| Library / Tipiṭaka / তিপিটক • Tipiṭaka / ধম্মসঙ্গণি-অট্ঠকথা • Dhammasaṅgaṇi-aṭṭhakathā |
একৰিধরূপসঙ্গহো
Ekavidharūpasaṅgaho
ইদানি তং ৰিত্থারতো দস্সেতুং একৰিধাদীহি একাদসহি সঙ্গহেহি মাতিকং ঠপেন্তো সব্বং রূপং ন হেতূতিআদিমাহ।
Idāni taṃ vitthārato dassetuṃ ekavidhādīhi ekādasahi saṅgahehi mātikaṃ ṭhapento sabbaṃ rūpaṃ na hetūtiādimāha.
তত্থ ‘সব্বং রূপ’ন্তি ইদং পদং ‘সব্বং রূপং ন হেতু’ ‘সব্বং রূপং অহেতুক’ন্তি এৰং সব্বপদেহি সদ্ধিং যোজেতব্বং। সব্বানেৰ চেতানি ‘ন হেতূ’তিআদীনি তেচত্তালীসপদানি উদ্দিট্ঠানি। তেসু পটিপাটিযা চত্তালীসপদানি মাতিকতো গহেত্ৰা ঠপিতানি, অৰসানে তীণি মাতিকামুত্তকানীতি। এৰং তাৰ পঠমে সঙ্গহে পাল়িৰৰত্থানমেৰ ৰেদিতব্বং। তথা দুতিযসঙ্গহাদীসু।
Tattha ‘sabbaṃ rūpa’nti idaṃ padaṃ ‘sabbaṃ rūpaṃ na hetu’ ‘sabbaṃ rūpaṃ ahetuka’nti evaṃ sabbapadehi saddhiṃ yojetabbaṃ. Sabbāneva cetāni ‘na hetū’tiādīni tecattālīsapadāni uddiṭṭhāni. Tesu paṭipāṭiyā cattālīsapadāni mātikato gahetvā ṭhapitāni, avasāne tīṇi mātikāmuttakānīti. Evaṃ tāva paṭhame saṅgahe pāḷivavatthānameva veditabbaṃ. Tathā dutiyasaṅgahādīsu.
