| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
৬. এল়কলোমসিক্খাপদং
6. Eḷakalomasikkhāpadaṃ
৫৭১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরস্স ভিক্খুনো কোসলেসু জনপদে সাৰত্থিং গচ্ছন্তস্স অন্তরামগ্গে এল়কলোমানি উপ্পজ্জিংসু। অথ খো সো ভিক্খু তানি এল়কলোমানি উত্তরাসঙ্গেন ভণ্ডিকং বন্ধিত্ৰা অগমাসি। মনুস্সা তং ভিক্খুং পস্সিত্ৰা উপ্পণ্ডেসুং – ‘‘কিত্তকেন তে, ভন্তে, কীতানি? কিত্তকো উদযো ভৰিস্সতী’’তি? সো ভিক্খু তেহি মনুস্সেহি উপ্পণ্ডিযমানো মঙ্কু অহোসি। অথ খো সো ভিক্খু সাৰত্থিং গন্ত্ৰা তানি এল়কলোমানি ঠিতকোৰ আসুম্ভি। ভিক্খূ তং ভিক্খুং এতদৰোচুং – ‘‘কিস্স ত্ৰং, আৰুসো, ইমানি এল়কলোমানি ঠিতকোৰ আসুম্ভসী’’তি? ‘‘তথা হি পনাহং, আৰুসো, ইমেসং এল়কলোমানং কারণা মনুস্সেহি উপ্পণ্ডিতো’’তি। ‘‘কীৰ দূরতো পন ত্ৰং, আৰুসো, ইমানি এল়কলোমানি আহরী’’তি? ‘‘অতিরেকতিযোজনং, আৰুসো’’তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খু অতিরেকতিযোজনং এল়কলোমানি আহরিস্সতী’’তি! অথ খো তে ভিক্খূ তং ভিক্খুং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে॰… সচ্চং কির ত্ৰং, ভিক্খু, অতিরেকতিযোজনং এল়কলোমানি আহরীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, অতিরেকতিযোজনং এল়কলোমানি আহরিস্সসি! নেতং মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
571. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa bhikkhuno kosalesu janapade sāvatthiṃ gacchantassa antarāmagge eḷakalomāni uppajjiṃsu. Atha kho so bhikkhu tāni eḷakalomāni uttarāsaṅgena bhaṇḍikaṃ bandhitvā agamāsi. Manussā taṃ bhikkhuṃ passitvā uppaṇḍesuṃ – ‘‘kittakena te, bhante, kītāni? Kittako udayo bhavissatī’’ti? So bhikkhu tehi manussehi uppaṇḍiyamāno maṅku ahosi. Atha kho so bhikkhu sāvatthiṃ gantvā tāni eḷakalomāni ṭhitakova āsumbhi. Bhikkhū taṃ bhikkhuṃ etadavocuṃ – ‘‘kissa tvaṃ, āvuso, imāni eḷakalomāni ṭhitakova āsumbhasī’’ti? ‘‘Tathā hi panāhaṃ, āvuso, imesaṃ eḷakalomānaṃ kāraṇā manussehi uppaṇḍito’’ti. ‘‘Kīva dūrato pana tvaṃ, āvuso, imāni eḷakalomāni āharī’’ti? ‘‘Atirekatiyojanaṃ, āvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhu atirekatiyojanaṃ eḷakalomāni āharissatī’’ti! Atha kho te bhikkhū taṃ bhikkhuṃ anekapariyāyena vigarahitvā bhagavato etamatthaṃ ārocesuṃ…pe… saccaṃ kira tvaṃ, bhikkhu, atirekatiyojanaṃ eḷakalomāni āharīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, atirekatiyojanaṃ eḷakalomāni āharissasi! Netaṃ moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৫৭২. ‘‘ভিক্খুনো পনেৰ অদ্ধানমগ্গপ্পটিপন্নস্স এল়কলোমানি উপ্পজ্জয্যুং। আকঙ্খমানেন ভিক্খুনা পটিগ্গহেতব্বানি। পটিগ্গহেত্ৰা তিযোজনপরমং সহত্থা হরিতব্বানি 1, অসন্তে হারকে। ততো চে উত্তরি হরেয্য, অসন্তেপি হারকে, নিস্সগ্গিযং পাচিত্তিয’’ন্তি।
572.‘‘Bhikkhunopaneva addhānamaggappaṭipannassa eḷakalomāni uppajjayyuṃ. Ākaṅkhamānena bhikkhunā paṭiggahetabbāni. Paṭiggahetvā tiyojanaparamaṃ sahatthā haritabbāni 2, asante hārake. Tato ce uttari hareyya, asantepi hārake, nissaggiyaṃ pācittiya’’nti.
৫৭৩. ভিক্খুনো পনেৰ অদ্ধানমগ্গপ্পটিপন্নস্সাতি পন্থং গচ্ছন্তস্স।
573.Bhikkhunopaneva addhānamaggappaṭipannassāti panthaṃ gacchantassa.
এল়কলোমানি উপ্পজ্জেয্যুন্তি উপ্পজ্জেয্যুং সঙ্ঘতো ৰা গণতো ৰা ঞাতিতো ৰা মিত্ততো ৰা পংসুকূলং ৰা অত্তনো ৰা ধনেন।
Eḷakalomāni uppajjeyyunti uppajjeyyuṃ saṅghato vā gaṇato vā ñātito vā mittato vā paṃsukūlaṃ vā attano vā dhanena.
আকঙ্খমানেনাতি ইচ্ছমানেন পটিগ্গহেতব্বানি।
Ākaṅkhamānenāti icchamānena paṭiggahetabbāni.
পটিগ্গহেত্ৰা তিযোজনপরমং সহত্থা হরিতব্বানীতি তিযোজনপরমতা সহত্থা হরিতব্বানি।
Paṭiggahetvā tiyojanaparamaṃ sahatthā haritabbānīti tiyojanaparamatā sahatthā haritabbāni.
অসন্তে হারকেতি নাঞ্ঞো কোচি হারকো হোতি ইত্থী ৰা পুরিসো ৰা গহট্ঠো ৰা পব্বজিতো ৰা।
Asante hāraketi nāñño koci hārako hoti itthī vā puriso vā gahaṭṭho vā pabbajito vā.
ততো চে উত্তরি হরেয্য, অসন্তেপি হারকেতি পঠমং পাদং তিযোজনং অতিক্কামেতি, আপত্তি দুক্কটস্স। দুতিযং পাদং অতিক্কামেতি, নিস্সগ্গিযং পাচিত্তিযং 3। অন্তোতিযোজনে ঠিতো বহিতিযোজনং পাতেতি, নিস্সগ্গিযং পাচিত্তিযং 4। অঞ্ঞস্স যানে ৰা ভণ্ডে ৰা অজানন্তস্স পক্খিপিত্ৰা তিযোজনং অতিক্কামেতি, নিস্সগ্গিযানি হোন্তি। নিস্সজ্জিতব্বানি সঙ্ঘস্স ৰা গণস্স ৰা পুগ্গলস্স ৰা। এৰঞ্চ পন, ভিক্খৰে, নিস্সজ্জিতব্বানি…পে॰… ইমানি মে, ভন্তে, এল়কলোমানি তিযোজনং অতিক্কামিতানি নিস্সগ্গিযানি। ইমানাহং সঙ্ঘস্স নিস্সজ্জামীতি…পে॰… দদেয্যাতি…পে॰… দদেয্যুন্তি…পে॰… আযস্মতো দম্মীতি।
Tato ce uttari hareyya, asantepi hāraketi paṭhamaṃ pādaṃ tiyojanaṃ atikkāmeti, āpatti dukkaṭassa. Dutiyaṃ pādaṃ atikkāmeti, nissaggiyaṃ pācittiyaṃ 5. Antotiyojane ṭhito bahitiyojanaṃ pāteti, nissaggiyaṃ pācittiyaṃ 6. Aññassa yāne vā bhaṇḍe vā ajānantassa pakkhipitvā tiyojanaṃ atikkāmeti, nissaggiyāni honti. Nissajjitabbāni saṅghassa vā gaṇassa vā puggalassa vā. Evañca pana, bhikkhave, nissajjitabbāni…pe… imāni me, bhante, eḷakalomāni tiyojanaṃ atikkāmitāni nissaggiyāni. Imānāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
ঊনকতিযোজনে অতিরেকসঞ্ঞী, আপত্তি দুক্কটস্স। ঊনকতিযোজনে ৰেমতিকো, আপত্তি দুক্কটস্স। ঊনকতিযোজনে ঊনকসঞ্ঞী, অনাপত্তি।
Ūnakatiyojane atirekasaññī, āpatti dukkaṭassa. Ūnakatiyojane vematiko, āpatti dukkaṭassa. Ūnakatiyojane ūnakasaññī, anāpatti.
৫৭৫. অনাপত্তি তিযোজনং হরতি, ঊনকতিযোজনং হরতি, তিযোজনং হরতিপি, পচ্চাহরতিপি, তিযোজনং ৰাসাধিপ্পাযো গন্ত্ৰা ততো পরং হরতি, অচ্ছিন্নং পটিলভিত্ৰা হরতি, নিস্সট্ঠং পটিলভিত্ৰা হরতি, অঞ্ঞং হরাপেতি কতভণ্ডং, উম্মত্তকস্স, আদিকম্মিকস্সাতি।
575. Anāpatti tiyojanaṃ harati, ūnakatiyojanaṃ harati, tiyojanaṃ haratipi, paccāharatipi, tiyojanaṃ vāsādhippāyo gantvā tato paraṃ harati, acchinnaṃ paṭilabhitvā harati, nissaṭṭhaṃ paṭilabhitvā harati, aññaṃ harāpeti katabhaṇḍaṃ, ummattakassa, ādikammikassāti.
এল়কলোমসিক্খাপদং নিট্ঠিতং ছট্ঠং।
Eḷakalomasikkhāpadaṃ niṭṭhitaṃ chaṭṭhaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৬. এল়কলোমসিক্খাপদৰণ্ণনা • 6. Eḷakalomasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৬. এল়কলোমসিক্খাপদৰণ্ণনা • 6. Eḷakalomasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৬. এল়কলোমসিক্খাপদৰণ্ণনা • 6. Eḷakalomasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৬. এল়কলোমসিক্খাপদৰণ্ণনা • 6. Eḷakalomasikkhāpadavaṇṇanā
