| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஏகூனஸத்ததித்³விஸதசதுக்ககதா²வண்ணனா
Ekūnasattatidvisatacatukkakathāvaṇṇanā
59-60. அக்கா²யிதனிமித்தா அக்கா²யித-ஸத்³தே³ன வுத்தா உத்தரபத³லோபேனாதி ஆஹ ‘‘ஸோணஸிங்கா³லாதீ³ஹி அக்கா²யிதனிமித்த’’ந்தி. அக்கா²யிதங் நிமித்தங் யஸ்ஸா ஸா அக்கா²யிதனிமித்தா. ‘‘ஜாக³ரந்தி’’ந்திஆதி³ விஸேஸனரஹிதத்தா ‘‘ஸுத்³தி⁴கசதுக்கானீ’’தி வுத்தங்.
59-60. Akkhāyitanimittā akkhāyita-saddena vuttā uttarapadalopenāti āha ‘‘soṇasiṅgālādīhi akkhāyitanimitta’’nti. Akkhāyitaṃ nimittaṃ yassā sā akkhāyitanimittā. ‘‘Jāgaranti’’ntiādi visesanarahitattā ‘‘suddhikacatukkānī’’ti vuttaṃ.
ஸமானாசரியகா தே²ராதி ஏகாசரியஸ்ஸ பாட²கந்தேவாஸிகா. மஹாப⁴யேதி ப்³ராஹ்மணதிஸ்ஸப⁴யே. க³ங்கா³ய அபரபா⁴கோ³ அபரக³ங்க³ங். வத ரேதி க³ரஹத்தே² நிபாதோ. அவிஸ்ஸஜ்ஜந்தேன கிங் கத்தப்³ப³ந்தி ஆஹ ‘‘நிச்சகாலங் ஸோதப்³ப³’’ந்திஆதி³. ஏவங் வினயக³ருகானந்தி இமினா உபரி தேஹி வுச்சமானவினிச்ச²யஸ்ஸ க³ருகரணீயதாய காரணங் வுத்தங். ஸப்³ப³ங் பரியாதி³யித்வாதி ஸப்³ப³ங் பாராஜிகக்கெ²த்தங் அனவஸேஸதோ க³ஹெத்வா. ஸோதங் சி²ந்தி³த்வாதி பாராஜிகக்கெ²த்தே வீதிக்கமஸோதங் சி²ந்தி³த்வா. அபஞ்ஞத்தபா⁴வதோ யுத்திஅபா⁴வதோ ச ‘‘பாராஜிகச்சா²யா பனெத்த² ந தி³ஸ்ஸதீ’’தி வுத்தங். கேசி பன ‘‘உபட்³ட⁴க்கா²யிதபா⁴வஸ்ஸ து³ப்³பி³னிச்ச²யத்தா தத்த² பாராஜிகங் ந பஞ்ஞபேஸீ’’தி வத³ந்தி, தங் அகாரணங், ந ச து³ப்³பி³னிச்ச²யதா அபஞ்ஞத்திகாரணங் யேபு⁴ய்யக்கா²யிதாதீ³ஸுபி து³ப்³பி³னிச்ச²யபா⁴வஸ்ஸ ஸமானத்தா. உபட்³ட⁴க்கா²யிததோ ஹி கிஞ்சிதே³வ அதி⁴கங் ஊனங் வா யதி³ கா²யிதங் ஸியா, தம்பி யேபு⁴ய்யேன கா²யிதங் அக்கா²யிதந்தி ஸங்க்²யங் க³ச்ச²தீதி உபட்³ட⁴க்கா²யிதமிவ யேபு⁴ய்யக்கா²யிதாதீ³னிபி து³ப்³பி³னிச்ச²யானேவ. அபிச உபட்³ட⁴க்கா²யிதங் யதி³ ஸபா⁴வதோ பாராஜிகக்கெ²த்தங் ஸியா, ந தத்த² ப⁴க³வா து³ப்³பி³னிச்ச²யந்தி பாராஜிகங் ந பஞ்ஞபேதி.
Samānācariyakā therāti ekācariyassa pāṭhakantevāsikā. Mahābhayeti brāhmaṇatissabhaye. Gaṅgāya aparabhāgo aparagaṅgaṃ. Vata reti garahatthe nipāto. Avissajjantena kiṃ kattabbanti āha ‘‘niccakālaṃ sotabba’’ntiādi. Evaṃ vinayagarukānanti iminā upari tehi vuccamānavinicchayassa garukaraṇīyatāya kāraṇaṃ vuttaṃ. Sabbaṃ pariyādiyitvāti sabbaṃ pārājikakkhettaṃ anavasesato gahetvā. Sotaṃ chinditvāti pārājikakkhette vītikkamasotaṃ chinditvā. Apaññattabhāvato yuttiabhāvato ca ‘‘pārājikacchāyā panettha na dissatī’’ti vuttaṃ. Keci pana ‘‘upaḍḍhakkhāyitabhāvassa dubbinicchayattā tattha pārājikaṃ na paññapesī’’ti vadanti, taṃ akāraṇaṃ, na ca dubbinicchayatā apaññattikāraṇaṃ yebhuyyakkhāyitādīsupi dubbinicchayabhāvassa samānattā. Upaḍḍhakkhāyitato hi kiñcideva adhikaṃ ūnaṃ vā yadi khāyitaṃ siyā, tampi yebhuyyena khāyitaṃ akkhāyitanti saṅkhyaṃ gacchatīti upaḍḍhakkhāyitamiva yebhuyyakkhāyitādīnipi dubbinicchayāneva. Apica upaḍḍhakkhāyitaṃ yadi sabhāvato pārājikakkhettaṃ siyā, na tattha bhagavā dubbinicchayanti pārājikaṃ na paññapeti.
இதா³னி தே²ரேன கதவினிச்ச²யமேவ உபத்த²ம்பெ⁴த்வா அபரம்பி தத்த² காரணங் த³ஸ்ஸெந்தோ ‘‘அபிசா’’திஆதி³மாஹ. நிமித்தே அப்பமத்திகாபி மங்ஸராஜி ஸசே அவஸிட்டா² ஹோதி, தங் யேபு⁴ய்யக்கா²யிதமேவ ஹோதி, ததோ பரங் பன ஸப்³ப³ஸோ கா²யிதே நிமித்தே து³க்கடமேவாதி த³ஸ்ஸெந்தோ ஆஹ ‘‘ததோ பரங் து²ல்லச்சயங் நத்தீ²’’தி. அத² வா யேபு⁴ய்யேன கா²யிதங் நாம வச்சமக்³க³பஸ்ஸாவமக்³க³முகா²னங் சதூஸு கொட்டா²ஸேஸு த்³வே கொட்டா²ஸே அதிக்கம்ம யாவ ததியகொட்டா²ஸஸ்ஸ பரியோஸானா கா²தி³தங், ததோ பரங் பன ததியகொட்டா²ஸங் அதிக்கம்ம யாவ சதுத்த²கொட்டா²ஸஸ்ஸ பரியோஸானா கா²தி³தங் து³க்கடவத்தூ²தி வேதி³தப்³ப³ங். மதஸரீரஸ்மிங்யேவ வேதி³தப்³ப³ந்தி ‘‘மதங் யேபு⁴ய்யேன அக்கா²யித’’ந்திஆதி³வசனதோ. ‘‘யதி³பி நிமித்தங் ஸப்³ப³ஸோ கா²யிதந்திஆதி³ ஸப்³ப³ங் ஜீவமானகஸரீரமேவ ஸந்தா⁴ய வுத்த’’ந்தி மஹாக³ண்டி²பதே³ வுத்தங். கேனசி பன ‘‘தங் வீமங்ஸித்வா க³ஹேதப்³ப³’’ந்தி லிகி²தங். கிமெத்த² வீமங்ஸிதப்³ப³ங் ஜீவமானகஸரீரஸ்ஸேவ அதி⁴கதத்தா மதஸரீரே லப்³ப⁴மானஸ்ஸ வினிச்ச²யஸ்ஸ விஸுங் வக்க²மானத்தா ச. தேனேவ மாதிகாட்ட²கதா²யம்பி (கங்கா²॰ அட்ட²॰ பட²மபாராஜிகவண்ணனா) –
Idāni therena katavinicchayameva upatthambhetvā aparampi tattha kāraṇaṃ dassento ‘‘apicā’’tiādimāha. Nimitte appamattikāpi maṃsarāji sace avasiṭṭhā hoti, taṃ yebhuyyakkhāyitameva hoti, tato paraṃ pana sabbaso khāyite nimitte dukkaṭamevāti dassento āha ‘‘tato paraṃ thullaccayaṃ natthī’’ti. Atha vā yebhuyyena khāyitaṃ nāma vaccamaggapassāvamaggamukhānaṃ catūsu koṭṭhāsesu dve koṭṭhāse atikkamma yāva tatiyakoṭṭhāsassa pariyosānā khāditaṃ, tato paraṃ pana tatiyakoṭṭhāsaṃ atikkamma yāva catutthakoṭṭhāsassa pariyosānā khāditaṃ dukkaṭavatthūti veditabbaṃ. Matasarīrasmiṃyeva veditabbanti ‘‘mataṃ yebhuyyena akkhāyita’’ntiādivacanato. ‘‘Yadipi nimittaṃ sabbaso khāyitantiādi sabbaṃ jīvamānakasarīrameva sandhāya vutta’’nti mahāgaṇṭhipade vuttaṃ. Kenaci pana ‘‘taṃ vīmaṃsitvā gahetabba’’nti likhitaṃ. Kimettha vīmaṃsitabbaṃ jīvamānakasarīrasseva adhikatattā matasarīre labbhamānassa vinicchayassa visuṃ vakkhamānattā ca. Teneva mātikāṭṭhakathāyampi (kaṅkhā. aṭṭha. paṭhamapārājikavaṇṇanā) –
‘‘ஜீவமானகஸரீரஸ்ஸ வுத்தப்பகாரே மக்³கே³ ஸசேபி தசாதீ³னி அனவஸேஸெத்வா ஸப்³ப³ஸோ சி²ன்னே நிமித்தஸண்டா²னமத்தங் பஞ்ஞாயதி, தத்த² அந்தமஸோ அங்க³ஜாதே உட்டி²கங் அனட்ட²காயப்பஸாத³ங் பீளகங் வா சம்மகீ²லங் வா பவேஸெந்தஸ்ஸபி ஸேவனசித்தே ஸதி பாராஜிகங், நட்ட²காயப்பஸாத³ங் ஸுக்க²பீளகங் வா மதசம்மங் வா லோமங் வா பவேஸெந்தஸ்ஸ து³க்கடங். ஸசே நிமித்தஸண்டா²னமத்தம்பி அனவஸேஸெத்வா ஸப்³ப³ஸோ மக்³கோ³ உப்பாடிதோ, தத்த² உபக்கமதோ வணஸங்கே²பவஸேன து²ல்லச்சய’’ந்தி –
‘‘Jīvamānakasarīrassa vuttappakāre magge sacepi tacādīni anavasesetvā sabbaso chinne nimittasaṇṭhānamattaṃ paññāyati, tattha antamaso aṅgajāte uṭṭhikaṃ anaṭṭhakāyappasādaṃ pīḷakaṃ vā cammakhīlaṃ vā pavesentassapi sevanacitte sati pārājikaṃ, naṭṭhakāyappasādaṃ sukkhapīḷakaṃ vā matacammaṃ vā lomaṃ vā pavesentassa dukkaṭaṃ. Sace nimittasaṇṭhānamattampi anavasesetvā sabbaso maggo uppāṭito, tattha upakkamato vaṇasaṅkhepavasena thullaccaya’’nti –
ஜீவமானகஸரீரஸ்மிங்யேவ யதா²வுத்தவினிச்ச²யோ த³ஸ்ஸிதோ.
Jīvamānakasarīrasmiṃyeva yathāvuttavinicchayo dassito.
ஸப்³ப³ஸோ கா²யிதந்தி நிமித்தப்பதே³ஸே ப³ஹிட்டி²தங் ச²விசம்மங் ஸப்³ப³ஸோ சி²ந்தி³த்வா ஸோணஸிங்கா³லாதீ³ஹி கா²யிதஸதி³ஸங் கதங். தேனேவாஹ ‘‘ச²விசம்மங் நத்தீ²’’தி. நிமித்தமங்ஸஸ்ஸ பன அப்³ப⁴ந்தரே ச²விசம்மஸ்ஸ ச விஜ்ஜமானத்தா ‘‘நிமித்தஸண்டா²னங் பஞ்ஞாயதீ’’தி வுத்தங். தேனேவாஹ ‘‘பவேஸனங் ஜாயதீ’’தி. நிமித்தஸண்டா²னங் பன அனவஸேஸெத்வாதி நிமித்தாகாரேன டி²தங் ச²விசம்மமங்ஸாதி³ங் அனவஸேஸெத்வா. ஜீவமானகஸரீரே லப்³ப⁴மானவிஸேஸங் த³ஸ்ஸெத்வா இதா³னி மதஸரீரே லப்³ப⁴மானவிஸேஸங் த³ஸ்ஸெந்தோ ஆஹ ‘‘மதஸரீரே பனா’’திஆதி³.
Sabbaso khāyitanti nimittappadese bahiṭṭhitaṃ chavicammaṃ sabbaso chinditvā soṇasiṅgālādīhi khāyitasadisaṃ kataṃ. Tenevāha ‘‘chavicammaṃ natthī’’ti. Nimittamaṃsassa pana abbhantare chavicammassa ca vijjamānattā ‘‘nimittasaṇṭhānaṃ paññāyatī’’ti vuttaṃ. Tenevāha ‘‘pavesanaṃ jāyatī’’ti. Nimittasaṇṭhānaṃ panaanavasesetvāti nimittākārena ṭhitaṃ chavicammamaṃsādiṃ anavasesetvā. Jīvamānakasarīre labbhamānavisesaṃ dassetvā idāni matasarīre labbhamānavisesaṃ dassento āha ‘‘matasarīre panā’’tiādi.
மனுஸ்ஸானங் ஜீவமானகஸரீரேதிஆதி³னா பன அக்கி²ஆத³யோபி வணஸங்க³ஹங் க³ச்ச²ந்தீதி வணேன ஏகபரிச்சே²த³ங் கத்வா அக்கி²ஆதீ³ஸுபி து²ல்லச்சயங் வுத்தங். தேஸஞ்ச வணஸங்க³ஹோ ‘‘நவத்³வாரோ மஹாவணோ’’தி (மி॰ ப॰ 2.6.1) ஏவமாதி³ஸுத்தானுஸாரேன வேதி³தப்³போ³. திரச்சா²னக³தானங் அக்கி²கண்ணவணேஸு து³க்கடங் பன அட்ட²கதா²ப்பமாணேன க³ஹேதப்³ப³ங். யதா² ஹி மனுஸ்ஸாமனுஸ்ஸதிரச்சா²னக³தேஸு வச்சமக்³க³பஸ்ஸாவமக்³க³முகா²னங் பாராஜிகவத்து²பா⁴வே நானாகரணங் நத்தி², ஏவங் அக்கி²ஆதீ³னம்பி து²ல்லச்சயாதி³வத்து²பா⁴வே நின்னானாகரணேன ப⁴விதப்³ப³ங். வணே து²ல்லச்சயஞ்ச ‘‘அமக்³கே³ன அமக்³க³ங் பவேஸேதி, ஆபத்தி து²ல்லச்சயஸ்ஸா’’தி (பாரா॰ 66) ஸாமஞ்ஞதோ வுத்தங், ந பன ‘‘மனுஸ்ஸான’’ந்தி விஸேஸனங் அத்தி². யதி³ ச திரச்சா²னக³தானங் வணேஸு து²ல்லச்சயேன ந ப⁴விதப்³ப³ங், பதங்க³முக²மண்டூ³கஸ்ஸ முக²ஸண்டா²னே வணஸங்கே²பதோ து²ல்லச்சயங் ந வத்தப்³ப³ங், வுத்தஞ்ச, தஸ்மா அட்ட²கதா²சரியா ஏவெத்த² பமாணங். ப⁴க³வதோ அதி⁴ப்பாயஞ்ஞுனோ ஹி அட்ட²கதா²சரியா. தேனேவ வுத்தங் ‘‘பு³த்³தே⁴ன த⁴ம்மோ வினயோ ச வுத்தோ, யோ தஸ்ஸ புத்தேஹி ததே²வ ஞாதோ’’திஆதி³ (பாரா॰ அட்ட²॰ 1.). மனுஸ்ஸானந்தி இத்தி²புரிஸபண்ட³கஉப⁴தொப்³யஞ்ஜனகானங் ஸாமஞ்ஞதோ வுத்தங். வத்தி²கோஸேஸூதி வத்தி²புடேஸு புரிஸானங் அங்க³ஜாதகோஸேஸு. மதஸரீரங் யாவ உத்³து⁴மாதகாதி³பா⁴வேன குதி²தங் ந ஹோதி, தாவ அல்லஸரீரந்தி வேதி³தப்³ப³ங். தேனாஹ – ‘‘யதா³ பன ஸரீரங் உத்³து⁴மாதகங் ஹோதீ’’திஆதி³. பாராஜிகவத்து²ஞ்ச து²ல்லச்சயவத்து²ஞ்ச விஜஹதீதி எத்த² பாராஜிகவத்து²பா⁴வங் து²ல்லச்சயவத்து²பா⁴வஞ்ச விஜஹதீதி அத்தோ² வேதி³தப்³போ³. மதானங் திரச்சா²னக³தானந்தி ஸம்ப³ந்தோ⁴.
Manussānaṃ jīvamānakasarīretiādinā pana akkhiādayopi vaṇasaṅgahaṃ gacchantīti vaṇena ekaparicchedaṃ katvā akkhiādīsupi thullaccayaṃ vuttaṃ. Tesañca vaṇasaṅgaho ‘‘navadvāro mahāvaṇo’’ti (mi. pa. 2.6.1) evamādisuttānusārena veditabbo. Tiracchānagatānaṃ akkhikaṇṇavaṇesu dukkaṭaṃ pana aṭṭhakathāppamāṇena gahetabbaṃ. Yathā hi manussāmanussatiracchānagatesu vaccamaggapassāvamaggamukhānaṃ pārājikavatthubhāve nānākaraṇaṃ natthi, evaṃ akkhiādīnampi thullaccayādivatthubhāve ninnānākaraṇena bhavitabbaṃ. Vaṇe thullaccayañca ‘‘amaggena amaggaṃ paveseti, āpatti thullaccayassā’’ti (pārā. 66) sāmaññato vuttaṃ, na pana ‘‘manussāna’’nti visesanaṃ atthi. Yadi ca tiracchānagatānaṃ vaṇesu thullaccayena na bhavitabbaṃ, pataṅgamukhamaṇḍūkassa mukhasaṇṭhāne vaṇasaṅkhepato thullaccayaṃ na vattabbaṃ, vuttañca, tasmā aṭṭhakathācariyā evettha pamāṇaṃ. Bhagavato adhippāyaññuno hi aṭṭhakathācariyā. Teneva vuttaṃ ‘‘buddhena dhammo vinayo ca vutto, yo tassa puttehi tatheva ñāto’’tiādi (pārā. aṭṭha. 1.). Manussānanti itthipurisapaṇḍakaubhatobyañjanakānaṃ sāmaññato vuttaṃ. Vatthikosesūti vatthipuṭesu purisānaṃ aṅgajātakosesu. Matasarīraṃ yāva uddhumātakādibhāvena kuthitaṃ na hoti, tāva allasarīranti veditabbaṃ. Tenāha – ‘‘yadā pana sarīraṃ uddhumātakaṃ hotī’’tiādi. Pārājikavatthuñca thullaccayavatthuñca vijahatīti ettha pārājikavatthubhāvaṃ thullaccayavatthubhāvañca vijahatīti attho veditabbo. Matānaṃ tiracchānagatānanti sambandho.
மேது²னராகே³ன வத்தி²கோஸங் பவேஸெந்தஸ்ஸ து²ல்லச்சயங் வுத்தந்தி ஆஹ ‘‘பத்தி²கோஸங் அப்பவேஸெந்தோ’’தி. இத்தி²யா அப்பவேஸெந்தோதி இத்தி²யா நிமித்தங் அப்பவேஸெந்தோ. அப்பவேஸெந்தோதி ச பவேஸனாதி⁴ப்பாயஸ்ஸ அபா⁴வங் த³ஸ்ஸேதி. பவேஸனாதி⁴ப்பாயேன ப³ஹி சு²பந்தஸ்ஸ பன மேது²னஸ்ஸ புப்³ப³பயோக³த்தா து³க்கடேனேவ ப⁴விதப்³ப³ங். நிமித்தேன நிமித்தங் சு²பதி, து²ல்லச்சயந்தி இத³ங் ‘‘ந ச, பி⁴க்க²வே, ரத்தசித்தேன அங்க³ஜாதங் சு²பிதப்³ப³ங், யோ சு²பெய்ய, ஆபத்தி து²ல்லச்சயஸ்ஸா’’தி (மஹாவ॰ 252) இமஸ்ஸ ஸுத்தஸ்ஸ வஸேன வுத்தங். தத்த² ச கேஸஞ்சி அஞ்ஞதா²பி அத்த²விகப்பஸ்ஸ விதி⁴ங் த³ஸ்ஸெந்தோ ‘‘மஹாஅட்ட²கதா²யங் பனா’’திஆதி³மாஹ. தத்த² கிஞ்சாபி ‘‘கத்வா மஹாஅட்ட²கத²ங் ஸரீர’’ந்தி (பாரா॰ அட்ட²॰ 1.க³ந்தா²ரம்ப⁴கதா²) வுத்தங், ததா²பி ஸேஸஅட்ட²கதா²ஸு ‘‘மேது²னராகே³ன முகே²னா’’தி வசனஸ்ஸ அபா⁴வங் த³ஸ்ஸேதுங் ‘‘மஹாஅட்ட²கதா²யங் பனா’’தி வுத்தங். ‘‘அங்க³ஜாதேனா’’தி அவுத்தத்தா ‘‘அவிஸேஸேனா’’தி வுத்தங்.
Methunarāgena vatthikosaṃ pavesentassa thullaccayaṃ vuttanti āha ‘‘patthikosaṃ appavesento’’ti. Itthiyā appavesentoti itthiyā nimittaṃ appavesento. Appavesentoti ca pavesanādhippāyassa abhāvaṃ dasseti. Pavesanādhippāyena bahi chupantassa pana methunassa pubbapayogattā dukkaṭeneva bhavitabbaṃ. Nimittena nimittaṃ chupati, thullaccayanti idaṃ ‘‘na ca, bhikkhave, rattacittena aṅgajātaṃ chupitabbaṃ, yo chupeyya, āpatti thullaccayassā’’ti (mahāva. 252) imassa suttassa vasena vuttaṃ. Tattha ca kesañci aññathāpi atthavikappassa vidhiṃ dassento ‘‘mahāaṭṭhakathāyaṃ panā’’tiādimāha. Tattha kiñcāpi ‘‘katvā mahāaṭṭhakathaṃ sarīra’’nti (pārā. aṭṭha. 1.ganthārambhakathā) vuttaṃ, tathāpi sesaaṭṭhakathāsu ‘‘methunarāgena mukhenā’’ti vacanassa abhāvaṃ dassetuṃ ‘‘mahāaṭṭhakathāyaṃ panā’’ti vuttaṃ. ‘‘Aṅgajātenā’’ti avuttattā ‘‘avisesenā’’ti vuttaṃ.
இதா³னி மஹாஅட்ட²கத²ங் பாளியா ஸங்ஸந்தி³த்வா த³ஸ்ஸெந்தோ ‘‘யங் தாவ மஹாஅட்ட²கதா²ய’’ந்திஆதி³மாஹ. இதரதா² ஹி து³க்கடங் ஸியாதி பகதிமுகே²ன சு²பந்தஸ்ஸ விஸாணாதி³க்³க³ஹணே விய து³க்கடங் ஸியா. ஏவங் மஹாஅட்ட²கத²ங் பாளியா ஸங்ஸந்தி³த்வா இதா³னி தத்த² கேஸஞ்சி அஞ்ஞதா² அத்த²விகப்பங் த³ஸ்ஸெந்தோ ‘‘கேசி பனா’’திஆதி³மாஹ. ஸங்கா⁴தி³ஸேஸோதி காயஸங்ஸக்³க³ஸிக்கா²பதே³ன ஸங்கா⁴தி³ஸேஸோ. வுத்தனயேனேவாதி மேது²னராகே³னேவ. ‘‘நிமித்தமுகே²னா’’தி வுத்தத்தா திரச்சா²னக³தித்தி²யா பஸ்ஸாவமக்³க³ங் மேது²னராகே³ன பகதிமுகே²ன சு²பந்தஸ்ஸ து³க்கடந்தி வேதி³தப்³ப³ங். காயஸங்ஸக்³க³ராகே³ன து³க்கடந்தி நிமித்தமுகே²ன வா பகதிமுகே²ன வா காயஸங்ஸக்³க³ராகே³ன சு²பந்தஸ்ஸ து³க்கடமேவ.
Idāni mahāaṭṭhakathaṃ pāḷiyā saṃsanditvā dassento ‘‘yaṃ tāva mahāaṭṭhakathāya’’ntiādimāha. Itarathā hi dukkaṭaṃ siyāti pakatimukhena chupantassa visāṇādiggahaṇe viya dukkaṭaṃ siyā. Evaṃ mahāaṭṭhakathaṃ pāḷiyā saṃsanditvā idāni tattha kesañci aññathā atthavikappaṃ dassento ‘‘keci panā’’tiādimāha. Saṅghādisesoti kāyasaṃsaggasikkhāpadena saṅghādiseso. Vuttanayenevāti methunarāgeneva. ‘‘Nimittamukhenā’’ti vuttattā tiracchānagatitthiyā passāvamaggaṃ methunarāgena pakatimukhena chupantassa dukkaṭanti veditabbaṃ. Kāyasaṃsaggarāgena dukkaṭanti nimittamukhena vā pakatimukhena vā kāyasaṃsaggarāgena chupantassa dukkaṭameva.
ஏகூனஸத்ததித்³விஸதசதுக்ககதா²வண்ணனா நிட்டி²தா.
Ekūnasattatidvisatacatukkakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஏகூனஸத்ததித்³விஸதசதுக்ககதா²வண்ணனா • Ekūnasattatidvisatacatukkakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஏகூனஸத்ததித்³விஸதசதுக்ககதா²வண்ணனா • Ekūnasattatidvisatacatukkakathāvaṇṇanā
