| Library / Tipiṭaka / ਤਿਪਿਟਕ • Tipiṭaka / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi |
ਏਕੁਤ੍ਤਰਿਕਨਯੋ ਤਿਕવਾਰવਣ੍ਣਨਾ
Ekuttarikanayo tikavāravaṇṇanā
੩੨੩. ਤਿਕੇਸੁ ਭਗવਤਿ ਤਿਟ੍ਠਨ੍ਤੇ ਯਂ ਆਪਤ੍ਤਿਂ ਆਪਜ੍ਜਤਿ, ਸਾ ਆਪਤ੍ਤਿ ਅਤ੍ਥੀਤਿ ਯੋਜਨਾ। ਸਬ੍ਬਤ੍ਥਾਤਿ ਸਬ੍ਬੇਸੁ ਪਦੇਸੁ। વਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ। ਤਤ੍ਥ ਤਤ੍ਥਾਤਿ ਤਿਕੇਸੁ, વਿਤ੍ਥਾਰੋ ਏવਂ વੇਦਿਤਬ੍ਬੋਤਿ ਯੋਜਨਾ। ਲੋਹਿਤੁਪ੍ਪਾਦਾਪਤ੍ਤੀਤਿ ਅਨੁਲੋਮਪਾਰਾਜਿਕਾਪਤ੍ਤਿ। ‘‘ਆવੁਸੋવਾਦੇਨਾ’’ਤਿ ‘‘ਆવੁਸੋ’’ਤਿ વੋਹਾਰੇਨ। વੋਤਿ ਤੁਮ੍ਹੇਹਿ।
323. Tikesu bhagavati tiṭṭhante yaṃ āpattiṃ āpajjati, sā āpatti atthīti yojanā. Sabbatthāti sabbesu padesu. Vitthāraṃ dassento āha ‘‘tatthā’’tiādi. Tattha tatthāti tikesu, vitthāro evaṃ veditabboti yojanā. Lohituppādāpattīti anulomapārājikāpatti. ‘‘Āvusovādenā’’ti ‘‘āvuso’’ti vohārena. Voti tumhehi.
ਕਾਲੇਤਿ ਪੁਰੇਭਤ੍ਤਕਾਲੇ। વਿਕਾਲੇਤਿ ਪਚ੍ਛਾਭਤ੍ਤਕਾਲੇ। ਅવਸੇਸਂ ਆਪਤ੍ਤਿਨ੍ਤਿ ਸਮ੍ਬਨ੍ਧੋ। ਦਸવਸ੍ਸੋਮ੍ਹੀਤਿ ਅਹਂ ਦਸવਸ੍ਸੋ ਅਮ੍ਹਿ। ਨવੋਤਿ ਪਞ੍ਚવਸ੍ਸਅਪਰਿਪੁਣ੍ਣੋ। ਮਜ੍ਝਿਮੋਤਿ ਪਞ੍ਚવਸ੍ਸਤੋ ਪਟ੍ਠਾਯ ਯਾવ ਦਸવਸ੍ਸਅਪਰਿਪੁਣ੍ਣੋ। ਕੁਸਲਚਿਤ੍ਤੋ ਆਪਜ੍ਜਤੀਤਿ ਕੁਸਲਚਿਤ੍ਤੋ ਹੁਤ੍વਾ ਆਪਜ੍ਜਤਿ। ਅਬ੍ਯਾਕਤਚਿਤ੍ਤੋਤਿ ਸੁਪਨ੍ਤਸ੍ਸ ਭવਙ੍ਗਚਿਤ੍ਤਂ ਸਨ੍ਧਾਯ વੁਤ੍ਤਂ। ਯਨ੍ਤਿ ਆਪਤ੍ਤਿਂ। ਸਬ੍ਬਨ੍ਤਿ ਆਪਤ੍ਤਿਂ, ਆਪਜ੍ਜਤੀਤਿ ਸਮ੍ਬਨ੍ਧੋ। ਦੁਕ੍ਖવੇਦਨਾਸਮਙ੍ਗੀ ਹੁਤ੍વਾ ਆਪਜ੍ਜਤੀਤਿ ਯੋਜਨਾ। ਯਨ੍ਤਿ ਆਪਤ੍ਤਿਂ।
Kāleti purebhattakāle. Vikāleti pacchābhattakāle. Avasesaṃ āpattinti sambandho. Dasavassomhīti ahaṃ dasavasso amhi. Navoti pañcavassaaparipuṇṇo. Majjhimoti pañcavassato paṭṭhāya yāva dasavassaaparipuṇṇo. Kusalacitto āpajjatīti kusalacitto hutvā āpajjati. Abyākatacittoti supantassa bhavaṅgacittaṃ sandhāya vuttaṃ. Yanti āpattiṃ. Sabbanti āpattiṃ, āpajjatīti sambandho. Dukkhavedanāsamaṅgī hutvā āpajjatīti yojanā. Yanti āpattiṃ.
ਤਯੋ ਪਟਿਕ੍ਖੇਪਾਤਿ ਏਤ੍ਥ ਪਟਿਕ੍ਖੇਪਸ੍ਸ ਸਾਮਿਕਂ ਦਸ੍ਸੇਨ੍ਤੋ ਆਹ ‘‘ਬੁਦ੍ਧਸ੍ਸ ਭਗવਤੋ’’ਤਿ। ਕਿਲੇਸਸਲ੍ਲੇਖਨਕਪਟਿਪਤ੍ਤਿਯਾਤਿ ਕਿਲੇਸਂ ਸਲ੍ਲਿਖਤਿ ਤਨੁਂ ਕਰੋਤੀਤਿ ਕਿਲੇਸਸਲ੍ਲੇਖਨਕਾ, ਸਾਯੇવ ਪਟਿਪਤ੍ਤਿ ਕਿਲੇਸਸਲ੍ਲੇਖਨਕਪਟਿਪਤ੍ਤਿ, ਤਾਯ।
Tayo paṭikkhepāti ettha paṭikkhepassa sāmikaṃ dassento āha ‘‘buddhassa bhagavato’’ti. Kilesasallekhanakapaṭipattiyāti kilesaṃ sallikhati tanuṃ karotīti kilesasallekhanakā, sāyeva paṭipatti kilesasallekhanakapaṭipatti, tāya.
ਪਰਿਸਂ ਉਪਟ੍ਠਾਪੇਨ੍ਤੋ ਬਾਲੋਤਿ ਸਮ੍ਬਨ੍ਧੋ। ਪਰਿਸਂ ਉਪਟ੍ਠਾਪੇਨ੍ਤੋ ਪਣ੍ਡਿਤੋ ਚਾਤਿ ਸਮ੍ਬਨ੍ਧੋ। ਅવਸੇਸਂ ਆਪਤ੍ਤਿਨ੍ਤਿ ਯੋਜਨਾ। ਕਾਲ਼ੇਤਿ ਕਾਲ਼ਪਕ੍ਖੇ। ਜੁਣ੍ਹੇਤਿ ਜੁਣ੍ਹਪਕ੍ਖੇ।
Parisaṃ upaṭṭhāpento bāloti sambandho. Parisaṃ upaṭṭhāpento paṇḍito cāti sambandho. Avasesaṃ āpattinti yojanā. Kāḷeti kāḷapakkhe. Juṇheti juṇhapakkhe.
ਕਤ੍ਤਿਕਪੁਣ੍ਣਮਾਸਿਯਾਤਿ ਪਚ੍ਛਿਮਕਤ੍ਤਿਕਪੁਣ੍ਣਮਾਸਿਯਾ। ਕੁਰੁਨ੍ਦਿਯਂ વੁਤ੍ਤਨ੍ਤਿ ਸਮ੍ਬਨ੍ਧੋ। ਸੁવੁਤ੍ਤਕਾਰਣਂ ਦਸ੍ਸੇਨ੍ਤੋ ਆਹ ‘‘ਚਾਤੁਮਾਸ’’ਨ੍ਤਿਆਦਿ। ਹੀਤਿ ਯਸ੍ਮਾ, ਪਰਿਯੇਸਨ੍ਤੋ ਚ ਨਿવਾਸੇਨ੍ਤੋ ਚ ਭਿਕ੍ਖੂਤਿ ਯੋਜਨਾ।
Kattikapuṇṇamāsiyāti pacchimakattikapuṇṇamāsiyā. Kurundiyaṃ vuttanti sambandho. Suvuttakāraṇaṃ dassento āha ‘‘cātumāsa’’ntiādi. Hīti yasmā, pariyesanto ca nivāsento ca bhikkhūti yojanā.
વਤ੍ਥੁਨ੍ਤਿ ਮੇਥੁਨਧਮ੍ਮਾਦਿવਤ੍ਥੁਂ।
Vatthunti methunadhammādivatthuṃ.
ਪਟਿਚ੍ਛਾਦੇਤਿ ਏਤਾਯਾਤਿ ਪਟਿਚ੍ਛਾਦੀਤਿ ਕਰਣਤ੍ਥੋਪਿ ਯੁਜ੍ਜਤਿ। વਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਦ੍વਾਰਂ ਪਿਦਹਿਤ੍વਾ’’ਤਿਆਦਿ। ਏਤਦੇવਾਤਿ ਪਰਿਕਮ੍ਮਮੇવ। ਉਭਯਤ੍ਥਾਤਿ ਉਭਯੇਸੁ ਜਨ੍ਤਾਘਰਪਟਿਚ੍ਛਾਦਿਉਦਕਪਟਿਚ੍ਛਾਦੀਸੁ। ਸਬ੍ਬਨ੍ਤਿ ਅਖਿਲਂ ਪਰਿਕਮ੍ਮਾਦਿਂ। ਨਿਯ੍ਯਨ੍ਤੀਤਿ ਨਿਲੀਯਿਤ੍વਾ ਯਨ੍ਤਿ। ਇਮਿਨਾ વਹਨ੍ਤੀਤਿ ਏਤ੍ਥ વਹਧਾਤੁ ਗਤ੍ਯਤ੍ਥੋਤਿ ਦਸ੍ਸੇਤਿ। ਅਬ੍ਭਮਹਿਕਾਧੂਮਰਜਰਾਹੁવਿਮੁਤ੍ਤਨ੍ਤਿ ਅਬ੍ਭੇਨ ਚ ਮਹਿਕਾਯ ਚ ਧੂਮੇਨ ਚ ਰਜੇਨ ਚ ਰਾਹੁਨਾ ਚ વਿਮੁਤ੍ਤਂ। ਤੇਸੂਤਿ ਅਬ੍ਭਾਦੀਸੁ। ਤਥਾਤਿ ਯਥਾ ਚਨ੍ਦਮਣ੍ਡਲਂ વਿਰੋਚਤਿ, ਤਥਾ ਸੂਰਿਯਮਣ੍ਡਲਂ।
Paṭicchādeti etāyāti paṭicchādīti karaṇatthopi yujjati. Vitthāraṃ dassento āha ‘‘dvāraṃ pidahitvā’’tiādi. Etadevāti parikammameva. Ubhayatthāti ubhayesu jantāgharapaṭicchādiudakapaṭicchādīsu. Sabbanti akhilaṃ parikammādiṃ. Niyyantīti nilīyitvā yanti. Iminā vahantīti ettha vahadhātu gatyatthoti dasseti. Abbhamahikādhūmarajarāhuvimuttanti abbhena ca mahikāya ca dhūmena ca rajena ca rāhunā ca vimuttaṃ. Tesūti abbhādīsu. Tathāti yathā candamaṇḍalaṃ virocati, tathā sūriyamaṇḍalaṃ.
ਕਰਣੀਯੇਨ ਹੁਤ੍વਾਤਿ ਸਮ੍ਬਨ੍ਧੋ।
Karaṇīyena hutvāti sambandho.
ਕਪ੍ਪੇਨ੍ਤੋਤਿ ਕਰੋਨ੍ਤੋ। ਆਗਨ੍ਤੁਕੋ ਆਪਜ੍ਜਤੀਤਿ ਸਮ੍ਬਨ੍ਧੋ। ਅਨਜ੍ਝਿਟ੍ਠੋਤਿ ਅਨਜ੍ਝੇਸਿਤੋ ਹੁਤ੍વਾਤਿ ਸਮ੍ਬਨ੍ਧੋ। ਤਿਣવਤ੍ਥਾਰਕਸਮਥੇ ਕਾਯੇਨ વੁਟ੍ਠਾਤਿ ਕਾਯਸਾਮਗ੍ਗਿਯਾ ਦਾਨਤ੍ਤਾ।
Kappentoti karonto. Āgantuko āpajjatīti sambandho. Anajjhiṭṭhoti anajjhesito hutvāti sambandho. Tiṇavatthārakasamathe kāyena vuṭṭhāti kāyasāmaggiyā dānattā.
ਆਗਾਲ਼੍ਹਾਯ ਚੇਤੇਯ੍ਯਾਤਿ ਆਗਾਲ਼੍ਹਸਦ੍ਦੋ ਦਲ਼੍ਹਪਰਿਯਾਯੋਤਿ ਆਹ ‘‘ਦਲ਼੍ਹਭਾવਾਯਾ’’ਤਿ। ਆ ਭੁਸੋ ਗਾਹਿਯਤੇ ਆਗਾਲ਼੍ਹੋ, ਗਾਲ਼੍ਹੋ ਬਾਲ਼੍ਹੋ ਦਲ਼੍ਹੋਤਿ ਅਤ੍ਥਤੋ ਏਕਂ। ਚੇਤੇਯ੍ਯਾਤਿ ਪਕਪ੍ਪੇਯ੍ਯ। ਨ ਪੂਰਯਤੋਤਿ ਨ ਪੂਰਯਨ੍ਤਸ੍ਸ। ਅਲਜ੍ਜੀ ਚ ਹੋਤਿ ਬਾਲੋ ਚ ਅਪਕਤਤ੍ਤੋ ਚਾਤਿ ਏਤ੍ਥ ਬਾਲਮਤ੍ਤਅਪਕਤਤ੍ਤਮਤ੍ਤੇਨ ਕਮ੍ਮਂ ਨ ਕਾਤਬ੍ਬਂ, ਆਪਤ੍ਤਿવਸੇਨੇવ ਪਨ ਕਾਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਬਾਲੋ’’ਤਿਆਦਿ। ਤਤ੍ਥ ਬਾਲੋ ਨ ਜਾਨਾਤੀਤਿ ਸਮ੍ਬਨ੍ਧੋ। ਅਯਨ੍ਤਿ ਬਾਲੋ। ਏਤ੍ਤਾવਤਾਤਿ ਏਤ੍ਤਕੇਨ ਅਜਾਨਨਮਤ੍ਤੇਨ। ਬਾਲਭਾવਮੂਲਕਂ ਆਪਤ੍ਤਿਨ੍ਤਿ ਸਮ੍ਬਨ੍ਧੋ। ਦ੍વੇ ਆਪਤ੍ਤਿਕ੍ਖਨ੍ਧੇਤਿ ਪਾਰਾਜਿਕਸਙ੍ਘਾਦਿਸੇਸવਸੇਨ ਦ੍વੇ ਆਪਤ੍ਤਿਰਾਸਯੋ। ਤੇਸਨ੍ਤਿ ਤਿਣ੍ਣਂ ਪੁਗ੍ਗਲਾਨਂ, ਕਾਤਬ੍ਬਨ੍ਤਿ ਸਮ੍ਬਨ੍ਧੋ।
Āgāḷhāya ceteyyāti āgāḷhasaddo daḷhapariyāyoti āha ‘‘daḷhabhāvāyā’’ti. Ā bhuso gāhiyate āgāḷho, gāḷho bāḷho daḷhoti atthato ekaṃ. Ceteyyāti pakappeyya. Na pūrayatoti na pūrayantassa. Alajjī ca hoti bālo ca apakatatto cāti ettha bālamattaapakatattamattena kammaṃ na kātabbaṃ, āpattivaseneva pana kātabbanti dassento āha ‘‘bālo’’tiādi. Tattha bālo na jānātīti sambandho. Ayanti bālo. Ettāvatāti ettakena ajānanamattena. Bālabhāvamūlakaṃ āpattinti sambandho. Dve āpattikkhandheti pārājikasaṅghādisesavasena dve āpattirāsayo. Tesanti tiṇṇaṃ puggalānaṃ, kātabbanti sambandho.
ਕਾਯਿਕੋ ਦવੋ ਨਾਮਾਤਿ ਕਾਯਿਕੋ ਪਰਿਹਾਸੋ ਨਾਮ। ਮੁਖਾਲਮ੍ਬਰਕਰਣਾਦਿਭੇਦੋਤਿ ਮੁਖੇਨ ਆਲਮ੍ਬਰਨਾਮਕਤੂਰਿਯਕਿਚ੍ਚਸ੍ਸ ਕਰਣਾਦਿਭੇਦੋ । ਦ੍વੀਹਿਪਿ ਦ੍વਾਰੇਹੀਤਿ ਕਾਯવਚੀવਸੇਨ ਦ੍વੀਹਿਪਿ ਦ੍વਾਰੇਹਿ। ਕਾਯਦ੍વਾਰੇ ਪਞ੍ਞਤ੍ਤਸਿਕ੍ਖਾਪਦવੀਤਿਕ੍ਕਮੋਤਿ ਕਾਯਦ੍વਾਰੇ ਪਞ੍ਞਤ੍ਤਸ੍ਸ ਕਾਯਸਂਸਗ੍ਗਾਦਿਸਿਕ੍ਖਾਪਦਸ੍ਸ વੀਤਿਕ੍ਕਮੋ। વਚੀਦ੍વਾਰੇ ਪਞ੍ਞਤ੍ਤਸਿਕ੍ਖਾਪਦવੀਤਿਕ੍ਕਮੋਤਿ વਚੀਦ੍વਾਰੇ ਪਞ੍ਞਤ੍ਤਸ੍ਸ ਦੁਟ੍ਠੁਲ੍ਲવਾਚਾਦਿਸਿਕ੍ਖਾਪਦਸ੍ਸ વੀਤਿਕ੍ਕਮੋ। ਕਾਯਿਕੇਨ ਉਪਘਾਤਿਕੇਨਾਤਿ ਏਤ੍ਥ ਉਪਘਾਤਿਕਂ ਨਾਮ ਅਸਿਕ੍ਖਨਨ੍ਤਿ ਆਹ ‘‘ਅਸਿਕ੍ਖਨੇਨਾ’’ਤਿ। ਕਸ੍ਮਾ ਅਸਿਕ੍ਖਨਂ ਉਪਘਾਤਂ ਨਾਮਾਤਿ ਆਹ ‘‘ਯੋ ਹੀ’’ਤਿਆਦਿ। ਤਤ੍ਥ ਯੋਤਿ ਪੁਗ੍ਗਲੋ। ਤਨ੍ਤਿ ਕਾਯਦ੍વਾਰੇ ਪਞ੍ਞਤ੍ਤਸਿਕ੍ਖਾਪਦਂ। ਨਨ੍ਤਿ ਏવਮੇવ। ਹਿ ਯਸ੍ਮਾ ਉਪਘਾਤੇਤੀਤਿ ਸਮ੍ਬਨ੍ਧੋ। વੇਜ੍ਜਕਮ੍ਮੇਨ ਸਮਨ੍ਨਾਗਤੋਤਿ ਸਮ੍ਬਨ੍ਧੋ। ਸਾਸਨਉਗ੍ਗਹਣਆਰੋਚਨਾਦਿਨਾ વਾਚਸਿਕੇਨ ਮਿਚ੍ਛਾਜੀવੇਨਾਤਿ ਯੋਜਨਾ।
Kāyiko davo nāmāti kāyiko parihāso nāma. Mukhālambarakaraṇādibhedoti mukhena ālambaranāmakatūriyakiccassa karaṇādibhedo . Dvīhipi dvārehīti kāyavacīvasena dvīhipi dvārehi. Kāyadvāre paññattasikkhāpadavītikkamoti kāyadvāre paññattassa kāyasaṃsaggādisikkhāpadassa vītikkamo. Vacīdvāre paññattasikkhāpadavītikkamoti vacīdvāre paññattassa duṭṭhullavācādisikkhāpadassa vītikkamo. Kāyikena upaghātikenāti ettha upaghātikaṃ nāma asikkhananti āha ‘‘asikkhanenā’’ti. Kasmā asikkhanaṃ upaghātaṃ nāmāti āha ‘‘yo hī’’tiādi. Tattha yoti puggalo. Tanti kāyadvāre paññattasikkhāpadaṃ. Nanti evameva. Hi yasmā upaghātetīti sambandho. Vejjakammena samannāgatoti sambandho. Sāsanauggahaṇaārocanādinā vācasikena micchājīvenāti yojanā.
‘‘ਮਾ ਭਣ੍ਡਨਂ ਕਰੀ’’ਤਿ ਇਮਿਨਾ ‘‘ਮਾ’’ਤਿ ਪਟਿਸੇਧਸ੍ਸ ‘‘ਕਰੀ’’ਤਿ ਪਾਠਸੇਸੇਨ ਸਮ੍ਬਨ੍ਧਿਤਬ੍ਬਭਾવਂ ਦਸ੍ਸੇਤਿ। ਨ વੋਹਰਿਤਬ੍ਬਨ੍ਤਿ ਏਤ੍ਥ વਿਪੁਬ੍ਬਅવਪੁਬ੍ਬ-ਹਰਧਾਤੁ ਕਥਨਤ੍ਥੋਤਿ ਆਹ ‘‘ਨ ਕਿਞ੍ਚਿ વਤ੍ਤਬ੍ਬ’’ਨ੍ਤਿ। ਹੀਤਿ ਸਚ੍ਚਂ। ਬੀਜਨਗ੍ਗਾਹਾਦਿਕੇਤਿ ਆਦਿਸਦ੍ਦੇਨ ਧਮ੍ਮਜ੍ਝੇਸਨਾਦਿਂ ਸਙ੍ਗਣ੍ਹਾਤਿ। ਓਕਾਸਕਮ੍ਮਂ ਕਾਰੇਨ੍ਤਸ੍ਸਾਤਿ ਏਤ੍ਥ ‘‘ਓਕਾਸ’’ਨ੍ਤਿ ਚ ‘‘ਓਕਾਸਕਮ੍ਮ’’ਨ੍ਤਿ ਚ ਸਦਿਸਨ੍ਤਿ ਆਹ ‘‘ਓਕਾਸਂ ਕਾਰੇਨ੍ਤਸ੍ਸਾ’’ਤਿ। ਨ ਆਦਾਤਬ੍ਬਨ੍ਤਿ ਨ ਗਣ੍ਹਿਤਬ੍ਬਂ। ਤਮੇવਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਤ੍ਥ ਗਹੇਤ੍વਾ’’ਤਿਆਦਿ।
‘‘Mā bhaṇḍanaṃ karī’’ti iminā ‘‘mā’’ti paṭisedhassa ‘‘karī’’ti pāṭhasesena sambandhitabbabhāvaṃ dasseti. Na voharitabbanti ettha vipubbaavapubba-haradhātu kathanatthoti āha ‘‘na kiñci vattabba’’nti. Hīti saccaṃ. Bījanaggāhādiketi ādisaddena dhammajjhesanādiṃ saṅgaṇhāti. Okāsakammaṃ kārentassāti ettha ‘‘okāsa’’nti ca ‘‘okāsakamma’’nti ca sadisanti āha ‘‘okāsaṃ kārentassā’’ti. Na ādātabbanti na gaṇhitabbaṃ. Tamevatthaṃ dassento āha ‘‘yattha gahetvā’’tiādi.
ਯਨ੍ਤਿ વਿਨਯਂ। ਸੋਤਿ ਭਿਕ੍ਖੁ। ਸੋਤਿ વਿਨਯੋ। ਤਸ੍ਸਾਤਿ ਭਿਕ੍ਖੁਸ੍ਸ। ਇਦਨ੍ਤਿ ਕਮ੍ਮਂ। ਅਞ੍ਞਂ ਪੁਚ੍ਛਾਤਿ ਮਯਾ ਅਞ੍ਞਂ ਭਿਕ੍ਖੁਂ ਪੁਚ੍ਛਾਹੀਤਿ ਯੋਜਨਾ। ਇਤੀਤਿ ਏવਂ। ਸੋਤਿ ਤੀਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ। ਅਸ੍ਸਾਤਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ। ਨ ਸਾਕਚ੍ਛਿਤਬ੍ਬੋਤਿ ਨ ਸਹ ਕਥੇਤਬ੍ਬੋ।
Yanti vinayaṃ. Soti bhikkhu. Soti vinayo. Tassāti bhikkhussa. Idanti kammaṃ. Aññaṃ pucchāti mayā aññaṃ bhikkhuṃ pucchāhīti yojanā. Itīti evaṃ. Soti tīhaṅgehi samannāgato bhikkhu. Assāti tīhaṅgehi samannāgatassa. Na sākacchitabboti na saha kathetabbo.
‘‘ਲਦ੍ਧਿ’’ਨ੍ਤਿ ਇਮਿਨਾ ਇਦਮਪ੍ਪਹਾਯਾਤਿ ਏਤ੍ਥ ਇਦਂਸਦ੍ਦਸ੍ਸ વਿਸਯਂ ਦਸ੍ਸੇਤਿ। ‘‘ਅવਿਜਹਿਤ੍વਾ’’ਤਿ ਇਮਿਨਾ ਹਾਧਾਤੁ ਤ੍વਾਪਚ੍ਚਯੋਤਿ ਦਸ੍ਸੇਤਿ। ਸੁਦ੍ਧਂ ਬ੍ਰਹ੍ਮਚਾਰਿਨ੍ਤਿ ਏਤ੍ਥ ਸਬ੍ਬਥਾ ਕਿਲੇਸਸੁਦ੍ਧੋ ਖੀਣਾਸવੋવ ਗਹੇਤਬ੍ਬੋਤਿ ਆਹ ‘‘ਖੀਣਾਸવਂ ਭਿਕ੍ਖੁ’’ਨ੍ਤਿ। ‘‘ਪਾਤਬ੍ਯਭਾવ’’ਨ੍ਤਿ ਇਮਿਨਾ ਪਾਤਬ੍ਯਤਨ੍ਤਿ ਏਤ੍ਥ ਤਾਪਚ੍ਚਯੋ ਭਾવਤ੍ਥੇ ਹੋਤੀਤਿ ਦਸ੍ਸੇਤਿ। ‘‘ਪਟਿਸੇવਨ’’ਨ੍ਤਿ ਇਮਿਨਾ ਪਾਤਬ੍ਯਸਦ੍ਦੋ ਯਥਾਕਾਮਪਰਿਭੁਞ੍ਜਨਤ੍ਥੋਤਿ ਦਸ੍ਸੇਤਿ । ਗਤਿવਿਸੋਧਨਨ੍ਤਿ ਦੁਗ੍ਗਤਿਤੋ ਸੁਗਤਿਯਾ વਿਸੁਜ੍ਝਨਂ । ‘‘ਅਕੁਸਲਾਨਿ ਚੇવ ਮੂਲਾਨਿ ਚਾ’’ਤਿ ਇਮਿਨਾ ਅਕੁਸਲਸਦ੍ਦਸ੍ਸ ਚ ਮੂਲਸਦ੍ਦਸ੍ਸ ਚ ਤੁਲ੍ਯਾਧਿਕਰਣਭਾવਂ ਦਸ੍ਸੇਤਿ। ਤਸ੍ਮਾ ਅਕੁਸਲਸਙ੍ਖਾਤਾਨਿ ਮੂਲਾਨਿ ਅਕੁਸਲਮੂਲਾਨੀਤਿ ਤੁਲ੍ਯਾਧਿਕਰਣਸਮਾਸੋ ਕਾਤਬ੍ਬੋ। ਦੁਚ੍ਚਰਿਤਾਨੀਤਿ ਏਤ੍ਥ ਦੁਸਦ੍ਦਸ੍ਸ ਦੁਟ੍ਠੁવਿਰੂਪਤ੍ਥਭਾવਂ ਦਸ੍ਸੇਨ੍ਤੋ ਆਹ ‘‘ਦੁਟ੍ਠੁ ਚਰਿਤਾਨਿ, વਿਰੂਪਾਨਿ વਾ ਚਰਿਤਾਨੀ’’ਤਿ। વਿਰੂਪਾਨੀਤਿ વਿਕਾਰਸਭਾવਾਨਿ। ‘‘ਕਰਣਭੂਤੇਨਾ’’ਤਿ ਇਮਿਨਾ ‘‘ਕਤ੍ਤੁਭੂਤੇਨਾ’’ਤਿ ਅਤ੍ਥਂ ਪਟਿਕ੍ਖਿਪਤਿ। ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਖਨ੍ਧਕੇ।
‘‘Laddhi’’nti iminā idamappahāyāti ettha idaṃsaddassa visayaṃ dasseti. ‘‘Avijahitvā’’ti iminā hādhātu tvāpaccayoti dasseti. Suddhaṃ brahmacārinti ettha sabbathā kilesasuddho khīṇāsavova gahetabboti āha ‘‘khīṇāsavaṃ bhikkhu’’nti. ‘‘Pātabyabhāva’’nti iminā pātabyatanti ettha tāpaccayo bhāvatthe hotīti dasseti. ‘‘Paṭisevana’’nti iminā pātabyasaddo yathākāmaparibhuñjanatthoti dasseti . Gativisodhananti duggatito sugatiyā visujjhanaṃ . ‘‘Akusalāni ceva mūlāni cā’’ti iminā akusalasaddassa ca mūlasaddassa ca tulyādhikaraṇabhāvaṃ dasseti. Tasmā akusalasaṅkhātāni mūlāni akusalamūlānīti tulyādhikaraṇasamāso kātabbo. Duccaritānīti ettha dusaddassa duṭṭhuvirūpatthabhāvaṃ dassento āha ‘‘duṭṭhu caritāni, virūpāni vā caritānī’’ti. Virūpānīti vikārasabhāvāni. ‘‘Karaṇabhūtenā’’ti iminā ‘‘kattubhūtenā’’ti atthaṃ paṭikkhipati. Tattha tatthāti tasmiṃ tasmiṃ khandhake.
ਇਤਿ ਤਿਕવਾਰવਣ੍ਣਨਾਯ ਯੋਜਨਾ ਸਮਤ੍ਤਾ।
Iti tikavāravaṇṇanāya yojanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਪਰਿવਾਰਪਾਲ਼ਿ • Parivārapāḷi / ੩. ਤਿਕવਾਰੋ • 3. Tikavāro
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਪਰਿવਾਰ-ਅਟ੍ਠਕਥਾ • Parivāra-aṭṭhakathā / ਤਿਕવਾਰવਣ੍ਣਨਾ • Tikavāravaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਤਿਕવਾਰવਣ੍ਣਨਾ • Tikavāravaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਤਿਕવਾਰવਣ੍ਣਨਾ • Tikavāravaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਤਿਕવਾਰવਣ੍ਣਨਾ • Tikavāravaṇṇanā
