| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
ஏகூனஸத்ததித்³விஸதசதுக்ககதா²வண்ணனா
Ekūnasattatidvisatacatukkakathāvaṇṇanā
59-60. ‘‘மதங் யேபு⁴ய்யேன அக்கா²யித’’ந்தி வசனதோ அமதங் யேபு⁴ய்யேன கா²யிதம்பி பாராஜிகவத்து²மேவாதி த³ஸ்ஸேதி. ஸப்³ப³ஸோ கா²யிதங், உப்பாடிதங் வா து²ல்லச்சயவத்து²மேவாதி த³ஸ்ஸேதி, ததா² ‘‘யேபு⁴ய்யேன கா²யித’’ந்தி வசனதோ மதங் ஸப்³ப³கா²யிதங், உப்பாடிதங் வா து³க்கடவத்தூ²தி த³ஸ்ஸேதி. ந ச ஸாவஸேஸங் பஞ்ஞபெந்தி. கிங் காரணா? இத³ஞ்ஹி ஸிக்கா²பத³ங் லோகவஜ்ஜங், ந பண்ணத்திவஜ்ஜங். தத்த² ஸிக்கா²பத³ந்தி பாராஜிகங் அதி⁴ப்பேதங். தத்த² து²ல்லச்சயம்பி ஹி லோகவஜ்ஜங், ந பண்ணத்திவஜ்ஜங். அத² வா உப⁴யம்பி அனவஸேஸங் பஞ்ஞத்தங். பாராஜிககெ²த்தே ஹி ஹெட்டி²மகோடிங் பாபெத்வா ட²பிதே ததோ பரங் து²ல்லச்சயந்தி பஞ்ஞத்தமேவ ஹோதி. தத்த² து²ல்லச்சயகெ²த்தம்பி பாராஜிககெ²த்தங் விய ஹெட்டி²மபரிச்சே²தே³ன வுத்தந்தி வேதி³தப்³ப³ங். உபட்³ட⁴க்கா²யிதே து²ல்லச்சயந்தி யத்த² நிமித்தங் கா²யிதங், தங் து³க்கடவத்தூ²தி வேதி³தப்³ப³ங். எத்தா²ஹ – பண்ணத்திவஜ்ஜங் கிங் ஸாவஸேஸமேவ ப⁴க³வா பஞ்ஞாபேதீதி? ந. ஏகங்ஸதோ பன யதா²ஸம்ப⁴வங் தத்த² தத்த² பகாஸயிஸ்ஸாம, கிமத்த²ங் பன ப⁴க³வா உபட்³ட⁴க்கா²யிதே பாராஜிகங் ந பஞ்ஞாபேஸீதி அயங் தாவ அபுச்சா² பு³த்³த⁴விஸயத்தா வினயபஞ்ஞத்தியா. இத³ங் பனெத்த² காரணபதிரூபகங் ‘‘உபட்³ட⁴பா⁴வஸ்ஸ து³ப்³பி³னிச்ச²யத்தா’’தி. யேபு⁴ய்யேன கா²யிதங் நாம வச்சமக்³க³பஸ்ஸாவமக்³க³முகா²னங் சதூஸு கொட்டா²ஸேஸு த்³வே கொட்டா²ஸே அதிக்கம்ம யாவ ததியகொட்டா²ஸபரியோஸானா கா²தி³தங், ததியகொட்டா²ஸங் அதிக்கம்ம யாவ சதுத்த²கொட்டா²ஸபரியோஸானா து³க்கடவத்து².
59-60. ‘‘Mataṃ yebhuyyena akkhāyita’’nti vacanato amataṃ yebhuyyena khāyitampi pārājikavatthumevāti dasseti. Sabbaso khāyitaṃ, uppāṭitaṃ vā thullaccayavatthumevāti dasseti, tathā ‘‘yebhuyyena khāyita’’nti vacanato mataṃ sabbakhāyitaṃ, uppāṭitaṃ vā dukkaṭavatthūti dasseti. Na ca sāvasesaṃ paññapenti. Kiṃ kāraṇā? Idañhi sikkhāpadaṃ lokavajjaṃ, na paṇṇattivajjaṃ. Tattha sikkhāpadanti pārājikaṃ adhippetaṃ. Tattha thullaccayampi hi lokavajjaṃ, na paṇṇattivajjaṃ. Atha vā ubhayampi anavasesaṃ paññattaṃ. Pārājikakhette hi heṭṭhimakoṭiṃ pāpetvā ṭhapite tato paraṃ thullaccayanti paññattameva hoti. Tattha thullaccayakhettampi pārājikakhettaṃ viya heṭṭhimaparicchedena vuttanti veditabbaṃ. Upaḍḍhakkhāyite thullaccayanti yattha nimittaṃ khāyitaṃ, taṃ dukkaṭavatthūti veditabbaṃ. Etthāha – paṇṇattivajjaṃ kiṃ sāvasesameva bhagavā paññāpetīti? Na. Ekaṃsato pana yathāsambhavaṃ tattha tattha pakāsayissāma, kimatthaṃ pana bhagavā upaḍḍhakkhāyite pārājikaṃ na paññāpesīti ayaṃ tāva apucchā buddhavisayattā vinayapaññattiyā. Idaṃ panettha kāraṇapatirūpakaṃ ‘‘upaḍḍhabhāvassa dubbinicchayattā’’ti. Yebhuyyena khāyitaṃ nāma vaccamaggapassāvamaggamukhānaṃ catūsu koṭṭhāsesu dve koṭṭhāse atikkamma yāva tatiyakoṭṭhāsapariyosānā khāditaṃ, tatiyakoṭṭhāsaṃ atikkamma yāva catutthakoṭṭhāsapariyosānā dukkaṭavatthu.
யதி³பி நிமித்தங் ஸப்³ப³ஸோ கா²யிதந்தி ‘‘ஜீவமானகஸரீரங்யேவ ஸந்தா⁴ய வுத்த’’ந்தி வத³ந்தி, தங் வீமங்ஸித்வா க³ஹேதப்³ப³ங். அல்லஸரீரேதி அபி⁴னவே, அகுதி²தே வா மனுஸ்ஸானங் ஜீவமானஸரீரே அக்கி²னாஸாதீ³ஸு து²ல்லச்சயமேவ. திரச்சா²னக³தானங் ஹத்தி²அஸ்ஸாதீ³னங் நாஸாய வத்தி²கோஸே ச து²ல்லச்சயந்தி ‘‘அமக்³கே³ன அமக்³க³ங் பவேஸேதி, ஆபத்தி து²ல்லச்சயஸ்ஸா’’தி இமாய பாளியா அத்த²விஸேஸேனெத்த² வுத்தங். உபகச்ச²காதீ³ஸு து³க்கடங், ஸப்³பே³ஸம்பி திரச்சா²னக³தானங் அக்கி²கண்ணவணேஸு து³க்கடங், அவஸேஸஸரீரேபி து³க்கடமேவாதி இத³ங் வினீதவத்து²ஸ்மிங் ‘‘ஏஹி, ப⁴ந்தே, மேது²னங் த⁴ம்மங் படிஸேவா’’தி . ‘‘அலங் ப⁴கி³னி நேதங் கப்பதீ’’தி (பாரா॰ 79) இமினா தாவ மேது²னராகா³பா⁴வோ த³ஸ்ஸிதோ ஹோதி. ‘‘ஏஹி, ப⁴ந்தே, ஊருந்தரிகாய க⁴ட்டேஹி…பே॰… ஸோ பி⁴க்கு² ததா² அகாஸீ’’தி இமினா தாவ மோசனஸ்ஸாதோ³ த³ஸ்ஸிதோ ஹோதி, தேனேவாஹ ப⁴க³வா ‘‘ஆபத்தி ஸங்கா⁴தி³ஸேஸஸ்ஸா’’தி. ‘‘யோ பன மேது²னராகே³ன ஊருந்தரிகாய க⁴ட்டேதி, தஸ்ஸ து³க்கட’’ந்தி ஸித்³த⁴ந்தி கத்வா வுத்தங்.
Yadipi nimittaṃ sabbaso khāyitanti ‘‘jīvamānakasarīraṃyeva sandhāya vutta’’nti vadanti, taṃ vīmaṃsitvā gahetabbaṃ. Allasarīreti abhinave, akuthite vā manussānaṃ jīvamānasarīre akkhināsādīsu thullaccayameva. Tiracchānagatānaṃ hatthiassādīnaṃ nāsāya vatthikose ca thullaccayanti ‘‘amaggena amaggaṃ paveseti, āpatti thullaccayassā’’ti imāya pāḷiyā atthavisesenettha vuttaṃ. Upakacchakādīsu dukkaṭaṃ, sabbesampi tiracchānagatānaṃ akkhikaṇṇavaṇesu dukkaṭaṃ, avasesasarīrepi dukkaṭamevāti idaṃ vinītavatthusmiṃ ‘‘ehi, bhante, methunaṃ dhammaṃ paṭisevā’’ti . ‘‘Alaṃ bhagini netaṃ kappatī’’ti (pārā. 79) iminā tāva methunarāgābhāvo dassito hoti. ‘‘Ehi, bhante, ūruntarikāya ghaṭṭehi…pe… so bhikkhu tathā akāsī’’ti iminā tāva mocanassādo dassito hoti, tenevāha bhagavā ‘‘āpatti saṅghādisesassā’’ti. ‘‘Yo pana methunarāgena ūruntarikāya ghaṭṭeti, tassa dukkaṭa’’nti siddhanti katvā vuttaṃ.
மனுஸ்ஸானங் அக்கி²கண்ணவணாதி³ து²ல்லச்சயவத்து², திரச்சா²னக³தானங் து³க்கடவத்தூ²தி எத்த² து³விஞ்ஞெய்யோ பாளிலேஸோ, தஸ்மா ‘‘ந ச, பி⁴க்க²வே, ரத்தசித்தேன அங்க³ஜாதங் சு²பிதப்³ப³ங், யோ சு²பெய்ய, ஆபத்தி து²ல்லச்சயஸ்ஸா’’தி வசனதோ ரத்தசித்தேன அக்கி²கண்ணவணங் சு²பந்தஸ்ஸ து³க்கடந்தி ஸித்³த⁴ந்தி அயங் சம்மக்க²ந்த⁴கே பாளிலேஸோதி வேதி³தப்³போ³. ‘‘ஜீவமானகபுரிஸஸ்ஸாதி ஜீவமானகஸத்³தோ³ மதே வத்தப்³ப³மேவ நத்தீ²தி ஞாபனத்த²ங் வுத்தோ’’தி வத³ந்தி. மஹாஅட்ட²கதா²யங் பனாதி இத³ங் கிஞ்சாபி ‘‘கத்வா மஹாஅட்ட²கத²ங் ஸரீர’’ந்தி வுத்தங், அத² கோ² ஸேஸஅட்ட²கதா²ஸு ‘‘மேது²னராகே³ன முகே²னா’’தி வசனாபா⁴வதோ தத்தே²வ பா⁴வதோ தங் வசனங் பாளிவசனேன ஸங்ஸந்தி³த்வா த³ஸ்ஸனத்த²ங் வுத்தங். அனுக³ண்டி²பதே³ பன ‘‘தங் ஸப்³ப³ம்பீதி மஹாஅட்ட²கதா²யமேவ மேது²னராகே³ன இத்தி²யா நிமித்தங் அப்பவேஸெந்தோ சு²பதி, து²ல்லச்சய’’ந்தி ச வுத்தங். ‘‘மேது²னராகே³ன முகே²னா’’திபி கத்த²சி, பாளியங் அவிஸேஸேன ‘‘ந ச, பி⁴க்க²வே, ரத்தசித்தேன அங்க³ஜாதங் சு²பிதப்³ப³’’ந்தி வுத்தங், தஸ்மா ‘‘தங் ஸப்³ப³’’ந்தி வுத்தங். புரிமங் பஸங்ஸந்தீதி திரச்சா²னக³தி…பே॰… வுத்தனயேனேவ து²ல்லச்சயங், காயஸங்ஸக்³க³ராகே³ன து³க்கடந்திஆதி³அட்ட²கதா²வசனேஹி ஸங்ஸந்த³னதோ. ‘‘தங் ஸப்³ப³ம்பி…பே॰… புரிமங் பஸங்ஸந்தீ’’தி இத³ங் ஸங்கீ³திதோ பச்சா² ஸீஹளதீ³பகேஹி ஆசரியேஹி பாளியா, அட்ட²கதா²யஞ்ச வுத்தவசனங் ஸங்ஸந்தி³த்வா வுத்தவினிச்ச²யோதி வுத்தங். எத்த² இதரதா² ஹீதி பகதிமுகே²ன. கஸ்மா து³க்கடந்தி சே? ‘‘அங்கு³லிபீ³ஜாதீ³னி பவேஸெந்தஸ்ஸ து³க்கட’’ந்தி வுத்தத்தா யுத்தங். திரச்சா²னக³தித்தி²யா பஸ்ஸாவமக்³க³ந்தி எத்த² மஹாஅட்ட²கதா²யம்பி புப்³பே³ ‘‘நிமித்த’’ந்தி வத்வா எத்த² ‘‘பஸ்ஸாவமக்³க³’’ந்தி வுத்தத்தா அவஸேஸனிமித்தே து³க்கடந்தி யுத்தங் விய தி³ஸ்ஸதி. வுத்தனயேனேவாதி மேது²னராகே³ன. து²ல்லச்சயந்தி ச க²ந்த⁴கே பஸ்ஸாவனிமித்தவஸேனேவாக³தத்தா உபபரிக்கி²த்வா க³ஹேதப்³ப³ங்.
Manussānaṃ akkhikaṇṇavaṇādi thullaccayavatthu, tiracchānagatānaṃ dukkaṭavatthūti ettha duviññeyyo pāḷileso, tasmā ‘‘na ca, bhikkhave, rattacittena aṅgajātaṃ chupitabbaṃ, yo chupeyya, āpatti thullaccayassā’’ti vacanato rattacittena akkhikaṇṇavaṇaṃ chupantassa dukkaṭanti siddhanti ayaṃ cammakkhandhake pāḷilesoti veditabbo. ‘‘Jīvamānakapurisassāti jīvamānakasaddo mate vattabbameva natthīti ñāpanatthaṃ vutto’’ti vadanti. Mahāaṭṭhakathāyaṃ panāti idaṃ kiñcāpi ‘‘katvā mahāaṭṭhakathaṃ sarīra’’nti vuttaṃ, atha kho sesaaṭṭhakathāsu ‘‘methunarāgena mukhenā’’ti vacanābhāvato tattheva bhāvato taṃ vacanaṃ pāḷivacanena saṃsanditvā dassanatthaṃ vuttaṃ. Anugaṇṭhipade pana ‘‘taṃ sabbampīti mahāaṭṭhakathāyameva methunarāgena itthiyā nimittaṃ appavesento chupati, thullaccaya’’nti ca vuttaṃ. ‘‘Methunarāgena mukhenā’’tipi katthaci, pāḷiyaṃ avisesena ‘‘na ca, bhikkhave, rattacittena aṅgajātaṃ chupitabba’’nti vuttaṃ, tasmā ‘‘taṃ sabba’’nti vuttaṃ. Purimaṃ pasaṃsantīti tiracchānagati…pe… vuttanayeneva thullaccayaṃ, kāyasaṃsaggarāgena dukkaṭantiādiaṭṭhakathāvacanehi saṃsandanato. ‘‘Taṃ sabbampi…pe… purimaṃ pasaṃsantī’’ti idaṃ saṅgītito pacchā sīhaḷadīpakehi ācariyehi pāḷiyā, aṭṭhakathāyañca vuttavacanaṃ saṃsanditvā vuttavinicchayoti vuttaṃ. Ettha itarathā hīti pakatimukhena. Kasmā dukkaṭanti ce? ‘‘Aṅgulibījādīni pavesentassa dukkaṭa’’nti vuttattā yuttaṃ. Tiracchānagatitthiyā passāvamagganti ettha mahāaṭṭhakathāyampi pubbe ‘‘nimitta’’nti vatvā ettha ‘‘passāvamagga’’nti vuttattā avasesanimitte dukkaṭanti yuttaṃ viya dissati. Vuttanayenevāti methunarāgena. Thullaccayanti ca khandhake passāvanimittavasenevāgatattā upaparikkhitvā gahetabbaṃ.
ஏகூனஸத்ததித்³விஸதசதுக்ககதா²வண்ணனா நிட்டி²தா.
Ekūnasattatidvisatacatukkakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஏகூனஸத்ததித்³விஸதசதுக்ககதா²வண்ணனா • Ekūnasattatidvisatacatukkakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஏகூனஸத்ததித்³விஸதசதுக்ககதா²வண்ணனா • Ekūnasattatidvisatacatukkakathāvaṇṇanā
