| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
ஏகுத்தரிகனயோ சதுக்கவாரவண்ணனா
Ekuttarikanayo catukkavāravaṇṇanā
324. சதுக்கேஸு ஏவங் வினிச்ச²யோ வேதி³தப்³போ³தி யோஜனா. திணவத்தா²ரகஸமத²ட்டா²னந்தி திணவத்தா²ரகஸமதே²ன அதி⁴கரணவூபஸமிதட்டா²னங். பரஸ்ஸ கம்மவாசாயாதி பரஸ்ஸ கரணபூ⁴தாய கம்மவாசாய. ததோதி சதுக்கதோ. பரேஸூதி அஞ்ஞேஸு சதுக்கேஸு ஏவமத்தோ² வேதி³தப்³போ³தி யோஜனா. தமேவாதி காயத்³வாரிகமேவ. புன தமேவாதி வசீத்³வாரிகமேவ. ஆபஜ்ஜிதப்³பா³பத்திஞ்ச ஸஹாகா³ரஸெய்யாபத்திஞ்சாதி யோஜனா. ஜக்³க³ந்தோதி ஜாக³ரந்தோ.
324. Catukkesu evaṃ vinicchayo veditabboti yojanā. Tiṇavatthārakasamathaṭṭhānanti tiṇavatthārakasamathena adhikaraṇavūpasamitaṭṭhānaṃ. Parassa kammavācāyāti parassa karaṇabhūtāya kammavācāya. Tatoti catukkato. Paresūti aññesu catukkesu evamattho veditabboti yojanā. Tamevāti kāyadvārikameva. Puna tamevāti vacīdvārikameva. Āpajjitabbāpattiñca sahāgāraseyyāpattiñcāti yojanā. Jaggantoti jāgaranto.
அசித்தகோ ஆபஜ்ஜதி நாமாதி ‘‘அசித்தகோ பி⁴க்கு² ஆபஜ்ஜதி நாமா’’தி வா ‘‘அசித்தகோ ஹுத்வா ஆபஜ்ஜதி நாமா’’தி வா யோஜனா காதப்³பா³. ஸபா⁴க³ந்தி வத்து²ஸபா⁴க³ங். தஞ்சாதி அஞ்ஞதரங் தஞ்ச ஆபத்திங். இதீதி ஏவங்.
Acittako āpajjati nāmāti ‘‘acittako bhikkhu āpajjati nāmā’’ti vā ‘‘acittako hutvā āpajjati nāmā’’ti vā yojanā kātabbā. Sabhāganti vatthusabhāgaṃ. Tañcāti aññataraṃ tañca āpattiṃ. Itīti evaṃ.
கம்மேனாதி ஸமனுபா⁴ஸனகம்மேன. கம்மேன வுட்டா²தீதி கம்மேன ஏவ வுட்டா²தி.
Kammenāti samanubhāsanakammena. Kammena vuṭṭhātīti kammena eva vuṭṭhāti.
ஸோதி கி³ஹிபரிக்கா²ரோ, ஆஹடோ ஹோதீதி ஸம்ப³ந்தோ⁴. அவாபுரணந்தி குஞ்சிகங். அந்தோதி ப⁴ண்டா³கா³ரஸ்ஸ அந்தோ.
Soti gihiparikkhāro, āhaṭo hotīti sambandho. Avāpuraṇanti kuñcikaṃ. Antoti bhaṇḍāgārassa anto.
ஸம்முகா² வுட்டா²தீதி ஸம்முகா² ஏவ வுட்டா²தி.
Sammukhāvuṭṭhātīti sammukhā eva vuṭṭhāti.
ஸயிதாய ஏவ பி⁴க்கு²னியாதி யோஜனா. இத³ந்தி ஸஹாகா³ரஸெய்யாபத்திங், படிச்சாதி ஸம்ப³ந்தோ⁴. ஏதந்தி ‘‘லிங்க³பாதுபா⁴வேனா’’தி வசனங், வுத்தந்தி ஸம்ப³ந்தோ⁴. உபி⁴ன்னம்பீதி பி⁴க்கு²பி⁴க்கு²னீனம்பி . லிங்க³படிலாபே⁴னாதி இத்தி²லிங்க³படிலாபே⁴ன. பட²மந்தி ஆதி³கப்பகாலே. ‘‘பட²மங் உப்பன்னவஸேனா’’தி இமினா புரே உப்பன்னங் புரிமந்தி வசனத்த²ங் த³ஸ்ஸேதி. ‘‘ஸெட்ட²பா⁴வேனா’’தி இமினா புரபா⁴வேன ஸெட்ட²பா⁴வேன உப்பன்னங் புரிமந்தி வசனத்த²ங் த³ஸ்ஸேதி. ‘‘புரிஸலிங்க³’’ந்தி இமினா இமபச்சயஸ்ஸ ஸரூபங் த³ஸ்ஸேதி. புரிஸகுத்தபுரிஸாகாராதீ³தி ஆதி³ஸத்³தே³ன புரிஸனிமித்தாத³யோ ஸங்க³ண்ஹாதி. யானி ச²சத்தாலீஸ ஸிக்கா²பதா³னீதி யோஜனா. இமினா வுத்தனயானுஸாரேன து³தியசதுக்கேபி அத்தோ² வேதி³தப்³போ³. தேஹீதி திங்ஸாதி⁴கேஹி ஸதஸிக்கா²பதே³ஹி.
Sayitāya eva bhikkhuniyāti yojanā. Idanti sahāgāraseyyāpattiṃ, paṭiccāti sambandho. Etanti ‘‘liṅgapātubhāvenā’’ti vacanaṃ, vuttanti sambandho. Ubhinnampīti bhikkhubhikkhunīnampi . Liṅgapaṭilābhenāti itthiliṅgapaṭilābhena. Paṭhamanti ādikappakāle. ‘‘Paṭhamaṃ uppannavasenā’’ti iminā pure uppannaṃ purimanti vacanatthaṃ dasseti. ‘‘Seṭṭhabhāvenā’’ti iminā purabhāvena seṭṭhabhāvena uppannaṃ purimanti vacanatthaṃ dasseti. ‘‘Purisaliṅga’’nti iminā imapaccayassa sarūpaṃ dasseti. Purisakuttapurisākārādīti ādisaddena purisanimittādayo saṅgaṇhāti. Yāni chacattālīsa sikkhāpadānīti yojanā. Iminā vuttanayānusārena dutiyacatukkepi attho veditabbo. Tehīti tiṃsādhikehi satasikkhāpadehi.
மஹாபதே³ஸாதி வினயே (மஹாவ॰ 305) ஆக³தா மஹாபதே³ஸா. கஸ்மா மஹாபதே³ஸா ‘‘ஸாமுக்கங்ஸா’’தி வுச்சந்தீதி ஆஹ ‘‘தே ஹீ’’திஆதி³. தத்த² தேதி சத்தாரோ மஹாபதே³ஸா, வுச்சந்தீதி ஸம்ப³ந்தோ⁴. ‘‘ஸய’’ந்தி இமினா ஸாமுக்கங்ஸாதி எத்த² ஸங்ஸத்³த³ஸ்ஸ ஸயமத்த²ங் த³ஸ்ஸேதி. ‘‘உக்கி²பித்வா’’தி இமினா உக்கங்ஸஸத்³தோ³ உக்கி²பனத்தோ²தி த³ஸ்ஸேதி. ‘‘ட²பிதத்தா’’தி இமினா ஸயங் உக்கங்ஸித்வா ட²பிதா ஸாமுக்கங்ஸாதி வசனத்த²ங் த³ஸ்ஸேதி. ‘‘அஜ்ஜோ²ஹரணீயபரிபோ⁴கா³’’தி இமினா பா³ஹிரபரிபோ⁴க³ங் நிவத்தேதி. உத³கங் பனாதி கேனசி அஸங்ஸக்³க³ங் பஸன்னோத³கங் பன. காலேதி ஸப்பத³ட்ட²காலே. ‘‘பஞ்ச வா த³ஸ வா ஸீலானீ’’தி இமினா பஞ்ச வா த³ஸ வா ஸீலானி உபாஸகஸீலந்தி த³ஸ்ஸேதி.
Mahāpadesāti vinaye (mahāva. 305) āgatā mahāpadesā. Kasmā mahāpadesā ‘‘sāmukkaṃsā’’ti vuccantīti āha ‘‘te hī’’tiādi. Tattha teti cattāro mahāpadesā, vuccantīti sambandho. ‘‘Saya’’nti iminā sāmukkaṃsāti ettha saṃsaddassa sayamatthaṃ dasseti. ‘‘Ukkhipitvā’’ti iminā ukkaṃsasaddo ukkhipanatthoti dasseti. ‘‘Ṭhapitattā’’ti iminā sayaṃ ukkaṃsitvā ṭhapitā sāmukkaṃsāti vacanatthaṃ dasseti. ‘‘Ajjhoharaṇīyaparibhogā’’ti iminā bāhiraparibhogaṃ nivatteti. Udakaṃ panāti kenaci asaṃsaggaṃ pasannodakaṃ pana. Kāleti sappadaṭṭhakāle. ‘‘Pañca vā dasa vā sīlānī’’ti iminā pañca vā dasa vā sīlāni upāsakasīlanti dasseti.
தத்த² சாதி விஹாரே ச. உபோ⁴பீதி ஆக³ந்துகாவாஸிகவஸேன உபோ⁴பி. அஸாதா⁴ரணந்தி த்³வீஹி அஸாதா⁴ரணங். ஆபத்திந்தி பி⁴க்கு²னீஹியேவ ஸாதா⁴ரணங் ஆபத்திங். க³மியசதுக்கேபீதி பிஸத்³தோ³ ஆக³ந்துகசதுக்கங் அபெக்க²தி. வத்து²னானத்ததாவாதி மேது²னாதி³வத்து²னானத்ததா ஏவ. ஹீதி ஸச்சங், யஸ்மா வா. ஸாதி ஆபத்தி. ததா²தி யதா² காயஸங்ஸக்³கே³, ததா² லஸுணகா²த³னேதி யோஜனா. எத்தா²தி வத்து²னானத்ததாதி³சதுக்கே . சத்தாரி பாராஜிகானீதி பி⁴க்கு²பாதிமொக்கே² ஆக³தானி. விஸுங் ஆபஜ்ஜந்தேஸுபி ஏஸேவ நயோதி ஸம்ப³ந்தோ⁴.
Tattha cāti vihāre ca. Ubhopīti āgantukāvāsikavasena ubhopi. Asādhāraṇanti dvīhi asādhāraṇaṃ. Āpattinti bhikkhunīhiyeva sādhāraṇaṃ āpattiṃ. Gamiyacatukkepīti pisaddo āgantukacatukkaṃ apekkhati. Vatthunānattatāvāti methunādivatthunānattatā eva. Hīti saccaṃ, yasmā vā. Sāti āpatti. Tathāti yathā kāyasaṃsagge, tathā lasuṇakhādaneti yojanā. Etthāti vatthunānattatādicatukke . Cattāri pārājikānīti bhikkhupātimokkhe āgatāni. Visuṃ āpajjantesupi eseva nayoti sambandho.
புரிமசதுக்கேதி வத்து²னானத்ததாதி³சதுக்கே. யோ பட²மோ பஞ்ஹோதி யோஜனா. இதா⁴தி வத்து²ஸபா⁴க³தாதி³சதுக்கே. யோ சாதி யோ ச பஞ்ஹோ. தத்தா²தி வத்து²னானத்ததாதி³சதுக்கே. ததியசதுத்தே²ஸு பஞ்ஹேஸூதி ஸம்ப³ந்தோ⁴.
Purimacatukketi vatthunānattatādicatukke. Yo paṭhamo pañhoti yojanā. Idhāti vatthusabhāgatādicatukke. Yo cāti yo ca pañho. Tatthāti vatthunānattatādicatukke. Tatiyacatutthesu pañhesūti sambandho.
‘‘ஸத்³தி⁴விஹாரிகஸ்ஸா’’தி பத³ங் ‘‘கத்தப்³ப³’’இதி பதே³ ஸம்பதா³னங்.
‘‘Saddhivihārikassā’’ti padaṃ ‘‘kattabba’’iti pade sampadānaṃ.
க³ருகந்தி பாராஜிகங். லஹுகந்தி து²ல்லச்சயங் வா து³க்கடங் வா.
Garukanti pārājikaṃ. Lahukanti thullaccayaṃ vā dukkaṭaṃ vā.
அட்ட²ன்னங் பி⁴க்கு²னீனங் படிபாடியா நிஸீதி³தப்³ப³தோ வுத்தங் ‘‘நவமபி⁴க்கு²னிதோ’’தி. பச்சுட்டா²னாரஹாதி படிமுக²ங் உபட்டா²துங் அரஹா. அவிஸேஸேன சாதி ‘‘பி⁴க்கூ²’’தி வா ‘‘பி⁴க்கு²னீ’’தி வா விஸேஸ, மகத்வா ஸாமஞ்ஞேன ச. ‘‘ஆஸனாரஹசதுக்கஸ்ஸா’’தி பத³ங் ‘‘பட²மபத³’’ந்தி பதே³ அவயவிஸம்ப³ந்தோ⁴.
Aṭṭhannaṃ bhikkhunīnaṃ paṭipāṭiyā nisīditabbato vuttaṃ ‘‘navamabhikkhunito’’ti. Paccuṭṭhānārahāti paṭimukhaṃ upaṭṭhātuṃ arahā. Avisesena cāti ‘‘bhikkhū’’ti vā ‘‘bhikkhunī’’ti vā visesa, makatvā sāmaññena ca. ‘‘Āsanārahacatukkassā’’ti padaṃ ‘‘paṭhamapada’’nti pade avayavisambandho.
அஸாதா⁴ரணந்தி பி⁴க்கூ²ஹி அஸாதா⁴ரணங். விகாலே கப்பதீதி தத³ஹுவிகாலே கப்பதி. காலாதீதந்தி காலயாமஸத்தஹாதீதங். யாவகாலிகாதி³த்தயஞ்ச அகப்பியமங்ஸஞ்ச உக்³க³ஹிதகஞ்ச அபடிக்³க³ஹிதகஞ்சாதி யோஜனா.
Asādhāraṇanti bhikkhūhi asādhāraṇaṃ. Vikāle kappatīti tadahuvikāle kappati. Kālātītanti kālayāmasattahātītaṃ. Yāvakālikādittayañca akappiyamaṃsañca uggahitakañca apaṭiggahitakañcāti yojanā.
கு³ணங்கு³ணூபாஹனஞ்ச து⁴வன்ஹானஞ்ச சம்மத்த²ரணஞ்ச கு³ணங்கு³ணூபாஹனது⁴வன்ஹானசம்மத்த²ரணானி. இமானி சத்தாரீதி பஞ்சவக்³கே³ன க³ணேன உபஸம்பத³தா³னாதீ³னி. இதா⁴தி பச்சந்திமேஸு ஜனபதே³ஸு. இதா⁴தி மஜ்ஜி²மேஸு. இத³ந்தி சதுப்³பி³த⁴ங் வத்து². தீ³பேதும்பீதி தீ³பனம்பி. துங்பச்சயோ ஹி கத்வத்த²ஜோதகோ. ஏஸேவ நயோ தீ³பேதுங் பனாதி எத்தா²பி. ஸேஸங் அனுஞ்ஞாதகந்தி ஸம்ப³ந்தோ⁴. உப⁴யத்த²பீதி பச்சந்திமமஜ்ஜி²மவஸேன உப⁴யத்தா²பி.
Guṇaṅguṇūpāhanañca dhuvanhānañca cammattharaṇañca guṇaṅguṇūpāhanadhuvanhānacammattharaṇāni. Imāni cattārīti pañcavaggena gaṇena upasampadadānādīni. Idhāti paccantimesu janapadesu. Idhāti majjhimesu. Idanti catubbidhaṃ vatthu. Dīpetumpīti dīpanampi. Tuṃpaccayo hi katvatthajotako. Eseva nayo dīpetuṃ panāti etthāpi. Sesaṃ anuññātakanti sambandho. Ubhayatthapīti paccantimamajjhimavasena ubhayatthāpi.
ச²ந்த³பாரிஸுத்³தி⁴அக்கா²னங் ஏகங் கத்வா ‘‘சத்தாரோ’’தி வுத்தங். சத்தாரோ புப்³ப³கிச்சாதி லிங்க³விபல்லாஸோ, ‘‘சத்தாரி புப்³ப³கிச்சானீ’’தி ஹி அத்தோ². ஏவங் வுத்தானி இமானி சத்தாரீதி ஸம்ப³ந்தோ⁴. ஏவங் ஆக³தா ஸம்முதியோதி ஸம்ப³ந்தோ⁴. ஸப்³ப³த்தா²தி ஸப்³பே³ஸு சதுக்கேஸு.
Chandapārisuddhiakkhānaṃ ekaṃ katvā ‘‘cattāro’’ti vuttaṃ. Cattāro pubbakiccāti liṅgavipallāso, ‘‘cattāri pubbakiccānī’’ti hi attho. Evaṃ vuttāni imāni cattārīti sambandho. Evaṃ āgatā sammutiyoti sambandho. Sabbatthāti sabbesu catukkesu.
இதி சதுக்கவாரவண்ணனாய யோஜனா ஸமத்தா.
Iti catukkavāravaṇṇanāya yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 4. சதுக்கவாரோ • 4. Catukkavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / சதுக்கவாரவண்ணனா • Catukkavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / சதுக்கவாரவண்ணனா • Catukkavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / சதுக்கவாரவண்ணனா • Catukkavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சதுக்கவாரவண்ணனா • Catukkavāravaṇṇanā
