| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
ಏಕುತ್ತರಿಕನಯೋ ಚತುಕ್ಕವಾರವಣ್ಣನಾ
Ekuttarikanayo catukkavāravaṇṇanā
೩೨೪. ಚತುಕ್ಕೇಸು ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ। ತಿಣವತ್ಥಾರಕಸಮಥಟ್ಠಾನನ್ತಿ ತಿಣವತ್ಥಾರಕಸಮಥೇನ ಅಧಿಕರಣವೂಪಸಮಿತಟ್ಠಾನಂ। ಪರಸ್ಸ ಕಮ್ಮವಾಚಾಯಾತಿ ಪರಸ್ಸ ಕರಣಭೂತಾಯ ಕಮ್ಮವಾಚಾಯ। ತತೋತಿ ಚತುಕ್ಕತೋ। ಪರೇಸೂತಿ ಅಞ್ಞೇಸು ಚತುಕ್ಕೇಸು ಏವಮತ್ಥೋ ವೇದಿತಬ್ಬೋತಿ ಯೋಜನಾ। ತಮೇವಾತಿ ಕಾಯದ್ವಾರಿಕಮೇವ। ಪುನ ತಮೇವಾತಿ ವಚೀದ್ವಾರಿಕಮೇವ। ಆಪಜ್ಜಿತಬ್ಬಾಪತ್ತಿಞ್ಚ ಸಹಾಗಾರಸೇಯ್ಯಾಪತ್ತಿಞ್ಚಾತಿ ಯೋಜನಾ। ಜಗ್ಗನ್ತೋತಿ ಜಾಗರನ್ತೋ।
324. Catukkesu evaṃ vinicchayo veditabboti yojanā. Tiṇavatthārakasamathaṭṭhānanti tiṇavatthārakasamathena adhikaraṇavūpasamitaṭṭhānaṃ. Parassa kammavācāyāti parassa karaṇabhūtāya kammavācāya. Tatoti catukkato. Paresūti aññesu catukkesu evamattho veditabboti yojanā. Tamevāti kāyadvārikameva. Puna tamevāti vacīdvārikameva. Āpajjitabbāpattiñca sahāgāraseyyāpattiñcāti yojanā. Jaggantoti jāgaranto.
ಅಚಿತ್ತಕೋ ಆಪಜ್ಜತಿ ನಾಮಾತಿ ‘‘ಅಚಿತ್ತಕೋ ಭಿಕ್ಖು ಆಪಜ್ಜತಿ ನಾಮಾ’’ತಿ ವಾ ‘‘ಅಚಿತ್ತಕೋ ಹುತ್ವಾ ಆಪಜ್ಜತಿ ನಾಮಾ’’ತಿ ವಾ ಯೋಜನಾ ಕಾತಬ್ಬಾ। ಸಭಾಗನ್ತಿ ವತ್ಥುಸಭಾಗಂ। ತಞ್ಚಾತಿ ಅಞ್ಞತರಂ ತಞ್ಚ ಆಪತ್ತಿಂ। ಇತೀತಿ ಏವಂ।
Acittako āpajjati nāmāti ‘‘acittako bhikkhu āpajjati nāmā’’ti vā ‘‘acittako hutvā āpajjati nāmā’’ti vā yojanā kātabbā. Sabhāganti vatthusabhāgaṃ. Tañcāti aññataraṃ tañca āpattiṃ. Itīti evaṃ.
ಕಮ್ಮೇನಾತಿ ಸಮನುಭಾಸನಕಮ್ಮೇನ। ಕಮ್ಮೇನ ವುಟ್ಠಾತೀತಿ ಕಮ್ಮೇನ ಏವ ವುಟ್ಠಾತಿ।
Kammenāti samanubhāsanakammena. Kammena vuṭṭhātīti kammena eva vuṭṭhāti.
ಸೋತಿ ಗಿಹಿಪರಿಕ್ಖಾರೋ, ಆಹಟೋ ಹೋತೀತಿ ಸಮ್ಬನ್ಧೋ। ಅವಾಪುರಣನ್ತಿ ಕುಞ್ಚಿಕಂ। ಅನ್ತೋತಿ ಭಣ್ಡಾಗಾರಸ್ಸ ಅನ್ತೋ।
Soti gihiparikkhāro, āhaṭo hotīti sambandho. Avāpuraṇanti kuñcikaṃ. Antoti bhaṇḍāgārassa anto.
ಸಮ್ಮುಖಾ ವುಟ್ಠಾತೀತಿ ಸಮ್ಮುಖಾ ಏವ ವುಟ್ಠಾತಿ।
Sammukhāvuṭṭhātīti sammukhā eva vuṭṭhāti.
ಸಯಿತಾಯ ಏವ ಭಿಕ್ಖುನಿಯಾತಿ ಯೋಜನಾ। ಇದನ್ತಿ ಸಹಾಗಾರಸೇಯ್ಯಾಪತ್ತಿಂ, ಪಟಿಚ್ಚಾತಿ ಸಮ್ಬನ್ಧೋ। ಏತನ್ತಿ ‘‘ಲಿಙ್ಗಪಾತುಭಾವೇನಾ’’ತಿ ವಚನಂ, ವುತ್ತನ್ತಿ ಸಮ್ಬನ್ಧೋ। ಉಭಿನ್ನಮ್ಪೀತಿ ಭಿಕ್ಖುಭಿಕ್ಖುನೀನಮ್ಪಿ । ಲಿಙ್ಗಪಟಿಲಾಭೇನಾತಿ ಇತ್ಥಿಲಿಙ್ಗಪಟಿಲಾಭೇನ। ಪಠಮನ್ತಿ ಆದಿಕಪ್ಪಕಾಲೇ। ‘‘ಪಠಮಂ ಉಪ್ಪನ್ನವಸೇನಾ’’ತಿ ಇಮಿನಾ ಪುರೇ ಉಪ್ಪನ್ನಂ ಪುರಿಮನ್ತಿ ವಚನತ್ಥಂ ದಸ್ಸೇತಿ। ‘‘ಸೇಟ್ಠಭಾವೇನಾ’’ತಿ ಇಮಿನಾ ಪುರಭಾವೇನ ಸೇಟ್ಠಭಾವೇನ ಉಪ್ಪನ್ನಂ ಪುರಿಮನ್ತಿ ವಚನತ್ಥಂ ದಸ್ಸೇತಿ। ‘‘ಪುರಿಸಲಿಙ್ಗ’’ನ್ತಿ ಇಮಿನಾ ಇಮಪಚ್ಚಯಸ್ಸ ಸರೂಪಂ ದಸ್ಸೇತಿ। ಪುರಿಸಕುತ್ತಪುರಿಸಾಕಾರಾದೀತಿ ಆದಿಸದ್ದೇನ ಪುರಿಸನಿಮಿತ್ತಾದಯೋ ಸಙ್ಗಣ್ಹಾತಿ। ಯಾನಿ ಛಚತ್ತಾಲೀಸ ಸಿಕ್ಖಾಪದಾನೀತಿ ಯೋಜನಾ। ಇಮಿನಾ ವುತ್ತನಯಾನುಸಾರೇನ ದುತಿಯಚತುಕ್ಕೇಪಿ ಅತ್ಥೋ ವೇದಿತಬ್ಬೋ। ತೇಹೀತಿ ತಿಂಸಾಧಿಕೇಹಿ ಸತಸಿಕ್ಖಾಪದೇಹಿ।
Sayitāya eva bhikkhuniyāti yojanā. Idanti sahāgāraseyyāpattiṃ, paṭiccāti sambandho. Etanti ‘‘liṅgapātubhāvenā’’ti vacanaṃ, vuttanti sambandho. Ubhinnampīti bhikkhubhikkhunīnampi . Liṅgapaṭilābhenāti itthiliṅgapaṭilābhena. Paṭhamanti ādikappakāle. ‘‘Paṭhamaṃ uppannavasenā’’ti iminā pure uppannaṃ purimanti vacanatthaṃ dasseti. ‘‘Seṭṭhabhāvenā’’ti iminā purabhāvena seṭṭhabhāvena uppannaṃ purimanti vacanatthaṃ dasseti. ‘‘Purisaliṅga’’nti iminā imapaccayassa sarūpaṃ dasseti. Purisakuttapurisākārādīti ādisaddena purisanimittādayo saṅgaṇhāti. Yāni chacattālīsa sikkhāpadānīti yojanā. Iminā vuttanayānusārena dutiyacatukkepi attho veditabbo. Tehīti tiṃsādhikehi satasikkhāpadehi.
ಮಹಾಪದೇಸಾತಿ ವಿನಯೇ (ಮಹಾವ॰ ೩೦೫) ಆಗತಾ ಮಹಾಪದೇಸಾ। ಕಸ್ಮಾ ಮಹಾಪದೇಸಾ ‘‘ಸಾಮುಕ್ಕಂಸಾ’’ತಿ ವುಚ್ಚನ್ತೀತಿ ಆಹ ‘‘ತೇ ಹೀ’’ತಿಆದಿ। ತತ್ಥ ತೇತಿ ಚತ್ತಾರೋ ಮಹಾಪದೇಸಾ, ವುಚ್ಚನ್ತೀತಿ ಸಮ್ಬನ್ಧೋ। ‘‘ಸಯ’’ನ್ತಿ ಇಮಿನಾ ಸಾಮುಕ್ಕಂಸಾತಿ ಏತ್ಥ ಸಂಸದ್ದಸ್ಸ ಸಯಮತ್ಥಂ ದಸ್ಸೇತಿ। ‘‘ಉಕ್ಖಿಪಿತ್ವಾ’’ತಿ ಇಮಿನಾ ಉಕ್ಕಂಸಸದ್ದೋ ಉಕ್ಖಿಪನತ್ಥೋತಿ ದಸ್ಸೇತಿ। ‘‘ಠಪಿತತ್ತಾ’’ತಿ ಇಮಿನಾ ಸಯಂ ಉಕ್ಕಂಸಿತ್ವಾ ಠಪಿತಾ ಸಾಮುಕ್ಕಂಸಾತಿ ವಚನತ್ಥಂ ದಸ್ಸೇತಿ। ‘‘ಅಜ್ಝೋಹರಣೀಯಪರಿಭೋಗಾ’’ತಿ ಇಮಿನಾ ಬಾಹಿರಪರಿಭೋಗಂ ನಿವತ್ತೇತಿ। ಉದಕಂ ಪನಾತಿ ಕೇನಚಿ ಅಸಂಸಗ್ಗಂ ಪಸನ್ನೋದಕಂ ಪನ। ಕಾಲೇತಿ ಸಪ್ಪದಟ್ಠಕಾಲೇ। ‘‘ಪಞ್ಚ ವಾ ದಸ ವಾ ಸೀಲಾನೀ’’ತಿ ಇಮಿನಾ ಪಞ್ಚ ವಾ ದಸ ವಾ ಸೀಲಾನಿ ಉಪಾಸಕಸೀಲನ್ತಿ ದಸ್ಸೇತಿ।
Mahāpadesāti vinaye (mahāva. 305) āgatā mahāpadesā. Kasmā mahāpadesā ‘‘sāmukkaṃsā’’ti vuccantīti āha ‘‘te hī’’tiādi. Tattha teti cattāro mahāpadesā, vuccantīti sambandho. ‘‘Saya’’nti iminā sāmukkaṃsāti ettha saṃsaddassa sayamatthaṃ dasseti. ‘‘Ukkhipitvā’’ti iminā ukkaṃsasaddo ukkhipanatthoti dasseti. ‘‘Ṭhapitattā’’ti iminā sayaṃ ukkaṃsitvā ṭhapitā sāmukkaṃsāti vacanatthaṃ dasseti. ‘‘Ajjhoharaṇīyaparibhogā’’ti iminā bāhiraparibhogaṃ nivatteti. Udakaṃ panāti kenaci asaṃsaggaṃ pasannodakaṃ pana. Kāleti sappadaṭṭhakāle. ‘‘Pañca vā dasa vā sīlānī’’ti iminā pañca vā dasa vā sīlāni upāsakasīlanti dasseti.
ತತ್ಥ ಚಾತಿ ವಿಹಾರೇ ಚ। ಉಭೋಪೀತಿ ಆಗನ್ತುಕಾವಾಸಿಕವಸೇನ ಉಭೋಪಿ। ಅಸಾಧಾರಣನ್ತಿ ದ್ವೀಹಿ ಅಸಾಧಾರಣಂ। ಆಪತ್ತಿನ್ತಿ ಭಿಕ್ಖುನೀಹಿಯೇವ ಸಾಧಾರಣಂ ಆಪತ್ತಿಂ। ಗಮಿಯಚತುಕ್ಕೇಪೀತಿ ಪಿಸದ್ದೋ ಆಗನ್ತುಕಚತುಕ್ಕಂ ಅಪೇಕ್ಖತಿ। ವತ್ಥುನಾನತ್ತತಾವಾತಿ ಮೇಥುನಾದಿವತ್ಥುನಾನತ್ತತಾ ಏವ। ಹೀತಿ ಸಚ್ಚಂ, ಯಸ್ಮಾ ವಾ। ಸಾತಿ ಆಪತ್ತಿ। ತಥಾತಿ ಯಥಾ ಕಾಯಸಂಸಗ್ಗೇ, ತಥಾ ಲಸುಣಖಾದನೇತಿ ಯೋಜನಾ। ಏತ್ಥಾತಿ ವತ್ಥುನಾನತ್ತತಾದಿಚತುಕ್ಕೇ । ಚತ್ತಾರಿ ಪಾರಾಜಿಕಾನೀತಿ ಭಿಕ್ಖುಪಾತಿಮೋಕ್ಖೇ ಆಗತಾನಿ। ವಿಸುಂ ಆಪಜ್ಜನ್ತೇಸುಪಿ ಏಸೇವ ನಯೋತಿ ಸಮ್ಬನ್ಧೋ।
Tattha cāti vihāre ca. Ubhopīti āgantukāvāsikavasena ubhopi. Asādhāraṇanti dvīhi asādhāraṇaṃ. Āpattinti bhikkhunīhiyeva sādhāraṇaṃ āpattiṃ. Gamiyacatukkepīti pisaddo āgantukacatukkaṃ apekkhati. Vatthunānattatāvāti methunādivatthunānattatā eva. Hīti saccaṃ, yasmā vā. Sāti āpatti. Tathāti yathā kāyasaṃsagge, tathā lasuṇakhādaneti yojanā. Etthāti vatthunānattatādicatukke . Cattāri pārājikānīti bhikkhupātimokkhe āgatāni. Visuṃ āpajjantesupi eseva nayoti sambandho.
ಪುರಿಮಚತುಕ್ಕೇತಿ ವತ್ಥುನಾನತ್ತತಾದಿಚತುಕ್ಕೇ। ಯೋ ಪಠಮೋ ಪಞ್ಹೋತಿ ಯೋಜನಾ। ಇಧಾತಿ ವತ್ಥುಸಭಾಗತಾದಿಚತುಕ್ಕೇ। ಯೋ ಚಾತಿ ಯೋ ಚ ಪಞ್ಹೋ। ತತ್ಥಾತಿ ವತ್ಥುನಾನತ್ತತಾದಿಚತುಕ್ಕೇ। ತತಿಯಚತುತ್ಥೇಸು ಪಞ್ಹೇಸೂತಿ ಸಮ್ಬನ್ಧೋ।
Purimacatukketi vatthunānattatādicatukke. Yo paṭhamo pañhoti yojanā. Idhāti vatthusabhāgatādicatukke. Yo cāti yo ca pañho. Tatthāti vatthunānattatādicatukke. Tatiyacatutthesu pañhesūti sambandho.
‘‘ಸದ್ಧಿವಿಹಾರಿಕಸ್ಸಾ’’ತಿ ಪದಂ ‘‘ಕತ್ತಬ್ಬ’’ಇತಿ ಪದೇ ಸಮ್ಪದಾನಂ।
‘‘Saddhivihārikassā’’ti padaṃ ‘‘kattabba’’iti pade sampadānaṃ.
ಗರುಕನ್ತಿ ಪಾರಾಜಿಕಂ। ಲಹುಕನ್ತಿ ಥುಲ್ಲಚ್ಚಯಂ ವಾ ದುಕ್ಕಟಂ ವಾ।
Garukanti pārājikaṃ. Lahukanti thullaccayaṃ vā dukkaṭaṃ vā.
ಅಟ್ಠನ್ನಂ ಭಿಕ್ಖುನೀನಂ ಪಟಿಪಾಟಿಯಾ ನಿಸೀದಿತಬ್ಬತೋ ವುತ್ತಂ ‘‘ನವಮಭಿಕ್ಖುನಿತೋ’’ತಿ। ಪಚ್ಚುಟ್ಠಾನಾರಹಾತಿ ಪಟಿಮುಖಂ ಉಪಟ್ಠಾತುಂ ಅರಹಾ। ಅವಿಸೇಸೇನ ಚಾತಿ ‘‘ಭಿಕ್ಖೂ’’ತಿ ವಾ ‘‘ಭಿಕ್ಖುನೀ’’ತಿ ವಾ ವಿಸೇಸ, ಮಕತ್ವಾ ಸಾಮಞ್ಞೇನ ಚ। ‘‘ಆಸನಾರಹಚತುಕ್ಕಸ್ಸಾ’’ತಿ ಪದಂ ‘‘ಪಠಮಪದ’’ನ್ತಿ ಪದೇ ಅವಯವಿಸಮ್ಬನ್ಧೋ।
Aṭṭhannaṃ bhikkhunīnaṃ paṭipāṭiyā nisīditabbato vuttaṃ ‘‘navamabhikkhunito’’ti. Paccuṭṭhānārahāti paṭimukhaṃ upaṭṭhātuṃ arahā. Avisesena cāti ‘‘bhikkhū’’ti vā ‘‘bhikkhunī’’ti vā visesa, makatvā sāmaññena ca. ‘‘Āsanārahacatukkassā’’ti padaṃ ‘‘paṭhamapada’’nti pade avayavisambandho.
ಅಸಾಧಾರಣನ್ತಿ ಭಿಕ್ಖೂಹಿ ಅಸಾಧಾರಣಂ। ವಿಕಾಲೇ ಕಪ್ಪತೀತಿ ತದಹುವಿಕಾಲೇ ಕಪ್ಪತಿ। ಕಾಲಾತೀತನ್ತಿ ಕಾಲಯಾಮಸತ್ತಹಾತೀತಂ। ಯಾವಕಾಲಿಕಾದಿತ್ತಯಞ್ಚ ಅಕಪ್ಪಿಯಮಂಸಞ್ಚ ಉಗ್ಗಹಿತಕಞ್ಚ ಅಪಟಿಗ್ಗಹಿತಕಞ್ಚಾತಿ ಯೋಜನಾ।
Asādhāraṇanti bhikkhūhi asādhāraṇaṃ. Vikāle kappatīti tadahuvikāle kappati. Kālātītanti kālayāmasattahātītaṃ. Yāvakālikādittayañca akappiyamaṃsañca uggahitakañca apaṭiggahitakañcāti yojanā.
ಗುಣಙ್ಗುಣೂಪಾಹನಞ್ಚ ಧುವನ್ಹಾನಞ್ಚ ಚಮ್ಮತ್ಥರಣಞ್ಚ ಗುಣಙ್ಗುಣೂಪಾಹನಧುವನ್ಹಾನಚಮ್ಮತ್ಥರಣಾನಿ। ಇಮಾನಿ ಚತ್ತಾರೀತಿ ಪಞ್ಚವಗ್ಗೇನ ಗಣೇನ ಉಪಸಮ್ಪದದಾನಾದೀನಿ। ಇಧಾತಿ ಪಚ್ಚನ್ತಿಮೇಸು ಜನಪದೇಸು। ಇಧಾತಿ ಮಜ್ಝಿಮೇಸು। ಇದನ್ತಿ ಚತುಬ್ಬಿಧಂ ವತ್ಥು। ದೀಪೇತುಮ್ಪೀತಿ ದೀಪನಮ್ಪಿ। ತುಂಪಚ್ಚಯೋ ಹಿ ಕತ್ವತ್ಥಜೋತಕೋ। ಏಸೇವ ನಯೋ ದೀಪೇತುಂ ಪನಾತಿ ಏತ್ಥಾಪಿ। ಸೇಸಂ ಅನುಞ್ಞಾತಕನ್ತಿ ಸಮ್ಬನ್ಧೋ। ಉಭಯತ್ಥಪೀತಿ ಪಚ್ಚನ್ತಿಮಮಜ್ಝಿಮವಸೇನ ಉಭಯತ್ಥಾಪಿ।
Guṇaṅguṇūpāhanañca dhuvanhānañca cammattharaṇañca guṇaṅguṇūpāhanadhuvanhānacammattharaṇāni. Imāni cattārīti pañcavaggena gaṇena upasampadadānādīni. Idhāti paccantimesu janapadesu. Idhāti majjhimesu. Idanti catubbidhaṃ vatthu. Dīpetumpīti dīpanampi. Tuṃpaccayo hi katvatthajotako. Eseva nayo dīpetuṃ panāti etthāpi. Sesaṃ anuññātakanti sambandho. Ubhayatthapīti paccantimamajjhimavasena ubhayatthāpi.
ಛನ್ದಪಾರಿಸುದ್ಧಿಅಕ್ಖಾನಂ ಏಕಂ ಕತ್ವಾ ‘‘ಚತ್ತಾರೋ’’ತಿ ವುತ್ತಂ। ಚತ್ತಾರೋ ಪುಬ್ಬಕಿಚ್ಚಾತಿ ಲಿಙ್ಗವಿಪಲ್ಲಾಸೋ, ‘‘ಚತ್ತಾರಿ ಪುಬ್ಬಕಿಚ್ಚಾನೀ’’ತಿ ಹಿ ಅತ್ಥೋ। ಏವಂ ವುತ್ತಾನಿ ಇಮಾನಿ ಚತ್ತಾರೀತಿ ಸಮ್ಬನ್ಧೋ। ಏವಂ ಆಗತಾ ಸಮ್ಮುತಿಯೋತಿ ಸಮ್ಬನ್ಧೋ। ಸಬ್ಬತ್ಥಾತಿ ಸಬ್ಬೇಸು ಚತುಕ್ಕೇಸು।
Chandapārisuddhiakkhānaṃ ekaṃ katvā ‘‘cattāro’’ti vuttaṃ. Cattāro pubbakiccāti liṅgavipallāso, ‘‘cattāri pubbakiccānī’’ti hi attho. Evaṃ vuttāni imāni cattārīti sambandho. Evaṃ āgatā sammutiyoti sambandho. Sabbatthāti sabbesu catukkesu.
ಇತಿ ಚತುಕ್ಕವಾರವಣ್ಣನಾಯ ಯೋಜನಾ ಸಮತ್ತಾ।
Iti catukkavāravaṇṇanāya yojanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi / ೪. ಚತುಕ್ಕವಾರೋ • 4. Catukkavāro
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಚತುಕ್ಕವಾರವಣ್ಣನಾ • Catukkavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಚತುಕ್ಕವಾರವಣ್ಣನಾ • Catukkavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಚತುಕ್ಕವಾರವಣ್ಣನಾ • Catukkavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಚತುಕ್ಕವಾರವಣ್ಣನಾ • Catukkavāravaṇṇanā
