tesu paṭipāṭiyā cattālīsapadāni mātikato gahetvā ṭhapitāni, avasāne tīṇi mātikāmuttakānīti. Evaṃ tāva paṭhame saṅgahe pāḷivavatthānameva veditabbaṃ. Tathā dutiyasaṅgahādīsu.
