Library / Tipiṭaka / ติปิฎก • Tipiṭaka / อปทานปาฬิ • Apadānapāḷi

    ๔๔. เอกวิหาริวโคฺค

    44. Ekavihārivaggo

    ๑. เอกวิหาริกเตฺถรอปทานํ

    1. Ekavihārikattheraapadānaṃ

    ๑.

    1.

    ‘‘อิมมฺหิ ภทฺทเก กเปฺป, พฺรหฺมพนฺธุ มหายโส;

    ‘‘Imamhi bhaddake kappe, brahmabandhu mahāyaso;

    กสฺสโป นาม โคเตฺตน, อุปฺปชฺชิ วทตํ วโรฯ

    Kassapo nāma gottena, uppajji vadataṃ varo.

    ๒.

    2.

    ‘‘นิปฺปปโญฺจ นิราลโมฺพ, อากาสสมมานโส;

    ‘‘Nippapañco nirālambo, ākāsasamamānaso;

    สุญฺญตาพหุโล ตาที, อนิมิตฺตรโต วสีฯ

    Suññatābahulo tādī, animittarato vasī.

    ๓.

    3.

    ‘‘อสงฺคจิโตฺต นิเกฺลโส 1, อสํสโฎฺฐ กุเล คเณ;

    ‘‘Asaṅgacitto nikleso 2, asaṃsaṭṭho kule gaṇe;

    มหาการุณิโก วีโร, วินโยปายโกวิโทฯ

    Mahākāruṇiko vīro, vinayopāyakovido.

    ๔.

    4.

    ‘‘อุยฺยุโตฺต ปรกิเจฺจสุ, วินยโนฺต สเทวเก;

    ‘‘Uyyutto parakiccesu, vinayanto sadevake;

    นิพฺพานคมนํ มคฺคํ, คติํ ปงฺกวิโสสนํฯ

    Nibbānagamanaṃ maggaṃ, gatiṃ paṅkavisosanaṃ.

    ๕.

    5.

    ‘‘อมตํ ปรมสฺสาทํ, ชรามจฺจุนิวารณํ;

    ‘‘Amataṃ paramassādaṃ, jarāmaccunivāraṇaṃ;

    มหาปริสมเชฺฌ โส, นิสิโนฺน โลกตารโกฯ

    Mahāparisamajjhe so, nisinno lokatārako.

    ๖.

    6.

    ‘‘กรวีกรุโต 3 นาโถ, พฺรหฺมโฆโส ตถาคโต;

    ‘‘Karavīkaruto 4 nātho, brahmaghoso tathāgato;

    อุทฺธรโนฺต มหาทุคฺคา, วิปฺปนเฎฺฐ อนายเกฯ

    Uddharanto mahāduggā, vippanaṭṭhe anāyake.

    ๗.

    7.

    ‘‘เทเสโนฺต วิรชํ ธมฺมํ, ทิโฎฺฐ เม โลกนายโก;

    ‘‘Desento virajaṃ dhammaṃ, diṭṭho me lokanāyako;

    ตสฺส ธมฺมํ สุณิตฺวาน, ปพฺพชิํ อนคาริยํฯ

    Tassa dhammaṃ suṇitvāna, pabbajiṃ anagāriyaṃ.

    ๘.

    8.

    ‘‘ปพฺพชิตฺวา ตทาปาหํ, จิเนฺตโนฺต ชินสาสนํ;

    ‘‘Pabbajitvā tadāpāhaṃ, cintento jinasāsanaṃ;

    เอกโกว วเน รเมฺม, วสิํ สํสคฺคปีฬิโตฯ

    Ekakova vane ramme, vasiṃ saṃsaggapīḷito.

    ๙.

    9.

    ‘‘สกฺกายวูปกาโส เม, เหตุภูโต มมาภวี 5;

    ‘‘Sakkāyavūpakāso me, hetubhūto mamābhavī 6;

    มนโส วูปกาสสฺส, สํสคฺคภยทสฺสิโนฯ

    Manaso vūpakāsassa, saṃsaggabhayadassino.

    ๑๐.

    10.

    ‘‘กิเลสา ฌาปิตา มยฺหํ, ภวา สเพฺพ สมูหตา;

    ‘‘Kilesā jhāpitā mayhaṃ, bhavā sabbe samūhatā;

    นาโคว พนฺธนํ เฉตฺวา, วิหรามิ อนาสโวฯ

    Nāgova bandhanaṃ chetvā, viharāmi anāsavo.

    ๑๑.

    11.

    ‘‘สฺวาคตํ วต เม อาสิ, มม พุทฺธสฺส สนฺติเก;

    ‘‘Svāgataṃ vata me āsi, mama buddhassa santike;

    ติโสฺส วิชฺชา อนุปฺปตฺตา, กตํ พุทฺธสฺส สาสนํฯ

    Tisso vijjā anuppattā, kataṃ buddhassa sāsanaṃ.

    ๑๒.

    12.

    ‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;

    ‘‘Paṭisambhidā catasso, vimokkhāpi ca aṭṭhime;

    ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

    Chaḷabhiññā sacchikatā, kataṃ buddhassa sāsanaṃ’’.

    อิตฺถํ สุทํ อายสฺมา เอกวิหาริโก เถโร อิมา คาถาโย

    Itthaṃ sudaṃ āyasmā ekavihāriko thero imā gāthāyo

    อภาสิตฺถาติฯ

    Abhāsitthāti.

    เอกวิหาริกเตฺถรสฺสาปทานํ ปฐมํฯ

    Ekavihārikattherassāpadānaṃ paṭhamaṃ.




    Next: ๒. เอกสงฺขิยเตฺถรอปทานํ • 2. Ekasaṅkhiyattheraapadānaṃ




    Footnotes:
    1. นิเลฺลโป (สฺยา. ก.)
    2. nillepo (syā. ka.)
    3. กรวีกรุโท (สฺยา. ปี. ก.)
    4. karavīkarudo (syā. pī. ka.)
    5. มมาคมี (สฺยา. ปี.)
    6. mamāgamī (syā. pī.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑-๖๐. สกิํสมฺมชฺชกเตฺถรอปทานาทิวณฺณนา • 1-60. Sakiṃsammajjakattheraapadānādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact