| Library / Tipiṭaka / තිපිටක • Tipiṭaka / අපදානපාළි • Apadānapāḷi |
2. එකූපොසථිකවග්‌ගො
2. Ekūposathikavaggo
1. එකූපොසථිකාථෙරීඅපදානං
1. Ekūposathikātherīapadānaṃ
1.
1.
‘‘නගරෙ බන්‌ධුමතියා, බන්‌ධුමා නාම ඛත්‌තියො;
‘‘Nagare bandhumatiyā, bandhumā nāma khattiyo;
දිවසෙ පුණ්‌ණමාය සො, උපවසි උපොසථං.
Divase puṇṇamāya so, upavasi uposathaṃ.
2.
2.
‘‘අහං තෙන සමයෙන, කුම්‌භදාසී අහං තහිං;
‘‘Ahaṃ tena samayena, kumbhadāsī ahaṃ tahiṃ;
දිස්‌වා සරාජකං සෙනං, එවාහං චින්‌තයිං තදා.
Disvā sarājakaṃ senaṃ, evāhaṃ cintayiṃ tadā.
3.
3.
‘රාජාපි රජ්‌ජං ඡඩ්‌ඩෙත්‌වා, උපවසි උපොසථං;
‘Rājāpi rajjaṃ chaḍḍetvā, upavasi uposathaṃ;
සඵලං නූන තං කම්‌මං, ජනකායො පමොදිතො’.
Saphalaṃ nūna taṃ kammaṃ, janakāyo pamodito’.
4.
4.
මානසං සම්‌පහංසිත්‌වා, උපවසිං උපොසථං.
Mānasaṃ sampahaṃsitvā, upavasiṃ uposathaṃ.
5.
5.
‘‘අහං උපොසථං කත්‌වා, සම්‌මාසම්‌බුද්‌ධසාසනෙ;
‘‘Ahaṃ uposathaṃ katvā, sammāsambuddhasāsane;
තෙන කම්‌මෙන සුකතෙන, තාවතිංසමගච්‌ඡහං.
Tena kammena sukatena, tāvatiṃsamagacchahaṃ.
6.
6.
‘‘තත්‌ථ මෙ සුකතං බ්‍යම්‌හං, උබ්‌භයොජනමුග්‌ගතං 5;
‘‘Tattha me sukataṃ byamhaṃ, ubbhayojanamuggataṃ 6;
කූටාගාරවරූපෙතං, මහාසනසුභූසිතං.
Kūṭāgāravarūpetaṃ, mahāsanasubhūsitaṃ.
7.
7.
‘‘අච්‌ඡරා සතසහස්‌සා, උපතිට්‌ඨන්‌ති මං සදා;
‘‘Accharā satasahassā, upatiṭṭhanti maṃ sadā;
අඤ්‌ඤෙ දෙවෙ අතික්‌කම්‌ම, අතිරොචාමි සබ්‌බදා.
Aññe deve atikkamma, atirocāmi sabbadā.
8.
8.
‘‘චතුසට්‌ඨි දෙවරාජූනං, මහෙසිත්‌තමකාරයිං;
‘‘Catusaṭṭhi devarājūnaṃ, mahesittamakārayiṃ;
තෙසට්‌ඨි චක්‌කවත්‌තීනං, මහෙසිත්‌තමකාරයිං.
Tesaṭṭhi cakkavattīnaṃ, mahesittamakārayiṃ.
9.
9.
‘‘සුවණ්‌ණවණ්‌ණා හුත්‌වාන, භවෙසු සංසරාමහං;
‘‘Suvaṇṇavaṇṇā hutvāna, bhavesu saṃsarāmahaṃ;
සබ්‌බත්‌ථ පවරා හොමි, උපොසථස්‌සිදං ඵලං.
Sabbattha pavarā homi, uposathassidaṃ phalaṃ.
10.
10.
ලභාමි සබ්‌බමෙවෙතං, උපොසථස්‌සිදං ඵලං.
Labhāmi sabbamevetaṃ, uposathassidaṃ phalaṃ.
11.
11.
‘‘සොණ්‌ණමයං රූපිමයං, අථොපි ඵලිකාමයං;
‘‘Soṇṇamayaṃ rūpimayaṃ, athopi phalikāmayaṃ;
ලොහිතඞ්‌ගමයඤ්‌චෙව, සබ්‌බං පටිලභාමහං.
Lohitaṅgamayañceva, sabbaṃ paṭilabhāmahaṃ.
12.
12.
‘‘කොසෙය්‍යකම්‌බලියානි , ඛොමකප්‌පාසිකානි ච;
‘‘Koseyyakambaliyāni , khomakappāsikāni ca;
මහග්‌ඝානි ච වත්‌ථානි, සබ්‌බං පටිලභාමහං.
Mahagghāni ca vatthāni, sabbaṃ paṭilabhāmahaṃ.
13.
13.
‘‘අන්‌නං පානං ඛාදනීයං, වත්‌ථසෙනාසනානි ච;
‘‘Annaṃ pānaṃ khādanīyaṃ, vatthasenāsanāni ca;
සබ්‌බමෙතං පටිලභෙ, උපොසථස්‌සිදං ඵලං.
Sabbametaṃ paṭilabhe, uposathassidaṃ phalaṃ.
14.
14.
‘‘වරගන්‌ධඤ්‌ච මාලඤ්‌ච, චුණ්‌ණකඤ්‌ච විලෙපනං;
‘‘Varagandhañca mālañca, cuṇṇakañca vilepanaṃ;
සබ්‌බමෙතං පටිලභෙ, උපොසථස්‌සිදං ඵලං.
Sabbametaṃ paṭilabhe, uposathassidaṃ phalaṃ.
15.
15.
‘‘කූටාගාරඤ්‌ච පාසාදං, මණ්‌ඩපං හම්‌මියං ගුහං;
‘‘Kūṭāgārañca pāsādaṃ, maṇḍapaṃ hammiyaṃ guhaṃ;
සබ්‌බමෙතං පටිලභෙ, උපොසථස්‌සිදං ඵලං.
Sabbametaṃ paṭilabhe, uposathassidaṃ phalaṃ.
16.
16.
‘‘ජාතියා සත්‌තවස්‌සාහං, පබ්‌බජිං අනගාරියං;
‘‘Jātiyā sattavassāhaṃ, pabbajiṃ anagāriyaṃ;
අඩ්‌ඪමාසෙ අසම්‌පත්‌තෙ, අරහත්‌තමපාපුණිං.
Aḍḍhamāse asampatte, arahattamapāpuṇiṃ.
17.
17.
‘‘කිලෙසා ඣාපිතා මය්‌හං, භවා සබ්‌බෙ සමූහතා;
‘‘Kilesā jhāpitā mayhaṃ, bhavā sabbe samūhatā;
සබ්‌බාසවපරික්‌ඛීණා, නත්‌ථි දානි පුනබ්‌භවො.
Sabbāsavaparikkhīṇā, natthi dāni punabbhavo.
18.
18.
‘‘එකනවුතිතො කප්‌පෙ, යං කම්‌මමකරිං තදා;
‘‘Ekanavutito kappe, yaṃ kammamakariṃ tadā;
දුග්‌ගතිං නාභිජානාමි, උපොසථස්‌සිදං ඵලං.
Duggatiṃ nābhijānāmi, uposathassidaṃ phalaṃ.
19.
19.
‘‘කිලෙසා ඣාපිතා මය්‌හං…පෙ.… විහරාමි අනාසවා.
‘‘Kilesā jhāpitā mayhaṃ…pe… viharāmi anāsavā.
20.
20.
‘‘ස්‌වාගතං වත මෙ ආසි…පෙ.… කතං බුද්‌ධස්‌ස සාසනං.
‘‘Svāgataṃ vata me āsi…pe… kataṃ buddhassa sāsanaṃ.
21.
21.
‘‘පටිසම්‌භිදා චතස්‌සො…පෙ.… කතං බුද්‌ධස්‌ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්‌ථං සුදං එකූපොසථිකා භික්‌ඛුනී ඉමා ගාථායො අභාසිත්‌ථාති.
Itthaṃ sudaṃ ekūposathikā bhikkhunī imā gāthāyo abhāsitthāti.
එකූපොසථිකාථෙරියාපදානං පඨමං.
Ekūposathikātheriyāpadānaṃ paṭhamaṃ.
Footnotes:
