| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
একুত্তরনযকথাৰণ্ণনা
Ekuttaranayakathāvaṇṇanā
৪২৪. ইতো পরন্তি ইতো সমুট্ঠানৰিনিচ্ছযকথায পরং। পরন্তি উত্তমং। একুত্তরং নযন্তি একেকঅঙ্গাতিরেকতায একুত্তরসঙ্খাতং এককদুকাদিনযং।
424.Ito paranti ito samuṭṭhānavinicchayakathāya paraṃ. Paranti uttamaṃ. Ekuttaraṃ nayanti ekekaaṅgātirekatāya ekuttarasaṅkhātaṃ ekakadukādinayaṃ.
৪২৫-৭. কে আপত্তিকরা ধম্মা…পে॰… কা চাদেসনগামিনীতি একেকপঞ্হৰসেন উত্তানত্থোযেৰ।
425-7.Ke āpattikarā dhammā…pe… kā cādesanagāminīti ekekapañhavasena uttānatthoyeva.
৪২৮. সমুট্ঠানানীতি আদিকো ৰিস্সজ্জনসঙ্খাতো উত্তরৰাদো। তত্থ সমুট্ঠানানি…পে॰… দীপিতাতি যস্মা এতেসং ৰসেন পুগ্গলো আপত্তিং করোতি আপজ্জতি, তস্মা ‘‘আপত্তিকরা’’তি ৰুত্তা।
428.Samuṭṭhānānīti ādiko vissajjanasaṅkhāto uttaravādo. Tattha samuṭṭhānāni…pe… dīpitāti yasmā etesaṃ vasena puggalo āpattiṃ karoti āpajjati, tasmā ‘‘āpattikarā’’ti vuttā.
৪২৯. তত্থাতি তাসু আপত্তীসু। লহুকাতি লহুকেন ৰিনযকম্মেন ৰিসুজ্ঝনতো লহুকা। গরুকেন ৰিনযকম্মেন ৰিসুজ্ঝনতো সঙ্ঘাদিসেসাপত্তি, কেনচি আকারেন অনাপত্তিভাৰং উপনেতুং অসক্কুণেয্যতো পারাজিকাপত্তি চ গরুকাপত্তি নাম, তা পন লহুকাসু ৰুত্তাসু তব্বিপরিযাযতো ঞাতুং সক্কাতি ৰিস্সজ্জনে ৰিসুং ন ৰুত্তা।
429.Tatthāti tāsu āpattīsu. Lahukāti lahukena vinayakammena visujjhanato lahukā. Garukena vinayakammena visujjhanato saṅghādisesāpatti, kenaci ākārena anāpattibhāvaṃ upanetuṃ asakkuṇeyyato pārājikāpatti ca garukāpatti nāma, tā pana lahukāsu vuttāsu tabbipariyāyato ñātuṃ sakkāti vissajjane visuṃ na vuttā.
৪৩১. দুট্ঠুং কুচ্ছিতভাৰং পরমজেগুচ্ছং নিন্দনীযভাৰং উলতি গচ্ছতীতি দুট্ঠুল্লং, পারাজিকসঙ্ঘাদিসেসং। তেনাহ ‘‘দুৰিধাপত্তি আদিতো’’তি।
431. Duṭṭhuṃ kucchitabhāvaṃ paramajegucchaṃ nindanīyabhāvaṃ ulati gacchatīti duṭṭhullaṃ, pārājikasaṅghādisesaṃ. Tenāha ‘‘duvidhāpatti ādito’’ti.
৪৩২. পঞ্চানন্তরিযসংযুত্তাতি মাতুঘাতকপিতুঘাতকঅরহন্তঘাতকেহি আপন্না মনুস্সৰিগ্গহপারাজিকাপত্তি চ লোহিতুপ্পাদকসঙ্ঘভেদকানং অভব্বতাহেতুকা কাযৰচীদ্ৰারপ্পৰত্তা অকুসলচেতনাসঙ্খাতা পারাজিকা চ অনন্তরমেৰ অপাযুপ্পত্তিহেতুতায ইমে পঞ্চ অনন্তরসংযুত্তা নাম। তা পন মিচ্ছত্তনিযতেসু অন্তোগধত্তা ‘‘নিযতা’’তি ৰুত্তা।
432.Pañcānantariyasaṃyuttāti mātughātakapitughātakaarahantaghātakehi āpannā manussaviggahapārājikāpatti ca lohituppādakasaṅghabhedakānaṃ abhabbatāhetukā kāyavacīdvārappavattā akusalacetanāsaṅkhātā pārājikā ca anantarameva apāyuppattihetutāya ime pañca anantarasaṃyuttā nāma. Tā pana micchattaniyatesu antogadhattā ‘‘niyatā’’ti vuttā.
পরিৰারে (পরি॰ ৩২১) পন অঞ্ঞেপি অন্তরাযিকাদী বহূ এককা দস্সিতা, তে পন গন্থভীরুকজনানুগ্গহেন আচরিযেন ইধ ন দস্সিতা। অত্থিকেহি পরিৰারেযেৰ (পরি॰ ৩২১) গহেতব্বা। এত্থ চ সত্তপি আপত্তিযো সঞ্চিচ্চ ৰীতিক্কন্তা সগ্গন্তরাযঞ্চেৰ মোক্খন্তরাযঞ্চ করোন্তীতি অন্তরাযিকা। অজানন্তেন ৰীতিক্কন্তা পন পণ্ণত্তিৰজ্জাপত্তি নেৰ সগ্গন্তরাযং, ন মোক্খন্তরাযং করোতীতি অনন্তরাযিকা। অন্তরাযিকং আপন্নস্সপি দেসনাগামিনিং দেসেত্ৰা ৰুট্ঠানগামিনিতো ৰুট্ঠায সুদ্ধিপত্তস্স, সামণেরভূমিযং ঠিতস্স চ অৰারিতো সগ্গমগ্গমোক্খমগ্গোতি।
Parivāre (pari. 321) pana aññepi antarāyikādī bahū ekakā dassitā, te pana ganthabhīrukajanānuggahena ācariyena idha na dassitā. Atthikehi parivāreyeva (pari. 321) gahetabbā. Ettha ca sattapi āpattiyo sañcicca vītikkantā saggantarāyañceva mokkhantarāyañca karontīti antarāyikā. Ajānantena vītikkantā pana paṇṇattivajjāpatti neva saggantarāyaṃ, na mokkhantarāyaṃ karotīti anantarāyikā. Antarāyikaṃ āpannassapi desanāgāminiṃ desetvā vuṭṭhānagāminito vuṭṭhāya suddhipattassa, sāmaṇerabhūmiyaṃ ṭhitassa ca avārito saggamaggamokkhamaggoti.
একককথাৰণ্ণনা।
Ekakakathāvaṇṇanā.
৪৩৫. অদ্ধৰিহীনো নাম ঊনৰীসতিৰস্সো। অঙ্গৰিহীনো নাম হত্থচ্ছিন্নাদিভেদো। ৰত্থুৰিপন্নো নাম পণ্ডকো, তিরচ্ছানগতো, উভতোব্যঞ্জনকো চ। অৰসেসা থেয্যসংৰাসকাদযো অট্ঠ অভব্বট্ঠানপ্পত্তা দুক্কটকারিনো নাম, ইমস্মিংযেৰ অত্তভাৰে দুক্কটেন অত্তনো কম্মেন অভব্বট্ঠানপ্পত্তাতি অত্থো। অপরিপুণ্ণোতি অপরিপুণ্ণপত্তচীৰরো। নো যাচতীতি উপসম্পন্নং ন যাচতি। পটিসিদ্ধাতি ‘‘দ্ৰে পুগ্গলা ন উপসম্পাদেতব্বা’’তিআদিনা (পরি॰ ৩২২) ৰারিতা।
435.Addhavihīno nāma ūnavīsativasso. Aṅgavihīno nāma hatthacchinnādibhedo. Vatthuvipanno nāma paṇḍako, tiracchānagato, ubhatobyañjanako ca. Avasesā theyyasaṃvāsakādayo aṭṭha abhabbaṭṭhānappattā dukkaṭakārino nāma, imasmiṃyeva attabhāve dukkaṭena attano kammena abhabbaṭṭhānappattāti attho. Aparipuṇṇoti aparipuṇṇapattacīvaro. No yācatīti upasampannaṃ na yācati. Paṭisiddhāti ‘‘dve puggalā na upasampādetabbā’’tiādinā (pari. 322) vāritā.
৪৩৬. হৰেতি একংসত্থে নিপাতো। লদ্ধসমাপত্তিস্স ভিক্খুনো দীপিতা আপত্তি অত্থি হৰে অত্থেৰ। নো লদ্ধসমাপত্তিস্সাতি অলদ্ধসমাপত্তিস্স দীপিতা আপত্তি অত্থেৰাতি যোজনা।
436.Haveti ekaṃsatthe nipāto. Laddhasamāpattissa bhikkhuno dīpitā āpatti atthi have attheva. No laddhasamāpattissāti aladdhasamāpattissa dīpitā āpatti atthevāti yojanā.
৪৩৭. ভূতস্সাতি অত্তনি সন্তস্স উত্তরিমনুস্সধম্মস্স। অভূতারোচনাপত্তীতি চতুত্থপারাজিকাপত্তি। অসমাপত্তিলাভিনো নিদ্দিসেতি যোজনা।
437.Bhūtassāti attani santassa uttarimanussadhammassa. Abhūtārocanāpattīti catutthapārājikāpatti. Asamāpattilābhino niddiseti yojanā.
৪৩৮. ‘‘অত্থি সদ্ধম্মসংযুত্তা’’তিআদীসু অত্থি-সদ্দো পচ্চত্তেকৰচনন্তেহি পচ্চেকং যোজেতব্বো।
438.‘‘Atthisaddhammasaṃyuttā’’tiādīsu atthi-saddo paccattekavacanantehi paccekaṃ yojetabbo.
৪৩৯. পদসোধম্মমূলাদীতি আদি-সদ্দেন ‘‘উত্তরিছপ্পঞ্চৰাচাধম্মদেসনা’’তি আপত্তীনং গহণং।
439.Padasodhammamūlādīti ādi-saddena ‘‘uttarichappañcavācādhammadesanā’’ti āpattīnaṃ gahaṇaṃ.
৪৪০. ভোগেতি পরিভোগে। ‘‘সপরিক্খারসংযুতা’’তি ইদঞ্চ নিদস্সনমত্তং। ‘‘পত্তচীৰরানং নিস্সজ্জনে, কিলিট্ঠচীৰরানং অধোৰনে, মলগ্গহিতপত্তস্স অপচনে’’তি এৰমাদিকা অযুত্তপরিভোগা আপত্তিযোপি সকপরিক্খারসংযুত্তাযেৰ।
440.Bhogeti paribhoge. ‘‘Saparikkhārasaṃyutā’’ti idañca nidassanamattaṃ. ‘‘Pattacīvarānaṃ nissajjane, kiliṭṭhacīvarānaṃ adhovane, malaggahitapattassa apacane’’ti evamādikā ayuttaparibhogā āpattiyopi sakaparikkhārasaṃyuttāyeva.
৪৪১. মঞ্চপীঠাদিন্তি আদি-সদ্দেন ভিসিআদীনং গহণং। অজ্ঝোকাসত্থরেপি চাতি অজ্ঝোকাসে অত্থরে অত্থরাপনে সতি। অনাপুচ্ছাৰ গমনেতি অনাপুচ্ছিত্ৰা ৰা গমনে। ৰা-সদ্দেন অনুদ্ধরিত্ৰা ৰা অনুদ্ধরাপেত্ৰা ৰা গমনং সঙ্গণ্হাতি। পরসন্তকসংযুতাতি পরপরিক্খারপটিবদ্ধা।
441.Mañcapīṭhādinti ādi-saddena bhisiādīnaṃ gahaṇaṃ. Ajjhokāsattharepi cāti ajjhokāse atthare attharāpane sati. Anāpucchāva gamaneti anāpucchitvā vā gamane. Vā-saddena anuddharitvā vā anuddharāpetvā vā gamanaṃ saṅgaṇhāti. Parasantakasaṃyutāti paraparikkhārapaṭibaddhā.
৪৪৩. ‘‘সিখরণীসী’’তি যং ৰচনং সচ্চং, তং ভণতো গরুকং দুট্ঠুল্লৰাচাসঙ্ঘাদিসেসো সিযাতি যোজনা।
443. ‘‘Sikharaṇīsī’’ti yaṃ vacanaṃ saccaṃ, taṃ bhaṇato garukaṃ duṭṭhullavācāsaṅghādiseso siyāti yojanā.
৪৪৫. গরুকাপত্তীতি উত্তরিমনুস্সধম্মপারাজিকাপত্তি। ভূতস্সারোচনেতি ভূতস্স উত্তরিমনুস্সধম্মস্স অনুপসম্পন্নস্স আরোচনে। সচ্চং ৰদতোতি সচ্চং ৰচনং ৰদন্তস্স। লহুকাতি পাচিত্তিযাপত্তি।
445.Garukāpattīti uttarimanussadhammapārājikāpatti. Bhūtassārocaneti bhūtassa uttarimanussadhammassa anupasampannassa ārocane. Saccaṃ vadatoti saccaṃ vacanaṃ vadantassa. Lahukāti pācittiyāpatti.
৪৪৭. ৰিকোপেতুন্তি ৰগ্গকরণেন ৰিকোপেতুং। হত্থপাসং জহন্তি অন্তোসীমায এৰ হত্থপাসং জহন্তো, হত্থপাসং জহিত্ৰা একমন্তং নিসীদন্তোতি অত্থো। ফুসেতি ভূমিগতো ফুসেয্য।
447.Vikopetunti vaggakaraṇena vikopetuṃ. Hatthapāsaṃ jahanti antosīmāya eva hatthapāsaṃ jahanto, hatthapāsaṃ jahitvā ekamantaṃ nisīdantoti attho. Phuseti bhūmigato phuseyya.
৪৪৮. ৰেহাসকুটিযা উপরি আহচ্চপাদকং মঞ্চং ৰা পীঠং ৰা অভিনিসীদন্তো ৰেহাসগতো আপজ্জতীতি যোজনা। সচে তং ভূমিযং পঞ্ঞপেত্ৰা নিসজ্জেয্য, ন আপজ্জেয্য। তেন ৰুত্তং ‘‘ন ভূমিতো’’তি।
448. Vehāsakuṭiyā upari āhaccapādakaṃ mañcaṃ vā pīṭhaṃ vā abhinisīdanto vehāsagato āpajjatīti yojanā. Sace taṃ bhūmiyaṃ paññapetvā nisajjeyya, na āpajjeyya. Tena vuttaṃ ‘‘na bhūmito’’ti.
৪৪৯. পৰিসন্তোতি আরামং পৰিসন্তো। নিক্খমন্তি ততো এৰ নিক্খমন্তো। তন্তি আরামং।
449.Pavisantoti ārāmaṃ pavisanto. Nikkhamanti tato eva nikkhamanto. Tanti ārāmaṃ.
৪৫০. ৰত্তমপূরেত্ৰানাতি সীসতো ছত্তাপনযনং, পাদতো উপাহনামুঞ্চনৰত্তং অকত্ৰা। নিক্খমন্তি বহি নিক্খমন্তো ছত্তুপাহনং ধারেন্তোপি ন আপজ্জতি।
450.Vattamapūretvānāti sīsato chattāpanayanaṃ, pādato upāhanāmuñcanavattaṃ akatvā. Nikkhamanti bahi nikkhamanto chattupāhanaṃ dhārentopi na āpajjati.
৪৫১. ‘‘নিক্খমন্তো’’তি ইদং ‘‘নিক্খম’’ন্তি এতস্স অত্থপদং। পৰিসং ন চাতি যং আরামং সন্ধায গতো, তং পৰিসন্তো ন আপজ্জেয্য।
451.‘‘Nikkhamanto’’ti idaṃ ‘‘nikkhama’’nti etassa atthapadaṃ. Pavisaṃ na cāti yaṃ ārāmaṃ sandhāya gato, taṃ pavisanto na āpajjeyya.
৪৫৩. যা কাচি ভিক্খুনী অতিগম্ভীরং উদকসুদ্ধিকং আদিযন্তী আপত্তিং আপজ্জতীতি যোজনা।
453. Yā kāci bhikkhunī atigambhīraṃ udakasuddhikaṃ ādiyantī āpattiṃ āpajjatīti yojanā.
৪৫৭. ৰত্তং পনত্তনোতি যং অত্তনো নেত্থারৰত্তং ৰুত্তং, সো তং অসমাদিযন্তোৰ আপজ্জতি নামাতি যোজনা।
457.Vattaṃ panattanoti yaṃ attano netthāravattaṃ vuttaṃ, so taṃ asamādiyantova āpajjati nāmāti yojanā.
৪৬০. ইতরস্স আচরিযস্স, তথা সদ্ধিৰিহারিকস্স চ।
460.Itarassa ācariyassa, tathā saddhivihārikassa ca.
৪৬২. দদমানোতি পারিৰত্তকং ৰিনা দদমানো।
462.Dadamānoti pārivattakaṃ vinā dadamāno.
৪৬৩. মুদূতি মুদুপিট্ঠিকো। ‘‘লম্বীআদিনো’’তি পদচ্ছেদো। আদি-সদ্দেন ‘‘হত্থেন উপক্কমিত্ৰা অসুচিং মোচেন্তস্স, ঊরুনা অঙ্গজাতং পেল্লন্তস্স, অত্তানং ৰধিত্ৰা ৰধিত্ৰা রোদন্তিযা ভিক্খুনিযা আপত্তী’’তি এৰমাদীনং সঙ্গহো। অত্তাতি এত্থ নিস্সিতাতি উত্তরপদলোপো, ৰিভত্তিলোপো চ নিরুত্তিলক্খণেন দট্ঠব্বো। সেসাতি মেথুনধম্মকাযসংসগ্গপহারদানাদীসু ৰুত্তাপত্তি। পরনিস্সিতাতি পরং নিস্সায আপজ্জিতব্বাতি অত্থো।
463.Mudūti mudupiṭṭhiko. ‘‘Lambīādino’’ti padacchedo. Ādi-saddena ‘‘hatthena upakkamitvā asuciṃ mocentassa, ūrunā aṅgajātaṃ pellantassa, attānaṃ vadhitvā vadhitvā rodantiyā bhikkhuniyā āpattī’’ti evamādīnaṃ saṅgaho. Attāti ettha nissitāti uttarapadalopo, vibhattilopo ca niruttilakkhaṇena daṭṭhabbo. Sesāti methunadhammakāyasaṃsaggapahāradānādīsu vuttāpatti. Paranissitāti paraṃ nissāya āpajjitabbāti attho.
৪৬৫. ‘‘ন , ভিক্খৰে, ওৰাদো ন গহেতব্বো’’তি ৰচনতো ওৰাদং ন গণ্হন্তো ন পটিগ্গণ্হন্তো ৰজ্জতং আপজ্জতি নাম।
465. ‘‘Na , bhikkhave, ovādo na gahetabbo’’ti vacanato ovādaṃ na gaṇhanto na paṭiggaṇhanto vajjataṃ āpajjati nāma.
৪৭০. অরুণুগ্গেতি অরুণুগ্গমনে। নঅরুণুগ্গমেতি অরুণুগ্গমনতো অঞ্ঞস্মিং কালে।
470.Aruṇuggeti aruṇuggamane. Naaruṇuggameti aruṇuggamanato aññasmiṃ kāle.
৪৭১. একরত্তাতিক্কমে ছারত্তাতিক্কমে সত্তাহাতিক্কমে দসাহাতিক্কমেতি যোজনা। আদি-সদ্দেন মাসাদীনং সঙ্গহো। ৰুত্তমাপত্তিন্তি সব্বত্থ নিস্সগ্গিযে পাচিত্তিযাপত্তিং। ‘‘আপজ্জতি অরুণুগ্গমে’’তি পদচ্ছেদো।
471. Ekarattātikkame chārattātikkame sattāhātikkame dasāhātikkameti yojanā. Ādi-saddena māsādīnaṃ saṅgaho. Vuttamāpattinti sabbattha nissaggiye pācittiyāpattiṃ. ‘‘Āpajjati aruṇuggame’’ti padacchedo.
৪৭৩. পরসন্তকং রুক্খলতাদিং থেয্যায ছিন্দন্তস্স পারাজিকং, ছিন্দন্তস্স পাচিত্তিমত্তং হোতীতি আহ ‘‘ভূতগামং ছিন্দন্তো পারাজিকঞ্চ পাচিত্তিঞ্চ ফুসে’’তি।
473. Parasantakaṃ rukkhalatādiṃ theyyāya chindantassa pārājikaṃ, chindantassa pācittimattaṃ hotīti āha ‘‘bhūtagāmaṃ chindanto pārājikañca pācittiñca phuse’’ti.
৪৭৫. ছাদেন্তো পনাতি এত্থ ‘‘কা আপত্তী’’তি সেসো। তত্র আহ ‘‘আপত্তিং ছাদেন্তো নরো আপজ্জতী’’তি।
475.Chādento panāti ettha ‘‘kā āpattī’’ti seso. Tatra āha ‘‘āpattiṃ chādento naro āpajjatī’’ti.
অচ্ছিন্নোতি অচ্ছিন্নচীৰরো। নচ্ছাদেন্তোতি তিণেন ৰা পণ্ণেন ৰা সাখাভঙ্গাদিনা যেন কেনচি অত্তনো হিরিকোপিনং অপ্পটিচ্ছাদেন্তো। যথাহ – ‘‘তিণেন ৰা পণ্ণেন ৰা পটিচ্ছাদেত্ৰা আগন্তব্বং, ন ত্ৰেৰ নগ্গেন আগন্তব্বং। যো আগচ্ছেয্য, আপত্তি দুক্কটস্সা’’তি (পারা॰ ৫১৭)।
Acchinnoti acchinnacīvaro. Nacchādentoti tiṇena vā paṇṇena vā sākhābhaṅgādinā yena kenaci attano hirikopinaṃ appaṭicchādento. Yathāha – ‘‘tiṇena vā paṇṇena vā paṭicchādetvā āgantabbaṃ, na tveva naggena āgantabbaṃ. Yo āgaccheyya, āpatti dukkaṭassā’’ti (pārā. 517).
৪৭৬. কুসচীরাদিন্তি আদি-সদ্দেন ৰাকচীরফলকচীরাদীনং তিত্থিযধজানং গহণং। ধারেন্তো কোচি আপজ্জতীতি সেসো। তত্রাহ – ‘‘কুসচীরাদীনি ধারেন্তো ধারেন্তো আপজ্জতী’’তি (পরি॰ অট্ঠ॰ ৩২২)।
476.Kusacīrādinti ādi-saddena vākacīraphalakacīrādīnaṃ titthiyadhajānaṃ gahaṇaṃ. Dhārento koci āpajjatīti seso. Tatrāha – ‘‘kusacīrādīni dhārento dhārento āpajjatī’’ti (pari. aṭṭha. 322).
৪৭৭. যং নিস্সট্ঠপত্তং ‘‘অযং তে ভিক্খু পত্তো যাৰভেদনায ধারেতব্বো’’তি দিন্নং, তং সক্কচ্চং অধারেন্তো চ দোসৰা হোতি আপজ্জতি আপত্তিং। সচিত্তকাচিত্তকদুকস্স সঞ্ঞাৰিমোক্খদুকং যথাক্কমং পরিযাযোতি আহ ‘‘সচিত্তকদুক’’ন্তিআদি।
477. Yaṃ nissaṭṭhapattaṃ ‘‘ayaṃ te bhikkhu patto yāvabhedanāya dhāretabbo’’ti dinnaṃ, taṃ sakkaccaṃ adhārento cadosavā hoti āpajjati āpattiṃ. Sacittakācittakadukassa saññāvimokkhadukaṃ yathākkamaṃ pariyāyoti āha ‘‘sacittakaduka’’ntiādi.
দুককথাৰণ্ণনা।
Dukakathāvaṇṇanā.
৪৭৮. যা আপত্তি নাথে তিট্ঠন্তে হোতি, নো পরিনিব্বুতে, সা আপত্তি অত্থি। যা আপত্তি নাথে পরিনিব্বুতে হোতি, ন তু তিট্ঠন্তে, সাপি অত্থি। যা আপত্তি নাথে তিট্ঠন্তেপি হোতি পরিনিব্বুতেপি, সা আপত্তি অত্থীতি যোজনা।
478. Yā āpatti nāthe tiṭṭhante hoti, no parinibbute, sā āpatti atthi. Yā āpatti nāthe parinibbute hoti, na tu tiṭṭhante, sāpi atthi. Yā āpatti nāthe tiṭṭhantepi hoti parinibbutepi, sā āpatti atthīti yojanā.
৪৭৯. সা কতমাতি আহ ‘‘রুহিরুপ্পাদনাপত্তী’’তিআদি। তত্থ থেরমাৰুসৰাদেন, ৰদতো পরিনিব্বুতেতি ‘‘যথা খো পনানন্দ, এতরহি ভিক্খূ অঞ্ঞমঞ্ঞং আৰুসোৰাদেন সমুদাচরন্তি, ন খো মমচ্চযেন এৰং সমুদাচরিতব্বং…পে॰… নৰকতরেন ভিক্খুনা থেরতরো ভিক্খু ‘ভন্তে’তি ৰা ‘আযস্মা’তি ৰা সমুদাচরিতব্বো’’তি (দী॰ নি॰ ২.২১৬) ৰচনতো থেরং আৰুসোৰাদেন সমুদাচরণপচ্চযা আপত্তিং পরিনিব্বুতে ভগৰতি আপজ্জতি, নো তিট্ঠন্তেতি অত্থো।
479. Sā katamāti āha ‘‘ruhiruppādanāpattī’’tiādi. Tattha theramāvusavādena, vadato parinibbuteti ‘‘yathā kho panānanda, etarahi bhikkhū aññamaññaṃ āvusovādena samudācaranti, na kho mamaccayena evaṃ samudācaritabbaṃ…pe… navakatarena bhikkhunā therataro bhikkhu ‘bhante’ti vā ‘āyasmā’ti vā samudācaritabbo’’ti (dī. ni. 2.216) vacanato theraṃ āvusovādena samudācaraṇapaccayā āpattiṃ parinibbute bhagavati āpajjati, no tiṭṭhanteti attho.
৪৮১. কথং কালেযেৰ আপত্তি সিযা, ন ৰিকালে। কথং ৰিকালেযেৰ আপত্তি সিযা, কালে ন সিযা। কথং কালে চেৰ ৰিকালে চাতি উভযত্থ সিযাতি পঞ্হে।
481. Kathaṃ kāleyeva āpatti siyā, na vikāle. Kathaṃ vikāleyeva āpatti siyā, kāle na siyā. Kathaṃ kāle ceva vikāle cāti ubhayattha siyāti pañhe.
৪৮২. যথাক্কমং ৰিস্সজ্জেন্তো আহ ‘‘ভুঞ্জতো’’তিআদি।
482. Yathākkamaṃ vissajjento āha ‘‘bhuñjato’’tiādi.
৪৮৩. অৰসেসং পন সব্বং আপত্তিং কালৰিকালেসু সব্বদা আপজ্জতি, তত্থ চ সংসযো নত্থীতি যোজনা।
483. Avasesaṃ pana sabbaṃ āpattiṃ kālavikālesu sabbadā āpajjati, tattha ca saṃsayo natthīti yojanā.
৪৮৪. ‘‘অত্থাপত্তি রত্তিং আপজ্জতি, নো দিৰা, অত্থাপত্তি দিৰা আপজ্জতি, নো রত্তিং, অত্থাপত্তি রত্তিঞ্চেৰ আপজ্জতি দিৰা চা’’তি (পরি॰ ৩২৩) ৰুত্তং তিকং দস্সেতুমাহ ‘‘রত্তিমেৰা’’তিআদি।
484. ‘‘Atthāpatti rattiṃ āpajjati, no divā, atthāpatti divā āpajjati, no rattiṃ, atthāpatti rattiñceva āpajjati divā cā’’ti (pari. 323) vuttaṃ tikaṃ dassetumāha ‘‘rattimevā’’tiādi.
৪৮৬. অত্থাপত্তি দসৰস্সো আপজ্জতি, নো ঊনদসৰস্সো, সা কথং সিযা। অত্থাপত্তি ঊনদসৰস্সো আপজ্জতি, নো দসৰস্সো, সা কথং হোতি। অত্থাপত্তি দসৰস্সোপি আপজ্জতি ঊনদসৰস্সোপীতি উভযত্থপি আপত্তি কথং হোতীতি যোজনা।
486. Atthāpatti dasavasso āpajjati, no ūnadasavasso, sā kathaṃ siyā. Atthāpatti ūnadasavasso āpajjati, no dasavasso, sā kathaṃ hoti. Atthāpatti dasavassopi āpajjati ūnadasavassopīti ubhayatthapi āpatti kathaṃ hotīti yojanā.
৪৮৭. তত্থ ৰিস্সজ্জনমাহ ‘‘উপট্ঠাপেতী’’তিআদি। ‘‘বালো’’তি এতস্স হি অত্থপদং ‘‘অব্যত্তো’’তি।
487. Tattha vissajjanamāha ‘‘upaṭṭhāpetī’’tiādi. ‘‘Bālo’’ti etassa hi atthapadaṃ ‘‘abyatto’’ti.
৪৮৮. ঊনদসৰস্সো এৰং ‘‘অহং পণ্ডিতো’’তি পরিসং গণ্হতি, তথা আপত্তিং আপজ্জতীতি যোজনা। ‘‘দসৰস্সো ঊনো’’তি পদচ্ছেদো। দসৰস্সো, ঊনদসৰস্সো চাতি উভোপেতে পরিসুপট্ঠাপনাপত্তিতো অঞ্ঞং আপত্তিং আপজ্জতীতি যোজনা। এত্থ চ ‘‘আপজ্জন্তে’’তি ৰত্তব্বে গাথাবন্ধৰসেন ন-কারলোপো।
488. Ūnadasavasso evaṃ ‘‘ahaṃ paṇḍito’’ti parisaṃ gaṇhati, tathā āpattiṃ āpajjatīti yojanā. ‘‘Dasavasso ūno’’ti padacchedo. Dasavasso, ūnadasavasso cāti ubhopete parisupaṭṭhāpanāpattito aññaṃ āpattiṃ āpajjatīti yojanā. Ettha ca ‘‘āpajjante’’ti vattabbe gāthābandhavasena na-kāralopo.
৪৮৯. কথং কাল়ে আপত্তিং আপজ্জতি, ন জুণ্হে, কথং জুণ্হে আপত্তিং আপজ্জতি, ন কাল়স্মিং, কথং কাল়ে চ জুণ্হে চাতি উভযত্থপি আপজ্জতীতি যোজনা।
489. Kathaṃ kāḷe āpattiṃ āpajjati, na juṇhe, kathaṃ juṇhe āpattiṃ āpajjati, na kāḷasmiṃ, kathaṃ kāḷe ca juṇhe cāti ubhayatthapi āpajjatīti yojanā.
৪৯০. ৰিস্সজ্জনমাহ ‘‘ৰস্স’’ন্তিআদি। ‘‘আপজ্জতে অপ্পৰারেন্তো’’তি পদচ্ছেদো। জুণ্হেতি পুরিমপক্খে। কাল়কেতি অপরপক্খে।
490. Vissajjanamāha ‘‘vassa’’ntiādi. ‘‘Āpajjate appavārento’’ti padacchedo. Juṇheti purimapakkhe. Kāḷaketi aparapakkhe.
৪৯১. অৰিপত্তিনাতি চতুব্বিধৰিপত্তিরহিতত্তা অৰিপত্তিনা ভগৰতা পঞ্ঞত্তং। অৰসেসন্তি ৰস্সং অনুপগমনাপত্তিযা চ পৰারণাপত্তিযা চ অৰসেসং সব্বং আপত্তিং।
491.Avipattināti catubbidhavipattirahitattā avipattinā bhagavatā paññattaṃ. Avasesanti vassaṃ anupagamanāpattiyā ca pavāraṇāpattiyā ca avasesaṃ sabbaṃ āpattiṃ.
৪৯২. ৰস্সূপগমনং কাল়ে কপ্পতি, জুণ্হে নো কপ্পতি, পৰারণা জুণ্হে কপ্পতি, কাল়ে নো কপ্পতি, সেসং অনুঞ্ঞাতং সব্বং সঙ্ঘকিচ্চং কাল়ে চ জুণ্হে চাতি উভযত্থপি কপ্পতীতি যোজনা।
492. Vassūpagamanaṃ kāḷe kappati, juṇhe no kappati, pavāraṇā juṇhe kappati, kāḷe no kappati, sesaṃ anuññātaṃ sabbaṃ saṅghakiccaṃ kāḷe ca juṇhe cāti ubhayatthapi kappatīti yojanā.
৪৯৩. অত্থাপত্তি হেমন্তে হোতি, ইতরউতুদ্ৰযে গিম্হানৰস্সানসঙ্খাতে ন হোতি, অত্থাপত্তি গিম্হেযেৰ হোতি, ন সেসেসু ৰস্সানহেমন্তসঙ্খাতেসু, অত্থাপত্তি ৰস্সে হোতি, নো ইতরদ্ৰযে হেমন্তগিম্হসঙ্খাতেতি যোজনা।
493. Atthāpatti hemante hoti, itarautudvaye gimhānavassānasaṅkhāte na hoti, atthāpatti gimheyeva hoti, na sesesu vassānahemantasaṅkhātesu, atthāpatti vasse hoti, no itaradvaye hemantagimhasaṅkhāteti yojanā.
৪৯৪-৬. সা তিৰিধাপি আপত্তি কতমাতি আহ ‘‘দিনে পাটিপদক্খাতে’’তিআদি। তত্থ দিনে…পে॰… পুণ্ণমাসিযাতি অপরকত্তিকপুণ্ণমাসিযা কাল়পক্খপাটিপদদিৰসে পচ্চুদ্ধরিত্ৰা ৰিকপ্পেত্ৰা ঠপিতং পন তং ৰস্সসাটিকচীৰরং সচে হেমন্তে নিৰাসেতি, হেমন্তে আপজ্জতীতি যোজনা।
494-6. Sā tividhāpi āpatti katamāti āha ‘‘dine pāṭipadakkhāte’’tiādi. Tattha dine…pe… puṇṇamāsiyāti aparakattikapuṇṇamāsiyā kāḷapakkhapāṭipadadivase paccuddharitvā vikappetvā ṭhapitaṃ pana taṃ vassasāṭikacīvaraṃ sace hemante nivāseti, hemante āpajjatīti yojanā.
পচ্ছিমেতি এত্থ সামিৰচনপ্পসঙ্গে ভুম্মং। পচ্ছিমস্স কত্তিকস্স যস্মিং পুণ্ণমে দিৰসে ৰস্সিকসাটিকচীৰরং পচ্চুদ্ধরিতব্বং, তস্মিং দিৰসে তং অপচ্চুদ্ধরিত্ৰাৰ পাটিপদে অরুণং উট্ঠাপেন্তো অপচ্চুদ্ধরণপচ্চযা আপত্তি হেমন্তেযেৰ আপজ্জতি, ইতরে গিম্হানৰস্সানউতুদ্ৰযে ন আপজ্জতীতি কুরুন্দট্ঠকথাযং (পরি॰ অট্ঠ॰ ৩২৩) নিদ্দিট্ঠন্তি যোজনা। ‘‘অনুজানামি, ভিক্খৰে, ৰস্সিকসাটিকং ৰস্সানং চতুমাসং অধিট্ঠাতুং, ততো পরং ৰিকপ্পেতু’’ন্তি (মহাৰ॰ ৩৫৮) ৰুত্তপাল়িযা কুরুন্দট্ঠকথাৰচনস্স অৰিরুজ্ঝনতো ‘‘তম্পি সুৰুত্ত’’ন্তি (পরি॰ অট্ঠ॰ ৩২৩) সমন্তপাসাদিকায ৰুত্তত্তা ‘‘হেমন্তে আপজ্জতী’’তি ৰচনস্স উভযম্পি অত্থো হোতীতি গহেতব্বং।
Pacchimeti ettha sāmivacanappasaṅge bhummaṃ. Pacchimassa kattikassa yasmiṃ puṇṇame divase vassikasāṭikacīvaraṃ paccuddharitabbaṃ, tasmiṃ divase taṃ apaccuddharitvāva pāṭipade aruṇaṃ uṭṭhāpento apaccuddharaṇapaccayā āpatti hemanteyeva āpajjati, itare gimhānavassānautudvaye na āpajjatīti kurundaṭṭhakathāyaṃ (pari. aṭṭha. 323) niddiṭṭhanti yojanā. ‘‘Anujānāmi, bhikkhave, vassikasāṭikaṃ vassānaṃ catumāsaṃ adhiṭṭhātuṃ, tato paraṃ vikappetu’’nti (mahāva. 358) vuttapāḷiyā kurundaṭṭhakathāvacanassa avirujjhanato ‘‘tampi suvutta’’nti (pari. aṭṭha. 323) samantapāsādikāya vuttattā ‘‘hemante āpajjatī’’ti vacanassa ubhayampi attho hotīti gahetabbaṃ.
৪৯৭. গিম্হানমাসানং সম্বন্ধিনি গিম্হিকে উতুম্হি। মাসতো অতিরেকো অতিরেকমাসোতি কত্ৰা অতিরেকমাসো কালো সেসোতি ৰত্তব্বে কালে। পরিযেসন্তোতি অঞ্ঞাতিকঅপ্পৰারিতট্ঠানতো সতুপ্পাদকরণেন ৰস্সিকসাটিকং পরিযেসন্তো চ অতিরেকমাসো সেসোতি কত্ৰা নিৰাসেন্তো চ গিম্হে আপত্তিং আপজ্জতি। ‘‘ন তু এৰ ইতরউতুদ্ৰযে’’তি পদচ্ছেদো। গিম্হে পরিযেসন্তো পুরিমমাসত্তযে আপজ্জতীতি কত্ৰা নিৰাসেন্তো অড্ঢমাসাধিকে গিম্হমাসত্তযে আপজ্জতি। নিস্সন্দেহে ‘‘গিম্হানং পচ্ছিমমাসতো পুরিমেসু সত্তসু মাসেসূ’’তি ৰুত্তং, তদযুত্তং ‘‘গিম্হানেযেৰ আপজ্জতী’’তি গিম্হাপত্তিযা দস্সিতত্তা, ‘‘ইতরউতুদ্ৰযে’’তি পটিসিদ্ধত্তা চ। এত্থ চ গাথায পরিযেসনাপত্তিযাযেৰ দস্সনং নিদস্সনমত্তন্তি কত্ৰা নিৰাসনাপত্তিযা চ গিম্হেযেৰ সম্ভৰোতি সাপি দস্সিতা।
497. Gimhānamāsānaṃ sambandhini gimhike utumhi. Māsato atireko atirekamāsoti katvā atirekamāso kālo sesoti vattabbe kāle. Pariyesantoti aññātikaappavāritaṭṭhānato satuppādakaraṇena vassikasāṭikaṃ pariyesanto ca atirekamāso sesoti katvā nivāsento ca gimhe āpattiṃ āpajjati. ‘‘Na tu eva itarautudvaye’’ti padacchedo. Gimhe pariyesanto purimamāsattaye āpajjatīti katvā nivāsento aḍḍhamāsādhike gimhamāsattaye āpajjati. Nissandehe ‘‘gimhānaṃ pacchimamāsato purimesu sattasu māsesū’’ti vuttaṃ, tadayuttaṃ ‘‘gimhāneyeva āpajjatī’’ti gimhāpattiyā dassitattā, ‘‘itarautudvaye’’ti paṭisiddhattā ca. Ettha ca gāthāya pariyesanāpattiyāyeva dassanaṃ nidassanamattanti katvā nivāsanāpattiyā ca gimheyeva sambhavoti sāpi dassitā.
৪৯৮. ইধ পন ইমস্মিং সাসনে যো ভিক্খু ৰস্সিকসাটিকচীৰরে ৰিজ্জমানে নগ্গো কাযং ওৰস্সাপেতি, সো হৰে একংসেন ৰস্সে ৰস্সানউতুম্হি আপজ্জতীতি যোজনা।
498.Idha pana imasmiṃ sāsane yo bhikkhu vassikasāṭikacīvare vijjamāne naggo kāyaṃ ovassāpeti, so have ekaṃsena vasse vassānautumhi āpajjatīti yojanā.
৪৯৯. ‘‘অত্থাপত্তি সঙ্ঘো আপজ্জতি, ন গণো ন পুগ্গলো, অত্থাপত্তি গণো আপজ্জতি, ন সঙ্ঘো ন পুগ্গলো, অত্থাপত্তি পুগ্গলো আপজ্জতি, ন সঙ্ঘো ন গণো’’তি (পরি॰ ৩২৩) ৰুত্তত্তিকং দস্সেতুমাহ ‘‘আপজ্জতি হি সঙ্ঘোৰা’’তিআদি।
499. ‘‘Atthāpatti saṅgho āpajjati, na gaṇo na puggalo, atthāpatti gaṇo āpajjati, na saṅgho na puggalo, atthāpatti puggalo āpajjati, na saṅgho na gaṇo’’ti (pari. 323) vuttattikaṃ dassetumāha ‘‘āpajjati hi saṅghovā’’tiādi.
৫০০. কথমাপজ্জতীতি আহ ‘‘অধিট্ঠান’’ন্তিআদি। অধিট্ঠানন্তি অধিট্ঠানুপোসথং করোন্তো পারিসুদ্ধিউপোসথং ৰাতি সম্বন্ধো। ইধ অত্তনো যথাপত্তমুপোসথং অকত্ৰা অপত্তউপোসথকরণং আপজ্জিতব্বাপত্তিদস্সনস্স অধিপ্পেতত্তা, অত্তকরণদোসস্স ৰিসুং ৰিসুং ৰক্খমানত্তা চ ন গণো ন চ পুগ্গলোতি এত্থ অধিট্ঠানং করোন্তো পুগ্গলো চ পারিসুদ্ধিং করোন্তো গণো চ নাপজ্জতীতি যথালাভযোজনা কাতব্বা। যথাক্কমং যোজনং করোমীতি ৰিপরিযাযৰিকপ্পো ন কাতব্বো। এৰমুপরিপি ৰিপরিযাযৰিপক্খং কত্ৰা যথালাভযোজনাৰ কাতব্বা।
500. Kathamāpajjatīti āha ‘‘adhiṭṭhāna’’ntiādi. Adhiṭṭhānanti adhiṭṭhānuposathaṃ karonto pārisuddhiuposathaṃ vāti sambandho. Idha attano yathāpattamuposathaṃ akatvā apattauposathakaraṇaṃ āpajjitabbāpattidassanassa adhippetattā, attakaraṇadosassa visuṃ visuṃ vakkhamānattā ca na gaṇo na ca puggaloti ettha adhiṭṭhānaṃ karonto puggalo ca pārisuddhiṃ karonto gaṇo ca nāpajjatīti yathālābhayojanā kātabbā. Yathākkamaṃ yojanaṃ karomīti vipariyāyavikappo na kātabbo. Evamuparipi vipariyāyavipakkhaṃ katvā yathālābhayojanāva kātabbā.
৫০১. ‘‘উপোসথ’’ন্তি ইদং ‘‘সুত্তুদ্দেসমধিট্ঠান’’ন্তি পদেহি পচ্চেকং যোজেতব্বং।
501.‘‘Uposatha’’nti idaṃ ‘‘suttuddesamadhiṭṭhāna’’nti padehi paccekaṃ yojetabbaṃ.
৫০২. সুত্তুদ্দেসং করোন্তো ৰাতি এত্থ ৰা-সদ্দেন পারিসুদ্ধিং গণ্হাতি। সুত্তুদ্দেসং, পারিসুদ্ধিং ৰা উপোসথং করোন্তো পুগ্গলো আপত্তিং আপজ্জতি, সুত্তুদ্দেসং করোন্তো সঙ্ঘো চ নাপজ্জতি, পারিসুদ্ধিং করোন্তো গণো চ ন আপজ্জতীতি যোজনা।
502.Suttuddesaṃ karonto vāti ettha vā-saddena pārisuddhiṃ gaṇhāti. Suttuddesaṃ, pārisuddhiṃ vā uposathaṃ karonto puggalo āpattiṃ āpajjati, suttuddesaṃ karonto saṅgho ca nāpajjati, pārisuddhiṃ karonto gaṇo ca na āpajjatīti yojanā.
৫০৩. কথং পন গিলানোৰ আপত্তিং আপজ্জতি, ন অগিলানো, কথং অগিলানোৰ আপত্তিং আপজ্জতি, নো গিলানো, কথং গিলানো চ অগিলানো চ উভোপি আপজ্জন্তীতি যোজনা।
503. Kathaṃ pana gilānova āpattiṃ āpajjati, na agilāno, kathaṃ agilānova āpattiṃ āpajjati, no gilāno, kathaṃ gilāno ca agilāno ca ubhopi āpajjantīti yojanā.
৫০৪. যো পন অকল্লকো গিলানো অঞ্ঞেন পন ভেসজ্জেন অত্থে সতি তদঞ্ঞং ততো অঞ্ঞং ভেসজ্জং ৰিঞ্ঞাপেতি, সো আপজ্জতি পাচিত্তিযাপত্তিন্তি যোজনা।
504. Yo pana akallako gilāno aññena pana bhesajjena atthe sati tadaññaṃ tato aññaṃ bhesajjaṃ viññāpeti, so āpajjati pācittiyāpattinti yojanā.
৫০৫. ভেসজ্জেন অত্থে অৰিজ্জমানেপি সচে ভেসজ্জং ৰিঞ্ঞাপেতি, অগিলানোৰ ৰিঞ্ঞত্তিপচ্চযা আপত্তিং আপজ্জতি। সেসং পন আপত্তিং গিলানঅগিলানা উভোপি আপজ্জন্তি।
505. Bhesajjena atthe avijjamānepi sace bhesajjaṃ viññāpeti, agilānova viññattipaccayā āpattiṃ āpajjati. Sesaṃ pana āpattiṃ gilānaagilānā ubhopi āpajjanti.
৫০৬. অত্থাপত্তি অন্তোৰ আপজ্জতি, ন বহিদ্ধা, তথা অত্থাপত্তি বহি এৰ আপজ্জতি, ন অন্তো, অত্থাপত্তি অন্তো, বহিদ্ধাতি উভযত্থপি আপজ্জতীতি যোজনা।
506. Atthāpatti antova āpajjati, na bahiddhā, tathā atthāpatti bahi eva āpajjati, na anto, atthāpatti anto, bahiddhāti ubhayatthapi āpajjatīti yojanā.
৫০৭. কেৰলং অন্তোযেৰ আপজ্জতীতি যোজনা।
507. Kevalaṃ antoyeva āpajjatīti yojanā.
৫০৮. মঞ্চাদিন্তি সঙ্ঘিকমঞ্চাদিং।
508.Mañcādinti saṅghikamañcādiṃ.
৫০৯. ‘‘অন্তোসীমায এৰ আপত্তি’’ন্তি পদচ্ছেদো। কথং অন্তোসীমায এৰ আপত্তিং আপজ্জতি, নেৰ বহিসীমায আপত্তিং আপজ্জতি, কথং বহিসীমায এৰ আপত্তিং আপজ্জতি, নো অন্তোসীমায আপত্তিং আপজ্জতি, কথং অন্তোসীমায চ বহিসীমায চাতি উভযত্থপি আপজ্জতীতি যোজনা।
509. ‘‘Antosīmāya eva āpatti’’nti padacchedo. Kathaṃ antosīmāya eva āpattiṃ āpajjati, neva bahisīmāya āpattiṃ āpajjati, kathaṃ bahisīmāya eva āpattiṃ āpajjati, no antosīmāya āpattiṃ āpajjati, kathaṃ antosīmāya ca bahisīmāya cāti ubhayatthapi āpajjatīti yojanā.
৫১০. সছত্তুপাহনো ভিক্খূতি ছত্তুপাহনসহিতো আগন্তুকো ভিক্খু। পৰিসন্তো তপোধনোতি আগন্তুকৰত্তং অদস্সেত্ৰা সঙ্ঘারামং পৰিসন্তো।
510.Sachattupāhano bhikkhūti chattupāhanasahito āgantuko bhikkhu. Pavisanto tapodhanoti āgantukavattaṃ adassetvā saṅghārāmaṃ pavisanto.
৫১১. ‘‘উপচারস্স অতিক্কমে’’তি পদচ্ছেদো।
511. ‘‘Upacārassa atikkame’’ti padacchedo.
৫১২. সেসং সব্বং আপত্তিং অন্তোসীমায চ বহিসীমায চ আপজ্জতীতি যোজনা। এত্থ চ কিঞ্চাপি ৰস্সচ্ছেদাপত্তিং বহিসীমাগতো আপজ্জতি, ভিক্খুনীআরামপৰেসনাপত্তিং অন্তোসীমায আপজ্জতি, তদুভযং পন আগন্তুকগমিকৰত্তভেদাপত্তীহি একপরিচ্ছেদন্তি উপলক্খণতো এতেনেৰ ৰিঞ্ঞাযতীতি ৰিসুং ন ৰুত্তন্তি গহেতব্বং। এৰং সব্বত্থ ঈদিসেসু ঠানেসু ৰিনিচ্ছযো ৰেদিতব্বো।
512.Sesaṃ sabbaṃ āpattiṃ antosīmāya ca bahisīmāya ca āpajjatīti yojanā. Ettha ca kiñcāpi vassacchedāpattiṃ bahisīmāgato āpajjati, bhikkhunīārāmapavesanāpattiṃ antosīmāya āpajjati, tadubhayaṃ pana āgantukagamikavattabhedāpattīhi ekaparicchedanti upalakkhaṇato eteneva viññāyatīti visuṃ na vuttanti gahetabbaṃ. Evaṃ sabbattha īdisesu ṭhānesu vinicchayo veditabbo.
তিককথাৰণ্ণনা।
Tikakathāvaṇṇanā.
৫১৫. ৰচীদ্ৰারিকমাপত্তিন্তি মুসাৰাদপেসুঞ্ঞহরণাদিৰসেন ৰচীদ্ৰারে আপজ্জিতব্বাপত্তিং। পরৰাচায সুজ্ঝতীতি সঙ্ঘমজ্ঝে একৰাচিকায তিণৰত্থারককম্মৰাচায সুজ্ঝতি।
515.Vacīdvārikamāpattinti musāvādapesuññaharaṇādivasena vacīdvāre āpajjitabbāpattiṃ. Paravācāya sujjhatīti saṅghamajjhe ekavācikāya tiṇavatthārakakammavācāya sujjhati.
৫১৬. ৰজ্জমেৰ ৰজ্জতা, তং, পাচিত্তিযন্তি অত্থো।
516. Vajjameva vajjatā, taṃ, pācittiyanti attho.
৫১৮-৯. তং দেসেত্ৰা ৰিসুজ্ঝন্তোতি তং দেসেত্ৰা ৰিসুদ্ধো হোন্তো। যাৰততিযকং পনাতি যাৰততিযেন সমনুভাসনকম্মেন আপন্নং সঙ্ঘাদিসেসাপত্তিং পন। পরিৰাসাদীতি আদি-সদ্দেন মানত্তমূলাযপটিকস্সনঅব্ভানানি গহিতানি।
518-9.Taṃdesetvā visujjhantoti taṃ desetvā visuddho honto. Yāvatatiyakaṃ panāti yāvatatiyena samanubhāsanakammena āpannaṃ saṅghādisesāpattiṃ pana. Parivāsādīti ādi-saddena mānattamūlāyapaṭikassanaabbhānāni gahitāni.
৫২২. কাযদ্ৰারিকমাপত্তিন্তি কাযদ্ৰারেন আপজ্জিতব্বং পহারদানাদিআপত্তিং।
522.Kāyadvārikamāpattinti kāyadvārena āpajjitabbaṃ pahāradānādiāpattiṃ.
৫২৩. কাযেনেৰ ৰিসুজ্ঝতীতি তিণৰত্থারকং গন্ত্ৰা কাযসামগ্গিং দেন্তো ৰিসুজ্ঝতি।
523.Kāyeneva visujjhatīti tiṇavatthārakaṃ gantvā kāyasāmaggiṃ dento visujjhati.
৫২৬. যো সুত্তো আপত্তিং আপজ্জতি, সো কথং পটিবুদ্ধো ৰিসুজ্ঝতি। যো পটিবুদ্ধোৰ আপন্নো, সো কথং সুত্তো সুজ্ঝতীতি যোজনা।
526. Yo sutto āpattiṃ āpajjati, so kathaṃ paṭibuddho visujjhati. Yo paṭibuddhova āpanno, so kathaṃ sutto sujjhatīti yojanā.
৫২৮. সগারসেয্যকাদিন্তি মাতুগামেন সহসেয্যাদিআপত্তিং।
528.Sagāraseyyakādinti mātugāmena sahaseyyādiāpattiṃ.
৫২৯. জগ্গন্তোতি জাগরন্তো নিদ্দং ৰিনোদেন্তো।
529.Jaggantoti jāgaranto niddaṃ vinodento.
৫৩১. পটিবুদ্ধোতি অনিদ্দাযন্তো।
531.Paṭibuddhoti aniddāyanto.
৫৩২. অচিত্তোতি ‘‘সিক্খাপদং ৰীতিক্কমিস্সামী’’তি চিত্তা ভাৰেন অচিত্তো।
532.Acittoti ‘‘sikkhāpadaṃ vītikkamissāmī’’ti cittā bhāvena acitto.
৫৩৫. সচিত্তকাপত্তিন্তি ৰিকালভোজনাদিআপত্তিং। তিণৰত্থারে সযন্তো নিদ্দাযন্তো তিণৰত্থারককম্মে করিযমানে ‘‘ইমিনাহং কম্মেন আপত্তিতো ৰুট্ঠামী’’তি চিত্তরহিতো ৰুট্ঠহন্তো অচিত্তকো ৰিসুজ্ঝতি।
535.Sacittakāpattinti vikālabhojanādiāpattiṃ. Tiṇavatthāre sayanto niddāyanto tiṇavatthārakakamme kariyamāne ‘‘imināhaṃ kammena āpattito vuṭṭhāmī’’ti cittarahito vuṭṭhahanto acittako visujjhati.
৫৩৬. পচ্ছিমং তু পদদ্ৰযন্তি –
536.Pacchimaṃ tu padadvayanti –
‘‘আপজ্জিত্ৰা অচিত্তোৰ, অচিত্তোৰ ৰিসুজ্ঝতি।
‘‘Āpajjitvā acittova, acittova visujjhati;
আপজ্জিত্ৰা সচিত্তোৰ, সচিত্তোৰ ৰিসুজ্ঝতী’’তি॥ –
Āpajjitvā sacittova, sacittova visujjhatī’’ti. –
পদদ্ৰযং । অমিস্সেত্ৰাতি অচিত্তসচিত্তপদেহি এৰমেৰ মিস্সং অকত্ৰা। এত্থাতি পুরিমপদদ্ৰযে। ৰুত্তানুসারেনাতি ৰুত্তনযানুসারেন।
Padadvayaṃ . Amissetvāti acittasacittapadehi evameva missaṃ akatvā. Etthāti purimapadadvaye. Vuttānusārenāti vuttanayānusārena.
৫৩৯. কম্মতোতি সমনুভাসনকম্মতো।
539.Kammatoti samanubhāsanakammato.
৫৪০. আপজ্জিত্ৰা অকম্মতোতি সমনুভাসনকম্মং ৰিনাৰ আপজ্জিত্ৰা।
540.Āpajjitvā akammatoti samanubhāsanakammaṃ vināva āpajjitvā.
৫৪১. সমনুভাসনে আপজ্জিতব্বং সঙ্ঘাদিসেসাপত্তিং সমনুভাসনমাহ কারণূপচারেন।
541. Samanubhāsane āpajjitabbaṃ saṅghādisesāpattiṃ samanubhāsanamāha kāraṇūpacārena.
৫৪২. অৰসেসন্তি মুসাৰাদপাচিত্তিযাদিকং।
542.Avasesanti musāvādapācittiyādikaṃ.
৫৪৩. ৰিসুজ্ঝতি অসম্মুখাতি সঙ্ঘস্স অসম্মুখা ৰিসুজ্ঝতি। ইদঞ্চ সম্মুখাৰিনযেন চেৰ পটিঞ্ঞাতকরণেন চ সমেন্তং আপত্তাধিকরণং সন্ধায ৰুত্তং। তত্থ পুগ্গলসম্মুখতায সব্ভাৰেপি সঙ্ঘস্স অসম্মুখতায আপজ্জতি ৰা ৰিসুজ্ঝতি ৰাতি ‘‘অসম্মুখা’’তি ৰুত্তং।
543.Visujjhati asammukhāti saṅghassa asammukhā visujjhati. Idañca sammukhāvinayena ceva paṭiññātakaraṇena ca samentaṃ āpattādhikaraṇaṃ sandhāya vuttaṃ. Tattha puggalasammukhatāya sabbhāvepi saṅghassa asammukhatāya āpajjati vā visujjhati vāti ‘‘asammukhā’’ti vuttaṃ.
৫৫১. ‘‘অচিত্তকচতুক্কং অজানন্তচতুক্ক’’ন্তি কুসলত্তিকফস্সপঞ্চকাদিৰোহারো ৰিয আদিপদৰসেন ৰুত্তো।
551. ‘‘Acittakacatukkaṃ ajānantacatukka’’nti kusalattikaphassapañcakādivohāro viya ādipadavasena vutto.
৫৫২-৩. অত্থাপত্তি আগন্তুকো আপজ্জতি, ন চেতরো আৰাসিকো আপজ্জতি, অত্থাপত্তি আৰাসিকোৰ আপজ্জতি, ন চেতরো আগন্তুকো আপজ্জতি, অত্থাপত্তি আগন্তুকো চ আৰাসিকো চ তে উভোপি আপজ্জন্তি, উভো সেসং ন আপজ্জন্তি অত্থীতি যোজনা।
552-3. Atthāpatti āgantuko āpajjati, na cetaro āvāsiko āpajjati, atthāpatti āvāsikova āpajjati, na cetaro āgantuko āpajjati, atthāpatti āgantuko ca āvāsiko ca te ubhopi āpajjanti, ubho sesaṃ na āpajjanti atthīti yojanā.
৫৫৫. ইতরোতি আৰাসিকো। আৰাসৰত্তন্তি আৰাসিকেন আগন্তুকস্স কাতব্বৰত্তং। আৰাসীতি আৰাসিকো।
555.Itaroti āvāsiko. Āvāsavattanti āvāsikena āgantukassa kātabbavattaṃ. Āvāsīti āvāsiko.
৫৫৬. ন চেৰাগন্তুকোতি তং আৰাসিকৰত্তং অকরোন্তো আগন্তুকো ন চেৰ আপজ্জতি । সেসং কাযৰচীদ্ৰারিকং আপত্তিং। উভোপি আগন্তুকআৰাসিকা। ভিক্খুভিক্খুনীনং অসাধারণং আপত্তিং ন আপজ্জন্তি।
556.Na cevāgantukoti taṃ āvāsikavattaṃ akaronto āgantuko na ceva āpajjati . Sesaṃ kāyavacīdvārikaṃ āpattiṃ. Ubhopi āgantukaāvāsikā. Bhikkhubhikkhunīnaṃ asādhāraṇaṃ āpattiṃ na āpajjanti.
৫৫৭. ৰত্থুনানত্ততাতি ৰীতিক্কমনানত্ততা। আপত্তিনানত্ততাতি পারাজিকাদীনং সত্তন্নং আপত্তিক্খন্ধানং অঞ্ঞমঞ্ঞনানত্ততা।
557.Vatthunānattatāti vītikkamanānattatā. Āpattinānattatāti pārājikādīnaṃ sattannaṃ āpattikkhandhānaṃ aññamaññanānattatā.
৫৬৩. ‘‘পারাজিকানং…পে॰… নানভাৰো’’তি ইদং নিদস্সনমত্তং সঙ্ঘাদিসেসানং অনিযতাদীহি ৰত্থুনানতায চেৰ আপত্তিনানতায চ লব্ভমানত্তা।
563.‘‘Pārājikānaṃ…pe… nānabhāvo’’ti idaṃ nidassanamattaṃ saṅghādisesānaṃ aniyatādīhi vatthunānatāya ceva āpattinānatāya ca labbhamānattā.
৫৬৫. অযমেৰ ৰিনিচ্ছযোতি ন কেৰলং পারাজিকাপত্তীসুযেৰ সাধারণাপত্তিযো একতো চ ৰিসুঞ্চ আপজ্জন্তানং যথাৰুত্তৰিনিচ্ছযো, অথ খো অৰসেসসাধারণাপত্তিযোপি ৰুত্তনযেন আপজ্জতি, অযমেৰ ৰিনিচ্ছযো যোজেতব্বো।
565.Ayameva vinicchayoti na kevalaṃ pārājikāpattīsuyeva sādhāraṇāpattiyo ekato ca visuñca āpajjantānaṃ yathāvuttavinicchayo, atha kho avasesasādhāraṇāpattiyopi vuttanayena āpajjati, ayameva vinicchayo yojetabbo.
৫৭৭. আদিযন্তো গণ্হন্তো। পযোজেন্তোতি গণ্হাপেন্তো।
577.Ādiyanto gaṇhanto. Payojentoti gaṇhāpento.
৫৭৯. ঊনকং পাদং…পে॰… লহুং ফুসেতি থুল্লচ্চযং, দুক্কটঞ্চ সন্ধাযাহ।
579.Ūnakaṃpādaṃ…pe… lahuṃ phuseti thullaccayaṃ, dukkaṭañca sandhāyāha.
৫৮০. এতেনেৰ উপাযেন, সেসকম্পি পদত্তযন্তি যো অযং পঠমৰিনিচ্ছযে ৰুত্তনযো, এতেনেৰ নযেন ঊনপাদং আদিযন্তো লহুকাপত্তিং আপজ্জতি, পাদং ৰা অতিরেকপাদং ৰা গহণত্থং আণাপেন্তো গরুং পারাজিকাপত্তিং আপজ্জতি, পাদং ৰা অতিরেকপাদং ৰা গণ্হন্তো চ গহণত্থায আণাপেন্তো চ গরুকে পারাজিকাপত্তিযংযেৰ তিট্ঠতি, ঊনপাদং গণ্হন্তো চ গহণত্থায আণাপেন্তো চ লহুকে থুল্লচ্চযে, দুক্কটে ৰা তিট্ঠতীতি এৰং সেসকম্পি ইমং পদত্তযং। অত্থসম্ভৰতোযেৰাতি যথাৰুত্তস্স অত্থস্স সম্ভৰৰসেনেৰ।
580.Eteneva upāyena, sesakampi padattayanti yo ayaṃ paṭhamavinicchaye vuttanayo, eteneva nayena ūnapādaṃ ādiyanto lahukāpattiṃ āpajjati, pādaṃ vā atirekapādaṃ vā gahaṇatthaṃ āṇāpento garuṃ pārājikāpattiṃ āpajjati, pādaṃ vā atirekapādaṃ vā gaṇhanto ca gahaṇatthāya āṇāpento ca garuke pārājikāpattiyaṃyeva tiṭṭhati, ūnapādaṃ gaṇhanto ca gahaṇatthāya āṇāpento ca lahuke thullaccaye, dukkaṭe vā tiṭṭhatīti evaṃ sesakampi imaṃ padattayaṃ. Atthasambhavatoyevāti yathāvuttassa atthassa sambhavavaseneva.
৫৮১-২. কথং কালেযেৰ আপত্তি সিযা, নো ৰিকালে, ৰিকালেযেৰ আপত্তি সিযা, ন চ কালে, অত্থাপত্তি কালে চ পকাসিতা ৰিকালে চ, অত্থাপত্তি নেৰ কালে চ পকাসিতা নেৰ ৰিকালে চাতি যোজনা।
581-2. Kathaṃ kāleyeva āpatti siyā, no vikāle, vikāleyeva āpatti siyā, na ca kāle, atthāpatti kāle ca pakāsitā vikāle ca, atthāpatti neva kāle ca pakāsitā neva vikāle cāti yojanā.
৫৮৬-৭. কালে পটিগ্গহিতং কিং কালে কপ্পতি ৰিকালে তু নো কপ্পতি, ৰিকালে গহিতং কিং ৰিকালে কপ্পতি, নো কালে কপ্পতি, কালে চ ৰিকালে চ পটিগ্গহিতং কিং নাম কালে চ ৰিকালে চ কপ্পতি, কালে চ ৰিকালে চ পটিগ্গহিতং কিং নাম কালে চ ৰিকালে চ ন কপ্পতি, ৰদ ভদ্রমুখাতি যোজনা।
586-7. Kāle paṭiggahitaṃ kiṃ kāle kappati vikāle tu no kappati, vikāle gahitaṃ kiṃ vikāle kappati, no kāle kappati, kāle ca vikāle ca paṭiggahitaṃ kiṃ nāma kāle ca vikāle ca kappati, kāle ca vikāle ca paṭiggahitaṃ kiṃ nāma kāle ca vikāle ca na kappati, vada bhadramukhāti yojanā.
৫৮৯. ৰিকালেযেৰ কপ্পতি, অপরজ্জু কালেপি ন কপ্পতীতি যোজনা।
589. Vikāleyeva kappati, aparajju kālepi na kappatīti yojanā.
৫৯২. কুলদূসনকম্মাদিন্তি আদি-সদ্দেন অভূতারোচনরূপিযসংৰোহারৰিঞ্ঞত্তিকুহনাদীনং সঙ্গহো।
592.Kuladūsanakammādinti ādi-saddena abhūtārocanarūpiyasaṃvohāraviññattikuhanādīnaṃ saṅgaho.
৫৯৩-৪. কতমা আপত্তি পচ্চন্তিমেসু দেসেসু আপজ্জতি, ন মজ্ঝিমে, কতমা আপত্তি মজ্ঝিমে পন দেসস্মিং আপজ্জতি, ন চ পচ্চন্তিমেসু, কতমা আপত্তি পচ্চন্তিমেসু চেৰ দেসেসু আপজ্জতি মজ্ঝিমে চ, কতমা আপত্তি পচ্চন্তিমেসু চেৰ দেসেসু ন আপজ্জতি ন মজ্ঝিমে চাতি যোজনা।
593-4. Katamā āpatti paccantimesu desesu āpajjati, na majjhime, katamā āpatti majjhime pana desasmiṃ āpajjati, na ca paccantimesu, katamā āpatti paccantimesu ceva desesu āpajjati majjhime ca, katamā āpatti paccantimesu ceva desesu na āpajjati na majjhime cāti yojanā.
৫৯৬. ‘‘সো গুণঙ্গুণুপাহন’’ন্তি পদচ্ছেদো। সো ভিক্খূতি অত্থো।
596. ‘‘So guṇaṅguṇupāhana’’nti padacchedo. So bhikkhūti attho.
৫৯৯. এৰং ‘‘আপজ্জতি, নাপজ্জতী’’তি পদৰসেন পচ্চন্তিমচতুক্কং দস্সেত্ৰা ‘‘নেৰ কপ্পতি, ন কপ্পতী’’তি পদৰসেন দস্সেতুমাহ ‘‘পচ্চন্তিমেসূ’’তিআদি।
599. Evaṃ ‘‘āpajjati, nāpajjatī’’ti padavasena paccantimacatukkaṃ dassetvā ‘‘neva kappati, na kappatī’’ti padavasena dassetumāha ‘‘paccantimesū’’tiādi.
৬০১. ৰুত্তন্তি ‘‘গণেন পঞ্চৰগ্গেনা’’তিআদিগাথায হেট্ঠা ৰুত্তং।
601.Vuttanti ‘‘gaṇena pañcavaggenā’’tiādigāthāya heṭṭhā vuttaṃ.
৬০৩. এৰং ৰত্তুন্তি ‘‘ন কপ্পতী’’তি ৰত্তুং। পঞ্চলোণাদিকন্তি ‘‘অনুজানামি, ভিক্খৰে, লোণানী’’তিআদি।
603.Evaṃ vattunti ‘‘na kappatī’’ti vattuṃ. Pañcaloṇādikanti ‘‘anujānāmi, bhikkhave, loṇānī’’tiādi.
৬০৮. অনুঞ্ঞাতট্ঠানস্স অন্তো নো আপজ্জতি, তং অতিক্কমন্তো বহিযেৰ চ আপজ্জতীতি যোজনা।
608. Anuññātaṭṭhānassa anto no āpajjati, taṃ atikkamanto bahiyeva ca āpajjatīti yojanā.
৬১২. সেক্খপঞ্ঞত্তীতি সেখিযপঞ্ঞত্তি।
612.Sekkhapaññattīti sekhiyapaññatti.
৬১৩. অগণাতি অদুতিযা। এত্থ হি একাপি গণো নাম।
613.Agaṇāti adutiyā. Ettha hi ekāpi gaṇo nāma.
৬১৪. উভযত্থপি অসাধারণমাপত্তিন্তি ভিক্খুনীনং নিযতাপঞ্ঞত্তি ৰেদিতব্বা।
614.Ubhayatthapi asādhāraṇamāpattinti bhikkhunīnaṃ niyatāpaññatti veditabbā.
৬১৬. গিলানো চ নাপজ্জতি, অগিলানো চ নাপজ্জতীতি এৰং উভোপি নাপজ্জন্তীতি যোজনা। তিকাদীসু দস্সিতানং পদানং চতুক্কাদিদস্সনৰসেন পুনপ্পুনং গহণং।
616. Gilāno ca nāpajjati, agilāno ca nāpajjatīti evaṃ ubhopi nāpajjantīti yojanā. Tikādīsu dassitānaṃ padānaṃ catukkādidassanavasena punappunaṃ gahaṇaṃ.
৬১৮. ‘‘আপজ্জতি অগিলানোৰা’’তি পদচ্ছেদো।
618. ‘‘Āpajjati agilānovā’’ti padacchedo.
চতুক্ককথাৰণ্ণনা।
Catukkakathāvaṇṇanā.
৬২০. ‘‘গরুথুল্লচ্চয’’ন্তি ৰত্তব্বে ‘‘গরু’’ন্তি নিগ্গহীতাগমো।
620. ‘‘Garuthullaccaya’’nti vattabbe ‘‘garu’’nti niggahītāgamo.
৬২১. পঞ্চ কথিনানিসংসা হেট্ঠা ৰুত্তাযেৰ।
621. Pañca kathinānisaṃsā heṭṭhā vuttāyeva.
৬২৬. অগ্গিসত্থনখক্কন্তন্তি অগ্গিসত্থনখেহি অক্কন্তং ফুট্ঠং, পহটন্তি অত্থো। অবীজন্তি নোবীজং। উব্বট্টবীজকন্তি নিব্বট্টবীজকং।
626.Aggisatthanakhakkantanti aggisatthanakhehi akkantaṃ phuṭṭhaṃ, pahaṭanti attho. Abījanti nobījaṃ. Ubbaṭṭabījakanti nibbaṭṭabījakaṃ.
৬২৮. পৰারণাপীতি পটিক্খেপপৰারণাপি। ওদনাদীহীতি আদি-সদ্দেন সত্তুকুম্মাসমচ্ছমংসানং গহণং। কাযাদিগহণেনাতি কাযেন ৰা কাযপটিবদ্ধেন ৰা গহণেন। ‘‘দাতুকামাভিহারো চ, হত্থপাসেরণক্খম’’ন্তি ইমেহি চতূহি অঙ্গেহি সদ্ধিং তেসং দ্ৰিন্নমেকং গহেত্ৰা পটিগ্গহণা পঞ্চেৰ হোন্তি।
628.Pavāraṇāpīti paṭikkhepapavāraṇāpi. Odanādīhīti ādi-saddena sattukummāsamacchamaṃsānaṃ gahaṇaṃ. Kāyādigahaṇenāti kāyena vā kāyapaṭibaddhena vā gahaṇena. ‘‘Dātukāmābhihāro ca, hatthapāseraṇakkhama’’nti imehi catūhi aṅgehi saddhiṃ tesaṃ dvinnamekaṃ gahetvā paṭiggahaṇā pañceva honti.
৬২৯-৩০. ৰিনযঞ্ঞুকস্মিন্তি ৰিনযধরে পুগ্গলে। সকঞ্চ সীলন্তি অত্তনো পাতিমোক্খসংৰরসীলঞ্চ। সুরক্খিতং হোতীতি আপত্তানাপত্তিকপ্পিযাকপ্পিযানং ৰিজানন্ততায অসেৰিতব্বং পহায সেৰিতব্বংযেৰ সেৰনৰসেন সুট্ঠু রক্খিতং হোতি। কুক্কুচ্চমঞ্ঞস্স নিরাকরোতীতি অঞ্ঞস্স সব্রহ্মচারিনো কপ্পিযাকপ্পিযৰিসযে উপ্পন্নং কুক্কুচ্চং নিৰারেতি। ৰিসারদো ভাসতি সঙ্ঘমজ্ঝেতি কপ্পিযাকপ্পিযানং ৰিনিচ্ছযকথায উপ্পন্নায নিরাসঙ্কো নিব্ভযো ৰোহরতি। ৰেরিভিক্খূতি অত্তপচ্চত্থিকে পুগ্গলে। ধম্মস্স চেৰ ঠিতিযা পৰত্তোতি ‘‘ৰিনযো নাম সাসনস্স আযু, ৰিনযে ঠিতে সাসনং ঠিতং হোতী’’তি (পারা॰ অট্ঠ॰ ১.পঠমমহাসঙ্গীতিকথা; দী॰ নি॰ অট্ঠ॰ ১.পঠমমহাসঙ্গীতিকথা; খু॰ পা॰ অট্ঠ॰ ৫.মঙ্গলসুত্তৰণ্ণনা; থেরগা॰ অট্ঠ॰ ১.২৫১) ৰচনতো সদ্ধম্মট্ঠিতিযা পটিপন্নো হোতি। তস্মা কারণা। তত্থ ৰিনযঞ্ঞুভাৰে। ধীরো পঞ্ঞৰা ভিক্খু।
629-30.Vinayaññukasminti vinayadhare puggale. Sakañca sīlanti attano pātimokkhasaṃvarasīlañca. Surakkhitaṃ hotīti āpattānāpattikappiyākappiyānaṃ vijānantatāya asevitabbaṃ pahāya sevitabbaṃyeva sevanavasena suṭṭhu rakkhitaṃ hoti. Kukkuccamaññassa nirākarotīti aññassa sabrahmacārino kappiyākappiyavisaye uppannaṃ kukkuccaṃ nivāreti. Visārado bhāsati saṅghamajjheti kappiyākappiyānaṃ vinicchayakathāya uppannāya nirāsaṅko nibbhayo voharati. Veribhikkhūti attapaccatthike puggale. Dhammassa ceva ṭhitiyā pavattoti ‘‘vinayo nāma sāsanassa āyu, vinaye ṭhite sāsanaṃ ṭhitaṃ hotī’’ti (pārā. aṭṭha. 1.paṭhamamahāsaṅgītikathā; dī. ni. aṭṭha. 1.paṭhamamahāsaṅgītikathā; khu. pā. aṭṭha. 5.maṅgalasuttavaṇṇanā; theragā. aṭṭha. 1.251) vacanato saddhammaṭṭhitiyā paṭipanno hoti. Tasmā kāraṇā. Tattha vinayaññubhāve. Dhīro paññavā bhikkhu.
পঞ্চককথাৰণ্ণনা।
Pañcakakathāvaṇṇanā.
৬৩১-২. ছল়ভিঞ্ঞেনাতি ছ অভিঞ্ঞা এতস্সাতি ছল়ভিঞ্ঞো, তেন। অতিক্কন্তপমাণং মঞ্চপীঠং, অতিক্কন্তপমাণং নিসীদনঞ্চ তথা অতিক্কন্তপমাণং কণ্ডুপ্পটিচ্ছাদিৰস্সসাটিকচীৰরঞ্চ সুগতস্স চীৰরে পমাণিকচীৰরন্তি ছ।
631-2.Chaḷabhiññenāti cha abhiññā etassāti chaḷabhiñño, tena. Atikkantapamāṇaṃ mañcapīṭhaṃ, atikkantapamāṇaṃ nisīdanañca tathā atikkantapamāṇaṃ kaṇḍuppaṭicchādivassasāṭikacīvarañca sugatassa cīvare pamāṇikacīvaranti cha.
৬৩৩-৪. অঞ্ঞাণঞ্চ কুক্কুচ্চঞ্চ অঞ্ঞাণকুক্কুচ্চা, তেহি, অঞ্ঞাণতায চেৰ কুক্কুচ্চপকততায চাতি ৰুত্তং হোতি। ৰিপরীতায সঞ্ঞায কপ্পিযে অকপ্পিযসঞ্ঞায, অকপ্পিযে কপ্পিযসঞ্ঞায।
633-4. Aññāṇañca kukkuccañca aññāṇakukkuccā, tehi, aññāṇatāya ceva kukkuccapakatatāya cāti vuttaṃ hoti. Viparītāya saññāya kappiye akappiyasaññāya, akappiye kappiyasaññāya.
তত্থ কথং অলজ্জিতায আপজ্জতি? অকপ্পিযভাৰং জানন্তোযেৰ মদ্দিত্ৰা ৰীতিক্কমং করোতি (কঙ্খা॰ অট্ঠ॰ নিদানৰণ্ণনা)। ৰুত্তম্পি চেতং –
Tattha kathaṃ alajjitāya āpajjati? Akappiyabhāvaṃ jānantoyeva madditvā vītikkamaṃ karoti (kaṅkhā. aṭṭha. nidānavaṇṇanā). Vuttampi cetaṃ –
‘‘সঞ্চিচ্চ আপত্তিং আপজ্জতি।
‘‘Sañcicca āpattiṃ āpajjati;
আপত্তিং পরিগূহতি।
Āpattiṃ parigūhati;
অগতিগমনঞ্চ গচ্ছতি।
Agatigamanañca gacchati;
এদিসো ৰুচ্চতি অলজ্জী পুগ্গলো’’তি॥ (পরি॰ ৩৫৯)।
Ediso vuccati alajjī puggalo’’ti. (pari. 359);
কথং অঞ্ঞাণতায আপজ্জতি? অঞ্ঞাণপুগ্গলো মন্দো মোমূহো কত্তব্বাকত্তব্বং অজানন্তো অকত্তব্বং করোতি, কত্তব্বং ৰিরাধেতি। এৰং অঞ্ঞাণতায আপজ্জতি।
Kathaṃ aññāṇatāya āpajjati? Aññāṇapuggalo mando momūho kattabbākattabbaṃ ajānanto akattabbaṃ karoti, kattabbaṃ virādheti. Evaṃ aññāṇatāya āpajjati.
কথং কুক্কুচ্চপকততায আপজ্জতি? কপ্পিযাকপ্পিযং নিস্সায কুক্কুচ্চে উপ্পন্নে ৰিনযধরং পুচ্ছিত্ৰা কপ্পিযং চে, কত্তব্বং সিযা, অকপ্পিযং চে, ন কত্তব্বং, অযং পন ‘‘ৰট্টতী’’তি মদ্দিত্ৰা ৰীতিক্কমতিযেৰ। এৰং কুক্কুচ্চপকততায আপজ্জতি।
Kathaṃ kukkuccapakatatāya āpajjati? Kappiyākappiyaṃ nissāya kukkucce uppanne vinayadharaṃ pucchitvā kappiyaṃ ce, kattabbaṃ siyā, akappiyaṃ ce, na kattabbaṃ, ayaṃ pana ‘‘vaṭṭatī’’ti madditvā vītikkamatiyeva. Evaṃ kukkuccapakatatāya āpajjati.
কথং কপ্পিযে অকপ্পিযসঞ্ঞায আপজ্জতি? সূকরমংসং ‘‘অচ্ছমংস’’ন্তি খাদতি, কালে ৰিকালসঞ্ঞায ভুঞ্জতি। এৰং কপ্পিযে অকপ্পিযসঞ্ঞায আপজ্জতি।
Kathaṃ kappiye akappiyasaññāya āpajjati? Sūkaramaṃsaṃ ‘‘acchamaṃsa’’nti khādati, kāle vikālasaññāya bhuñjati. Evaṃ kappiye akappiyasaññāya āpajjati.
কথং অকপ্পিযে কপ্পিযসঞ্ঞায আপজ্জতি? অচ্ছমংসং ‘‘সূকরমংস’’ন্তি খাদতি, ৰিকালে কালসঞ্ঞায ভুঞ্জতি। এৰং অকপ্পিযে কপ্পিযসঞ্ঞায আপজ্জতি।
Kathaṃ akappiye kappiyasaññāya āpajjati? Acchamaṃsaṃ ‘‘sūkaramaṃsa’’nti khādati, vikāle kālasaññāya bhuñjati. Evaṃ akappiye kappiyasaññāya āpajjati.
কথং সতিসম্মোসায আপজ্জতি? সহসেয্যচীৰরৰিপ্পৰাসাদীনি সতিসম্মোসায আপজ্জতি।
Kathaṃ satisammosāya āpajjati? Sahaseyyacīvaravippavāsādīni satisammosāya āpajjati.
৬৩৫-৮. ‘‘ভিক্খুনা উপট্ঠপেতব্বো’’তি পদচ্ছেদো। ধম্মচক্খুনাতি পাতিমোক্খসংৰরসীলসঙ্খাতো পটিপত্তিধম্মোৰ চক্খু এতস্সাতি ধম্মচক্খু, তেন ছহি অঙ্গেহি যুত্তেন ধম্মচক্খুনা পন ভিক্খুনা উপসম্পাদনা কাতব্বা, নিস্সযো চেৰ দাতব্বো, সামণেরো উপট্ঠাপেতব্বোতি যোজনা। আপত্তিং জানাতি, অনাপত্তিং জানাতি, গরুং আপত্তিং জানাতি, লহুং আপত্তিং জানাতীতি যোজনা। অস্স ভিক্খুনো উভযানি পাতিমোক্খানি ৰিত্থারা স্ৰাগতানি ভৰন্তি, অত্থতো সুৰিভত্তানি ভৰন্তি, সুত্তসো অনুব্যঞ্জনসো সুৰিনিচ্ছিতানি ভৰন্তি, দসৰস্সো ৰা হোতি, অতিরেকদসৰস্সো ৰাতি যোজনা।
635-8. ‘‘Bhikkhunā upaṭṭhapetabbo’’ti padacchedo. Dhammacakkhunāti pātimokkhasaṃvarasīlasaṅkhāto paṭipattidhammova cakkhu etassāti dhammacakkhu, tena chahi aṅgehi yuttena dhammacakkhunā pana bhikkhunā upasampādanā kātabbā, nissayo ceva dātabbo, sāmaṇero upaṭṭhāpetabboti yojanā. Āpattiṃ jānāti, anāpattiṃ jānāti, garuṃ āpattiṃ jānāti, lahuṃ āpattiṃ jānātīti yojanā. Assa bhikkhuno ubhayāni pātimokkhāni vitthārā svāgatāni bhavanti, atthato suvibhattāni bhavanti, suttaso anubyañjanaso suvinicchitāni bhavanti, dasavasso vā hoti, atirekadasavasso vāti yojanā.
ছক্ককথাৰণ্ণনা।
Chakkakathāvaṇṇanā.
৬৩৯. সত্ত সামীচিযো ৰুত্তাতি ‘‘সো চ ভিক্খু অনব্ভিতো, তে চ ভিক্খূ গারয্হা, অযং তত্থ সামীচি, যুঞ্জন্তাযস্মন্তো সকং, মা ৰো সকং ৰিনস্সাতি অযং তত্থ সামীচি, অযং তে ভিক্খু পত্তো যাৰ ভেদনায ধারেতব্বোতি, অযং তত্থ সামীচি, ততো নীহরিত্ৰা ভিক্খূহি সদ্ধিং সংৰিভজিতব্বং, অযং তত্থ সামীচি, অঞ্ঞাতব্বং পরিপুচ্ছিতব্বং পরিপঞ্হিতব্বং, অযং তত্থ সামীচি, যস্স ভৰিস্সতি, সো হরিস্সতীতি, অযং তত্থ সামীচী’’তি ছ সামীচিযো ভিক্খুপাতিমোক্খেৰুত্তা, ‘‘সা চ ভিক্খুনী অনব্ভিতা, তা চ ভিক্খুনিযো গারয্হা, অযং তত্থ সামীচী’’তি ভিক্খুনিপাতিমোক্খে ৰুত্তায সদ্ধিং সত্ত সামীচিযো ৰুত্তা। সত্তেৰ সমথাপি চাতি সম্মুখাৰিনযাদিসমথাপি সত্তেৰ ৰুত্তা। পঞ্ঞত্তাপত্তিযো সত্তাতি পারাজিকাদযো পঞ্ঞত্তাপত্তিযো সত্ত ৰুত্তা। সত্তবোজ্ঝঙ্গদস্সিনাতি সতিসম্বোজ্ঝঙ্গাদযো সত্ত বোজ্ঝঙ্গে যাথাৰতো পস্সন্তেন ভগৰতা।
639.Sattasāmīciyo vuttāti ‘‘so ca bhikkhu anabbhito, te ca bhikkhū gārayhā, ayaṃ tattha sāmīci, yuñjantāyasmanto sakaṃ, mā vo sakaṃ vinassāti ayaṃ tattha sāmīci, ayaṃ te bhikkhu patto yāva bhedanāya dhāretabboti, ayaṃ tattha sāmīci, tato nīharitvā bhikkhūhi saddhiṃ saṃvibhajitabbaṃ, ayaṃ tattha sāmīci, aññātabbaṃ paripucchitabbaṃ paripañhitabbaṃ, ayaṃ tattha sāmīci, yassa bhavissati, so harissatīti, ayaṃ tattha sāmīcī’’ti cha sāmīciyo bhikkhupātimokkhevuttā, ‘‘sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīcī’’ti bhikkhunipātimokkhe vuttāya saddhiṃ satta sāmīciyo vuttā. Satteva samathāpi cāti sammukhāvinayādisamathāpi satteva vuttā. Paññattāpattiyo sattāti pārājikādayo paññattāpattiyo satta vuttā. Sattabojjhaṅgadassināti satisambojjhaṅgādayo satta bojjhaṅge yāthāvato passantena bhagavatā.
সত্তককথাৰণ্ণনা।
Sattakakathāvaṇṇanā.
৬৪০-১. ইধ কুলদূসকো ভিক্খু আজীৰস্সেৰ কারণা পুপ্ফেন, ফলেন, চুণ্ণেন, মত্তিকায, দন্তকট্ঠেহি, ৰেল়ুযা, ৰেজ্জিকায, জঙ্ঘপেসনিকেনাতি ইমেহি অট্ঠহি আকারেহি কুলানি দূসেতীতি যোজনা। ‘‘পুপ্ফেনা’’তিআদিনা পুপ্ফাদিনা দানমেৰ উপলক্খণতো দস্সেতি। পুপ্ফেনাতি পুপ্ফদানেনাতি অত্থো গহেতব্বো। পুপ্ফদানাদযো কুলদূসনে ৰুত্তা।
640-1. Idha kuladūsako bhikkhu ājīvasseva kāraṇā pupphena, phalena, cuṇṇena, mattikāya, dantakaṭṭhehi, veḷuyā, vejjikāya, jaṅghapesanikenāti imehi aṭṭhahi ākārehi kulāni dūsetīti yojanā. ‘‘Pupphenā’’tiādinā pupphādinā dānameva upalakkhaṇato dasseti. Pupphenāti pupphadānenāti attho gahetabbo. Pupphadānādayo kuladūsane vuttā.
৬৪২-৫. ‘‘অট্ঠধানতিরিত্তাপি, অতিরিত্তাপি অট্ঠধা’’তিদ্ৰীসু অট্ঠকেসু অট্ঠ অনতিরিত্তে তাৰ দস্সেতুমাহ ‘‘অকপ্পিযকতঞ্চেৰা’’তিআদি । গিলানানতিরিত্তকন্তি নিদ্দিট্ঠা ইমে অট্ঠেৰ অনতিরিত্তকা ঞেয্যাতি যোজনা। অকপ্পিযকতাদযো পৰারণসিক্খাপদকথাৰণ্ণনায ৰুত্তা।
642-5. ‘‘Aṭṭhadhānatirittāpi, atirittāpi aṭṭhadhā’’tidvīsu aṭṭhakesu aṭṭha anatiritte tāva dassetumāha ‘‘akappiyakatañcevā’’tiādi . Gilānānatirittakanti niddiṭṭhā ime aṭṭheva anatirittakā ñeyyāti yojanā. Akappiyakatādayo pavāraṇasikkhāpadakathāvaṇṇanāya vuttā.
৬৪৬. ঞাতঞত্তিসূতি ঞাতদুক্কটং, ঞত্তিদুক্কটঞ্চ। পটিসাৰনেতি পটিস্সৰে। অট্ঠদুক্কটানং ৰিনিচ্ছযো দুতিযপারাজিককথাৰণ্ণনায ৰুত্তো।
646.Ñātañattisūti ñātadukkaṭaṃ, ñattidukkaṭañca. Paṭisāvaneti paṭissave. Aṭṭhadukkaṭānaṃ vinicchayo dutiyapārājikakathāvaṇṇanāya vutto.
৬৪৮-৯. এহিভিক্খূপসম্পদাতি যসকুলপুত্তাদীনং ‘‘এহি ভিক্খূ’’তি ৰচনেন ভগৰতা দিন্নউপসম্পদা। সরণগমনেন চাতি পঠমবোধিযং তীহি সরণগমনেহি অনুঞ্ঞাতউপসম্পদা। পঞ্হাব্যাকরণোৰাদাতি সোপাকস্স পঞ্হাব্যাকরণোপসম্পদা, মহাকস্সপত্থেরস্স দিন্নওৰাদপটিগ্গহণোপসম্পদা চ। গরুধম্মপটিগ্গহোতি মহাপজাপতিযা গোতমিযা অনুঞ্ঞাতগরুধম্মপটিগ্গহণোপসম্পদা।
648-9.Ehibhikkhūpasampadāti yasakulaputtādīnaṃ ‘‘ehi bhikkhū’’ti vacanena bhagavatā dinnaupasampadā. Saraṇagamanena cāti paṭhamabodhiyaṃ tīhi saraṇagamanehi anuññātaupasampadā. Pañhābyākaraṇovādāti sopākassa pañhābyākaraṇopasampadā, mahākassapattherassa dinnaovādapaṭiggahaṇopasampadā ca. Garudhammapaṭiggahoti mahāpajāpatiyā gotamiyā anuññātagarudhammapaṭiggahaṇopasampadā.
ঞত্তিচতুত্থেন কম্মেনাতি ইদানি ভিক্খুউপসম্পদা। অট্ঠৰাচিকাতি ভিক্খুনীনং সন্তিকে ঞত্তিচতুত্থেন কম্মেন, ভিক্খূনং সন্তিকে ঞত্তিচতুত্থেন কম্মেনাতি অট্ঠহি কম্মৰাচাহি ভিক্খুনীনং উপসম্পদা অট্ঠৰাচিকা নাম। দূতেন ভিক্খুনীনন্তি অড্ঢকাসিযা গণিকায অনুঞ্ঞাতা ভিক্খুনীনং দূতেন উপসম্পদা।
Ñatticatutthena kammenāti idāni bhikkhuupasampadā. Aṭṭhavācikāti bhikkhunīnaṃ santike ñatticatutthena kammena, bhikkhūnaṃ santike ñatticatutthena kammenāti aṭṭhahi kammavācāhi bhikkhunīnaṃ upasampadā aṭṭhavācikā nāma. Dūtena bhikkhunīnanti aḍḍhakāsiyā gaṇikāya anuññātā bhikkhunīnaṃ dūtena upasampadā.
৬৫০. সুদ্ধদিট্ঠিনাতি সুট্ঠু সৰাসনকিলেসানং পহানেন পরিসুদ্ধা সমন্তচক্খুসঙ্খাতা দিট্ঠি এতস্সাতি সুদ্ধদিট্ঠি, তেন সমন্তচক্খুনা সম্মাসম্বুদ্ধেন।
650.Suddhadiṭṭhināti suṭṭhu savāsanakilesānaṃ pahānena parisuddhā samantacakkhusaṅkhātā diṭṭhi etassāti suddhadiṭṭhi, tena samantacakkhunā sammāsambuddhena.
৬৫১. পাপিচ্ছা নাম অসন্তগুণসম্ভাৰনিচ্ছা।
651.Pāpicchā nāma asantaguṇasambhāvanicchā.
৬৫২-৩. ন চ মজ্জপো সিযাতি মজ্জপো ন সিযা মজ্জং পিৰন্তো ন ভৰেয্য, মজ্জং ন পিৰেয্যাতি অত্থো। অব্রহ্মচরিযাতি (অ॰ নি॰ অট্ঠ॰ ২.৩.৭১) অসেট্ঠচরিযতো মেথুনা ৰিরমেয্য। রত্তিং ন ভুঞ্জেয্য ৰিকালভোজনন্তি উপোসথং উপৰুত্থো রত্তিভোজনঞ্চ দিৰাৰিকালভোজনঞ্চ ন ভুঞ্জেয্য। ন চ গন্ধমাচরেতি গন্ধঞ্চ ন ৰিলিম্পেয্য। মঞ্চে ছমাযং ৰ সযেথ সন্থতেতি কপ্পিযমঞ্চে ৰা সুধাদিপরিকম্মকতায ভূমিযা ৰা তিণপণ্ণপলালাদীনি সন্থরিত্ৰা কতে সন্থতে ৰা সযেথাতি অত্থো। এতঞ্হি অট্ঠঙ্গিকমাহুপোসথন্তি এতং পাণাতিপাতাদীনি অসমাচরন্তেন উপৰুত্থং উপোসথং অট্ঠহঙ্গেহি সমন্নাগতত্তা ‘‘অট্ঠঙ্গিক’’ন্তি ৰদন্তি। দুক্খন্তগুনাতি ৰট্টদুক্খস্স অন্তং অমতমহানিব্বানং গতেন পত্তেন বুদ্ধেন পকাসিতন্তি যোজনা।
652-3.Naca majjapo siyāti majjapo na siyā majjaṃ pivanto na bhaveyya, majjaṃ na piveyyāti attho. Abrahmacariyāti (a. ni. aṭṭha. 2.3.71) aseṭṭhacariyato methunā virameyya. Rattiṃ na bhuñjeyya vikālabhojananti uposathaṃ upavuttho rattibhojanañca divāvikālabhojanañca na bhuñjeyya. Na ca gandhamācareti gandhañca na vilimpeyya. Mañce chamāyaṃ va sayetha santhateti kappiyamañce vā sudhādiparikammakatāya bhūmiyā vā tiṇapaṇṇapalālādīni santharitvā kate santhate vā sayethāti attho. Etañhi aṭṭhaṅgikamāhuposathanti etaṃ pāṇātipātādīni asamācarantena upavutthaṃ uposathaṃ aṭṭhahaṅgehi samannāgatattā ‘‘aṭṭhaṅgika’’nti vadanti. Dukkhantagunāti vaṭṭadukkhassa antaṃ amatamahānibbānaṃ gatena pattena buddhena pakāsitanti yojanā.
৬৫৪. ভিক্খুনোৰাদকভিক্খুনো অট্ঠঙ্গানি ভিক্খুনোৰাদকথাৰণ্ণনায দস্সিতানেৰ।
654. Bhikkhunovādakabhikkhuno aṭṭhaṅgāni bhikkhunovādakathāvaṇṇanāya dassitāneva.
অট্ঠককথাৰণ্ণনা।
Aṭṭhakakathāvaṇṇanā.
৬৫৫. ভোজনানি পণীতানি নৰ ৰুত্তানীতি পণীতানি হি ভোজনসিক্খাপদে ৰুত্তানি। দসসু অকপ্পিযমংসেসু মনুস্সমংসৰজ্জিতানি নৰ মংসানি খাদন্তস্স দুক্কটং নিদ্দিট্ঠন্তি যোজনা।
655.Bhojanāni paṇītāni nava vuttānīti paṇītāni hi bhojanasikkhāpade vuttāni. Dasasu akappiyamaṃsesu manussamaṃsavajjitāni nava maṃsāni khādantassa dukkaṭaṃ niddiṭṭhanti yojanā.
৬৫৬. পাতিমোক্খ…পে॰… পরিদীপিতাতি ভিক্খূনং পঞ্চুদ্দেসা, ভিক্খুনীনং অনিযতুদ্দেসেহি ৰিনা চত্তারোতি উদ্দেসা নৰ দীপিতা। উপোসথা নৰেৰাতি দিৰসৰসেন তযো, কারকৰসেন তযো, করণৰসেন তযোতি নৰ উপোসথা। এত্থাতি ইমস্মিং সাসনে। সঙ্ঘো নৰহি ভিজ্জতীতি নৰহি পুগ্গলেহি সঙ্ঘো ভিজ্জতীতি যোজনা। যথাহ –
656.Pātimokkha…pe… paridīpitāti bhikkhūnaṃ pañcuddesā, bhikkhunīnaṃ aniyatuddesehi vinā cattāroti uddesā nava dīpitā. Uposathā navevāti divasavasena tayo, kārakavasena tayo, karaṇavasena tayoti nava uposathā. Etthāti imasmiṃ sāsane. Saṅgho navahi bhijjatīti navahi puggalehi saṅgho bhijjatīti yojanā. Yathāha –
‘‘একতো , উপালি, চত্তারো হোন্তি, একতো চত্তারো, নৰমো অনুস্সাৰেতি, সলাকং গাহেতি ‘অযং ধম্মো, অযং ৰিনযো, ইদং সত্থুসাসনং, ইমং গণ্হথ, ইমং রোচেথা’তি। এৰম্পি খো, উপালি, সঙ্ঘরাজি চেৰ হোতি সঙ্ঘভেদো চ। নৰন্নং ৰা, উপালি, অতিরেকনৰন্নং ৰা সঙ্ঘরাজি চেৰ হোতি সঙ্ঘভেদো চা’’তি (চূল়ৰ॰ ৩৫১)।
‘‘Ekato , upāli, cattāro honti, ekato cattāro, navamo anussāveti, salākaṃ gāheti ‘ayaṃ dhammo, ayaṃ vinayo, idaṃ satthusāsanaṃ, imaṃ gaṇhatha, imaṃ rocethā’ti. Evampi kho, upāli, saṅgharāji ceva hoti saṅghabhedo ca. Navannaṃ vā, upāli, atirekanavannaṃ vā saṅgharāji ceva hoti saṅghabhedo cā’’ti (cūḷava. 351).
নৰককথাৰণ্ণনা।
Navakakathāvaṇṇanā.
৬৫৭. দস অক্কোসৰত্থূনি ৰক্খতি। দস সিক্খাপদানি পাকটানেৰ। মনুস্সমংসাদীনি দস অকপ্পিযমংসানি হেট্ঠা ৰুত্তানেৰ। সুক্কানি ৰে দসাতি নীলাদীনি দস সুক্কানি।
657. Dasa akkosavatthūni vakkhati. Dasa sikkhāpadāni pākaṭāneva. Manussamaṃsādīni dasa akappiyamaṃsāni heṭṭhā vuttāneva. Sukkāni ve dasāti nīlādīni dasa sukkāni.
৬৫৯. রঞ্ঞো অন্তেপুরপ্পৰেসনে দস আদীনৰা এৰং পাল়িপাঠেন ৰেদিতব্বা –
659. Rañño antepurappavesane dasa ādīnavā evaṃ pāḷipāṭhena veditabbā –
‘‘দসযিমে, ভিক্খৰে, আদীনৰা রাজন্তেপুরপ্পৰেসনে। কতমে দস? ইধ, ভিক্খৰে, রাজা মহেসিযা সদ্ধিং নিসিন্নো হোতি, তত্র ভিক্খু পৰিসতি, মহেসী ৰা ভিক্খুং দিস্ৰা সিতং পাতুকরোতি, ভিক্খু ৰা মহেসিং দিস্ৰা সিতং পাতুকরোতি, তত্থ রঞ্ঞো এৰং হোতি ‘অদ্ধা ইমেসং কতং ৰা করিস্সন্তি ৰা’তি। অযং, ভিক্খৰে, পঠমো আদীনৰো রাজন্তেপুরপ্পৰেসনে।
‘‘Dasayime, bhikkhave, ādīnavā rājantepurappavesane. Katame dasa? Idha, bhikkhave, rājā mahesiyā saddhiṃ nisinno hoti, tatra bhikkhu pavisati, mahesī vā bhikkhuṃ disvā sitaṃ pātukaroti, bhikkhu vā mahesiṃ disvā sitaṃ pātukaroti, tattha rañño evaṃ hoti ‘addhā imesaṃ kataṃ vā karissanti vā’ti. Ayaṃ, bhikkhave, paṭhamo ādīnavo rājantepurappavesane.
‘‘পুন চপরং, ভিক্খৰে, রাজা বহুকিচ্চো বহুকরণীযো অঞ্ঞতরং ইত্থিং গন্ত্ৰা ন সরতি, সা তেন গব্ভং গণ্হাতি, তত্থ রঞ্ঞো এৰং হোতি ‘ন খো ইধ অঞ্ঞো কোচি পৰিসতি অঞ্ঞত্র পব্বজিতেন, সিযা নু খো পব্বজিতস্স কম্ম’ন্তি। অযং, ভিক্খৰে, দুতিযো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rājā bahukicco bahukaraṇīyo aññataraṃ itthiṃ gantvā na sarati, sā tena gabbhaṃ gaṇhāti, tattha rañño evaṃ hoti ‘na kho idha añño koci pavisati aññatra pabbajitena, siyā nu kho pabbajitassa kamma’nti. Ayaṃ, bhikkhave, dutiyo ādīnavo rājantepurappavesane.
‘‘পুন চপরং, ভিক্খৰে, রঞ্ঞো অন্তেপুরে অঞ্ঞতরং রতনং নস্সতি, তত্থ রঞ্ঞো এৰং হোতি ‘ন খো ইধ অঞ্ঞো কোচি পৰিসতি অঞ্ঞত্র পব্বজিতেন, সিযা নু খো পব্বজিতস্স কম্ম’ন্তি। অযং, ভিক্খৰে, ততিযো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rañño antepure aññataraṃ ratanaṃ nassati, tattha rañño evaṃ hoti ‘na kho idha añño koci pavisati aññatra pabbajitena, siyā nu kho pabbajitassa kamma’nti. Ayaṃ, bhikkhave, tatiyo ādīnavo rājantepurappavesane.
‘‘পুন চপরং, ভিক্খৰে, রঞ্ঞো অন্তেপুরে অব্ভন্তরা গুয্হমন্তা বহিদ্ধা সম্ভেদং গচ্ছন্তি, তত্থ রঞ্ঞো এৰং হোতি ‘ন খো ইধ অঞ্ঞো কোচি পৰিসতি অঞ্ঞত্র পব্বজিতেন, সিযা নু খো পব্বজিতস্স কম্ম’ন্তি। অযং, ভিক্খৰে, চতুত্থো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rañño antepure abbhantarā guyhamantā bahiddhā sambhedaṃ gacchanti, tattha rañño evaṃ hoti ‘na kho idha añño koci pavisati aññatra pabbajitena, siyā nu kho pabbajitassa kamma’nti. Ayaṃ, bhikkhave, catuttho ādīnavo rājantepurappavesane.
‘‘পুন চপরং, ভিক্খৰে, রঞ্ঞো অন্তেপুরে পিতা ৰা পুত্তং পত্থেতি, পুত্তো ৰা পিতরং পত্থেতি, তেসং এৰং হোতি ‘ন খো ইধ অঞ্ঞো কোচি পৰিসতি অঞ্ঞত্র পব্বজিতেন, সিযা নু খো পব্বজিতস্স কম্ম’ন্তি। অযং, ভিক্খৰে, পঞ্চমো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rañño antepure pitā vā puttaṃ pattheti, putto vā pitaraṃ pattheti, tesaṃ evaṃ hoti ‘na kho idha añño koci pavisati aññatra pabbajitena, siyā nu kho pabbajitassa kamma’nti. Ayaṃ, bhikkhave, pañcamo ādīnavo rājantepurappavesane.
‘‘পুন চপরং, ভিক্খৰে, রাজা নীচট্ঠানিযং উচ্চে ঠানে ঠপেতি, যেসং তং অমনাপং, তেসং এৰং হোতি ‘রাজা খো পব্বজিতেন সংসট্ঠো, সিযা নু খো পব্বজিতস্স কম্ম’ন্তি। অযং, ভিক্খৰে, ছট্ঠো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rājā nīcaṭṭhāniyaṃ ucce ṭhāne ṭhapeti, yesaṃ taṃ amanāpaṃ, tesaṃ evaṃ hoti ‘rājā kho pabbajitena saṃsaṭṭho, siyā nu kho pabbajitassa kamma’nti. Ayaṃ, bhikkhave, chaṭṭho ādīnavo rājantepurappavesane.
‘‘পুন চপরং, ভিক্খৰে, রাজা উচ্চট্ঠানিযং নীচে ঠানে ঠপেতি, যেসং তং অমনাপং, তেসং এৰং হোতি ‘রাজা খো পব্বজিতেন সংসট্ঠো, সিযা নু খো পব্বজিতস্স কম্ম’ন্তি। অযং, ভিক্খৰে, সত্তমো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rājā uccaṭṭhāniyaṃ nīce ṭhāne ṭhapeti, yesaṃ taṃ amanāpaṃ, tesaṃ evaṃ hoti ‘rājā kho pabbajitena saṃsaṭṭho, siyā nu kho pabbajitassa kamma’nti. Ayaṃ, bhikkhave, sattamo ādīnavo rājantepurappavesane.
‘‘পুন চপরং, ভিক্খৰে, রাজা অকালে সেনং উয্যোজেতি, যেসং তং অমনাপং, তেসং এৰং হোতি ‘রাজা খো পব্বজিতেন সংসট্ঠো, সিযা নু খো পব্বজিতস্স কম্ম’ন্তি। অযং, ভিক্খৰে, অট্ঠমো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rājā akāle senaṃ uyyojeti, yesaṃ taṃ amanāpaṃ, tesaṃ evaṃ hoti ‘rājā kho pabbajitena saṃsaṭṭho, siyā nu kho pabbajitassa kamma’nti. Ayaṃ, bhikkhave, aṭṭhamo ādīnavo rājantepurappavesane.
‘‘পুন চপরং, ভিক্খৰে, রাজা কালে সেনং উয্যোজেত্ৰা অন্তরামগ্গতো নিৰত্তাপেতি, যেসং তং অমনাপং, তেসং এৰং হোতি ‘রাজা খো পব্বজিতেন সংসট্ঠো, সিযা নু খো পব্বজিতস্স কম্ম’ন্তি। অযং, ভিক্খৰে, নৰমো আদীনৰো রাজন্তেপুরপ্পৰেসনে।
‘‘Puna caparaṃ, bhikkhave, rājā kāle senaṃ uyyojetvā antarāmaggato nivattāpeti, yesaṃ taṃ amanāpaṃ, tesaṃ evaṃ hoti ‘rājā kho pabbajitena saṃsaṭṭho, siyā nu kho pabbajitassa kamma’nti. Ayaṃ, bhikkhave, navamo ādīnavo rājantepurappavesane.
‘‘পুন চপরং, ভিক্খৰে, রঞ্ঞো অন্তেপুরং হত্থিসম্মদ্দং অস্সসম্মদ্দং রথসম্মদ্দং রজনীযানি রূপসদ্দগন্ধরসফোট্ঠব্বানি, যানি ন পব্বজিতস্স সারুপ্পানি, অযং, ভিক্খৰে, দসমো আদীনৰো রাজন্তেপুরপ্পৰেসনে। ইমে খো, ভিক্খৰে, দস আদীনৰা রাজন্তেপুরপ্পৰেসনে’’তি (অ॰ নি॰ ১০.৪৫; পাচি॰ ৪৯৭)।
‘‘Puna caparaṃ, bhikkhave, rañño antepuraṃ hatthisammaddaṃ assasammaddaṃ rathasammaddaṃ rajanīyāni rūpasaddagandharasaphoṭṭhabbāni, yāni na pabbajitassa sāruppāni, ayaṃ, bhikkhave, dasamo ādīnavo rājantepurappavesane. Ime kho, bhikkhave, dasa ādīnavā rājantepurappavesane’’ti (a. ni. 10.45; pāci. 497).
তত্থ চ পিতা ৰা পুত্তং পত্থেতীতি পুত্তং মারেতুমিচ্ছতীতি অত্থো। এসেৰ নযো পুত্তো পিতরং পত্থেতীতি। হত্থিসম্মদ্দন্তি হত্থীনং সম্মদ্দো সংসট্ঠো এত্থাতি হত্থিসম্মদ্দং। এৰং ‘‘অস্সসম্মদ্দ’’ন্তিআদীসুপি।
Tattha ca pitā vā puttaṃ patthetīti puttaṃ māretumicchatīti attho. Eseva nayo putto pitaraṃ patthetīti. Hatthisammaddanti hatthīnaṃ sammaddo saṃsaṭṭho etthāti hatthisammaddaṃ. Evaṃ ‘‘assasammadda’’ntiādīsupi.
দসাকারেহীতি –
Dasākārehīti –
‘‘আপত্তিনুক্খিত্তমনন্তরায-
‘‘Āpattinukkhittamanantarāya-
পহুত্ততাযো তথসঞ্ঞিতা চ।
Pahuttatāyo tathasaññitā ca;
ছাদেতুকামো অথ ছাদনাতি।
Chādetukāmo atha chādanāti;
ছন্না দসঙ্গেহরুণুগ্গমম্হীতি॥ –
Channā dasaṅgeharuṇuggamamhīti. –
গহিতেহি দসহি অঙ্গেহি।
Gahitehi dasahi aṅgehi.
৬৬০. দস কম্মপথা পুঞ্ঞাতি পাণাতিপাতাৰেরমণিআদযো দস কুসলকম্মপথা। অপুঞ্ঞাপি তথা দসাতি পাণাতিপাতাদযো দস অকুসলকম্মপথাৰ। দস দানৰত্থূনি ৰক্খতি। দসেৰ রতনানি চাতি –
660.Dasa kammapathā puññāti pāṇātipātāveramaṇiādayo dasa kusalakammapathā. Apuññāpi tathā dasāti pāṇātipātādayo dasa akusalakammapathāva. Dasa dānavatthūni vakkhati. Daseva ratanāni cāti –
‘‘মুত্তা মণী ৰেল়ুরিযা চ সঙ্খা।
‘‘Muttā maṇī veḷuriyā ca saṅkhā;
সিলা পৰাল়ং রজতঞ্চ হেমং।
Silā pavāḷaṃ rajatañca hemaṃ;
লোহীতকঞ্চাপি মসারগল্লা।
Lohītakañcāpi masāragallā;
দস্সেতি ধীরো রতনানি জঞ্ঞা’’তি॥ –
Dasseti dhīro ratanāni jaññā’’ti. –
নিদ্দিট্ঠানি দস রতনানি।
Niddiṭṭhāni dasa ratanāni.
৬৬২. মুনিন্দেন অৰন্দিযা দস পুগ্গলা দীপিতাতি যোজনা। কথং? ‘‘দসযিমে, ভিক্খৰে, অৰন্দিযা। পুরে উপসম্পন্নেন পচ্ছা উপসম্পন্নো অৰন্দিযো, অনুপসম্পন্নো অৰন্দিযো, নানাসংৰাসকো ৰুড্ঢতরো অধম্মৰাদী অৰন্দিযো, মাতুগামো অৰন্দিযো, পণ্ডকো অৰন্দিযো, পারিৰাসিকো অৰন্দিযো, মূলাযপটিকস্সনারহো অৰন্দিযো, মানত্তারহো অৰন্দিযো, মানত্তচারিকো অৰন্দিযো, অব্ভানারহো অৰন্দিযো। ইমে খো, ভিক্খৰে, দস অৰন্দিযা’’তি (চূল়ৰ॰ ৩১২)।
662. Munindena avandiyā dasa puggalā dīpitāti yojanā. Kathaṃ? ‘‘Dasayime, bhikkhave, avandiyā. Pure upasampannena pacchā upasampanno avandiyo, anupasampanno avandiyo, nānāsaṃvāsako vuḍḍhataro adhammavādī avandiyo, mātugāmo avandiyo, paṇḍako avandiyo, pārivāsiko avandiyo, mūlāyapaṭikassanāraho avandiyo, mānattāraho avandiyo, mānattacāriko avandiyo, abbhānāraho avandiyo. Ime kho, bhikkhave, dasa avandiyā’’ti (cūḷava. 312).
৬৬৩-৪. সোসানিকন্তি সুসানে ছড্ডিতং। পাপণিকন্তি আপণদ্ৰারে ছড্ডিতং। উন্দূরক্খাযিতন্তি উন্দূরেহি খাযিতং পরিচ্চত্তং পিলোতিকং। গোখাযিতাদীসুপি এসেৰ নযো। থূপচীৰরিকন্তি বলিকম্মত্থায ৰম্মিকে পরিক্খিপিত্ৰা পরিচ্চত্তৰত্থং। আভিসেকিযন্তি রাজূনং অভিসেকমণ্ডপে পরিচ্চত্তৰত্থং। গতপচ্চাগতঞ্চাতি সুসানগতমনুস্সেহি পচ্চাগন্ত্ৰা নহাযিত্ৰা ছড্ডিতং পিলোতিকং।
663-4.Sosānikanti susāne chaḍḍitaṃ. Pāpaṇikanti āpaṇadvāre chaḍḍitaṃ. Undūrakkhāyitanti undūrehi khāyitaṃ pariccattaṃ pilotikaṃ. Gokhāyitādīsupi eseva nayo. Thūpacīvarikanti balikammatthāya vammike parikkhipitvā pariccattavatthaṃ. Ābhisekiyanti rājūnaṃ abhisekamaṇḍape pariccattavatthaṃ. Gatapaccāgatañcāti susānagatamanussehi paccāgantvā nahāyitvā chaḍḍitaṃ pilotikaṃ.
৬৬৫. সব্বনীলাদযো ৰুত্তা, দস চীৰরধারণাতি ‘‘সব্বনীলকানি চীৰরানি ধারেন্তীতি ৰুত্তৰসেন দসা’’তি (পরি॰ অট্ঠ॰ ৩৩০) কুরুন্দিযং ৰুত্তং। এত্থ ইমস্মিং দসকে সংকচ্চিকায ৰা উদকসাটিকায ৰা সদ্ধিং তিচীৰরানি নামেন অধিট্ঠিতানি নৰ চীৰরানি ‘‘দসচীৰরধারণা’’তি ৰুত্তানি। যথাহ – ‘‘নৰসু কপ্পিযচীৰরেসু উদকসাটিকং ৰা সংকচ্চিকং ৰা পক্খিপিত্ৰা দসাতি ৰুত্ত’’ন্তি (পরি॰ অট্ঠ॰ ৩৩০)।
665.Sabbanīlādayo vuttā, dasa cīvaradhāraṇāti ‘‘sabbanīlakāni cīvarāni dhārentīti vuttavasena dasā’’ti (pari. aṭṭha. 330) kurundiyaṃ vuttaṃ. Ettha imasmiṃ dasake saṃkaccikāya vā udakasāṭikāya vā saddhiṃ ticīvarāni nāmena adhiṭṭhitāni nava cīvarāni ‘‘dasacīvaradhāraṇā’’ti vuttāni. Yathāha – ‘‘navasu kappiyacīvaresu udakasāṭikaṃ vā saṃkaccikaṃ vā pakkhipitvā dasāti vutta’’nti (pari. aṭṭha. 330).
দসককথাৰণ্ণনা।
Dasakakathāvaṇṇanā.
৬৬৬. পণ্ডকাদযো একাদস অভব্বপুগ্গলা পন উপসম্পাদিতাপি অনুপসম্পন্না হোন্তীতি যোজনা।
666. Paṇḍakādayo ekādasa abhabbapuggalā pana upasampāditāpi anupasampannā hontīti yojanā.
৬৬৭. ‘‘অকপ্পিযা’’তি ৰুত্তা পত্তা একাদস ভৰন্তীতি যোজনা। দারুজেন পত্তেনাতি দারুমযেন পত্তেন। রতনুব্ভৰাতি রতনমযা দস পত্তা একাদস ভৰন্তীতি যোজনা। দারুজেন চাতি এত্থ চ-সদ্দেন তম্বলোহমযপত্তস্স সঙ্গহো। যথাহ ‘‘একাদস পত্তাতি তম্বলোহমযেন ৰা দারুমযেন ৰা সদ্ধিং দসরতনমযা’’তি। ইধ রতনং নাম মুত্তাদিদসরতনং।
667. ‘‘Akappiyā’’ti vuttā pattā ekādasa bhavantīti yojanā. Dārujena pattenāti dārumayena pattena. Ratanubbhavāti ratanamayā dasa pattā ekādasa bhavantīti yojanā. Dārujena cāti ettha ca-saddena tambalohamayapattassa saṅgaho. Yathāha ‘‘ekādasa pattāti tambalohamayena vā dārumayena vā saddhiṃ dasaratanamayā’’ti. Idha ratanaṃ nāma muttādidasaratanaṃ.
৬৬৮. অকপ্পিযা পাদুকা একাদস হোন্তীতি যোজনা। যথাহ ‘‘একাদস পাদুকাতি দস রতনমযা, একা কট্ঠপাদুকা। তিণপাদুকমুঞ্জপাদুকপব্বজপাদুকাদযো পন কট্ঠপাদুকসঙ্গহমেৰ গচ্ছন্তী’’তি।
668. Akappiyā pādukā ekādasa hontīti yojanā. Yathāha ‘‘ekādasa pādukāti dasa ratanamayā, ekā kaṭṭhapādukā. Tiṇapādukamuñjapādukapabbajapādukādayo pana kaṭṭhapādukasaṅgahameva gacchantī’’ti.
৬৬৯-৭০. অতিখুদ্দকা অতিমহন্তাতি যোজনা। খণ্ডনিমিত্তকা ছাযানিমিত্তকাতি যোজনা। বহিট্ঠেন সম্মতাতি সীমায বহি ঠিতেন সম্মতা। নদিযং, জাতস্সরে, সমুদ্দে ৰা তথা সম্মতাতি যোজনা। সীমায সম্ভিন্না সীমায অজ্ঝোত্থটা সীমাতি যোজনা। ইমা একাদস অসীমাযো সিযুন্তি যোজনা।
669-70. Atikhuddakā atimahantāti yojanā. Khaṇḍanimittakā chāyānimittakāti yojanā. Bahiṭṭhena sammatāti sīmāya bahi ṭhitena sammatā. Nadiyaṃ, jātassare, samudde vā tathā sammatāti yojanā. Sīmāya sambhinnā sīmāya ajjhotthaṭā sīmāti yojanā. Imā ekādasa asīmāyo siyunti yojanā.
৬৭১. একাদসেৰ পথৰী কপ্পিযা, একাদসেৰ পথৰী অকপ্পিযাতি যোজনা।
671. Ekādaseva pathavī kappiyā, ekādaseva pathavī akappiyāti yojanā.
তত্থ একাদস কপ্পিযপথৰী নাম সুদ্ধপাসাণা, সুদ্ধসক্খরা, সুদ্ধকথলা, সুদ্ধমরুম্বা, সুদ্ধৰালুকা, যেভুয্যেনপাসাণা, যেভুয্যেনসক্খরা, যেভুয্যেনকথলা, যেভুয্যেনমরুম্বা, যেভুয্যেনৰালুকাতি ইমা দস দড্ঢায পথৰিযা ৰা চতুমাসোৰট্ঠকপংসুপুঞ্জেন ৰা মত্তিকাপুঞ্জেন ৰা সদ্ধিং একাদস। ‘‘অপ্পপংসুকা, অপ্পমত্তিকা’’তি (পাচি॰ ৮৬) অপরাপি পথৰিযো ৰুত্তা, তা যেভুয্যেনপাসাণাদীসু পঞ্চসুযেৰ সঙ্গহিতা।
Tattha ekādasa kappiyapathavī nāma suddhapāsāṇā, suddhasakkharā, suddhakathalā, suddhamarumbā, suddhavālukā, yebhuyyenapāsāṇā, yebhuyyenasakkharā, yebhuyyenakathalā, yebhuyyenamarumbā, yebhuyyenavālukāti imā dasa daḍḍhāya pathaviyā vā catumāsovaṭṭhakapaṃsupuñjena vā mattikāpuñjena vā saddhiṃ ekādasa. ‘‘Appapaṃsukā, appamattikā’’ti (pāci. 86) aparāpi pathaviyo vuttā, tā yebhuyyenapāsāṇādīsu pañcasuyeva saṅgahitā.
একাদস অকপ্পিযপথৰী নাম ‘‘সুদ্ধপংসু সুদ্ধমত্তিকা অপ্পপাসাণা অপ্পসক্খরা অপ্পকথলা অপ্পমরুম্বা অপ্পৰালুকা যেভুয্যেনপংসুকা যেভুয্যেনমত্তিকা, অদড্ঢাপি ৰুচ্চতি জাতা পথৰী। যোপি পংসুপুঞ্জো ৰা মত্তিকাপুঞ্জো ৰা অতিরেকচাতুমাসং ওৰট্ঠো, অযম্পি ৰুচ্চতি জাতপথৰী’’তি (পাচি॰ ৮৬) ৰুত্তা একাদস।
Ekādasa akappiyapathavī nāma ‘‘suddhapaṃsu suddhamattikā appapāsāṇā appasakkharā appakathalā appamarumbā appavālukā yebhuyyenapaṃsukā yebhuyyenamattikā, adaḍḍhāpi vuccati jātā pathavī. Yopi paṃsupuñjo vā mattikāpuñjo vā atirekacātumāsaṃ ovaṭṭho, ayampi vuccati jātapathavī’’ti (pāci. 86) vuttā ekādasa.
গণ্ঠিকা কপ্পিযা ৰুত্তা, একাদস চ ৰীধকাতি এত্থ কপ্পিযা গণ্ঠিকা ৰিধকা চ একাদস ৰুত্তাতি যোজনা। তে পন –
Gaṇṭhikākappiyā vuttā, ekādasa ca vīdhakāti ettha kappiyā gaṇṭhikā vidhakā ca ekādasa vuttāti yojanā. Te pana –
‘‘ৰেল়ুদন্তৰিসাণট্ঠি-কট্ঠলাখাফলামযা।
‘‘Veḷudantavisāṇaṭṭhi-kaṭṭhalākhāphalāmayā;
সঙ্খনাভিমযা সুত্ত-নল়লোহমযাপি চ।
Saṅkhanābhimayā sutta-naḷalohamayāpi ca;
ৰিধা কপ্পন্তি কপ্পিযা, গণ্ঠিযো চাপি তম্মযা’’তি॥ –
Vidhā kappanti kappiyā, gaṇṭhiyo cāpi tammayā’’ti. –
ইমায গাথায সঙ্গহিতাতি ৰেদিতব্বা।
Imāya gāthāya saṅgahitāti veditabbā.
৬৭৪-৫. উক্খিত্তস্সানুৰত্তিকা ভিক্খুনী উভিন্নং ভিক্খুভিক্খুনীনং ৰসা সঙ্ঘাদিসেসেসু অট্ঠ যাৰততিযকাতি ইমে একাদস যাৰততিযকাতি পকাসিতাতি যোজনা।
674-5.Ukkhittassānuvattikā bhikkhunī ubhinnaṃ bhikkhubhikkhunīnaṃ vasā saṅghādisesesu aṭṭha yāvatatiyakāti ime ekādasa yāvatatiyakāti pakāsitāti yojanā.
৬৭৬. নিস্সযস্স পটিপ্পস্সদ্ধিযো দসেকাৰ একাদসেৰ ৰুত্তাতি যোজনা। ছধাচরিযতো ৰুত্তাতি –
676. Nissayassa paṭippassaddhiyo dasekāva ekādaseva vuttāti yojanā. Chadhācariyato vuttāti –
‘‘পক্কন্তে পক্খসঙ্কন্তে, ৰিব্ভন্তে চাপি নিস্সযো।
‘‘Pakkante pakkhasaṅkante, vibbhante cāpi nissayo;
মরণাণত্তুপজ্ঝায-সমোধানেহি সম্মতী’’তি॥ –
Maraṇāṇattupajjhāya-samodhānehi sammatī’’ti. –
আচরিযতো ছধা নিস্সযপটিপ্পস্সদ্ধিযো ৰুত্তা। উপজ্ঝাযা তু পঞ্চধাতি তাসু উপজ্ঝাযসমোধানং ৰিনা অৰসেসাহি পঞ্চধা উপজ্ঝাযপটিপ্পস্সদ্ধিযো ৰুত্তাতি ইমে একাদস।
Ācariyato chadhā nissayapaṭippassaddhiyo vuttā. Upajjhāyā tu pañcadhāti tāsu upajjhāyasamodhānaṃ vinā avasesāhi pañcadhā upajjhāyapaṭippassaddhiyo vuttāti ime ekādasa.
একাদসককথাৰণ্ণনা।
Ekādasakakathāvaṇṇanā.
৬৭৭. তেরসেৰ ধুতঙ্গানীতি পংসুকূলিকঙ্গাদীনি ধুতঙ্গানি তেরসেৰ হোন্তি।
677.Teraseva dhutaṅgānīti paṃsukūlikaṅgādīni dhutaṅgāni teraseva honti.
পরমানি চ চুদ্দসাতি ‘‘দসাহপরমং অতিরেকচীৰরং ধারেতব্বং, মাসপরমং তেন ভিক্খুনা তং চীৰরং নিক্খিপিতব্বং, সন্তরুত্তরপরমং তেন ভিক্খুনা ততো চীৰরং সাদিতব্বং, ছক্খত্তুপরমং তুণ্হীভূতেন উদ্দিস্স ঠাতব্বং, নৰং পন ভিক্খুনা সন্থতং কারাপেত্ৰা ছব্বস্সানি ধারেতব্বং ছব্বস্সপরমতা ধারেতব্বং, তিযোজনপরমং সহত্থা হরিতব্বানি, দসাহপরমং অতিরেকপত্তো ধারেতব্বো, সত্তাহপরমং সন্নিধিকারকং পরিভুঞ্জিতব্বানি, ছারত্তপরমং তেন ভিক্খুনা তেন চীৰরেন ৰিপ্পৰসিতব্বং, চতুক্কংসপরমং, অড্ঢতেয্যকংসপরমং, দ্ৰঙ্গুলপব্বপরমং আদাতব্বং, অট্ঠঙ্গুলপরমং মঞ্চপটিপাদকং, অট্ঠঙ্গুলপরমং দন্তকট্ঠ’’ন্তি ইতি ইমানি চুদ্দস পরমানি।
Paramāni ca cuddasāti ‘‘dasāhaparamaṃ atirekacīvaraṃ dhāretabbaṃ, māsaparamaṃ tena bhikkhunā taṃ cīvaraṃ nikkhipitabbaṃ, santaruttaraparamaṃ tena bhikkhunā tato cīvaraṃ sāditabbaṃ, chakkhattuparamaṃ tuṇhībhūtena uddissa ṭhātabbaṃ, navaṃ pana bhikkhunā santhataṃ kārāpetvā chabbassāni dhāretabbaṃ chabbassaparamatā dhāretabbaṃ, tiyojanaparamaṃ sahatthā haritabbāni, dasāhaparamaṃ atirekapatto dhāretabbo, sattāhaparamaṃ sannidhikārakaṃ paribhuñjitabbāni, chārattaparamaṃ tena bhikkhunā tena cīvarena vippavasitabbaṃ, catukkaṃsaparamaṃ, aḍḍhateyyakaṃsaparamaṃ, dvaṅgulapabbaparamaṃ ādātabbaṃ, aṭṭhaṅgulaparamaṃ mañcapaṭipādakaṃ, aṭṭhaṅgulaparamaṃ dantakaṭṭha’’nti iti imāni cuddasa paramāni.
সোল়সেৰ তু ‘‘জান’’ন্তি পঞ্ঞত্তানীতি ‘‘জান’’ন্তি এৰং ৰত্ৰা পঞ্ঞত্তানি সোল়স। তে এৰং ৰেদিতব্বা – জানং সঙ্ঘিকং লাভং পরিণতং অত্তনো পরিণামেয্য, জানং পুব্বুপগতং ভিক্খুং অনুপখজ্জ সেয্যং কপ্পেয্য, জানং সপ্পাণকং উদকং তিণং ৰা মত্তিকং ৰা সিঞ্চেয্য ৰা সিঞ্চাপেয্য ৰা, জানং ভিক্খুনিপরিপাচিতং পিণ্ডপাতং পরিভুঞ্জেয্য, জানং আসাদনাপেক্খো, ভুত্তস্মিং পাচিত্তিযং, জানং সপ্পাণকং উদকং পরিভুঞ্জেয্য, জানং যথাধম্মং নিহটাধিকরণং পুন কম্মায উক্কোটেয্য, জানং দুট্ঠুল্লং আপত্তিং পটিচ্ছাদেয্য, জানং ঊনৰীসতিৰস্সং পুগ্গলং উপসম্পাদেয্য, জানং থেয্যসত্থেন সদ্ধিং সংৰিধায একদ্ধানমগ্গং পটিপজ্জেয্য, জানং তথাৰাদিনা ভিক্খুনা অকতানুধম্মেন, জানং তথানাসিতং সমণুদ্দেসং, জানং সঙ্ঘিকং লাভং পরিণতং পুগ্গলস্স পরিণামেয্য, জানং পারাজিকং ধম্মং অজ্ঝাপন্নং ভিক্খুনিং নেৰত্তনা পটিচোদেয্য, জানং চোরিং ৰজ্ঝং ৰিদিতং অনপলোকেত্ৰা, জানং সভিক্খুকং আরামং অনাপুচ্ছা পৰিসেয্যাতি।
Soḷaseva tu ‘‘jāna’’nti paññattānīti ‘‘jāna’’nti evaṃ vatvā paññattāni soḷasa. Te evaṃ veditabbā – jānaṃ saṅghikaṃ lābhaṃ pariṇataṃ attano pariṇāmeyya, jānaṃ pubbupagataṃ bhikkhuṃ anupakhajja seyyaṃ kappeyya, jānaṃ sappāṇakaṃ udakaṃ tiṇaṃ vā mattikaṃ vā siñceyya vā siñcāpeyya vā, jānaṃ bhikkhuniparipācitaṃ piṇḍapātaṃ paribhuñjeyya, jānaṃ āsādanāpekkho, bhuttasmiṃ pācittiyaṃ, jānaṃ sappāṇakaṃ udakaṃ paribhuñjeyya, jānaṃ yathādhammaṃ nihaṭādhikaraṇaṃ puna kammāya ukkoṭeyya, jānaṃ duṭṭhullaṃ āpattiṃ paṭicchādeyya, jānaṃ ūnavīsativassaṃ puggalaṃ upasampādeyya, jānaṃ theyyasatthena saddhiṃ saṃvidhāya ekaddhānamaggaṃ paṭipajjeyya, jānaṃ tathāvādinā bhikkhunā akatānudhammena, jānaṃ tathānāsitaṃ samaṇuddesaṃ, jānaṃ saṅghikaṃ lābhaṃ pariṇataṃ puggalassa pariṇāmeyya, jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodeyya, jānaṃ coriṃ vajjhaṃ viditaṃ anapaloketvā, jānaṃ sabhikkhukaṃ ārāmaṃ anāpucchā paviseyyāti.
৬৭৮. ইধ ইমস্মিং সাসনে যো ভিক্খু অনুত্তরং সউত্তরং উত্তরপকরণেন সহিতং সকলম্পি ৰিনযৰিনিচ্ছযং জানাতি, মহত্তরে অতিৰিপুলে অনুত্তরে উত্তরৰিরহিতে উত্তমে ৰিনযনযে ৰিনযাগতে আপত্তিঅনাপত্তিগরুকলহুককপ্পিযঅকপ্পিযাদিৰিনিচ্ছযকম্মে। অথ ৰা ৰিনযনযে ৰিনযপিটকে পৰত্তমানো সো ভিক্খু নিরুত্তরো ভৰতি পচ্চত্থিকেহি ৰত্তব্বং উত্তরং অতিক্কমিত্ৰা ঠিতো, সেট্ঠো ৰা ভৰতি, তস্স চেৰ পরেসঞ্চ সংসযো ন কাতব্বোতি যোজনা। জানতীতি গাথাবন্ধৰসেন রস্সো।
678.Idha imasmiṃ sāsane yo bhikkhu anuttaraṃ sauttaraṃ uttarapakaraṇena sahitaṃ sakalampi vinayavinicchayaṃ jānāti, mahattare ativipule anuttare uttaravirahite uttame vinayanaye vinayāgate āpattianāpattigarukalahukakappiyaakappiyādivinicchayakamme. Atha vā vinayanaye vinayapiṭake pavattamāno so bhikkhu niruttaro bhavati paccatthikehi vattabbaṃ uttaraṃ atikkamitvā ṭhito, seṭṭho vā bhavati, tassa ceva paresañca saṃsayo na kātabboti yojanā. Jānatīti gāthābandhavasena rasso.
ইতি উত্তরে লীনত্থপকাসনিযা
Iti uttare līnatthapakāsaniyā
একুত্তরনযকথাৰণ্ণনা নিট্ঠিতা।
Ekuttaranayakathāvaṇṇanā niṭṭhitā.
