| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
একুত্তরিকনযো তিকৰারৰণ্ণনা
Ekuttarikanayo tikavāravaṇṇanā
৩২৩. তিকেসু ভগৰতি তিট্ঠন্তে যং আপত্তিং আপজ্জতি, সা আপত্তি অত্থীতি যোজনা। সব্বত্থাতি সব্বেসু পদেসু। ৰিত্থারং দস্সেন্তো আহ ‘‘তত্থা’’তিআদি। তত্থ তত্থাতি তিকেসু, ৰিত্থারো এৰং ৰেদিতব্বোতি যোজনা। লোহিতুপ্পাদাপত্তীতি অনুলোমপারাজিকাপত্তি। ‘‘আৰুসোৰাদেনা’’তি ‘‘আৰুসো’’তি ৰোহারেন। ৰোতি তুম্হেহি।
323. Tikesu bhagavati tiṭṭhante yaṃ āpattiṃ āpajjati, sā āpatti atthīti yojanā. Sabbatthāti sabbesu padesu. Vitthāraṃ dassento āha ‘‘tatthā’’tiādi. Tattha tatthāti tikesu, vitthāro evaṃ veditabboti yojanā. Lohituppādāpattīti anulomapārājikāpatti. ‘‘Āvusovādenā’’ti ‘‘āvuso’’ti vohārena. Voti tumhehi.
কালেতি পুরেভত্তকালে। ৰিকালেতি পচ্ছাভত্তকালে। অৰসেসং আপত্তিন্তি সম্বন্ধো। দসৰস্সোম্হীতি অহং দসৰস্সো অম্হি। নৰোতি পঞ্চৰস্সঅপরিপুণ্ণো। মজ্ঝিমোতি পঞ্চৰস্সতো পট্ঠায যাৰ দসৰস্সঅপরিপুণ্ণো। কুসলচিত্তো আপজ্জতীতি কুসলচিত্তো হুত্ৰা আপজ্জতি। অব্যাকতচিত্তোতি সুপন্তস্স ভৰঙ্গচিত্তং সন্ধায ৰুত্তং। যন্তি আপত্তিং। সব্বন্তি আপত্তিং, আপজ্জতীতি সম্বন্ধো। দুক্খৰেদনাসমঙ্গী হুত্ৰা আপজ্জতীতি যোজনা। যন্তি আপত্তিং।
Kāleti purebhattakāle. Vikāleti pacchābhattakāle. Avasesaṃ āpattinti sambandho. Dasavassomhīti ahaṃ dasavasso amhi. Navoti pañcavassaaparipuṇṇo. Majjhimoti pañcavassato paṭṭhāya yāva dasavassaaparipuṇṇo. Kusalacitto āpajjatīti kusalacitto hutvā āpajjati. Abyākatacittoti supantassa bhavaṅgacittaṃ sandhāya vuttaṃ. Yanti āpattiṃ. Sabbanti āpattiṃ, āpajjatīti sambandho. Dukkhavedanāsamaṅgī hutvā āpajjatīti yojanā. Yanti āpattiṃ.
তযো পটিক্খেপাতি এত্থ পটিক্খেপস্স সামিকং দস্সেন্তো আহ ‘‘বুদ্ধস্স ভগৰতো’’তি। কিলেসসল্লেখনকপটিপত্তিযাতি কিলেসং সল্লিখতি তনুং করোতীতি কিলেসসল্লেখনকা, সাযেৰ পটিপত্তি কিলেসসল্লেখনকপটিপত্তি, তায।
Tayo paṭikkhepāti ettha paṭikkhepassa sāmikaṃ dassento āha ‘‘buddhassa bhagavato’’ti. Kilesasallekhanakapaṭipattiyāti kilesaṃ sallikhati tanuṃ karotīti kilesasallekhanakā, sāyeva paṭipatti kilesasallekhanakapaṭipatti, tāya.
পরিসং উপট্ঠাপেন্তো বালোতি সম্বন্ধো। পরিসং উপট্ঠাপেন্তো পণ্ডিতো চাতি সম্বন্ধো। অৰসেসং আপত্তিন্তি যোজনা। কাল়েতি কাল়পক্খে। জুণ্হেতি জুণ্হপক্খে।
Parisaṃ upaṭṭhāpento bāloti sambandho. Parisaṃ upaṭṭhāpento paṇḍito cāti sambandho. Avasesaṃ āpattinti yojanā. Kāḷeti kāḷapakkhe. Juṇheti juṇhapakkhe.
কত্তিকপুণ্ণমাসিযাতি পচ্ছিমকত্তিকপুণ্ণমাসিযা। কুরুন্দিযং ৰুত্তন্তি সম্বন্ধো। সুৰুত্তকারণং দস্সেন্তো আহ ‘‘চাতুমাস’’ন্তিআদি। হীতি যস্মা, পরিযেসন্তো চ নিৰাসেন্তো চ ভিক্খূতি যোজনা।
Kattikapuṇṇamāsiyāti pacchimakattikapuṇṇamāsiyā. Kurundiyaṃ vuttanti sambandho. Suvuttakāraṇaṃ dassento āha ‘‘cātumāsa’’ntiādi. Hīti yasmā, pariyesanto ca nivāsento ca bhikkhūti yojanā.
ৰত্থুন্তি মেথুনধম্মাদিৰত্থুং।
Vatthunti methunadhammādivatthuṃ.
পটিচ্ছাদেতি এতাযাতি পটিচ্ছাদীতি করণত্থোপি যুজ্জতি। ৰিত্থারং দস্সেন্তো আহ ‘‘দ্ৰারং পিদহিত্ৰা’’তিআদি। এতদেৰাতি পরিকম্মমেৰ। উভযত্থাতি উভযেসু জন্তাঘরপটিচ্ছাদিউদকপটিচ্ছাদীসু। সব্বন্তি অখিলং পরিকম্মাদিং। নিয্যন্তীতি নিলীযিত্ৰা যন্তি। ইমিনা ৰহন্তীতি এত্থ ৰহধাতু গত্যত্থোতি দস্সেতি। অব্ভমহিকাধূমরজরাহুৰিমুত্তন্তি অব্ভেন চ মহিকায চ ধূমেন চ রজেন চ রাহুনা চ ৰিমুত্তং। তেসূতি অব্ভাদীসু। তথাতি যথা চন্দমণ্ডলং ৰিরোচতি, তথা সূরিযমণ্ডলং।
Paṭicchādeti etāyāti paṭicchādīti karaṇatthopi yujjati. Vitthāraṃ dassento āha ‘‘dvāraṃ pidahitvā’’tiādi. Etadevāti parikammameva. Ubhayatthāti ubhayesu jantāgharapaṭicchādiudakapaṭicchādīsu. Sabbanti akhilaṃ parikammādiṃ. Niyyantīti nilīyitvā yanti. Iminā vahantīti ettha vahadhātu gatyatthoti dasseti. Abbhamahikādhūmarajarāhuvimuttanti abbhena ca mahikāya ca dhūmena ca rajena ca rāhunā ca vimuttaṃ. Tesūti abbhādīsu. Tathāti yathā candamaṇḍalaṃ virocati, tathā sūriyamaṇḍalaṃ.
করণীযেন হুত্ৰাতি সম্বন্ধো।
Karaṇīyena hutvāti sambandho.
কপ্পেন্তোতি করোন্তো। আগন্তুকো আপজ্জতীতি সম্বন্ধো। অনজ্ঝিট্ঠোতি অনজ্ঝেসিতো হুত্ৰাতি সম্বন্ধো। তিণৰত্থারকসমথে কাযেন ৰুট্ঠাতি কাযসামগ্গিযা দানত্তা।
Kappentoti karonto. Āgantuko āpajjatīti sambandho. Anajjhiṭṭhoti anajjhesito hutvāti sambandho. Tiṇavatthārakasamathe kāyena vuṭṭhāti kāyasāmaggiyā dānattā.
আগাল়্হায চেতেয্যাতি আগাল়্হসদ্দো দল়্হপরিযাযোতি আহ ‘‘দল়্হভাৰাযা’’তি। আ ভুসো গাহিযতে আগাল়্হো, গাল়্হো বাল়্হো দল়্হোতি অত্থতো একং। চেতেয্যাতি পকপ্পেয্য। ন পূরযতোতি ন পূরযন্তস্স। অলজ্জী চ হোতি বালো চ অপকতত্তো চাতি এত্থ বালমত্তঅপকতত্তমত্তেন কম্মং ন কাতব্বং, আপত্তিৰসেনেৰ পন কাতব্বন্তি দস্সেন্তো আহ ‘‘বালো’’তিআদি। তত্থ বালো ন জানাতীতি সম্বন্ধো। অযন্তি বালো। এত্তাৰতাতি এত্তকেন অজাননমত্তেন। বালভাৰমূলকং আপত্তিন্তি সম্বন্ধো। দ্ৰে আপত্তিক্খন্ধেতি পারাজিকসঙ্ঘাদিসেসৰসেন দ্ৰে আপত্তিরাসযো। তেসন্তি তিণ্ণং পুগ্গলানং, কাতব্বন্তি সম্বন্ধো।
Āgāḷhāya ceteyyāti āgāḷhasaddo daḷhapariyāyoti āha ‘‘daḷhabhāvāyā’’ti. Ā bhuso gāhiyate āgāḷho, gāḷho bāḷho daḷhoti atthato ekaṃ. Ceteyyāti pakappeyya. Na pūrayatoti na pūrayantassa. Alajjī ca hoti bālo ca apakatatto cāti ettha bālamattaapakatattamattena kammaṃ na kātabbaṃ, āpattivaseneva pana kātabbanti dassento āha ‘‘bālo’’tiādi. Tattha bālo na jānātīti sambandho. Ayanti bālo. Ettāvatāti ettakena ajānanamattena. Bālabhāvamūlakaṃ āpattinti sambandho. Dve āpattikkhandheti pārājikasaṅghādisesavasena dve āpattirāsayo. Tesanti tiṇṇaṃ puggalānaṃ, kātabbanti sambandho.
কাযিকো দৰো নামাতি কাযিকো পরিহাসো নাম। মুখালম্বরকরণাদিভেদোতি মুখেন আলম্বরনামকতূরিযকিচ্চস্স করণাদিভেদো । দ্ৰীহিপি দ্ৰারেহীতি কাযৰচীৰসেন দ্ৰীহিপি দ্ৰারেহি। কাযদ্ৰারে পঞ্ঞত্তসিক্খাপদৰীতিক্কমোতি কাযদ্ৰারে পঞ্ঞত্তস্স কাযসংসগ্গাদিসিক্খাপদস্স ৰীতিক্কমো। ৰচীদ্ৰারে পঞ্ঞত্তসিক্খাপদৰীতিক্কমোতি ৰচীদ্ৰারে পঞ্ঞত্তস্স দুট্ঠুল্লৰাচাদিসিক্খাপদস্স ৰীতিক্কমো। কাযিকেন উপঘাতিকেনাতি এত্থ উপঘাতিকং নাম অসিক্খনন্তি আহ ‘‘অসিক্খনেনা’’তি। কস্মা অসিক্খনং উপঘাতং নামাতি আহ ‘‘যো হী’’তিআদি। তত্থ যোতি পুগ্গলো। তন্তি কাযদ্ৰারে পঞ্ঞত্তসিক্খাপদং। নন্তি এৰমেৰ। হি যস্মা উপঘাতেতীতি সম্বন্ধো। ৰেজ্জকম্মেন সমন্নাগতোতি সম্বন্ধো। সাসনউগ্গহণআরোচনাদিনা ৰাচসিকেন মিচ্ছাজীৰেনাতি যোজনা।
Kāyiko davo nāmāti kāyiko parihāso nāma. Mukhālambarakaraṇādibhedoti mukhena ālambaranāmakatūriyakiccassa karaṇādibhedo . Dvīhipi dvārehīti kāyavacīvasena dvīhipi dvārehi. Kāyadvāre paññattasikkhāpadavītikkamoti kāyadvāre paññattassa kāyasaṃsaggādisikkhāpadassa vītikkamo. Vacīdvāre paññattasikkhāpadavītikkamoti vacīdvāre paññattassa duṭṭhullavācādisikkhāpadassa vītikkamo. Kāyikena upaghātikenāti ettha upaghātikaṃ nāma asikkhananti āha ‘‘asikkhanenā’’ti. Kasmā asikkhanaṃ upaghātaṃ nāmāti āha ‘‘yo hī’’tiādi. Tattha yoti puggalo. Tanti kāyadvāre paññattasikkhāpadaṃ. Nanti evameva. Hi yasmā upaghātetīti sambandho. Vejjakammena samannāgatoti sambandho. Sāsanauggahaṇaārocanādinā vācasikena micchājīvenāti yojanā.
‘‘মা ভণ্ডনং করী’’তি ইমিনা ‘‘মা’’তি পটিসেধস্স ‘‘করী’’তি পাঠসেসেন সম্বন্ধিতব্বভাৰং দস্সেতি। ন ৰোহরিতব্বন্তি এত্থ ৰিপুব্বঅৰপুব্ব-হরধাতু কথনত্থোতি আহ ‘‘ন কিঞ্চি ৰত্তব্ব’’ন্তি। হীতি সচ্চং। বীজনগ্গাহাদিকেতি আদিসদ্দেন ধম্মজ্ঝেসনাদিং সঙ্গণ্হাতি। ওকাসকম্মং কারেন্তস্সাতি এত্থ ‘‘ওকাস’’ন্তি চ ‘‘ওকাসকম্ম’’ন্তি চ সদিসন্তি আহ ‘‘ওকাসং কারেন্তস্সা’’তি। ন আদাতব্বন্তি ন গণ্হিতব্বং। তমেৰত্থং দস্সেন্তো আহ ‘‘যত্থ গহেত্ৰা’’তিআদি।
‘‘Mā bhaṇḍanaṃ karī’’ti iminā ‘‘mā’’ti paṭisedhassa ‘‘karī’’ti pāṭhasesena sambandhitabbabhāvaṃ dasseti. Na voharitabbanti ettha vipubbaavapubba-haradhātu kathanatthoti āha ‘‘na kiñci vattabba’’nti. Hīti saccaṃ. Bījanaggāhādiketi ādisaddena dhammajjhesanādiṃ saṅgaṇhāti. Okāsakammaṃ kārentassāti ettha ‘‘okāsa’’nti ca ‘‘okāsakamma’’nti ca sadisanti āha ‘‘okāsaṃ kārentassā’’ti. Na ādātabbanti na gaṇhitabbaṃ. Tamevatthaṃ dassento āha ‘‘yattha gahetvā’’tiādi.
যন্তি ৰিনযং। সোতি ভিক্খু। সোতি ৰিনযো। তস্সাতি ভিক্খুস্স। ইদন্তি কম্মং। অঞ্ঞং পুচ্ছাতি মযা অঞ্ঞং ভিক্খুং পুচ্ছাহীতি যোজনা। ইতীতি এৰং। সোতি তীহঙ্গেহি সমন্নাগতো ভিক্খু। অস্সাতি তীহঙ্গেহি সমন্নাগতস্স। ন সাকচ্ছিতব্বোতি ন সহ কথেতব্বো।
Yanti vinayaṃ. Soti bhikkhu. Soti vinayo. Tassāti bhikkhussa. Idanti kammaṃ. Aññaṃ pucchāti mayā aññaṃ bhikkhuṃ pucchāhīti yojanā. Itīti evaṃ. Soti tīhaṅgehi samannāgato bhikkhu. Assāti tīhaṅgehi samannāgatassa. Na sākacchitabboti na saha kathetabbo.
‘‘লদ্ধি’’ন্তি ইমিনা ইদমপ্পহাযাতি এত্থ ইদংসদ্দস্স ৰিসযং দস্সেতি। ‘‘অৰিজহিত্ৰা’’তি ইমিনা হাধাতু ত্ৰাপচ্চযোতি দস্সেতি। সুদ্ধং ব্রহ্মচারিন্তি এত্থ সব্বথা কিলেসসুদ্ধো খীণাসৰোৰ গহেতব্বোতি আহ ‘‘খীণাসৰং ভিক্খু’’ন্তি। ‘‘পাতব্যভাৰ’’ন্তি ইমিনা পাতব্যতন্তি এত্থ তাপচ্চযো ভাৰত্থে হোতীতি দস্সেতি। ‘‘পটিসেৰন’’ন্তি ইমিনা পাতব্যসদ্দো যথাকামপরিভুঞ্জনত্থোতি দস্সেতি । গতিৰিসোধনন্তি দুগ্গতিতো সুগতিযা ৰিসুজ্ঝনং । ‘‘অকুসলানি চেৰ মূলানি চা’’তি ইমিনা অকুসলসদ্দস্স চ মূলসদ্দস্স চ তুল্যাধিকরণভাৰং দস্সেতি। তস্মা অকুসলসঙ্খাতানি মূলানি অকুসলমূলানীতি তুল্যাধিকরণসমাসো কাতব্বো। দুচ্চরিতানীতি এত্থ দুসদ্দস্স দুট্ঠুৰিরূপত্থভাৰং দস্সেন্তো আহ ‘‘দুট্ঠু চরিতানি, ৰিরূপানি ৰা চরিতানী’’তি। ৰিরূপানীতি ৰিকারসভাৰানি। ‘‘করণভূতেনা’’তি ইমিনা ‘‘কত্তুভূতেনা’’তি অত্থং পটিক্খিপতি। তত্থ তত্থাতি তস্মিং তস্মিং খন্ধকে।
‘‘Laddhi’’nti iminā idamappahāyāti ettha idaṃsaddassa visayaṃ dasseti. ‘‘Avijahitvā’’ti iminā hādhātu tvāpaccayoti dasseti. Suddhaṃ brahmacārinti ettha sabbathā kilesasuddho khīṇāsavova gahetabboti āha ‘‘khīṇāsavaṃ bhikkhu’’nti. ‘‘Pātabyabhāva’’nti iminā pātabyatanti ettha tāpaccayo bhāvatthe hotīti dasseti. ‘‘Paṭisevana’’nti iminā pātabyasaddo yathākāmaparibhuñjanatthoti dasseti . Gativisodhananti duggatito sugatiyā visujjhanaṃ . ‘‘Akusalāni ceva mūlāni cā’’ti iminā akusalasaddassa ca mūlasaddassa ca tulyādhikaraṇabhāvaṃ dasseti. Tasmā akusalasaṅkhātāni mūlāni akusalamūlānīti tulyādhikaraṇasamāso kātabbo. Duccaritānīti ettha dusaddassa duṭṭhuvirūpatthabhāvaṃ dassento āha ‘‘duṭṭhu caritāni, virūpāni vā caritānī’’ti. Virūpānīti vikārasabhāvāni. ‘‘Karaṇabhūtenā’’ti iminā ‘‘kattubhūtenā’’ti atthaṃ paṭikkhipati. Tattha tatthāti tasmiṃ tasmiṃ khandhake.
ইতি তিকৰারৰণ্ণনায যোজনা সমত্তা।
Iti tikavāravaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৩. তিকৰারো • 3. Tikavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / তিকৰারৰণ্ণনা • Tikavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / তিকৰারৰণ্ণনা • Tikavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / তিকৰারৰণ্ণনা • Tikavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / তিকৰারৰণ্ণনা • Tikavāravaṇṇanā
