| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
একুত্তরিকনযো অট্ঠকৰারৰণ্ণনা
Ekuttarikanayo aṭṭhakavāravaṇṇanā
৩২৮. অট্ঠকেসু অট্ঠানিসংসাদীনং দেসনাকারদেসনট্ঠানানি দস্সেন্তো আহ ‘‘ন ময’’ন্তিআদি। তত্থ ‘‘ন মযং…পে॰… করিস্সামা’’তি ইমিনা দেসনাকারং দস্সেতি, ‘‘কোসম্বকক্খন্ধকে’’তি ইমিনা দেসনট্ঠানং দস্সেতি। তম্পীতি দুতিযঅট্ঠকম্পি।
328. Aṭṭhakesu aṭṭhānisaṃsādīnaṃ desanākāradesanaṭṭhānāni dassento āha ‘‘na maya’’ntiādi. Tattha ‘‘na mayaṃ…pe… karissāmā’’ti iminā desanākāraṃ dasseti, ‘‘kosambakakkhandhake’’ti iminā desanaṭṭhānaṃ dasseti. Tampīti dutiyaaṭṭhakampi.
তেরসকে ৰুত্তাতি সম্বন্ধো। কুলানি দূসেতীতি এত্থ ‘‘দূসেতী’’তি কিরিযাপদস্স করণং দস্সেন্তো আহ ‘‘পুপ্ফেন ৰা’’তিআদি। ইমেহি অট্ঠহি দূসেতীতি যোজনা। ‘‘লাভেনা’’তিআদিনা ‘‘অট্ঠহি অসদ্ধম্মেহী’’তি এত্থ অসদ্ধম্মসরূপং দস্সেতি। সারাগোতি সংরাগো, ভুসং রজ্জনন্তি অত্থো। পটিৰিরোধোতি দোসো। সো হি যস্মা অলাভাদীসু পটিৰিরুজ্ঝতি, তস্মা পটিৰিরোধোতি ৰুচ্চতি। পাল়িযন্তি ৰিনযপাল়িযং।
Terasake vuttāti sambandho. Kulāni dūsetīti ettha ‘‘dūsetī’’ti kiriyāpadassa karaṇaṃ dassento āha ‘‘pupphena vā’’tiādi. Imehi aṭṭhahi dūsetīti yojanā. ‘‘Lābhenā’’tiādinā ‘‘aṭṭhahi asaddhammehī’’ti ettha asaddhammasarūpaṃ dasseti. Sārāgoti saṃrāgo, bhusaṃ rajjananti attho. Paṭivirodhoti doso. So hi yasmā alābhādīsu paṭivirujjhati, tasmā paṭivirodhoti vuccati. Pāḷiyanti vinayapāḷiyaṃ.
পাণন্তিআদিকা দ্ৰে গাথাযো দ্ৰাদসক্খরেন বন্ধিতা। পঠমগাথায ততিযপাদে চরিযসদ্দেন যুত্তত্তা একক্খরো অধিকো। অযং পনেত্থ যোজনা – পাণং ন হনে ন ঘাতেয্য, আদিন্নঞ্চ ন আদিযে ন গণ্হেয্য, মুসা ৰিতথৰচনং ন ভাসে ন কথেয্য, মজ্জপো মজ্জপানং ন চ সিযা, অব্রহ্মচরিযা মেথুনা ৰিরমেয্য, রত্তিং ৰিকালভোজনং ন ভুঞ্জেয্য।
Pāṇantiādikā dve gāthāyo dvādasakkharena bandhitā. Paṭhamagāthāya tatiyapāde cariyasaddena yuttattā ekakkharo adhiko. Ayaṃ panettha yojanā – pāṇaṃ na hane na ghāteyya, ādinnañca na ādiye na gaṇheyya, musā vitathavacanaṃ na bhāse na katheyya, majjapo majjapānaṃ na ca siyā, abrahmacariyā methunā virameyya, rattiṃ vikālabhojanaṃ na bhuñjeyya.
মালং ন ধারে ন ধারেয্য, গন্ধঞ্চ ন আচরে, সন্থতে মঞ্চে চ ছমাযঞ্চ সযেথ। এতঞ্হি উপোসথং অট্ঠঙ্গিকং উপোসথং ইতি দুক্খন্তগুনা বুদ্ধেন পকাসিতন্তি আহু পণ্ডিতাতি।
Mālaṃ na dhāre na dhāreyya, gandhañca na ācare, santhate mañce ca chamāyañca sayetha. Etañhi uposathaṃ aṭṭhaṅgikaṃ uposathaṃ iti dukkhantagunā buddhena pakāsitanti āhu paṇḍitāti.
সঙ্ঘভেদকেতি সঙ্ঘভেদকক্খন্ধকে। তাসংযেৰাতি ভিক্খুনীনমেৰ। ‘‘উপাসিকা অট্ঠ ৰরানি যাচতী’’তি এৰং সামঞ্ঞৰচনস্সাপি অত্থপকরণাদিনা ৰিসেসৰিসযো হোতীতি আহ ‘‘ৰিসাখা’’তি। সা হি ৰিৰিধা পুত্তনত্তুসঙ্খাতা সাখা এতিস্সাত্থীতি ৰিসাখাতি ৰুচ্চতি। সব্বত্থাতি সব্বেসু অট্ঠকেসু। সেসং সুৰিঞ্ঞেয্যমেৰ।
Saṅghabhedaketi saṅghabhedakakkhandhake. Tāsaṃyevāti bhikkhunīnameva. ‘‘Upāsikā aṭṭha varāni yācatī’’ti evaṃ sāmaññavacanassāpi atthapakaraṇādinā visesavisayo hotīti āha ‘‘visākhā’’ti. Sā hi vividhā puttanattusaṅkhātā sākhā etissātthīti visākhāti vuccati. Sabbatthāti sabbesu aṭṭhakesu. Sesaṃ suviññeyyameva.
ইতি অট্ঠকৰারৰণ্ণনায যোজনা সমত্তা।
Iti aṭṭhakavāravaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৮. অট্ঠকৰারো • 8. Aṭṭhakavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / অট্ঠকৰারৰণ্ণনা • Aṭṭhakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অট্ঠকৰারৰণ্ণনা • Aṭṭhakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অট্ঠকৰারৰণ্ণনা • Aṭṭhakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ছক্কৰারাদিৰণ্ণনা • Chakkavārādivaṇṇanā
