| Library / Tipiṭaka / ਤਿਪਿਟਕ • Tipiṭaka / ਅਪਦਾਨਪਾਲ਼ਿ • Apadānapāḷi |
੨. ਏਕੂਪੋਸਥਿਕવਗ੍ਗੋ
2. Ekūposathikavaggo
੧. ਏਕੂਪੋਸਥਿਕਾਥੇਰੀਅਪਦਾਨਂ
1. Ekūposathikātherīapadānaṃ
੧.
1.
‘‘ਨਗਰੇ ਬਨ੍ਧੁਮਤਿਯਾ, ਬਨ੍ਧੁਮਾ ਨਾਮ ਖਤ੍ਤਿਯੋ।
‘‘Nagare bandhumatiyā, bandhumā nāma khattiyo;
ਦਿવਸੇ ਪੁਣ੍ਣਮਾਯ ਸੋ, ਉਪવਸਿ ਉਪੋਸਥਂ॥
Divase puṇṇamāya so, upavasi uposathaṃ.
੨.
2.
‘‘ਅਹਂ ਤੇਨ ਸਮਯੇਨ, ਕੁਮ੍ਭਦਾਸੀ ਅਹਂ ਤਹਿਂ।
‘‘Ahaṃ tena samayena, kumbhadāsī ahaṃ tahiṃ;
ਦਿਸ੍વਾ ਸਰਾਜਕਂ ਸੇਨਂ, ਏવਾਹਂ ਚਿਨ੍ਤਯਿਂ ਤਦਾ॥
Disvā sarājakaṃ senaṃ, evāhaṃ cintayiṃ tadā.
੩.
3.
‘ਰਾਜਾਪਿ ਰਜ੍ਜਂ ਛਡ੍ਡੇਤ੍વਾ, ਉਪવਸਿ ਉਪੋਸਥਂ।
‘Rājāpi rajjaṃ chaḍḍetvā, upavasi uposathaṃ;
ਸਫਲਂ ਨੂਨ ਤਂ ਕਮ੍ਮਂ, ਜਨਕਾਯੋ ਪਮੋਦਿਤੋ’॥
Saphalaṃ nūna taṃ kammaṃ, janakāyo pamodito’.
੪.
4.
ਮਾਨਸਂ ਸਮ੍ਪਹਂਸਿਤ੍વਾ, ਉਪવਸਿਂ ਉਪੋਸਥਂ॥
Mānasaṃ sampahaṃsitvā, upavasiṃ uposathaṃ.
੫.
5.
‘‘ਅਹਂ ਉਪੋਸਥਂ ਕਤ੍વਾ, ਸਮ੍ਮਾਸਮ੍ਬੁਦ੍ਧਸਾਸਨੇ।
‘‘Ahaṃ uposathaṃ katvā, sammāsambuddhasāsane;
ਤੇਨ ਕਮ੍ਮੇਨ ਸੁਕਤੇਨ, ਤਾવਤਿਂਸਮਗਚ੍ਛਹਂ॥
Tena kammena sukatena, tāvatiṃsamagacchahaṃ.
੬.
6.
ਕੂਟਾਗਾਰવਰੂਪੇਤਂ, ਮਹਾਸਨਸੁਭੂਸਿਤਂ॥
Kūṭāgāravarūpetaṃ, mahāsanasubhūsitaṃ.
੭.
7.
‘‘ਅਚ੍ਛਰਾ ਸਤਸਹਸ੍ਸਾ, ਉਪਤਿਟ੍ਠਨ੍ਤਿ ਮਂ ਸਦਾ।
‘‘Accharā satasahassā, upatiṭṭhanti maṃ sadā;
ਅਞ੍ਞੇ ਦੇવੇ ਅਤਿਕ੍ਕਮ੍ਮ, ਅਤਿਰੋਚਾਮਿ ਸਬ੍ਬਦਾ॥
Aññe deve atikkamma, atirocāmi sabbadā.
੮.
8.
‘‘ਚਤੁਸਟ੍ਠਿ ਦੇવਰਾਜੂਨਂ, ਮਹੇਸਿਤ੍ਤਮਕਾਰਯਿਂ।
‘‘Catusaṭṭhi devarājūnaṃ, mahesittamakārayiṃ;
ਤੇਸਟ੍ਠਿ ਚਕ੍ਕવਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ॥
Tesaṭṭhi cakkavattīnaṃ, mahesittamakārayiṃ.
੯.
9.
‘‘ਸੁવਣ੍ਣવਣ੍ਣਾ ਹੁਤ੍વਾਨ, ਭવੇਸੁ ਸਂਸਰਾਮਹਂ।
‘‘Suvaṇṇavaṇṇā hutvāna, bhavesu saṃsarāmahaṃ;
ਸਬ੍ਬਤ੍ਥ ਪવਰਾ ਹੋਮਿ, ਉਪੋਸਥਸ੍ਸਿਦਂ ਫਲਂ॥
Sabbattha pavarā homi, uposathassidaṃ phalaṃ.
੧੦.
10.
ਲਭਾਮਿ ਸਬ੍ਬਮੇવੇਤਂ, ਉਪੋਸਥਸ੍ਸਿਦਂ ਫਲਂ॥
Labhāmi sabbamevetaṃ, uposathassidaṃ phalaṃ.
੧੧.
11.
‘‘ਸੋਣ੍ਣਮਯਂ ਰੂਪਿਮਯਂ, ਅਥੋਪਿ ਫਲਿਕਾਮਯਂ।
‘‘Soṇṇamayaṃ rūpimayaṃ, athopi phalikāmayaṃ;
ਲੋਹਿਤਙ੍ਗਮਯਞ੍ਚੇવ, ਸਬ੍ਬਂ ਪਟਿਲਭਾਮਹਂ॥
Lohitaṅgamayañceva, sabbaṃ paṭilabhāmahaṃ.
੧੨.
12.
‘‘ਕੋਸੇਯ੍ਯਕਮ੍ਬਲਿਯਾਨਿ , ਖੋਮਕਪ੍ਪਾਸਿਕਾਨਿ ਚ।
‘‘Koseyyakambaliyāni , khomakappāsikāni ca;
ਮਹਗ੍ਘਾਨਿ ਚ વਤ੍ਥਾਨਿ, ਸਬ੍ਬਂ ਪਟਿਲਭਾਮਹਂ॥
Mahagghāni ca vatthāni, sabbaṃ paṭilabhāmahaṃ.
੧੩.
13.
‘‘ਅਨ੍ਨਂ ਪਾਨਂ ਖਾਦਨੀਯਂ, વਤ੍ਥਸੇਨਾਸਨਾਨਿ ਚ।
‘‘Annaṃ pānaṃ khādanīyaṃ, vatthasenāsanāni ca;
ਸਬ੍ਬਮੇਤਂ ਪਟਿਲਭੇ, ਉਪੋਸਥਸ੍ਸਿਦਂ ਫਲਂ॥
Sabbametaṃ paṭilabhe, uposathassidaṃ phalaṃ.
੧੪.
14.
‘‘વਰਗਨ੍ਧਞ੍ਚ ਮਾਲਞ੍ਚ, ਚੁਣ੍ਣਕਞ੍ਚ વਿਲੇਪਨਂ।
‘‘Varagandhañca mālañca, cuṇṇakañca vilepanaṃ;
ਸਬ੍ਬਮੇਤਂ ਪਟਿਲਭੇ, ਉਪੋਸਥਸ੍ਸਿਦਂ ਫਲਂ॥
Sabbametaṃ paṭilabhe, uposathassidaṃ phalaṃ.
੧੫.
15.
‘‘ਕੂਟਾਗਾਰਞ੍ਚ ਪਾਸਾਦਂ, ਮਣ੍ਡਪਂ ਹਮ੍ਮਿਯਂ ਗੁਹਂ।
‘‘Kūṭāgārañca pāsādaṃ, maṇḍapaṃ hammiyaṃ guhaṃ;
ਸਬ੍ਬਮੇਤਂ ਪਟਿਲਭੇ, ਉਪੋਸਥਸ੍ਸਿਦਂ ਫਲਂ॥
Sabbametaṃ paṭilabhe, uposathassidaṃ phalaṃ.
੧੬.
16.
‘‘ਜਾਤਿਯਾ ਸਤ੍ਤવਸ੍ਸਾਹਂ, ਪਬ੍ਬਜਿਂ ਅਨਗਾਰਿਯਂ।
‘‘Jātiyā sattavassāhaṃ, pabbajiṃ anagāriyaṃ;
ਅਡ੍ਢਮਾਸੇ ਅਸਮ੍ਪਤ੍ਤੇ, ਅਰਹਤ੍ਤਮਪਾਪੁਣਿਂ॥
Aḍḍhamāse asampatte, arahattamapāpuṇiṃ.
੧੭.
17.
‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭવਾ ਸਬ੍ਬੇ ਸਮੂਹਤਾ।
‘‘Kilesā jhāpitā mayhaṃ, bhavā sabbe samūhatā;
ਸਬ੍ਬਾਸવਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭવੋ॥
Sabbāsavaparikkhīṇā, natthi dāni punabbhavo.
੧੮.
18.
‘‘ਏਕਨવੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ।
‘‘Ekanavutito kappe, yaṃ kammamakariṃ tadā;
ਦੁਗ੍ਗਤਿਂ ਨਾਭਿਜਾਨਾਮਿ, ਉਪੋਸਥਸ੍ਸਿਦਂ ਫਲਂ॥
Duggatiṃ nābhijānāmi, uposathassidaṃ phalaṃ.
੧੯.
19.
‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ॰… વਿਹਰਾਮਿ ਅਨਾਸવਾ॥
‘‘Kilesā jhāpitā mayhaṃ…pe… viharāmi anāsavā.
੨੦.
20.
‘‘ਸ੍વਾਗਤਂ વਤ ਮੇ ਆਸਿ…ਪੇ॰… ਕਤਂ ਬੁਦ੍ਧਸ੍ਸ ਸਾਸਨਂ॥
‘‘Svāgataṃ vata me āsi…pe… kataṃ buddhassa sāsanaṃ.
੨੧.
21.
‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ॰… ਕਤਂ ਬੁਦ੍ਧਸ੍ਸ ਸਾਸਨਂ’’॥
‘‘Paṭisambhidā catasso…pe… kataṃ buddhassa sāsanaṃ’’.
ਇਤ੍ਥਂ ਸੁਦਂ ਏਕੂਪੋਸਥਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ।
Itthaṃ sudaṃ ekūposathikā bhikkhunī imā gāthāyo abhāsitthāti.
ਏਕੂਪੋਸਥਿਕਾਥੇਰਿਯਾਪਦਾਨਂ ਪਠਮਂ।
Ekūposathikātheriyāpadānaṃ paṭhamaṃ.
Footnotes:
