| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
একুত্তরিকনযো চতুক্কৰারৰণ্ণনা
Ekuttarikanayo catukkavāravaṇṇanā
৩২৪. চতুক্কেসু এৰং ৰিনিচ্ছযো ৰেদিতব্বোতি যোজনা। তিণৰত্থারকসমথট্ঠানন্তি তিণৰত্থারকসমথেন অধিকরণৰূপসমিতট্ঠানং। পরস্স কম্মৰাচাযাতি পরস্স করণভূতায কম্মৰাচায। ততোতি চতুক্কতো। পরেসূতি অঞ্ঞেসু চতুক্কেসু এৰমত্থো ৰেদিতব্বোতি যোজনা। তমেৰাতি কাযদ্ৰারিকমেৰ। পুন তমেৰাতি ৰচীদ্ৰারিকমেৰ। আপজ্জিতব্বাপত্তিঞ্চ সহাগারসেয্যাপত্তিঞ্চাতি যোজনা। জগ্গন্তোতি জাগরন্তো।
324. Catukkesu evaṃ vinicchayo veditabboti yojanā. Tiṇavatthārakasamathaṭṭhānanti tiṇavatthārakasamathena adhikaraṇavūpasamitaṭṭhānaṃ. Parassa kammavācāyāti parassa karaṇabhūtāya kammavācāya. Tatoti catukkato. Paresūti aññesu catukkesu evamattho veditabboti yojanā. Tamevāti kāyadvārikameva. Puna tamevāti vacīdvārikameva. Āpajjitabbāpattiñca sahāgāraseyyāpattiñcāti yojanā. Jaggantoti jāgaranto.
অচিত্তকো আপজ্জতি নামাতি ‘‘অচিত্তকো ভিক্খু আপজ্জতি নামা’’তি ৰা ‘‘অচিত্তকো হুত্ৰা আপজ্জতি নামা’’তি ৰা যোজনা কাতব্বা। সভাগন্তি ৰত্থুসভাগং। তঞ্চাতি অঞ্ঞতরং তঞ্চ আপত্তিং। ইতীতি এৰং।
Acittako āpajjati nāmāti ‘‘acittako bhikkhu āpajjati nāmā’’ti vā ‘‘acittako hutvā āpajjati nāmā’’ti vā yojanā kātabbā. Sabhāganti vatthusabhāgaṃ. Tañcāti aññataraṃ tañca āpattiṃ. Itīti evaṃ.
কম্মেনাতি সমনুভাসনকম্মেন। কম্মেন ৰুট্ঠাতীতি কম্মেন এৰ ৰুট্ঠাতি।
Kammenāti samanubhāsanakammena. Kammena vuṭṭhātīti kammena eva vuṭṭhāti.
সোতি গিহিপরিক্খারো, আহটো হোতীতি সম্বন্ধো। অৰাপুরণন্তি কুঞ্চিকং। অন্তোতি ভণ্ডাগারস্স অন্তো।
Soti gihiparikkhāro, āhaṭo hotīti sambandho. Avāpuraṇanti kuñcikaṃ. Antoti bhaṇḍāgārassa anto.
সম্মুখা ৰুট্ঠাতীতি সম্মুখা এৰ ৰুট্ঠাতি।
Sammukhāvuṭṭhātīti sammukhā eva vuṭṭhāti.
সযিতায এৰ ভিক্খুনিযাতি যোজনা। ইদন্তি সহাগারসেয্যাপত্তিং, পটিচ্চাতি সম্বন্ধো। এতন্তি ‘‘লিঙ্গপাতুভাৰেনা’’তি ৰচনং, ৰুত্তন্তি সম্বন্ধো। উভিন্নম্পীতি ভিক্খুভিক্খুনীনম্পি । লিঙ্গপটিলাভেনাতি ইত্থিলিঙ্গপটিলাভেন। পঠমন্তি আদিকপ্পকালে। ‘‘পঠমং উপ্পন্নৰসেনা’’তি ইমিনা পুরে উপ্পন্নং পুরিমন্তি ৰচনত্থং দস্সেতি। ‘‘সেট্ঠভাৰেনা’’তি ইমিনা পুরভাৰেন সেট্ঠভাৰেন উপ্পন্নং পুরিমন্তি ৰচনত্থং দস্সেতি। ‘‘পুরিসলিঙ্গ’’ন্তি ইমিনা ইমপচ্চযস্স সরূপং দস্সেতি। পুরিসকুত্তপুরিসাকারাদীতি আদিসদ্দেন পুরিসনিমিত্তাদযো সঙ্গণ্হাতি। যানি ছচত্তালীস সিক্খাপদানীতি যোজনা। ইমিনা ৰুত্তনযানুসারেন দুতিযচতুক্কেপি অত্থো ৰেদিতব্বো। তেহীতি তিংসাধিকেহি সতসিক্খাপদেহি।
Sayitāya eva bhikkhuniyāti yojanā. Idanti sahāgāraseyyāpattiṃ, paṭiccāti sambandho. Etanti ‘‘liṅgapātubhāvenā’’ti vacanaṃ, vuttanti sambandho. Ubhinnampīti bhikkhubhikkhunīnampi . Liṅgapaṭilābhenāti itthiliṅgapaṭilābhena. Paṭhamanti ādikappakāle. ‘‘Paṭhamaṃ uppannavasenā’’ti iminā pure uppannaṃ purimanti vacanatthaṃ dasseti. ‘‘Seṭṭhabhāvenā’’ti iminā purabhāvena seṭṭhabhāvena uppannaṃ purimanti vacanatthaṃ dasseti. ‘‘Purisaliṅga’’nti iminā imapaccayassa sarūpaṃ dasseti. Purisakuttapurisākārādīti ādisaddena purisanimittādayo saṅgaṇhāti. Yāni chacattālīsa sikkhāpadānīti yojanā. Iminā vuttanayānusārena dutiyacatukkepi attho veditabbo. Tehīti tiṃsādhikehi satasikkhāpadehi.
মহাপদেসাতি ৰিনযে (মহাৰ॰ ৩০৫) আগতা মহাপদেসা। কস্মা মহাপদেসা ‘‘সামুক্কংসা’’তি ৰুচ্চন্তীতি আহ ‘‘তে হী’’তিআদি। তত্থ তেতি চত্তারো মহাপদেসা, ৰুচ্চন্তীতি সম্বন্ধো। ‘‘সয’’ন্তি ইমিনা সামুক্কংসাতি এত্থ সংসদ্দস্স সযমত্থং দস্সেতি। ‘‘উক্খিপিত্ৰা’’তি ইমিনা উক্কংসসদ্দো উক্খিপনত্থোতি দস্সেতি। ‘‘ঠপিতত্তা’’তি ইমিনা সযং উক্কংসিত্ৰা ঠপিতা সামুক্কংসাতি ৰচনত্থং দস্সেতি। ‘‘অজ্ঝোহরণীযপরিভোগা’’তি ইমিনা বাহিরপরিভোগং নিৰত্তেতি। উদকং পনাতি কেনচি অসংসগ্গং পসন্নোদকং পন। কালেতি সপ্পদট্ঠকালে। ‘‘পঞ্চ ৰা দস ৰা সীলানী’’তি ইমিনা পঞ্চ ৰা দস ৰা সীলানি উপাসকসীলন্তি দস্সেতি।
Mahāpadesāti vinaye (mahāva. 305) āgatā mahāpadesā. Kasmā mahāpadesā ‘‘sāmukkaṃsā’’ti vuccantīti āha ‘‘te hī’’tiādi. Tattha teti cattāro mahāpadesā, vuccantīti sambandho. ‘‘Saya’’nti iminā sāmukkaṃsāti ettha saṃsaddassa sayamatthaṃ dasseti. ‘‘Ukkhipitvā’’ti iminā ukkaṃsasaddo ukkhipanatthoti dasseti. ‘‘Ṭhapitattā’’ti iminā sayaṃ ukkaṃsitvā ṭhapitā sāmukkaṃsāti vacanatthaṃ dasseti. ‘‘Ajjhoharaṇīyaparibhogā’’ti iminā bāhiraparibhogaṃ nivatteti. Udakaṃ panāti kenaci asaṃsaggaṃ pasannodakaṃ pana. Kāleti sappadaṭṭhakāle. ‘‘Pañca vā dasa vā sīlānī’’ti iminā pañca vā dasa vā sīlāni upāsakasīlanti dasseti.
তত্থ চাতি ৰিহারে চ। উভোপীতি আগন্তুকাৰাসিকৰসেন উভোপি। অসাধারণন্তি দ্ৰীহি অসাধারণং। আপত্তিন্তি ভিক্খুনীহিযেৰ সাধারণং আপত্তিং। গমিযচতুক্কেপীতি পিসদ্দো আগন্তুকচতুক্কং অপেক্খতি। ৰত্থুনানত্ততাৰাতি মেথুনাদিৰত্থুনানত্ততা এৰ। হীতি সচ্চং, যস্মা ৰা। সাতি আপত্তি। তথাতি যথা কাযসংসগ্গে, তথা লসুণখাদনেতি যোজনা। এত্থাতি ৰত্থুনানত্ততাদিচতুক্কে । চত্তারি পারাজিকানীতি ভিক্খুপাতিমোক্খে আগতানি। ৰিসুং আপজ্জন্তেসুপি এসেৰ নযোতি সম্বন্ধো।
Tattha cāti vihāre ca. Ubhopīti āgantukāvāsikavasena ubhopi. Asādhāraṇanti dvīhi asādhāraṇaṃ. Āpattinti bhikkhunīhiyeva sādhāraṇaṃ āpattiṃ. Gamiyacatukkepīti pisaddo āgantukacatukkaṃ apekkhati. Vatthunānattatāvāti methunādivatthunānattatā eva. Hīti saccaṃ, yasmā vā. Sāti āpatti. Tathāti yathā kāyasaṃsagge, tathā lasuṇakhādaneti yojanā. Etthāti vatthunānattatādicatukke . Cattāri pārājikānīti bhikkhupātimokkhe āgatāni. Visuṃ āpajjantesupi eseva nayoti sambandho.
পুরিমচতুক্কেতি ৰত্থুনানত্ততাদিচতুক্কে। যো পঠমো পঞ্হোতি যোজনা। ইধাতি ৰত্থুসভাগতাদিচতুক্কে। যো চাতি যো চ পঞ্হো। তত্থাতি ৰত্থুনানত্ততাদিচতুক্কে। ততিযচতুত্থেসু পঞ্হেসূতি সম্বন্ধো।
Purimacatukketi vatthunānattatādicatukke. Yo paṭhamo pañhoti yojanā. Idhāti vatthusabhāgatādicatukke. Yo cāti yo ca pañho. Tatthāti vatthunānattatādicatukke. Tatiyacatutthesu pañhesūti sambandho.
‘‘সদ্ধিৰিহারিকস্সা’’তি পদং ‘‘কত্তব্ব’’ইতি পদে সম্পদানং।
‘‘Saddhivihārikassā’’ti padaṃ ‘‘kattabba’’iti pade sampadānaṃ.
গরুকন্তি পারাজিকং। লহুকন্তি থুল্লচ্চযং ৰা দুক্কটং ৰা।
Garukanti pārājikaṃ. Lahukanti thullaccayaṃ vā dukkaṭaṃ vā.
অট্ঠন্নং ভিক্খুনীনং পটিপাটিযা নিসীদিতব্বতো ৰুত্তং ‘‘নৰমভিক্খুনিতো’’তি। পচ্চুট্ঠানারহাতি পটিমুখং উপট্ঠাতুং অরহা। অৰিসেসেন চাতি ‘‘ভিক্খূ’’তি ৰা ‘‘ভিক্খুনী’’তি ৰা ৰিসেস, মকত্ৰা সামঞ্ঞেন চ। ‘‘আসনারহচতুক্কস্সা’’তি পদং ‘‘পঠমপদ’’ন্তি পদে অৰযৰিসম্বন্ধো।
Aṭṭhannaṃ bhikkhunīnaṃ paṭipāṭiyā nisīditabbato vuttaṃ ‘‘navamabhikkhunito’’ti. Paccuṭṭhānārahāti paṭimukhaṃ upaṭṭhātuṃ arahā. Avisesena cāti ‘‘bhikkhū’’ti vā ‘‘bhikkhunī’’ti vā visesa, makatvā sāmaññena ca. ‘‘Āsanārahacatukkassā’’ti padaṃ ‘‘paṭhamapada’’nti pade avayavisambandho.
অসাধারণন্তি ভিক্খূহি অসাধারণং। ৰিকালে কপ্পতীতি তদহুৰিকালে কপ্পতি। কালাতীতন্তি কালযামসত্তহাতীতং। যাৰকালিকাদিত্তযঞ্চ অকপ্পিযমংসঞ্চ উগ্গহিতকঞ্চ অপটিগ্গহিতকঞ্চাতি যোজনা।
Asādhāraṇanti bhikkhūhi asādhāraṇaṃ. Vikāle kappatīti tadahuvikāle kappati. Kālātītanti kālayāmasattahātītaṃ. Yāvakālikādittayañca akappiyamaṃsañca uggahitakañca apaṭiggahitakañcāti yojanā.
গুণঙ্গুণূপাহনঞ্চ ধুৰন্হানঞ্চ চম্মত্থরণঞ্চ গুণঙ্গুণূপাহনধুৰন্হানচম্মত্থরণানি। ইমানি চত্তারীতি পঞ্চৰগ্গেন গণেন উপসম্পদদানাদীনি। ইধাতি পচ্চন্তিমেসু জনপদেসু। ইধাতি মজ্ঝিমেসু। ইদন্তি চতুব্বিধং ৰত্থু। দীপেতুম্পীতি দীপনম্পি। তুংপচ্চযো হি কত্ৰত্থজোতকো। এসেৰ নযো দীপেতুং পনাতি এত্থাপি। সেসং অনুঞ্ঞাতকন্তি সম্বন্ধো। উভযত্থপীতি পচ্চন্তিমমজ্ঝিমৰসেন উভযত্থাপি।
Guṇaṅguṇūpāhanañca dhuvanhānañca cammattharaṇañca guṇaṅguṇūpāhanadhuvanhānacammattharaṇāni. Imāni cattārīti pañcavaggena gaṇena upasampadadānādīni. Idhāti paccantimesu janapadesu. Idhāti majjhimesu. Idanti catubbidhaṃ vatthu. Dīpetumpīti dīpanampi. Tuṃpaccayo hi katvatthajotako. Eseva nayo dīpetuṃ panāti etthāpi. Sesaṃ anuññātakanti sambandho. Ubhayatthapīti paccantimamajjhimavasena ubhayatthāpi.
ছন্দপারিসুদ্ধিঅক্খানং একং কত্ৰা ‘‘চত্তারো’’তি ৰুত্তং। চত্তারো পুব্বকিচ্চাতি লিঙ্গৰিপল্লাসো, ‘‘চত্তারি পুব্বকিচ্চানী’’তি হি অত্থো। এৰং ৰুত্তানি ইমানি চত্তারীতি সম্বন্ধো। এৰং আগতা সম্মুতিযোতি সম্বন্ধো। সব্বত্থাতি সব্বেসু চতুক্কেসু।
Chandapārisuddhiakkhānaṃ ekaṃ katvā ‘‘cattāro’’ti vuttaṃ. Cattāro pubbakiccāti liṅgavipallāso, ‘‘cattāri pubbakiccānī’’ti hi attho. Evaṃ vuttāni imāni cattārīti sambandho. Evaṃ āgatā sammutiyoti sambandho. Sabbatthāti sabbesu catukkesu.
ইতি চতুক্কৰারৰণ্ণনায যোজনা সমত্তা।
Iti catukkavāravaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৪. চতুক্কৰারো • 4. Catukkavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / চতুক্কৰারৰণ্ণনা • Catukkavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / চতুক্কৰারৰণ্ণনা • Catukkavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / চতুক্কৰারৰণ্ণনা • Catukkavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / চতুক্কৰারৰণ্ণনা • Catukkavāravaṇṇanā
