| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༧. ཨེལ༹ཀལོམདྷོཝཱཔནསིཀྑཱཔདཾ
7. Eḷakalomadhovāpanasikkhāpadaṃ
༥༧༦. ཏེན སམཡེན བུདྡྷོ བྷགཝཱ སཀྐེསུ ཝིཧརཏི ཀཔིལཝཏྠུསྨིཾ ནིགྲོདྷཱརཱམེ། ཏེན ཁོ པན སམཡེན ཚབྦགྒིཡཱ བྷིཀྑཱུ བྷིཀྑུནཱིཧི ཨེལ༹ཀལོམཱནི དྷོཝཱཔེནྟིཔི རཛཱཔེནྟིཔི ཝིཛཊཱཔེནྟིཔི། བྷིཀྑུནིཡོ ཨེལ༹ཀལོམཱནི དྷོཝནྟིཡོ རཛནྟིཡོ ཝིཛཊེནྟིཡོ རིཉྩནྟི ཨུདྡེསཾ པརིཔུཙྪཾ ཨདྷིསཱིལཾ ཨདྷིཙིཏྟཾ ཨདྷིཔཉྙཾ། ཨཐ ཁོ མཧཱཔཛཱཔཏི གོཏམཱི ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཋིཏཾ ཁོ མཧཱཔཛཱཔཏིཾ གོཏམིཾ བྷགཝཱ ཨེཏདཝོཙ – ‘‘ཀཙྩི, གོཏམི, བྷིཀྑུནིཡོ ཨཔྤམཏྟཱ ཨཱཏཱཔིནིཡོ པཧིཏཏྟཱ ཝིཧརནྟཱི’’ཏི? ‘‘ཀུཏོ, བྷནྟེ, བྷིཀྑུནཱིནཾ ཨཔྤམཱདོ! ཨཡྻཱ ཚབྦགྒིཡཱ བྷིཀྑུནཱིཧི ཨེལ༹ཀལོམཱནི དྷོཝཱཔེནྟིཔི རཛཱཔེནྟིཔི ཝིཛཊཱཔེནྟིཔི། བྷིཀྑུནིཡོ ཨེལ༹ཀལོམཱནི དྷོཝནྟིཡོ རཛནྟིཡོ ཝིཛཊེནྟིཡོ རིཉྩནྟི ཨུདྡེསཾ པརིཔུཙྪཾ ཨདྷིསཱིལཾ ཨདྷིཙིཏྟཾ ཨདྷིཔཉྙ’’ནྟི།
576. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena chabbaggiyā bhikkhū bhikkhunīhi eḷakalomāni dhovāpentipi rajāpentipi vijaṭāpentipi. Bhikkhuniyo eḷakalomāni dhovantiyo rajantiyo vijaṭentiyo riñcanti uddesaṃ paripucchaṃ adhisīlaṃ adhicittaṃ adhipaññaṃ. Atha kho mahāpajāpati gotamī yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitaṃ kho mahāpajāpatiṃ gotamiṃ bhagavā etadavoca – ‘‘kacci, gotami, bhikkhuniyo appamattā ātāpiniyo pahitattā viharantī’’ti? ‘‘Kuto, bhante, bhikkhunīnaṃ appamādo! Ayyā chabbaggiyā bhikkhunīhi eḷakalomāni dhovāpentipi rajāpentipi vijaṭāpentipi. Bhikkhuniyo eḷakalomāni dhovantiyo rajantiyo vijaṭentiyo riñcanti uddesaṃ paripucchaṃ adhisīlaṃ adhicittaṃ adhipañña’’nti.
ཨཐ ཁོ བྷགཝཱ མཧཱཔཛཱཔཏིཾ གོཏམིཾ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ མཧཱཔཛཱཔཏི གོཏམཱི བྷགཝཏཱ དྷམྨིཡཱ ཀཐཱཡ སནྡསྶིཏཱ སམཱདཔིཏཱ སམུཏྟེཛིཏཱ སམྤཧཾསིཏཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ བྷིཀྑུསངྒྷཾ སནྣིཔཱཏཱཔེཏྭཱ ཚབྦགྒིཡེ བྷིཀྑཱུ པཊིཔུཙྪི – ‘‘སཙྩཾ ཀིར ཏུམྷེ, བྷིཀྑཝེ, བྷིཀྑུནཱིཧི ཨེལ༹ཀལོམཱནི དྷོཝཱཔེཐཔི རཛཱཔེཐཔི ཝིཛཊཱཔེཐཔཱི’’ཏི ? ‘‘སཙྩཾ, བྷགཝཱ’’ཏི། ‘‘ཉཱཏིཀཱཡོ ཏུམྷཱཀཾ, བྷིཀྑཝེ, ཨཉྙཱཏིཀཱཡོ’’ཏི? ‘‘ཨཉྙཱཏིཀཱཡོ, བྷགཝཱ’’ཏི། ‘‘ཨཉྙཱཏཀཱ, མོགྷཔུརིསཱ, ཨཉྙཱཏིཀཱནཾ ན ཛཱནནྟི པཏིརཱུཔཾ ཝཱ ཨཔྤཏིརཱུཔཾ ཝཱ པཱསཱདིཀཾ ཝཱ ཨཔཱསཱདིཀཾ། ཏཏྠ ནཱམ ཏུམྷེ, མོགྷཔུརིསཱ, ཨཉྙཱཏིཀཱཧི བྷིཀྑུནཱིཧི ཨེལ༹ཀལོམཱནི དྷོཝཱཔེསྶཐཔི རཛཱཔེསྶཐཔི ཝིཛཊཱཔེསྶཐཔི! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Atha kho bhagavā mahāpajāpatiṃ gotamiṃ dhammiyā kathāya sandassesi samādapesi samuttejesi sampahaṃsesi. Atha kho mahāpajāpati gotamī bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā chabbaggiye bhikkhū paṭipucchi – ‘‘saccaṃ kira tumhe, bhikkhave, bhikkhunīhi eḷakalomāni dhovāpethapi rajāpethapi vijaṭāpethapī’’ti ? ‘‘Saccaṃ, bhagavā’’ti. ‘‘Ñātikāyo tumhākaṃ, bhikkhave, aññātikāyo’’ti? ‘‘Aññātikāyo, bhagavā’’ti. ‘‘Aññātakā, moghapurisā, aññātikānaṃ na jānanti patirūpaṃ vā appatirūpaṃ vā pāsādikaṃ vā apāsādikaṃ. Tattha nāma tumhe, moghapurisā, aññātikāhi bhikkhunīhi eḷakalomāni dhovāpessathapi rajāpessathapi vijaṭāpessathapi! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༥༧༧. ‘‘ཡོ པན བྷིཀྑུ ཨཉྙཱཏིཀཱཡ བྷིཀྑུནིཡཱ ཨེལ༹ཀལོམཱནི དྷོཝཱཔེཡྻ ཝཱ རཛཱཔེཡྻ ཝཱ ཝིཛཊཱཔེཡྻ ཝཱ, ནིསྶགྒིཡཾ པཱཙིཏྟིཡ’’ནྟི།
577.‘‘Yo pana bhikkhu aññātikāya bhikkhuniyā eḷakalomāni dhovāpeyya vā rajāpeyya vā vijaṭāpeyya vā, nissaggiyaṃ pācittiya’’nti.
༥༧༨. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
578.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ཨཉྙཱཏིཀཱ ནཱམ མཱཏིཏོ ཝཱ པིཏིཏོ ཝཱ ཡཱཝ སཏྟམཱ པིཏཱམཧཡུགཱ ཨསམྦདྡྷཱ།
Aññātikā nāma mātito vā pitito vā yāva sattamā pitāmahayugā asambaddhā.
བྷིཀྑུནཱི ནཱམ ཨུབྷཏོསངྒྷེ ཨུཔསམྤནྣཱ།
Bhikkhunī nāma ubhatosaṅghe upasampannā.
དྷོཝཱཏི ཨཱཎཱཔེཏི, ཨཱཔཏྟི དུཀྐཊསྶ། དྷོཏཱནི ནིསྶགྒིཡཱནི ཧོནྟི། རཛཱཏི ཨཱཎཱཔེཏི, ཨཱཔཏྟི དུཀྐཊསྶ། རཏྟཱནི ནིསྶགྒིཡཱནི ཧོནྟི། ཝིཛཊེཧཱིཏི ཨཱཎཱཔེཏི, ཨཱཔཏྟི དུཀྐཊསྶ། ཝིཛཊིཏཱནི ནིསྶགྒིཡཱནི ཧོནྟི། ནིསྶཛྫིཏབྦཱནི སངྒྷསྶ ཝཱ གཎསྶ ཝཱ པུགྒལསྶ ཝཱ། ཨེཝཉྩ པན, བྷིཀྑཝེ, ནིསྶཛྫིཏབྦཱནི…པེ॰… ཨིམཱནི མེ, བྷནྟེ, ཨེལ༹ཀལོམཱནི ཨཉྙཱཏིཀཱཡ བྷིཀྑུནིཡཱ དྷོཝཱཔིཏཱནི ནིསྶགྒིཡཱནི། ཨིམཱནཱཧཾ སངྒྷསྶ ནིསྶཛྫཱམཱིཏི…པེ॰… དདེཡྻཱཏི…པེ॰… དདེཡྻུནྟི…པེ॰… ཨཱཡསྨཏོ དམྨཱིཏི།
Dhovāti āṇāpeti, āpatti dukkaṭassa. Dhotāni nissaggiyāni honti. Rajāti āṇāpeti, āpatti dukkaṭassa. Rattāni nissaggiyāni honti. Vijaṭehīti āṇāpeti, āpatti dukkaṭassa. Vijaṭitāni nissaggiyāni honti. Nissajjitabbāni saṅghassa vā gaṇassa vā puggalassa vā. Evañca pana, bhikkhave, nissajjitabbāni…pe… imāni me, bhante, eḷakalomāni aññātikāya bhikkhuniyā dhovāpitāni nissaggiyāni. Imānāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
༥༧༩. ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི དྷོཝཱཔེཏི, ནིསྶགྒིཡཾ པཱཙིཏྟིཡཾ། ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི དྷོཝཱཔེཏི རཛཱཔེཏི, ནིསྶགྒིཡེན ཨཱཔཏྟི དུཀྐཊསྶ། ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི དྷོཝཱཔེཏི ཝིཛཊཱཔེཏི, ནིསྶགྒིཡེན ཨཱཔཏྟི དུཀྐཊསྶ། ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི དྷོཝཱཔེཏི རཛཱཔེཏི ཝིཛཊཱཔེཏི, ནིསྶགྒིཡེན ཨཱཔཏྟི དྭིནྣཾ དུཀྐཊཱནཾ།
579. Aññātikāya aññātikasaññī eḷakalomāni dhovāpeti, nissaggiyaṃ pācittiyaṃ. Aññātikāya aññātikasaññī eḷakalomāni dhovāpeti rajāpeti, nissaggiyena āpatti dukkaṭassa. Aññātikāya aññātikasaññī eḷakalomāni dhovāpeti vijaṭāpeti, nissaggiyena āpatti dukkaṭassa. Aññātikāya aññātikasaññī eḷakalomāni dhovāpeti rajāpeti vijaṭāpeti, nissaggiyena āpatti dvinnaṃ dukkaṭānaṃ.
ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི རཛཱཔེཏི, ནིསྶགྒིཡཾ པཱཙིཏྟིཡཾ། ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི རཛཱཔེཏི ཝིཛཊཱཔེཏི, ནིསྶགྒིཡེན ཨཱཔཏྟི དུཀྐཊསྶ། ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི རཛཱཔེཏི དྷོཝཱཔེཏི, ནིསྶགྒིཡེན ཨཱཔཏྟི དུཀྐཊསྶ། ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི རཛཱཔེཏི ཝིཛཊཱཔེཏི དྷོཝཱཔེཏི, ནིསྶགྒིཡེན ཨཱཔཏྟི དྭིནྣཾ དུཀྐཊཱནཾ།
Aññātikāya aññātikasaññī eḷakalomāni rajāpeti, nissaggiyaṃ pācittiyaṃ. Aññātikāya aññātikasaññī eḷakalomāni rajāpeti vijaṭāpeti, nissaggiyena āpatti dukkaṭassa. Aññātikāya aññātikasaññī eḷakalomāni rajāpeti dhovāpeti, nissaggiyena āpatti dukkaṭassa. Aññātikāya aññātikasaññī eḷakalomāni rajāpeti vijaṭāpeti dhovāpeti, nissaggiyena āpatti dvinnaṃ dukkaṭānaṃ.
ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི ཝིཛཊཱཔེཏི, ནིསྶགྒིཡཾ པཱཙིཏྟིཡཾ། ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི ཝིཛཊཱཔེཏི དྷོཝཱཔེཏི, ནིསྶགྒིཡེན ཨཱཔཏྟི དུཀྐཊསྶ། ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི ཝིཛཊཱཔེཏི རཛཱཔེཏི, ནིསྶགྒིཡེན ཨཱཔཏྟི དུཀྐཊསྶ ། ཨཉྙཱཏིཀཱཡ ཨཉྙཱཏིཀསཉྙཱི ཨེལ༹ཀལོམཱནི ཝིཛཊཱཔེཏི དྷོཝཱཔེཏི རཛཱཔེཏི, ནིསྶགྒིཡེན ཨཱཔཏྟི དྭིནྣཾ དུཀྐཊཱནཾ།
Aññātikāya aññātikasaññī eḷakalomāni vijaṭāpeti, nissaggiyaṃ pācittiyaṃ. Aññātikāya aññātikasaññī eḷakalomāni vijaṭāpeti dhovāpeti, nissaggiyena āpatti dukkaṭassa. Aññātikāya aññātikasaññī eḷakalomāni vijaṭāpeti rajāpeti, nissaggiyena āpatti dukkaṭassa . Aññātikāya aññātikasaññī eḷakalomāni vijaṭāpeti dhovāpeti rajāpeti, nissaggiyena āpatti dvinnaṃ dukkaṭānaṃ.
༥༨༠. ཨཉྙཱཏིཀཱཡ ཝེམཏིཀོ…པེ॰… ཨཉྙཱཏིཀཱཡ ཉཱཏིཀསཉྙཱི…པེ॰… ཨཉྙསྶ ཨེལ༹ཀལོམཱནི དྷོཝཱཔེཏི, ཨཱཔཏྟི དུཀྐཊསྶ། ཨེཀཏོ ཨུཔསམྤནྣཱཡ དྷོཝཱཔེཏི, ཨཱཔཏྟི དུཀྐཊསྶ། ཉཱཏིཀཱཡ ཨཉྙཱཏིཀསཉྙཱི, ཨཱཔཏྟི དུཀྐཊསྶ། ཉཱཏིཀཱཡ ཝེམཏིཀོ, ཨཱཔཏྟི དུཀྐཊསྶ། ཉཱཏིཀཱཡ ཉཱཏིཀསཉྙཱི, ཨནཱཔཏྟི།
580. Aññātikāya vematiko…pe… aññātikāya ñātikasaññī…pe… aññassa eḷakalomāni dhovāpeti, āpatti dukkaṭassa. Ekato upasampannāya dhovāpeti, āpatti dukkaṭassa. Ñātikāya aññātikasaññī, āpatti dukkaṭassa. Ñātikāya vematiko, āpatti dukkaṭassa. Ñātikāya ñātikasaññī, anāpatti.
༥༨༡. ཨནཱཔཏྟི ཉཱཏིཀཱཡ དྷཱཝནྟིཡཱ ཨཉྙཱཏིཀཱ དུཏིཡཱ ཧོཏི, ཨཝུཏྟཱ དྷོཝཏི, ཨཔརིབྷུཏྟཾ ཀཏབྷཎྜཾ དྷོཝཱཔེཏི, སིཀྑམཱནཱཡ སཱམཎེརིཡཱ ཨུམྨཏྟཀསྶ ཨཱདིཀམྨིཀསྶཱཏི།
581. Anāpatti ñātikāya dhāvantiyā aññātikā dutiyā hoti, avuttā dhovati, aparibhuttaṃ katabhaṇḍaṃ dhovāpeti, sikkhamānāya sāmaṇeriyā ummattakassa ādikammikassāti.
ཨེལ༹ཀལོམདྷོཝཱཔནསིཀྑཱཔདཾ ནིཊྛིཏཾ སཏྟམཾ།
Eḷakalomadhovāpanasikkhāpadaṃ niṭṭhitaṃ sattamaṃ.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༧. ཨེལ༹ཀལོམདྷོཝཱཔནསིཀྑཱཔདཝཎྞནཱ • 7. Eḷakalomadhovāpanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༦. ཨེལ༹ཀལོམསིཀྑཱཔདཝཎྞནཱ • 6. Eḷakalomasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༧. ཨེལ༹ཀལོམདྷོཝཱཔནསིཀྑཱཔདཝཎྞནཱ • 7. Eḷakalomadhovāpanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༧. ཨེལ༹ཀལོམདྷོཝཱཔནསིཀྑཱཔདཝཎྞནཱ • 7. Eḷakalomadhovāpanasikkhāpadavaṇṇanā
