| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஏகூனஸத்ததித்³விஸதசதுக்ககதா²வண்ணனா
Ekūnasattatidvisatacatukkakathāvaṇṇanā
59-60. மத்தந்தி ஸுராதீ³ஹி மத்தங். அக்கா²யிதனிமித்தா இத⁴ உத்தரபத³லோபேன அக்கா²யிதஸத்³தே³ன வுத்தாதி ஆஹ ‘‘அக்கா²யிதனிமித்த’’ந்தி. ஜாக³ரந்திந்திஆதி³ விஸேஸனரஹிதத்தா ‘‘ஸுத்³தி⁴கசதுக்கானீ’’தி வுத்தங். ஸமானாசரியகாதே²ராதி ஏகாசரியஸ்ஸ உத்³தே³ஸந்தேவாஸிகா. க³ங்கா³ய அபரபா⁴கோ³ அபரக³ங்க³ங். வதரேதி க³ரஹத்தே² நிபாதோ. ஏவங் வினயக³ருகானந்தி இமினா உபரி உபதிஸ்ஸத்தே²ரேன வுச்சமானவினிச்ச²யஸ்ஸ க³ருகரணீயதாய காரணங் வுத்தங். ஸப்³ப³ங் பரியாதி³யித்வாதி ஸப்³ப³ங் பாராஜிககெ²த்தங் அனவஸேஸதோ க³ஹெத்வா. யதி³ ஹி ஸாவஸேஸங் கத்வா பஞ்ஞபெய்ய, அலஜ்ஜீனங் தத்த² லேஸேன அஜ்ஜா²சாரஸோதோ பவத்ததீதி ஆஹ ‘‘ஸோதங் சி²ந்தி³த்வா’’தி. ஸஹஸெய்யாதி³பண்ணத்திவஜ்ஜஸிக்கா²பதே³ஸுயேவ (பாசி॰ 49-51) ஸாவஸேஸங் கத்வாபி பஞ்ஞாபனங் ஸம்ப⁴வதி, ந லோகவஜ்ஜேஸூதி ஆஹ இத³ஞ்ஹீதிஆதி³. ஸஹஸெய்யஸிக்கா²பதே³ ஹி (பாசி॰ 49 ஆத³யோ) கிஞ்சாபி யேபு⁴ய்யச்ச²ன்னே யேபு⁴ய்யபரிச்ச²ன்னே ஹெட்டி²மபரிச்சே²த³தோ பாசித்தியங் த³ஸ்ஸிதங், உபட்³ட⁴ச்ச²ன்னே உபட்³ட⁴பரிச்ச²ன்னே து³க்கடங், ததா²பி ஸாவஸேஸத்தா பஞ்ஞத்தியா யேபு⁴ய்யச்ச²ன்னஉபட்³ட⁴பரிச்ச²ன்னாதீ³ஸுபி அட்ட²கதா²யங் பாசித்தியமேவ த³ஸ்ஸிதங். இத⁴ பன நிரவஸேஸத்தா பஞ்ஞத்தியா ப⁴க³வதா த³ஸ்ஸிதங் யேபு⁴ய்யேன அக்கா²யிதனிமித்ததோ ஹெட்டா² பாராஜிகக்கெ²த்தங் நத்தி², து²ல்லச்சயாதி³மேவ தத்த² லப்³ப⁴தி.
59-60.Mattanti surādīhi mattaṃ. Akkhāyitanimittā idha uttarapadalopena akkhāyitasaddena vuttāti āha ‘‘akkhāyitanimitta’’nti. Jāgarantintiādi visesanarahitattā ‘‘suddhikacatukkānī’’ti vuttaṃ. Samānācariyakātherāti ekācariyassa uddesantevāsikā. Gaṅgāya aparabhāgo aparagaṅgaṃ. Vatareti garahatthe nipāto. Evaṃ vinayagarukānanti iminā upari upatissattherena vuccamānavinicchayassa garukaraṇīyatāya kāraṇaṃ vuttaṃ. Sabbaṃ pariyādiyitvāti sabbaṃ pārājikakhettaṃ anavasesato gahetvā. Yadi hi sāvasesaṃ katvā paññapeyya, alajjīnaṃ tattha lesena ajjhācārasoto pavattatīti āha ‘‘sotaṃ chinditvā’’ti. Sahaseyyādipaṇṇattivajjasikkhāpadesuyeva (pāci. 49-51) sāvasesaṃ katvāpi paññāpanaṃ sambhavati, na lokavajjesūti āha idañhītiādi. Sahaseyyasikkhāpade hi (pāci. 49 ādayo) kiñcāpi yebhuyyacchanne yebhuyyaparicchanne heṭṭhimaparicchedato pācittiyaṃ dassitaṃ, upaḍḍhacchanne upaḍḍhaparicchanne dukkaṭaṃ, tathāpi sāvasesattā paññattiyā yebhuyyacchannaupaḍḍhaparicchannādīsupi aṭṭhakathāyaṃ pācittiyameva dassitaṃ. Idha pana niravasesattā paññattiyā bhagavatā dassitaṃ yebhuyyena akkhāyitanimittato heṭṭhā pārājikakkhettaṃ natthi, thullaccayādimeva tattha labbhati.
உபதிஸ்ஸத்தே²ரேன வுத்தஸ்ஸேவ வினிச்ச²யஸ்ஸ அஞ்ஞம்பி உபத்த²ம்ப⁴காரணங் த³ஸ்ஸெந்தோ அபிசாதிஆதி³மாஹ. நிமித்தே அப்பமத்திகாபி மங்ஸராஜி ஸசே அவஸிட்டா² ஹோதி, தங் யேபு⁴ய்யக்கா²யிதமேவ ஹோதி, ததோ பரங் பன ஸப்³ப³ஸோ கா²யிதே நிமித்தே து³க்கடமேவாதி த³ஸ்ஸெந்தோ ஆஹ ‘‘ததோ பரங் து²ல்லச்சயங் நத்தீ²’’தி. கேசி பனெத்த² வச்சமக்³கா³தி³ங் சத்தாரோ கொட்டா²ஸே கத்வா ‘‘தேஸு த்³வே கொட்டா²ஸே அதிக்கம்ம யாவ ததியகொட்டா²ஸஸ்ஸ பரியோஸானா கா²யிதங் யேபு⁴ய்யக்கா²யிதங் நாம, ததோ பரங் து²ல்லச்சயங் நத்தி², யாவ சதுத்த²கொட்டா²ஸஸ்ஸ பரியோஸானா கா²யிதங், தம்பி து³க்கடவத்து²யேவா’’தி ச வத³ந்தி, தங் ந யுத்தங். மதஸரீரஸ்மிங்யேவ வேதி³தப்³ப³ந்தி மதங் யேபு⁴ய்யேன அக்கா²யிதந்திஆதி³வசனதோ வுத்தங். யதி³பி நிமித்தந்திஆதி³ ஜீவமானகஸரீரமேவ ஸந்தா⁴ய வுத்தங் தஸ்ஸேவ அதி⁴கதத்தா. தேனேவ மாதிகாட்ட²கதா²யங் (கங்கா²॰ அட்ட²॰ பட²மபாராஜிகவண்ணனா) ‘‘ஜீவமானகஸரீரஸ்ஸ வுத்தப்பகாரே மக்³கே³ ஸசேபி தசாதீ³னி அனவஸேஸெத்வா ஸப்³ப³ஸோ சி²ன்னே’’திஆதி³ வுத்தங். ஸப்³ப³ஸோ கா²யிதந்தி நிமித்தமங்ஸங் ஸப்³ப³ங் சி²ன்னந்தி அத்தோ². நிமித்தஸண்டா²னந்தி சி²ன்னமங்ஸஸ்ஸ அந்தோ யாவ முத்தவத்தி²கோஸா சி²த்³தா³காரோ அப்³ப⁴ந்தரச²விசம்மமத்தோ இத்தி²னிமித்தாகாரோ, தேனாஹ ‘‘பவேஸனங் ஜாயதீ’’தி. நிமித்தஸண்டா²னங் பன அனவஸேஸெத்வாதி பவேஸனாரஹசி²த்³தா³காரேன டி²தஅப்³ப⁴ந்தரமங்ஸாதி³ங் அனவஸேஸெத்வா. ஏதேன யாவ பவேஸோ லப்³ப⁴தி, தாவ மக்³கோ³யேவாதி த³ஸ்ஸேதி. நிமித்ததோ பதிதாய மங்ஸபேஸியாதி இத³ங் நிமித்தஸண்டா²னவிரஹிதங் அப்³ப⁴ந்தரமங்ஸக²ண்ட³ங் ஸந்தா⁴ய வுத்தங். நிமித்தஸண்டா²னங் அகோபெத்வா ஸமந்ததோ சி²ந்தி³த்வா உத்³த⁴டமங்ஸபேஸியா பன மதஸரீரே யேபு⁴ய்யேன அக்கா²யிதனிமித்தே விய உபக்கமந்தஸ்ஸ பாராஜிகமேவ.
Upatissattherena vuttasseva vinicchayassa aññampi upatthambhakāraṇaṃ dassento apicātiādimāha. Nimitte appamattikāpi maṃsarāji sace avasiṭṭhā hoti, taṃ yebhuyyakkhāyitameva hoti, tato paraṃ pana sabbaso khāyite nimitte dukkaṭamevāti dassento āha ‘‘tato paraṃ thullaccayaṃ natthī’’ti. Keci panettha vaccamaggādiṃ cattāro koṭṭhāse katvā ‘‘tesu dve koṭṭhāse atikkamma yāva tatiyakoṭṭhāsassa pariyosānā khāyitaṃ yebhuyyakkhāyitaṃ nāma, tato paraṃ thullaccayaṃ natthi, yāva catutthakoṭṭhāsassa pariyosānā khāyitaṃ, tampi dukkaṭavatthuyevā’’ti ca vadanti, taṃ na yuttaṃ. Matasarīrasmiṃyeva veditabbanti mataṃ yebhuyyena akkhāyitantiādivacanato vuttaṃ. Yadipi nimittantiādi jīvamānakasarīrameva sandhāya vuttaṃ tasseva adhikatattā. Teneva mātikāṭṭhakathāyaṃ (kaṅkhā. aṭṭha. paṭhamapārājikavaṇṇanā) ‘‘jīvamānakasarīrassa vuttappakāre magge sacepi tacādīni anavasesetvā sabbaso chinne’’tiādi vuttaṃ. Sabbaso khāyitanti nimittamaṃsaṃ sabbaṃ chinnanti attho. Nimittasaṇṭhānanti chinnamaṃsassa anto yāva muttavatthikosā chiddākāro abbhantarachavicammamatto itthinimittākāro, tenāha ‘‘pavesanaṃ jāyatī’’ti. Nimittasaṇṭhānaṃ pana anavasesetvāti pavesanārahachiddākārena ṭhitaabbhantaramaṃsādiṃ anavasesetvā. Etena yāva paveso labbhati, tāva maggoyevāti dasseti. Nimittato patitāya maṃsapesiyāti idaṃ nimittasaṇṭhānavirahitaṃ abbhantaramaṃsakhaṇḍaṃ sandhāya vuttaṃ. Nimittasaṇṭhānaṃ akopetvā samantato chinditvā uddhaṭamaṃsapesiyā pana matasarīre yebhuyyena akkhāyitanimitte viya upakkamantassa pārājikameva.
ஏவங் ஜீவமானகமனுஸ்ஸஸரீரே லப்³ப⁴மானவிஸேஸங் த³ஸ்ஸெத்வா இதா³னி மதஸரீரே த³ஸ்ஸேதுங் மதஸரீரே பனாதிஆதி³மாஹ. வத்தி²கோஸேஸூதி புரிஸானங் அங்க³ஜாதகோஸசம்மேஸு. ‘‘நவத்³வாரோ மஹாவணோ’’திஆதி³ (மி॰ ப॰ 2.6.1) வசனதோ மனுஸ்ஸானங் அக்கி²னாஸாதீ³னி வணஸங்கே²பேன து²ல்லச்சயக்கெ²த்தானீதி தேஸுபி து²ல்லச்சயங் வுத்தங், ஏவங் மனுஸ்ஸானங் மதஸரீரேபி, தேனாஹ மதே அல்லஸரீரேதிஆதி³. தத்த² அல்லஸரீரேதி அகுதி²தங் ஸந்தா⁴ய வுத்தங். பாராஜிகக்கெ²த்தேதி யேபு⁴ய்யேன அக்கா²யிதம்பி ஸந்தா⁴ய வுத்தங். து²ல்லச்சயக்கெ²த்தேதி உபட்³ட⁴க்கா²யிதாதி³ம்பி ஸந்தா⁴ய வுத்தங். எத்த² ச அக்கி²னாஸாதி³து²ல்லச்சயக்கெ²த்தேஸு யேபு⁴ய்யேன அக்கா²யிதேஸுபி து²ல்லச்சயங், உபட்³ட⁴க்கா²யிதாதீ³ஸு து³க்கடந்தி வேதி³தப்³ப³ங். ஸப்³பே³ஸம்பீதி யதா²வுத்தஹத்தி²ஆதீ³ஹி அஞ்ஞேஸங் திரச்சா²னானங் ஸங்க³ண்ஹனத்த²ங் வுத்தங். திரச்சா²னக³தானங் அக்கி²கண்ணவணேஸு து³க்கடங் பன அட்ட²கதா²ப்பமாணேன க³ஹேதப்³ப³ங், ‘‘அமக்³கே³ன அமக்³க³ங் பவேஸேதி, ஆபத்தி து²ல்லச்சயஸ்ஸா’’தி (பாரா॰ 66) ஹி ஸாமஞ்ஞதோ வுத்தங், ந பன மனுஸ்ஸானந்தி விஸேஸெத்வா. யதி³ ஹி மனுஸ்ஸானஞ்ஞேவ வணேஸு து²ல்லச்சயங் ஸியா, ஹத்தி²அஸ்ஸாதீ³னங் நாஸவத்தி²கோஸேஸுபி படங்க³முக²மண்டூ³கஸ்ஸ முக²ஸண்டா²னேபி ச வணஸங்கே²பதோ து²ல்லச்சயங் ந வத்தப்³ப³ங் ஸியா, வுத்தஞ்ச. தஸ்மா அட்ட²கதா²சரியா ஏவெத்த² பமாணங். மதானங் திரச்சா²னக³தானந்தி மதகேன ஸம்ப³ந்தோ⁴.
Evaṃ jīvamānakamanussasarīre labbhamānavisesaṃ dassetvā idāni matasarīre dassetuṃ matasarīre panātiādimāha. Vatthikosesūti purisānaṃ aṅgajātakosacammesu. ‘‘Navadvāro mahāvaṇo’’tiādi (mi. pa. 2.6.1) vacanato manussānaṃ akkhināsādīni vaṇasaṅkhepena thullaccayakkhettānīti tesupi thullaccayaṃ vuttaṃ, evaṃ manussānaṃ matasarīrepi, tenāha mate allasarīretiādi. Tattha allasarīreti akuthitaṃ sandhāya vuttaṃ. Pārājikakkhetteti yebhuyyena akkhāyitampi sandhāya vuttaṃ. Thullaccayakkhetteti upaḍḍhakkhāyitādimpi sandhāya vuttaṃ. Ettha ca akkhināsādithullaccayakkhettesu yebhuyyena akkhāyitesupi thullaccayaṃ, upaḍḍhakkhāyitādīsu dukkaṭanti veditabbaṃ. Sabbesampīti yathāvuttahatthiādīhi aññesaṃ tiracchānānaṃ saṅgaṇhanatthaṃ vuttaṃ. Tiracchānagatānaṃ akkhikaṇṇavaṇesu dukkaṭaṃ pana aṭṭhakathāppamāṇena gahetabbaṃ, ‘‘amaggena amaggaṃ paveseti, āpatti thullaccayassā’’ti (pārā. 66) hi sāmaññato vuttaṃ, na pana manussānanti visesetvā. Yadi hi manussānaññeva vaṇesu thullaccayaṃ siyā, hatthiassādīnaṃ nāsavatthikosesupi paṭaṅgamukhamaṇḍūkassa mukhasaṇṭhānepi ca vaṇasaṅkhepato thullaccayaṃ na vattabbaṃ siyā, vuttañca. Tasmā aṭṭhakathācariyā evettha pamāṇaṃ. Matānaṃ tiracchānagatānanti matakena sambandho.
மேது²னராகே³ன வத்தி²கோஸங் பவேஸெந்தஸ்ஸ து²ல்லச்சயங் வுத்தந்தி ஆஹ ‘‘வத்தி²கோஸங் அப்பவேஸெந்தோ’’தி. மேது²னராகோ³ ச நாம காயஸங்ஸக்³க³ராக³ங் மோசனஸ்ஸாத³ஞ்ச முஞ்சித்வா விஸுங் த்³வயங்த்³வயஸமாபத்தியா ராகோ³, ஸோ ச புரிஸாதீ³ஸுபி உப்பஜ்ஜதி, தேன ச அபாராஜிகக்கெ²த்தே இத்தி²ஸரீரேபி உபக்கமந்தஸ்ஸ அஸுசிம்ஹி முத்தேபி ஸங்கா⁴தி³ஸேஸோ ந ஹோதி, கெ²த்தானுரூபங் து²ல்லச்சயது³க்கடமேவ ஹோதீதி வேதி³தப்³ப³ங். அப்பவேஸெந்தோதி இமினா தீஸு மக்³கே³ஸு பவேஸனாதி⁴ப்பாயே அஸதிபி மேது²னராகே³ன ப³ஹி க⁴ட்டனங் ஸம்ப⁴வதீதி த³ஸ்ஸேதி, தேனேவ து²ல்லச்சயங் வுத்தங், இதரதா² பவேஸனாதி⁴ப்பாயேன ப³ஹி சு²பந்தஸ்ஸ மேது²னஸ்ஸ புப்³ப³பயோக³த்தா து³க்கடமேவ வத்தப்³ப³ங் ஸியா. நிமித்தேன நிமித்தங் சு²பதி து²ல்லச்சயந்தி இத³ஞ்ச ‘‘ந ச, பி⁴க்க²வே, ரத்தசித்தேன அங்க³ஜாதங் சு²பிதப்³ப³ங், யோ சு²பெய்ய, ஆபத்தி து²ல்லச்சயஸ்ஸா’’தி (மஹாவ॰ 252) இமஸ்ஸ சம்மக்க²ந்த⁴கே ஆக³தஸ்ஸ ஸுத்தஸ்ஸ வஸேன வுத்தங். தத்த² ச கேஸஞ்சி அஞ்ஞதா²பி அத்த²விகப்பஸ்ஸ பீ³ஜங் த³ஸ்ஸெந்தோ மஹாஅட்ட²கதா²யங் பனாதிஆதி³மாஹ. முகே²னேவ சு²பனங் ஸந்தா⁴யாதி ஒட்ட²ஜிவ்ஹாதி³முகா²வயவேன சு²பனங் ஸந்தா⁴ய. ஓளாரிகத்தாதி அஜ்ஜா²சாரஸ்ஸ து²ல்லத்தா. தங் ஸந்தா⁴யபா⁴ஸிதந்தி தங் யதா²வுத்தஸுத்தங். ஸுத்தஞ்ஹி அஜ்ஜா²சாரங் ஸந்தா⁴ய படிச்ச வுத்தத்தா ‘‘ஸந்தா⁴யபா⁴ஸித’’ந்தி வுச்சதி. ஸுட்டு²ஸல்லக்கெ²த்வாதி பிட்டி²ங் அபி⁴ருஹந்தானங் அங்க³ஜாதமுகே²னேவ நிமித்தசு²பனஸ்ஸ ஸம்ப⁴வங் மேது²னராகீ³னஞ்ச அங்க³ஜாதேன சு²பனஸ்ஸேவ அனுரூபதஞ்ச ஸுத்தே ச ‘‘முகே²னா’’தி அவுத்ததஞ்ச அஞ்ஞஞ்ச நயங் யதா²ப³லங் ஸுட்டு² ஸல்லக்கெ²த்வாதி அத்தோ². ஸங்கா⁴தி³ஸேஸோதி மனுஸ்ஸித்தி²ங் ஸந்தா⁴ய வுத்தங். பஸ்ஸாவமக்³க³ந்தி இத³ங் சம்மக்க²ந்த⁴கே நிதா³னவஸேன வுத்தங். இதரமக்³க³த்³வயங் பன நிமித்தமுகே²ன சு²பந்தஸ்ஸ வணஸங்கே²பேன து²ல்லச்சயமேவ. வுத்தனயேனேவாதி மேது²னராகே³னேவ. நிமித்தமுகே²ன பன வினா மேது²னராகே³ன மனுஸ்ஸித்தி²யா வா திரச்சா²னக³தித்தி²யா வா பஸ்ஸாவமக்³க³ங் பகதிமுகே²ன சு²பந்தஸ்ஸ து³க்கடமேவ பகதிமுகே²ன பகதிமுக²சு²பனே விய, இதரதா² தத்தா²பி து²ல்லச்சயேன ப⁴விதப்³ப³ங், தஞ்ச ந யுத்தங் க²ந்த⁴கஸுத்தேபி ததா² அவுத்தத்தா. காயஸங்ஸக்³க³ராகே³ன து³க்கடந்தி நிமித்தமுகே²ன வா பகதிமுகா²தி³ங் இதரகாயேன வா காயஸங்ஸக்³க³ராகே³ன சு²பந்தஸ்ஸ து³க்கடமேவ.
Methunarāgena vatthikosaṃ pavesentassa thullaccayaṃ vuttanti āha ‘‘vatthikosaṃ appavesento’’ti. Methunarāgo ca nāma kāyasaṃsaggarāgaṃ mocanassādañca muñcitvā visuṃ dvayaṃdvayasamāpattiyā rāgo, so ca purisādīsupi uppajjati, tena ca apārājikakkhette itthisarīrepi upakkamantassa asucimhi muttepi saṅghādiseso na hoti, khettānurūpaṃ thullaccayadukkaṭameva hotīti veditabbaṃ. Appavesentoti iminā tīsu maggesu pavesanādhippāye asatipi methunarāgena bahi ghaṭṭanaṃ sambhavatīti dasseti, teneva thullaccayaṃ vuttaṃ, itarathā pavesanādhippāyena bahi chupantassa methunassa pubbapayogattā dukkaṭameva vattabbaṃ siyā. Nimittena nimittaṃ chupati thullaccayanti idañca ‘‘na ca, bhikkhave, rattacittena aṅgajātaṃ chupitabbaṃ, yo chupeyya, āpatti thullaccayassā’’ti (mahāva. 252) imassa cammakkhandhake āgatassa suttassa vasena vuttaṃ. Tattha ca kesañci aññathāpi atthavikappassa bījaṃ dassento mahāaṭṭhakathāyaṃ panātiādimāha. Mukheneva chupanaṃ sandhāyāti oṭṭhajivhādimukhāvayavena chupanaṃ sandhāya. Oḷārikattāti ajjhācārassa thullattā. Taṃ sandhāyabhāsitanti taṃ yathāvuttasuttaṃ. Suttañhi ajjhācāraṃ sandhāya paṭicca vuttattā ‘‘sandhāyabhāsita’’nti vuccati. Suṭṭhusallakkhetvāti piṭṭhiṃ abhiruhantānaṃ aṅgajātamukheneva nimittachupanassa sambhavaṃ methunarāgīnañca aṅgajātena chupanasseva anurūpatañca sutte ca ‘‘mukhenā’’ti avuttatañca aññañca nayaṃ yathābalaṃ suṭṭhu sallakkhetvāti attho. Saṅghādisesoti manussitthiṃ sandhāya vuttaṃ. Passāvamagganti idaṃ cammakkhandhake nidānavasena vuttaṃ. Itaramaggadvayaṃ pana nimittamukhena chupantassa vaṇasaṅkhepena thullaccayameva. Vuttanayenevāti methunarāgeneva. Nimittamukhena pana vinā methunarāgena manussitthiyā vā tiracchānagatitthiyā vā passāvamaggaṃ pakatimukhena chupantassa dukkaṭameva pakatimukhena pakatimukhachupane viya, itarathā tatthāpi thullaccayena bhavitabbaṃ, tañca na yuttaṃ khandhakasuttepi tathā avuttattā. Kāyasaṃsaggarāgena dukkaṭanti nimittamukhena vā pakatimukhādiṃ itarakāyena vā kāyasaṃsaggarāgena chupantassa dukkaṭameva.
எத்த² ச காயஸங்ஸக்³க³ராகே³ன ப³ஹினிமித்தே உபக்கமதோ அஜானந்தஸ்ஸேவ அங்க³ஜாதங் யதி³ பாராஜிகக்கெ²த்தங் சு²பதி, தத்த² கிங் ஹோதீதி? கேசி தாவ ‘‘மேது²னராக³ஸ்ஸ அபா⁴வா மனுஸ்ஸித்தி²யா ஸங்கா⁴தி³ஸேஸோ, ஸேஸேஸு வத்து²வஸேன து²ல்லச்சயது³க்கடானீ’’தி வத³ந்தி. அஞ்ஞே பன ‘‘பவேஸனக்க²ணே ப²ஸ்ஸஸ்ஸ ஸாதி³யனஸம்ப⁴வதோ ப³லக்காரேன உபக்கமனக்க²ணே விய பாராஜிகமேவா’’தி வத³ந்தி, இத³மேவ யுத்ததரங். மக்³க³த்தயதோ ஹி அஞ்ஞஸ்மிங் பதே³ஸேயேவ காயஸங்ஸக்³கா³தி³ராக³பே⁴த³தோ ஆபத்திபே⁴தோ³ லப்³ப⁴தி, ந மக்³க³த்தயே. தத்த² பன யேன கேனசி ஆகாரேன ப²ஸ்ஸஸ்ஸ ஸாதி³யனக்க²ணே பாராஜிகமேவ, தேனேவ பரோபக்கமேன பவேஸனாதீ³ஸு ராக³பே⁴த³ங் அனுத்³த⁴ரித்வா ஸாதி³யனமத்தேன பாராஜிகங் வுத்தங்.
Ettha ca kāyasaṃsaggarāgena bahinimitte upakkamato ajānantasseva aṅgajātaṃ yadi pārājikakkhettaṃ chupati, tattha kiṃ hotīti? Keci tāva ‘‘methunarāgassa abhāvā manussitthiyā saṅghādiseso, sesesu vatthuvasena thullaccayadukkaṭānī’’ti vadanti. Aññe pana ‘‘pavesanakkhaṇe phassassa sādiyanasambhavato balakkārena upakkamanakkhaṇe viya pārājikamevā’’ti vadanti, idameva yuttataraṃ. Maggattayato hi aññasmiṃ padeseyeva kāyasaṃsaggādirāgabhedato āpattibhedo labbhati, na maggattaye. Tattha pana yena kenaci ākārena phassassa sādiyanakkhaṇe pārājikameva, teneva paropakkamena pavesanādīsu rāgabhedaṃ anuddharitvā sādiyanamattena pārājikaṃ vuttaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஏகூனஸத்ததித்³விஸதசதுக்ககதா²வண்ணனா • Ekūnasattatidvisatacatukkakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஏகூனஸத்ததித்³விஸதசதுக்ககதா²வண்ணனா • Ekūnasattatidvisatacatukkakathāvaṇṇanā
