| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
ஏகுத்தரிகனயோ திகவாரவண்ணனா
Ekuttarikanayo tikavāravaṇṇanā
323. திகேஸு ப⁴க³வதி திட்ட²ந்தே யங் ஆபத்திங் ஆபஜ்ஜதி, ஸா ஆபத்தி அத்தீ²தி யோஜனா. ஸப்³ப³த்தா²தி ஸப்³பே³ஸு பதே³ஸு. வித்தா²ரங் த³ஸ்ஸெந்தோ ஆஹ ‘‘தத்தா²’’திஆதி³. தத்த² தத்தா²தி திகேஸு, வித்தா²ரோ ஏவங் வேதி³தப்³போ³தி யோஜனா. லோஹிதுப்பாதா³பத்தீதி அனுலோமபாராஜிகாபத்தி. ‘‘ஆவுஸோவாதே³னா’’தி ‘‘ஆவுஸோ’’தி வோஹாரேன. வோதி தும்ஹேஹி.
323. Tikesu bhagavati tiṭṭhante yaṃ āpattiṃ āpajjati, sā āpatti atthīti yojanā. Sabbatthāti sabbesu padesu. Vitthāraṃ dassento āha ‘‘tatthā’’tiādi. Tattha tatthāti tikesu, vitthāro evaṃ veditabboti yojanā. Lohituppādāpattīti anulomapārājikāpatti. ‘‘Āvusovādenā’’ti ‘‘āvuso’’ti vohārena. Voti tumhehi.
காலேதி புரேப⁴த்தகாலே. விகாலேதி பச்சா²ப⁴த்தகாலே. அவஸேஸங் ஆபத்திந்தி ஸம்ப³ந்தோ⁴. த³ஸவஸ்ஸொம்ஹீதி அஹங் த³ஸவஸ்ஸோ அம்ஹி. நவோதி பஞ்சவஸ்ஸஅபரிபுண்ணோ. மஜ்ஜி²மோதி பஞ்சவஸ்ஸதோ பட்டா²ய யாவ த³ஸவஸ்ஸஅபரிபுண்ணோ. குஸலசித்தோ ஆபஜ்ஜதீதி குஸலசித்தோ ஹுத்வா ஆபஜ்ஜதி. அப்³யாகதசித்தோதி ஸுபந்தஸ்ஸ ப⁴வங்க³சித்தங் ஸந்தா⁴ய வுத்தங். யந்தி ஆபத்திங். ஸப்³ப³ந்தி ஆபத்திங், ஆபஜ்ஜதீதி ஸம்ப³ந்தோ⁴. து³க்க²வேத³னாஸமங்கீ³ ஹுத்வா ஆபஜ்ஜதீதி யோஜனா. யந்தி ஆபத்திங்.
Kāleti purebhattakāle. Vikāleti pacchābhattakāle. Avasesaṃ āpattinti sambandho. Dasavassomhīti ahaṃ dasavasso amhi. Navoti pañcavassaaparipuṇṇo. Majjhimoti pañcavassato paṭṭhāya yāva dasavassaaparipuṇṇo. Kusalacitto āpajjatīti kusalacitto hutvā āpajjati. Abyākatacittoti supantassa bhavaṅgacittaṃ sandhāya vuttaṃ. Yanti āpattiṃ. Sabbanti āpattiṃ, āpajjatīti sambandho. Dukkhavedanāsamaṅgī hutvā āpajjatīti yojanā. Yanti āpattiṃ.
தயோ படிக்கே²பாதி எத்த² படிக்கே²பஸ்ஸ ஸாமிகங் த³ஸ்ஸெந்தோ ஆஹ ‘‘பு³த்³த⁴ஸ்ஸ ப⁴க³வதோ’’தி. கிலேஸஸல்லேக²னகபடிபத்தியாதி கிலேஸங் ஸல்லிக²தி தனுங் கரோதீதி கிலேஸஸல்லேக²னகா, ஸாயேவ படிபத்தி கிலேஸஸல்லேக²னகபடிபத்தி, தாய.
Tayo paṭikkhepāti ettha paṭikkhepassa sāmikaṃ dassento āha ‘‘buddhassa bhagavato’’ti. Kilesasallekhanakapaṭipattiyāti kilesaṃ sallikhati tanuṃ karotīti kilesasallekhanakā, sāyeva paṭipatti kilesasallekhanakapaṭipatti, tāya.
பரிஸங் உபட்டா²பெந்தோ பா³லோதி ஸம்ப³ந்தோ⁴. பரிஸங் உபட்டா²பெந்தோ பண்டி³தோ சாதி ஸம்ப³ந்தோ⁴. அவஸேஸங் ஆபத்திந்தி யோஜனா. காளேதி காளபக்கே². ஜுண்ஹேதி ஜுண்ஹபக்கே².
Parisaṃ upaṭṭhāpento bāloti sambandho. Parisaṃ upaṭṭhāpento paṇḍito cāti sambandho. Avasesaṃ āpattinti yojanā. Kāḷeti kāḷapakkhe. Juṇheti juṇhapakkhe.
கத்திகபுண்ணமாஸியாதி பச்சி²மகத்திகபுண்ணமாஸியா. குருந்தி³யங் வுத்தந்தி ஸம்ப³ந்தோ⁴. ஸுவுத்தகாரணங் த³ஸ்ஸெந்தோ ஆஹ ‘‘சாதுமாஸ’’ந்திஆதி³. ஹீதி யஸ்மா, பரியேஸந்தோ ச நிவாஸெந்தோ ச பி⁴க்கூ²தி யோஜனா.
Kattikapuṇṇamāsiyāti pacchimakattikapuṇṇamāsiyā. Kurundiyaṃ vuttanti sambandho. Suvuttakāraṇaṃ dassento āha ‘‘cātumāsa’’ntiādi. Hīti yasmā, pariyesanto ca nivāsento ca bhikkhūti yojanā.
வத்து²ந்தி மேது²னத⁴ம்மாதி³வத்து²ங்.
Vatthunti methunadhammādivatthuṃ.
படிச்சா²தே³தி ஏதாயாதி படிச்சா²தீ³தி கரணத்தோ²பி யுஜ்ஜதி. வித்தா²ரங் த³ஸ்ஸெந்தோ ஆஹ ‘‘த்³வாரங் பித³ஹித்வா’’திஆதி³. ஏததே³வாதி பரிகம்மமேவ. உப⁴யத்தா²தி உப⁴யேஸு ஜந்தாக⁴ரபடிச்சா²தி³உத³கபடிச்சா²தீ³ஸு. ஸப்³ப³ந்தி அகி²லங் பரிகம்மாதி³ங். நிய்யந்தீதி நிலீயித்வா யந்தி. இமினா வஹந்தீதி எத்த² வஹதா⁴து க³த்யத்தோ²தி த³ஸ்ஸேதி. அப்³ப⁴மஹிகாதூ⁴மரஜராஹுவிமுத்தந்தி அப்³பே⁴ன ச மஹிகாய ச தூ⁴மேன ச ரஜேன ச ராஹுனா ச விமுத்தங். தேஸூதி அப்³பா⁴தீ³ஸு. ததா²தி யதா² சந்த³மண்ட³லங் விரோசதி, ததா² ஸூரியமண்ட³லங்.
Paṭicchādeti etāyāti paṭicchādīti karaṇatthopi yujjati. Vitthāraṃ dassento āha ‘‘dvāraṃ pidahitvā’’tiādi. Etadevāti parikammameva. Ubhayatthāti ubhayesu jantāgharapaṭicchādiudakapaṭicchādīsu. Sabbanti akhilaṃ parikammādiṃ. Niyyantīti nilīyitvā yanti. Iminā vahantīti ettha vahadhātu gatyatthoti dasseti. Abbhamahikādhūmarajarāhuvimuttanti abbhena ca mahikāya ca dhūmena ca rajena ca rāhunā ca vimuttaṃ. Tesūti abbhādīsu. Tathāti yathā candamaṇḍalaṃ virocati, tathā sūriyamaṇḍalaṃ.
கரணீயேன ஹுத்வாதி ஸம்ப³ந்தோ⁴.
Karaṇīyena hutvāti sambandho.
கப்பெந்தோதி கரொந்தோ. ஆக³ந்துகோ ஆபஜ்ஜதீதி ஸம்ப³ந்தோ⁴. அனஜ்ஜி²ட்டோ²தி அனஜ்ஜே²ஸிதோ ஹுத்வாதி ஸம்ப³ந்தோ⁴. திணவத்தா²ரகஸமதே² காயேன வுட்டா²தி காயஸாமக்³கி³யா தா³னத்தா.
Kappentoti karonto. Āgantuko āpajjatīti sambandho. Anajjhiṭṭhoti anajjhesito hutvāti sambandho. Tiṇavatthārakasamathe kāyena vuṭṭhāti kāyasāmaggiyā dānattā.
ஆகா³ள்ஹாய சேதெய்யாதி ஆகா³ள்ஹஸத்³தோ³ த³ள்ஹபரியாயோதி ஆஹ ‘‘த³ள்ஹபா⁴வாயா’’தி. ஆ பு⁴ஸோ கா³ஹியதே ஆகா³ள்ஹோ, கா³ள்ஹோ பா³ள்ஹோ த³ள்ஹோதி அத்த²தோ ஏகங். சேதெய்யாதி பகப்பெய்ய. ந பூரயதோதி ந பூரயந்தஸ்ஸ. அலஜ்ஜீ ச ஹோதி பா³லோ ச அபகதத்தோ சாதி எத்த² பா³லமத்தஅபகதத்தமத்தேன கம்மங் ந காதப்³ப³ங், ஆபத்திவஸேனேவ பன காதப்³ப³ந்தி த³ஸ்ஸெந்தோ ஆஹ ‘‘பா³லோ’’திஆதி³. தத்த² பா³லோ ந ஜானாதீதி ஸம்ப³ந்தோ⁴. அயந்தி பா³லோ. எத்தாவதாதி எத்தகேன அஜானநமத்தேன. பா³லபா⁴வமூலகங் ஆபத்திந்தி ஸம்ப³ந்தோ⁴. த்³வே ஆபத்திக்க²ந்தே⁴தி பாராஜிகஸங்கா⁴தி³ஸேஸவஸேன த்³வே ஆபத்திராஸயோ. தேஸந்தி திண்ணங் புக்³க³லானங், காதப்³ப³ந்தி ஸம்ப³ந்தோ⁴.
Āgāḷhāya ceteyyāti āgāḷhasaddo daḷhapariyāyoti āha ‘‘daḷhabhāvāyā’’ti. Ā bhuso gāhiyate āgāḷho, gāḷho bāḷho daḷhoti atthato ekaṃ. Ceteyyāti pakappeyya. Na pūrayatoti na pūrayantassa. Alajjī ca hoti bālo ca apakatatto cāti ettha bālamattaapakatattamattena kammaṃ na kātabbaṃ, āpattivaseneva pana kātabbanti dassento āha ‘‘bālo’’tiādi. Tattha bālo na jānātīti sambandho. Ayanti bālo. Ettāvatāti ettakena ajānanamattena. Bālabhāvamūlakaṃ āpattinti sambandho. Dve āpattikkhandheti pārājikasaṅghādisesavasena dve āpattirāsayo. Tesanti tiṇṇaṃ puggalānaṃ, kātabbanti sambandho.
காயிகோ த³வோ நாமாதி காயிகோ பரிஹாஸோ நாம. முகா²லம்ப³ரகரணாதி³பே⁴தோ³தி முகே²ன ஆலம்ப³ரனாமகதூரியகிச்சஸ்ஸ கரணாதி³பே⁴தோ³ . த்³வீஹிபி த்³வாரேஹீதி காயவசீவஸேன த்³வீஹிபி த்³வாரேஹி. காயத்³வாரே பஞ்ஞத்தஸிக்கா²பத³வீதிக்கமோதி காயத்³வாரே பஞ்ஞத்தஸ்ஸ காயஸங்ஸக்³கா³தி³ஸிக்கா²பத³ஸ்ஸ வீதிக்கமோ. வசீத்³வாரே பஞ்ஞத்தஸிக்கா²பத³வீதிக்கமோதி வசீத்³வாரே பஞ்ஞத்தஸ்ஸ து³ட்டு²ல்லவாசாதி³ஸிக்கா²பத³ஸ்ஸ வீதிக்கமோ. காயிகேன உபகா⁴திகேனாதி எத்த² உபகா⁴திகங் நாம அஸிக்க²னந்தி ஆஹ ‘‘அஸிக்க²னேனா’’தி. கஸ்மா அஸிக்க²னங் உபகா⁴தங் நாமாதி ஆஹ ‘‘யோ ஹீ’’திஆதி³. தத்த² யோதி புக்³க³லோ. தந்தி காயத்³வாரே பஞ்ஞத்தஸிக்கா²பத³ங். நந்தி ஏவமேவ. ஹி யஸ்மா உபகா⁴தேதீதி ஸம்ப³ந்தோ⁴. வேஜ்ஜகம்மேன ஸமன்னாக³தோதி ஸம்ப³ந்தோ⁴. ஸாஸனஉக்³க³ஹணஆரோசனாதி³னா வாசஸிகேன மிச்சா²ஜீவேனாதி யோஜனா.
Kāyiko davo nāmāti kāyiko parihāso nāma. Mukhālambarakaraṇādibhedoti mukhena ālambaranāmakatūriyakiccassa karaṇādibhedo . Dvīhipi dvārehīti kāyavacīvasena dvīhipi dvārehi. Kāyadvāre paññattasikkhāpadavītikkamoti kāyadvāre paññattassa kāyasaṃsaggādisikkhāpadassa vītikkamo. Vacīdvāre paññattasikkhāpadavītikkamoti vacīdvāre paññattassa duṭṭhullavācādisikkhāpadassa vītikkamo. Kāyikena upaghātikenāti ettha upaghātikaṃ nāma asikkhananti āha ‘‘asikkhanenā’’ti. Kasmā asikkhanaṃ upaghātaṃ nāmāti āha ‘‘yo hī’’tiādi. Tattha yoti puggalo. Tanti kāyadvāre paññattasikkhāpadaṃ. Nanti evameva. Hi yasmā upaghātetīti sambandho. Vejjakammena samannāgatoti sambandho. Sāsanauggahaṇaārocanādinā vācasikena micchājīvenāti yojanā.
‘‘மா ப⁴ண்ட³னங் கரீ’’தி இமினா ‘‘மா’’தி படிஸேத⁴ஸ்ஸ ‘‘கரீ’’தி பாட²ஸேஸேன ஸம்ப³ந்தி⁴தப்³ப³பா⁴வங் த³ஸ்ஸேதி. ந வோஹரிதப்³ப³ந்தி எத்த² விபுப்³ப³அவபுப்³ப³-ஹரதா⁴து கத²னத்தோ²தி ஆஹ ‘‘ந கிஞ்சி வத்தப்³ப³’’ந்தி. ஹீதி ஸச்சங். பீ³ஜனக்³கா³ஹாதி³கேதி ஆதி³ஸத்³தே³ன த⁴ம்மஜ்ஜே²ஸனாதி³ங் ஸங்க³ண்ஹாதி. ஓகாஸகம்மங் காரெந்தஸ்ஸாதி எத்த² ‘‘ஓகாஸ’’ந்தி ச ‘‘ஓகாஸகம்ம’’ந்தி ச ஸதி³ஸந்தி ஆஹ ‘‘ஓகாஸங் காரெந்தஸ்ஸா’’தி. ந ஆதா³தப்³ப³ந்தி ந க³ண்ஹிதப்³ப³ங். தமேவத்த²ங் த³ஸ்ஸெந்தோ ஆஹ ‘‘யத்த² க³ஹெத்வா’’திஆதி³.
‘‘Mā bhaṇḍanaṃ karī’’ti iminā ‘‘mā’’ti paṭisedhassa ‘‘karī’’ti pāṭhasesena sambandhitabbabhāvaṃ dasseti. Na voharitabbanti ettha vipubbaavapubba-haradhātu kathanatthoti āha ‘‘na kiñci vattabba’’nti. Hīti saccaṃ. Bījanaggāhādiketi ādisaddena dhammajjhesanādiṃ saṅgaṇhāti. Okāsakammaṃ kārentassāti ettha ‘‘okāsa’’nti ca ‘‘okāsakamma’’nti ca sadisanti āha ‘‘okāsaṃ kārentassā’’ti. Na ādātabbanti na gaṇhitabbaṃ. Tamevatthaṃ dassento āha ‘‘yattha gahetvā’’tiādi.
யந்தி வினயங். ஸோதி பி⁴க்கு². ஸோதி வினயோ. தஸ்ஸாதி பி⁴க்கு²ஸ்ஸ. இத³ந்தி கம்மங். அஞ்ஞங் புச்சா²தி மயா அஞ்ஞங் பி⁴க்கு²ங் புச்சா²ஹீதி யோஜனா. இதீதி ஏவங். ஸோதி தீஹங்கே³ஹி ஸமன்னாக³தோ பி⁴க்கு². அஸ்ஸாதி தீஹங்கே³ஹி ஸமன்னாக³தஸ்ஸ. ந ஸாகச்சி²தப்³போ³தி ந ஸஹ கதே²தப்³போ³.
Yanti vinayaṃ. Soti bhikkhu. Soti vinayo. Tassāti bhikkhussa. Idanti kammaṃ. Aññaṃ pucchāti mayā aññaṃ bhikkhuṃ pucchāhīti yojanā. Itīti evaṃ. Soti tīhaṅgehi samannāgato bhikkhu. Assāti tīhaṅgehi samannāgatassa. Na sākacchitabboti na saha kathetabbo.
‘‘லத்³தி⁴’’ந்தி இமினா இத³மப்பஹாயாதி எத்த² இத³ங்ஸத்³த³ஸ்ஸ விஸயங் த³ஸ்ஸேதி. ‘‘அவிஜஹித்வா’’தி இமினா ஹாதா⁴து த்வாபச்சயோதி த³ஸ்ஸேதி. ஸுத்³த⁴ங் ப்³ரஹ்மசாரிந்தி எத்த² ஸப்³ப³தா² கிலேஸஸுத்³தோ⁴ கீ²ணாஸவோவ க³ஹேதப்³போ³தி ஆஹ ‘‘கீ²ணாஸவங் பி⁴க்கு²’’ந்தி. ‘‘பாதப்³யபா⁴வ’’ந்தி இமினா பாதப்³யதந்தி எத்த² தாபச்சயோ பா⁴வத்தே² ஹோதீதி த³ஸ்ஸேதி. ‘‘படிஸேவன’’ந்தி இமினா பாதப்³யஸத்³தோ³ யதா²காமபரிபு⁴ஞ்ஜனத்தோ²தி த³ஸ்ஸேதி . க³திவிஸோத⁴னந்தி து³க்³க³திதோ ஸுக³தியா விஸுஜ்ஜ²னங் . ‘‘அகுஸலானி சேவ மூலானி சா’’தி இமினா அகுஸலஸத்³த³ஸ்ஸ ச மூலஸத்³த³ஸ்ஸ ச துல்யாதி⁴கரணபா⁴வங் த³ஸ்ஸேதி. தஸ்மா அகுஸலஸங்கா²தானி மூலானி அகுஸலமூலானீதி துல்யாதி⁴கரணஸமாஸோ காதப்³போ³. து³ச்சரிதானீதி எத்த² து³ஸத்³த³ஸ்ஸ து³ட்டு²விரூபத்த²பா⁴வங் த³ஸ்ஸெந்தோ ஆஹ ‘‘து³ட்டு² சரிதானி, விரூபானி வா சரிதானீ’’தி. விரூபானீதி விகாரஸபா⁴வானி. ‘‘கரணபூ⁴தேனா’’தி இமினா ‘‘கத்துபூ⁴தேனா’’தி அத்த²ங் படிக்கி²பதி. தத்த² தத்தா²தி தஸ்மிங் தஸ்மிங் க²ந்த⁴கே.
‘‘Laddhi’’nti iminā idamappahāyāti ettha idaṃsaddassa visayaṃ dasseti. ‘‘Avijahitvā’’ti iminā hādhātu tvāpaccayoti dasseti. Suddhaṃ brahmacārinti ettha sabbathā kilesasuddho khīṇāsavova gahetabboti āha ‘‘khīṇāsavaṃ bhikkhu’’nti. ‘‘Pātabyabhāva’’nti iminā pātabyatanti ettha tāpaccayo bhāvatthe hotīti dasseti. ‘‘Paṭisevana’’nti iminā pātabyasaddo yathākāmaparibhuñjanatthoti dasseti . Gativisodhananti duggatito sugatiyā visujjhanaṃ . ‘‘Akusalāni ceva mūlāni cā’’ti iminā akusalasaddassa ca mūlasaddassa ca tulyādhikaraṇabhāvaṃ dasseti. Tasmā akusalasaṅkhātāni mūlāni akusalamūlānīti tulyādhikaraṇasamāso kātabbo. Duccaritānīti ettha dusaddassa duṭṭhuvirūpatthabhāvaṃ dassento āha ‘‘duṭṭhu caritāni, virūpāni vā caritānī’’ti. Virūpānīti vikārasabhāvāni. ‘‘Karaṇabhūtenā’’ti iminā ‘‘kattubhūtenā’’ti atthaṃ paṭikkhipati. Tattha tatthāti tasmiṃ tasmiṃ khandhake.
இதி திகவாரவண்ணனாய யோஜனா ஸமத்தா.
Iti tikavāravaṇṇanāya yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 3. திகவாரோ • 3. Tikavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / திகவாரவண்ணனா • Tikavāravaṇṇanā
