| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
৭. এল়কলোমধোৰাপনসিক্খাপদং
7. Eḷakalomadhovāpanasikkhāpadaṃ
৫৭৬. তেন সমযেন বুদ্ধো ভগৰা সক্কেসু ৰিহরতি কপিলৰত্থুস্মিং নিগ্রোধারামে। তেন খো পন সমযেন ছব্বগ্গিযা ভিক্খূ ভিক্খুনীহি এল়কলোমানি ধোৰাপেন্তিপি রজাপেন্তিপি ৰিজটাপেন্তিপি। ভিক্খুনিযো এল়কলোমানি ধোৰন্তিযো রজন্তিযো ৰিজটেন্তিযো রিঞ্চন্তি উদ্দেসং পরিপুচ্ছং অধিসীলং অধিচিত্তং অধিপঞ্ঞং। অথ খো মহাপজাপতি গোতমী যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি। একমন্তং ঠিতং খো মহাপজাপতিং গোতমিং ভগৰা এতদৰোচ – ‘‘কচ্চি, গোতমি, ভিক্খুনিযো অপ্পমত্তা আতাপিনিযো পহিতত্তা ৰিহরন্তী’’তি? ‘‘কুতো, ভন্তে, ভিক্খুনীনং অপ্পমাদো! অয্যা ছব্বগ্গিযা ভিক্খুনীহি এল়কলোমানি ধোৰাপেন্তিপি রজাপেন্তিপি ৰিজটাপেন্তিপি। ভিক্খুনিযো এল়কলোমানি ধোৰন্তিযো রজন্তিযো ৰিজটেন্তিযো রিঞ্চন্তি উদ্দেসং পরিপুচ্ছং অধিসীলং অধিচিত্তং অধিপঞ্ঞ’’ন্তি।
576. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena chabbaggiyā bhikkhū bhikkhunīhi eḷakalomāni dhovāpentipi rajāpentipi vijaṭāpentipi. Bhikkhuniyo eḷakalomāni dhovantiyo rajantiyo vijaṭentiyo riñcanti uddesaṃ paripucchaṃ adhisīlaṃ adhicittaṃ adhipaññaṃ. Atha kho mahāpajāpati gotamī yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitaṃ kho mahāpajāpatiṃ gotamiṃ bhagavā etadavoca – ‘‘kacci, gotami, bhikkhuniyo appamattā ātāpiniyo pahitattā viharantī’’ti? ‘‘Kuto, bhante, bhikkhunīnaṃ appamādo! Ayyā chabbaggiyā bhikkhunīhi eḷakalomāni dhovāpentipi rajāpentipi vijaṭāpentipi. Bhikkhuniyo eḷakalomāni dhovantiyo rajantiyo vijaṭentiyo riñcanti uddesaṃ paripucchaṃ adhisīlaṃ adhicittaṃ adhipañña’’nti.
অথ খো ভগৰা মহাপজাপতিং গোতমিং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো মহাপজাপতি গোতমী ভগৰতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা ভগৰন্তং অভিৰাদেত্ৰা পদক্খিণং কত্ৰা পক্কামি। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ছব্বগ্গিযে ভিক্খূ পটিপুচ্ছি – ‘‘সচ্চং কির তুম্হে, ভিক্খৰে, ভিক্খুনীহি এল়কলোমানি ধোৰাপেথপি রজাপেথপি ৰিজটাপেথপী’’তি ? ‘‘সচ্চং, ভগৰা’’তি। ‘‘ঞাতিকাযো তুম্হাকং, ভিক্খৰে, অঞ্ঞাতিকাযো’’তি? ‘‘অঞ্ঞাতিকাযো, ভগৰা’’তি। ‘‘অঞ্ঞাতকা, মোঘপুরিসা, অঞ্ঞাতিকানং ন জানন্তি পতিরূপং ৰা অপ্পতিরূপং ৰা পাসাদিকং ৰা অপাসাদিকং। তত্থ নাম তুম্হে, মোঘপুরিসা, অঞ্ঞাতিকাহি ভিক্খুনীহি এল়কলোমানি ধোৰাপেস্সথপি রজাপেস্সথপি ৰিজটাপেস্সথপি! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Atha kho bhagavā mahāpajāpatiṃ gotamiṃ dhammiyā kathāya sandassesi samādapesi samuttejesi sampahaṃsesi. Atha kho mahāpajāpati gotamī bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā chabbaggiye bhikkhū paṭipucchi – ‘‘saccaṃ kira tumhe, bhikkhave, bhikkhunīhi eḷakalomāni dhovāpethapi rajāpethapi vijaṭāpethapī’’ti ? ‘‘Saccaṃ, bhagavā’’ti. ‘‘Ñātikāyo tumhākaṃ, bhikkhave, aññātikāyo’’ti? ‘‘Aññātikāyo, bhagavā’’ti. ‘‘Aññātakā, moghapurisā, aññātikānaṃ na jānanti patirūpaṃ vā appatirūpaṃ vā pāsādikaṃ vā apāsādikaṃ. Tattha nāma tumhe, moghapurisā, aññātikāhi bhikkhunīhi eḷakalomāni dhovāpessathapi rajāpessathapi vijaṭāpessathapi! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৫৭৭. ‘‘যো পন ভিক্খু অঞ্ঞাতিকায ভিক্খুনিযা এল়কলোমানি ধোৰাপেয্য ৰা রজাপেয্য ৰা ৰিজটাপেয্য ৰা, নিস্সগ্গিযং পাচিত্তিয’’ন্তি।
577.‘‘Yo pana bhikkhu aññātikāya bhikkhuniyā eḷakalomāni dhovāpeyya vā rajāpeyya vā vijaṭāpeyya vā, nissaggiyaṃ pācittiya’’nti.
৫৭৮. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
578.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
অঞ্ঞাতিকা নাম মাতিতো ৰা পিতিতো ৰা যাৰ সত্তমা পিতামহযুগা অসম্বদ্ধা।
Aññātikā nāma mātito vā pitito vā yāva sattamā pitāmahayugā asambaddhā.
ভিক্খুনী নাম উভতোসঙ্ঘে উপসম্পন্না।
Bhikkhunī nāma ubhatosaṅghe upasampannā.
ধোৰাতি আণাপেতি, আপত্তি দুক্কটস্স। ধোতানি নিস্সগ্গিযানি হোন্তি। রজাতি আণাপেতি, আপত্তি দুক্কটস্স। রত্তানি নিস্সগ্গিযানি হোন্তি। ৰিজটেহীতি আণাপেতি, আপত্তি দুক্কটস্স। ৰিজটিতানি নিস্সগ্গিযানি হোন্তি। নিস্সজ্জিতব্বানি সঙ্ঘস্স ৰা গণস্স ৰা পুগ্গলস্স ৰা। এৰঞ্চ পন, ভিক্খৰে, নিস্সজ্জিতব্বানি…পে॰… ইমানি মে, ভন্তে, এল়কলোমানি অঞ্ঞাতিকায ভিক্খুনিযা ধোৰাপিতানি নিস্সগ্গিযানি। ইমানাহং সঙ্ঘস্স নিস্সজ্জামীতি…পে॰… দদেয্যাতি…পে॰… দদেয্যুন্তি…পে॰… আযস্মতো দম্মীতি।
Dhovāti āṇāpeti, āpatti dukkaṭassa. Dhotāni nissaggiyāni honti. Rajāti āṇāpeti, āpatti dukkaṭassa. Rattāni nissaggiyāni honti. Vijaṭehīti āṇāpeti, āpatti dukkaṭassa. Vijaṭitāni nissaggiyāni honti. Nissajjitabbāni saṅghassa vā gaṇassa vā puggalassa vā. Evañca pana, bhikkhave, nissajjitabbāni…pe… imāni me, bhante, eḷakalomāni aññātikāya bhikkhuniyā dhovāpitāni nissaggiyāni. Imānāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
৫৭৯. অঞ্ঞাতিকায অঞ্ঞাতিকসঞ্ঞী এল়কলোমানি ধোৰাপেতি, নিস্সগ্গিযং পাচিত্তিযং। অঞ্ঞাতিকায অঞ্ঞাতিকসঞ্ঞী এল়কলোমানি ধোৰাপেতি রজাপেতি, নিস্সগ্গিযেন আপত্তি দুক্কটস্স। অঞ্ঞাতিকায অঞ্ঞাতিকসঞ্ঞী এল়কলোমানি ধোৰাপেতি ৰিজটাপেতি, নিস্সগ্গিযেন আপত্তি দুক্কটস্স। অঞ্ঞাতিকায অঞ্ঞাতিকসঞ্ঞী এল়কলোমানি ধোৰাপেতি রজাপেতি ৰিজটাপেতি, নিস্সগ্গিযেন আপত্তি দ্ৰিন্নং দুক্কটানং।
579. Aññātikāya aññātikasaññī eḷakalomāni dhovāpeti, nissaggiyaṃ pācittiyaṃ. Aññātikāya aññātikasaññī eḷakalomāni dhovāpeti rajāpeti, nissaggiyena āpatti dukkaṭassa. Aññātikāya aññātikasaññī eḷakalomāni dhovāpeti vijaṭāpeti, nissaggiyena āpatti dukkaṭassa. Aññātikāya aññātikasaññī eḷakalomāni dhovāpeti rajāpeti vijaṭāpeti, nissaggiyena āpatti dvinnaṃ dukkaṭānaṃ.
অঞ্ঞাতিকায অঞ্ঞাতিকসঞ্ঞী এল়কলোমানি রজাপেতি, নিস্সগ্গিযং পাচিত্তিযং। অঞ্ঞাতিকায অঞ্ঞাতিকসঞ্ঞী এল়কলোমানি রজাপেতি ৰিজটাপেতি, নিস্সগ্গিযেন আপত্তি দুক্কটস্স। অঞ্ঞাতিকায অঞ্ঞাতিকসঞ্ঞী এল়কলোমানি রজাপেতি ধোৰাপেতি, নিস্সগ্গিযেন আপত্তি দুক্কটস্স। অঞ্ঞাতিকায অঞ্ঞাতিকসঞ্ঞী এল়কলোমানি রজাপেতি ৰিজটাপেতি ধোৰাপেতি, নিস্সগ্গিযেন আপত্তি দ্ৰিন্নং দুক্কটানং।
Aññātikāya aññātikasaññī eḷakalomāni rajāpeti, nissaggiyaṃ pācittiyaṃ. Aññātikāya aññātikasaññī eḷakalomāni rajāpeti vijaṭāpeti, nissaggiyena āpatti dukkaṭassa. Aññātikāya aññātikasaññī eḷakalomāni rajāpeti dhovāpeti, nissaggiyena āpatti dukkaṭassa. Aññātikāya aññātikasaññī eḷakalomāni rajāpeti vijaṭāpeti dhovāpeti, nissaggiyena āpatti dvinnaṃ dukkaṭānaṃ.
অঞ্ঞাতিকায অঞ্ঞাতিকসঞ্ঞী এল়কলোমানি ৰিজটাপেতি, নিস্সগ্গিযং পাচিত্তিযং। অঞ্ঞাতিকায অঞ্ঞাতিকসঞ্ঞী এল়কলোমানি ৰিজটাপেতি ধোৰাপেতি, নিস্সগ্গিযেন আপত্তি দুক্কটস্স। অঞ্ঞাতিকায অঞ্ঞাতিকসঞ্ঞী এল়কলোমানি ৰিজটাপেতি রজাপেতি, নিস্সগ্গিযেন আপত্তি দুক্কটস্স । অঞ্ঞাতিকায অঞ্ঞাতিকসঞ্ঞী এল়কলোমানি ৰিজটাপেতি ধোৰাপেতি রজাপেতি, নিস্সগ্গিযেন আপত্তি দ্ৰিন্নং দুক্কটানং।
Aññātikāya aññātikasaññī eḷakalomāni vijaṭāpeti, nissaggiyaṃ pācittiyaṃ. Aññātikāya aññātikasaññī eḷakalomāni vijaṭāpeti dhovāpeti, nissaggiyena āpatti dukkaṭassa. Aññātikāya aññātikasaññī eḷakalomāni vijaṭāpeti rajāpeti, nissaggiyena āpatti dukkaṭassa . Aññātikāya aññātikasaññī eḷakalomāni vijaṭāpeti dhovāpeti rajāpeti, nissaggiyena āpatti dvinnaṃ dukkaṭānaṃ.
৫৮০. অঞ্ঞাতিকায ৰেমতিকো…পে॰… অঞ্ঞাতিকায ঞাতিকসঞ্ঞী…পে॰… অঞ্ঞস্স এল়কলোমানি ধোৰাপেতি, আপত্তি দুক্কটস্স। একতো উপসম্পন্নায ধোৰাপেতি, আপত্তি দুক্কটস্স। ঞাতিকায অঞ্ঞাতিকসঞ্ঞী, আপত্তি দুক্কটস্স। ঞাতিকায ৰেমতিকো, আপত্তি দুক্কটস্স। ঞাতিকায ঞাতিকসঞ্ঞী, অনাপত্তি।
580. Aññātikāya vematiko…pe… aññātikāya ñātikasaññī…pe… aññassa eḷakalomāni dhovāpeti, āpatti dukkaṭassa. Ekato upasampannāya dhovāpeti, āpatti dukkaṭassa. Ñātikāya aññātikasaññī, āpatti dukkaṭassa. Ñātikāya vematiko, āpatti dukkaṭassa. Ñātikāya ñātikasaññī, anāpatti.
৫৮১. অনাপত্তি ঞাতিকায ধাৰন্তিযা অঞ্ঞাতিকা দুতিযা হোতি, অৰুত্তা ধোৰতি, অপরিভুত্তং কতভণ্ডং ধোৰাপেতি, সিক্খমানায সামণেরিযা উম্মত্তকস্স আদিকম্মিকস্সাতি।
581. Anāpatti ñātikāya dhāvantiyā aññātikā dutiyā hoti, avuttā dhovati, aparibhuttaṃ katabhaṇḍaṃ dhovāpeti, sikkhamānāya sāmaṇeriyā ummattakassa ādikammikassāti.
এল়কলোমধোৰাপনসিক্খাপদং নিট্ঠিতং সত্তমং।
Eḷakalomadhovāpanasikkhāpadaṃ niṭṭhitaṃ sattamaṃ.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৭. এল়কলোমধোৰাপনসিক্খাপদৰণ্ণনা • 7. Eḷakalomadhovāpanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৬. এল়কলোমসিক্খাপদৰণ্ণনা • 6. Eḷakalomasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৭. এল়কলোমধোৰাপনসিক্খাপদৰণ্ণনা • 7. Eḷakalomadhovāpanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৭. এল়কলোমধোৰাপনসিক্খাপদৰণ্ণনা • 7. Eḷakalomadhovāpanasikkhāpadavaṇṇanā
