| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
එකුත්‌තරිකනයො අට්‌ඨකවාරවණ්‌ණනා
Ekuttarikanayo aṭṭhakavāravaṇṇanā
328. අට්‌ඨකෙසු අට්‌ඨානිසංසාදීනං දෙසනාකාරදෙසනට්‌ඨානානි දස්‌සෙන්‌තො ආහ ‘‘න මය’’න්‌තිආදි. තත්‌ථ ‘‘න මයං…පෙ.… කරිස්‌සාමා’’ති ඉමිනා දෙසනාකාරං දස්‌සෙති, ‘‘කොසම්‌බකක්‌ඛන්‌ධකෙ’’ති ඉමිනා දෙසනට්‌ඨානං දස්‌සෙති. තම්‌පීති දුතියඅට්‌ඨකම්‌පි.
328. Aṭṭhakesu aṭṭhānisaṃsādīnaṃ desanākāradesanaṭṭhānāni dassento āha ‘‘na maya’’ntiādi. Tattha ‘‘na mayaṃ…pe… karissāmā’’ti iminā desanākāraṃ dasseti, ‘‘kosambakakkhandhake’’ti iminā desanaṭṭhānaṃ dasseti. Tampīti dutiyaaṭṭhakampi.
තෙරසකෙ වුත්‌තාති සම්‌බන්‌ධො. කුලානි දූසෙතීති එත්‌ථ ‘‘දූසෙතී’’ති කිරියාපදස්‌ස කරණං දස්‌සෙන්‌තො ආහ ‘‘පුප්‌ඵෙන වා’’තිආදි. ඉමෙහි අට්‌ඨහි දූසෙතීති යොජනා. ‘‘ලාභෙනා’’තිආදිනා ‘‘අට්‌ඨහි අසද්‌ධම්‌මෙහී’’ති එත්‌ථ අසද්‌ධම්‌මසරූපං දස්‌සෙති. සාරාගොති සංරාගො, භුසං රජ්‌ජනන්‌ති අත්‌ථො. පටිවිරොධොති දොසො. සො හි යස්‌මා අලාභාදීසු පටිවිරුජ්‌ඣති, තස්‌මා පටිවිරොධොති වුච්‌චති. පාළියන්‌ති විනයපාළියං.
Terasake vuttāti sambandho. Kulāni dūsetīti ettha ‘‘dūsetī’’ti kiriyāpadassa karaṇaṃ dassento āha ‘‘pupphena vā’’tiādi. Imehi aṭṭhahi dūsetīti yojanā. ‘‘Lābhenā’’tiādinā ‘‘aṭṭhahi asaddhammehī’’ti ettha asaddhammasarūpaṃ dasseti. Sārāgoti saṃrāgo, bhusaṃ rajjananti attho. Paṭivirodhoti doso. So hi yasmā alābhādīsu paṭivirujjhati, tasmā paṭivirodhoti vuccati. Pāḷiyanti vinayapāḷiyaṃ.
පාණන්‌තිආදිකා ද්‌වෙ ගාථායො ද්‌වාදසක්‌ඛරෙන බන්‌ධිතා. පඨමගාථාය තතියපාදෙ චරියසද්‌දෙන යුත්‌තත්‌තා එකක්‌ඛරො අධිකො. අයං පනෙත්‌ථ යොජනා – පාණං න හනෙ න ඝාතෙය්‍ය, ආදින්‌නඤ්‌ච න ආදියෙ න ගණ්‌හෙය්‍ය, මුසා විතථවචනං න භාසෙ න කථෙය්‍ය, මජ්‌ජපො මජ්‌ජපානං න ච සියා, අබ්‍රහ්‌මචරියා මෙථුනා විරමෙය්‍ය, රත්‌තිං විකාලභොජනං න භුඤ්‌ජෙය්‍ය.
Pāṇantiādikā dve gāthāyo dvādasakkharena bandhitā. Paṭhamagāthāya tatiyapāde cariyasaddena yuttattā ekakkharo adhiko. Ayaṃ panettha yojanā – pāṇaṃ na hane na ghāteyya, ādinnañca na ādiye na gaṇheyya, musā vitathavacanaṃ na bhāse na katheyya, majjapo majjapānaṃ na ca siyā, abrahmacariyā methunā virameyya, rattiṃ vikālabhojanaṃ na bhuñjeyya.
මාලං න ධාරෙ න ධාරෙය්‍ය, ගන්‌ධඤ්‌ච න ආචරෙ, සන්‌ථතෙ මඤ්‌චෙ ච ඡමායඤ්‌ච සයෙථ. එතඤ්‌හි උපොසථං අට්‌ඨඞ්‌ගිකං උපොසථං ඉති දුක්‌ඛන්‌තගුනා බුද්‌ධෙන පකාසිතන්‌ති ආහු පණ්‌ඩිතාති.
Mālaṃ na dhāre na dhāreyya, gandhañca na ācare, santhate mañce ca chamāyañca sayetha. Etañhi uposathaṃ aṭṭhaṅgikaṃ uposathaṃ iti dukkhantagunā buddhena pakāsitanti āhu paṇḍitāti.
සඞ්‌ඝභෙදකෙති සඞ්‌ඝභෙදකක්‌ඛන්‌ධකෙ. තාසංයෙවාති භික්‌ඛුනීනමෙව. ‘‘උපාසිකා අට්‌ඨ වරානි යාචතී’’ති එවං සාමඤ්‌ඤවචනස්‌සාපි අත්‌ථපකරණාදිනා විසෙසවිසයො හොතීති ආහ ‘‘විසාඛා’’ති. සා හි විවිධා පුත්‌තනත්‌තුසඞ්‌ඛාතා සාඛා එතිස්‌සාත්‌ථීති විසාඛාති වුච්‌චති. සබ්‌බත්‌ථාති සබ්‌බෙසු අට්‌ඨකෙසු. සෙසං සුවිඤ්‌ඤෙය්‍යමෙව.
Saṅghabhedaketi saṅghabhedakakkhandhake. Tāsaṃyevāti bhikkhunīnameva. ‘‘Upāsikā aṭṭha varāni yācatī’’ti evaṃ sāmaññavacanassāpi atthapakaraṇādinā visesavisayo hotīti āha ‘‘visākhā’’ti. Sā hi vividhā puttanattusaṅkhātā sākhā etissātthīti visākhāti vuccati. Sabbatthāti sabbesu aṭṭhakesu. Sesaṃ suviññeyyameva.
ඉති අට්‌ඨකවාරවණ්‌ණනාය යොජනා සමත්‌තා.
Iti aṭṭhakavāravaṇṇanāya yojanā samattā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 8. අට්‌ඨකවාරො • 8. Aṭṭhakavāro
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / අට්‌ඨකවාරවණ්‌ණනා • Aṭṭhakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අට්‌ඨකවාරවණ්‌ණනා • Aṭṭhakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අට්‌ඨකවාරවණ්‌ණනා • Aṭṭhakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ඡක්‌කවාරාදිවණ්‌ණනා • Chakkavārādivaṇṇanā
