| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
ஏகுத்தரிகனயோ அட்ட²கவாரவண்ணனா
Ekuttarikanayo aṭṭhakavāravaṇṇanā
328. அட்ட²கேஸு அட்டா²னிஸங்ஸாதீ³னங் தே³ஸனாகாரதே³ஸனட்டா²னானி த³ஸ்ஸெந்தோ ஆஹ ‘‘ந மய’’ந்திஆதி³. தத்த² ‘‘ந மயங்…பே॰… கரிஸ்ஸாமா’’தி இமினா தே³ஸனாகாரங் த³ஸ்ஸேதி, ‘‘கோஸம்ப³கக்க²ந்த⁴கே’’தி இமினா தே³ஸனட்டா²னங் த³ஸ்ஸேதி. தம்பீதி து³தியஅட்ட²கம்பி.
328. Aṭṭhakesu aṭṭhānisaṃsādīnaṃ desanākāradesanaṭṭhānāni dassento āha ‘‘na maya’’ntiādi. Tattha ‘‘na mayaṃ…pe… karissāmā’’ti iminā desanākāraṃ dasseti, ‘‘kosambakakkhandhake’’ti iminā desanaṭṭhānaṃ dasseti. Tampīti dutiyaaṭṭhakampi.
தேரஸகே வுத்தாதி ஸம்ப³ந்தோ⁴. குலானி தூ³ஸேதீதி எத்த² ‘‘தூ³ஸேதீ’’தி கிரியாபத³ஸ்ஸ கரணங் த³ஸ்ஸெந்தோ ஆஹ ‘‘புப்பே²ன வா’’திஆதி³. இமேஹி அட்ட²ஹி தூ³ஸேதீதி யோஜனா. ‘‘லாபே⁴னா’’திஆதி³னா ‘‘அட்ட²ஹி அஸத்³த⁴ம்மேஹீ’’தி எத்த² அஸத்³த⁴ம்மஸரூபங் த³ஸ்ஸேதி. ஸாராகோ³தி ஸங்ராகோ³, பு⁴ஸங் ரஜ்ஜனந்தி அத்தோ². படிவிரோதோ⁴தி தோ³ஸோ. ஸோ ஹி யஸ்மா அலாபா⁴தீ³ஸு படிவிருஜ்ஜ²தி, தஸ்மா படிவிரோதோ⁴தி வுச்சதி. பாளியந்தி வினயபாளியங்.
Terasake vuttāti sambandho. Kulāni dūsetīti ettha ‘‘dūsetī’’ti kiriyāpadassa karaṇaṃ dassento āha ‘‘pupphena vā’’tiādi. Imehi aṭṭhahi dūsetīti yojanā. ‘‘Lābhenā’’tiādinā ‘‘aṭṭhahi asaddhammehī’’ti ettha asaddhammasarūpaṃ dasseti. Sārāgoti saṃrāgo, bhusaṃ rajjananti attho. Paṭivirodhoti doso. So hi yasmā alābhādīsu paṭivirujjhati, tasmā paṭivirodhoti vuccati. Pāḷiyanti vinayapāḷiyaṃ.
பாணந்திஆதி³கா த்³வே கா³தா²யோ த்³வாத³ஸக்க²ரேன ப³ந்தி⁴தா. பட²மகா³தா²ய ததியபாதே³ சரியஸத்³தே³ன யுத்தத்தா ஏகக்க²ரோ அதி⁴கோ. அயங் பனெத்த² யோஜனா – பாணங் ந ஹனே ந கா⁴தெய்ய, ஆதி³ன்னஞ்ச ந ஆதி³யே ந க³ண்ஹெய்ய, முஸா விதத²வசனங் ந பா⁴ஸே ந கதெ²ய்ய, மஜ்ஜபோ மஜ்ஜபானங் ந ச ஸியா, அப்³ரஹ்மசரியா மேது²னா விரமெய்ய, ரத்திங் விகாலபோ⁴ஜனங் ந பு⁴ஞ்ஜெய்ய.
Pāṇantiādikā dve gāthāyo dvādasakkharena bandhitā. Paṭhamagāthāya tatiyapāde cariyasaddena yuttattā ekakkharo adhiko. Ayaṃ panettha yojanā – pāṇaṃ na hane na ghāteyya, ādinnañca na ādiye na gaṇheyya, musā vitathavacanaṃ na bhāse na katheyya, majjapo majjapānaṃ na ca siyā, abrahmacariyā methunā virameyya, rattiṃ vikālabhojanaṃ na bhuñjeyya.
மாலங் ந தா⁴ரே ந தா⁴ரெய்ய, க³ந்த⁴ஞ்ச ந ஆசரே, ஸந்த²தே மஞ்சே ச ச²மாயஞ்ச ஸயேத². ஏதஞ்ஹி உபோஸத²ங் அட்ட²ங்கி³கங் உபோஸத²ங் இதி து³க்க²ந்தகு³னா பு³த்³தே⁴ன பகாஸிதந்தி ஆஹு பண்டி³தாதி.
Mālaṃ na dhāre na dhāreyya, gandhañca na ācare, santhate mañce ca chamāyañca sayetha. Etañhi uposathaṃ aṭṭhaṅgikaṃ uposathaṃ iti dukkhantagunā buddhena pakāsitanti āhu paṇḍitāti.
ஸங்க⁴பே⁴த³கேதி ஸங்க⁴பே⁴த³கக்க²ந்த⁴கே. தாஸங்யேவாதி பி⁴க்கு²னீனமேவ. ‘‘உபாஸிகா அட்ட² வரானி யாசதீ’’தி ஏவங் ஸாமஞ்ஞவசனஸ்ஸாபி அத்த²பகரணாதி³னா விஸேஸவிஸயோ ஹோதீதி ஆஹ ‘‘விஸாகா²’’தி. ஸா ஹி விவிதா⁴ புத்தனத்துஸங்கா²தா ஸாகா² ஏதிஸ்ஸாத்தீ²தி விஸாகா²தி வுச்சதி. ஸப்³ப³த்தா²தி ஸப்³பே³ஸு அட்ட²கேஸு. ஸேஸங் ஸுவிஞ்ஞெய்யமேவ.
Saṅghabhedaketi saṅghabhedakakkhandhake. Tāsaṃyevāti bhikkhunīnameva. ‘‘Upāsikā aṭṭha varāni yācatī’’ti evaṃ sāmaññavacanassāpi atthapakaraṇādinā visesavisayo hotīti āha ‘‘visākhā’’ti. Sā hi vividhā puttanattusaṅkhātā sākhā etissātthīti visākhāti vuccati. Sabbatthāti sabbesu aṭṭhakesu. Sesaṃ suviññeyyameva.
இதி அட்ட²கவாரவண்ணனாய யோஜனா ஸமத்தா.
Iti aṭṭhakavāravaṇṇanāya yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 8. அட்ட²கவாரோ • 8. Aṭṭhakavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / அட்ட²கவாரவண்ணனா • Aṭṭhakavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அட்ட²கவாரவண்ணனா • Aṭṭhakavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அட்ட²கவாரவண்ணனா • Aṭṭhakavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ச²க்கவாராதி³வண்ணனா • Chakkavārādivaṇṇanā
