| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
6. එළකලොමසික්‌ඛාපදං
6. Eḷakalomasikkhāpadaṃ
571. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන අඤ්‌ඤතරස්‌ස භික්‌ඛුනො කොසලෙසු ජනපදෙ සාවත්‌ථිං ගච්‌ඡන්‌තස්‌ස අන්‌තරාමග්‌ගෙ එළකලොමානි උප්‌පජ්‌ජිංසු. අථ ඛො සො භික්‌ඛු තානි එළකලොමානි උත්‌තරාසඞ්‌ගෙන භණ්‌ඩිකං බන්‌ධිත්‌වා අගමාසි. මනුස්‌සා තං භික්‌ඛුං පස්‌සිත්‌වා උප්‌පණ්‌ඩෙසුං – ‘‘කිත්‌තකෙන තෙ, භන්‌තෙ, කීතානි? කිත්‌තකො උදයො භවිස්‌සතී’’ති? සො භික්‌ඛු තෙහි මනුස්‌සෙහි උප්‌පණ්‌ඩියමානො මඞ්‌කු අහොසි. අථ ඛො සො භික්‌ඛු සාවත්‌ථිං ගන්‌ත්‌වා තානි එළකලොමානි ඨිතකොව ආසුම්‌භි. භික්‌ඛූ තං භික්‌ඛුං එතදවොචුං – ‘‘කිස්‌ස ත්‌වං, ආවුසො, ඉමානි එළකලොමානි ඨිතකොව ආසුම්‌භසී’’ති? ‘‘තථා හි පනාහං, ආවුසො, ඉමෙසං එළකලොමානං කාරණා මනුස්‌සෙහි උප්‌පණ්‌ඩිතො’’ති. ‘‘කීව දූරතො පන ත්‌වං, ආවුසො, ඉමානි එළකලොමානි ආහරී’’ති? ‘‘අතිරෙකතියොජනං, ආවුසො’’ති. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛු අතිරෙකතියොජනං එළකලොමානි ආහරිස්‌සතී’’ති! අථ ඛො තෙ භික්‌ඛූ තං භික්‌ඛුං අනෙකපරියායෙන විගරහිත්‌වා භගවතො එතමත්‌ථං ආරොචෙසුං…පෙ.… සච්‌චං කිර ත්‌වං, භික්‌ඛු, අතිරෙකතියොජනං එළකලොමානි ආහරීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම ත්‌වං, මොඝපුරිස, අතිරෙකතියොජනං එළකලොමානි ආහරිස්‌සසි! නෙතං මොඝපුරිස, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
571. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa bhikkhuno kosalesu janapade sāvatthiṃ gacchantassa antarāmagge eḷakalomāni uppajjiṃsu. Atha kho so bhikkhu tāni eḷakalomāni uttarāsaṅgena bhaṇḍikaṃ bandhitvā agamāsi. Manussā taṃ bhikkhuṃ passitvā uppaṇḍesuṃ – ‘‘kittakena te, bhante, kītāni? Kittako udayo bhavissatī’’ti? So bhikkhu tehi manussehi uppaṇḍiyamāno maṅku ahosi. Atha kho so bhikkhu sāvatthiṃ gantvā tāni eḷakalomāni ṭhitakova āsumbhi. Bhikkhū taṃ bhikkhuṃ etadavocuṃ – ‘‘kissa tvaṃ, āvuso, imāni eḷakalomāni ṭhitakova āsumbhasī’’ti? ‘‘Tathā hi panāhaṃ, āvuso, imesaṃ eḷakalomānaṃ kāraṇā manussehi uppaṇḍito’’ti. ‘‘Kīva dūrato pana tvaṃ, āvuso, imāni eḷakalomāni āharī’’ti? ‘‘Atirekatiyojanaṃ, āvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhu atirekatiyojanaṃ eḷakalomāni āharissatī’’ti! Atha kho te bhikkhū taṃ bhikkhuṃ anekapariyāyena vigarahitvā bhagavato etamatthaṃ ārocesuṃ…pe… saccaṃ kira tvaṃ, bhikkhu, atirekatiyojanaṃ eḷakalomāni āharīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, atirekatiyojanaṃ eḷakalomāni āharissasi! Netaṃ moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
572. ‘‘භික්‌ඛුනො පනෙව අද්‌ධානමග්‌ගප්‌පටිපන්‌නස්‌ස එළකලොමානි උප්‌පජ්‌ජය්‍යුං. ආකඞ්‌ඛමානෙන භික්‌ඛුනා පටිග්‌ගහෙතබ්‌බානි. පටිග්‌ගහෙත්‌වා තියොජනපරමං සහත්‌ථා හරිතබ්‌බානි 1, අසන්‌තෙ හාරකෙ. තතො චෙ උත්‌තරි හරෙය්‍ය, අසන්‌තෙපි හාරකෙ, නිස්‌සග්‌ගියං පාචිත්‌තිය’’න්‌ති.
572.‘‘Bhikkhunopaneva addhānamaggappaṭipannassa eḷakalomāni uppajjayyuṃ. Ākaṅkhamānena bhikkhunā paṭiggahetabbāni. Paṭiggahetvā tiyojanaparamaṃ sahatthā haritabbāni 2, asante hārake. Tato ce uttari hareyya, asantepi hārake, nissaggiyaṃ pācittiya’’nti.
573. භික්‌ඛුනො පනෙව අද්‌ධානමග්‌ගප්‌පටිපන්‌නස්‌සාති පන්‌ථං ගච්‌ඡන්‌තස්‌ස.
573.Bhikkhunopaneva addhānamaggappaṭipannassāti panthaṃ gacchantassa.
එළකලොමානි උප්‌පජ්‌ජෙය්‍යුන්‌ති උප්‌පජ්‌ජෙය්‍යුං සඞ්‌ඝතො වා ගණතො වා ඤාතිතො වා මිත්‌තතො වා පංසුකූලං වා අත්‌තනො වා ධනෙන.
Eḷakalomāni uppajjeyyunti uppajjeyyuṃ saṅghato vā gaṇato vā ñātito vā mittato vā paṃsukūlaṃ vā attano vā dhanena.
ආකඞ්‌ඛමානෙනාති ඉච්‌ඡමානෙන පටිග්‌ගහෙතබ්‌බානි.
Ākaṅkhamānenāti icchamānena paṭiggahetabbāni.
පටිග්‌ගහෙත්‌වා තියොජනපරමං සහත්‌ථා හරිතබ්‌බානීති තියොජනපරමතා සහත්‌ථා හරිතබ්‌බානි.
Paṭiggahetvā tiyojanaparamaṃ sahatthā haritabbānīti tiyojanaparamatā sahatthā haritabbāni.
අසන්‌තෙ හාරකෙති නාඤ්‌ඤො කොචි හාරකො හොති ඉත්‌ථී වා පුරිසො වා ගහට්‌ඨො වා පබ්‌බජිතො වා.
Asante hāraketi nāñño koci hārako hoti itthī vā puriso vā gahaṭṭho vā pabbajito vā.
තතො චෙ උත්‌තරි හරෙය්‍ය, අසන්‌තෙපි හාරකෙති පඨමං පාදං තියොජනං අතික්‌කාමෙති, ආපත්‌ති දුක්‌කටස්‌ස. දුතියං පාදං අතික්‌කාමෙති, නිස්‌සග්‌ගියං පාචිත්‌තියං 3. අන්‌තොතියොජනෙ ඨිතො බහිතියොජනං පාතෙති, නිස්‌සග්‌ගියං පාචිත්‌තියං 4. අඤ්‌ඤස්‌ස යානෙ වා භණ්‌ඩෙ වා අජානන්‌තස්‌ස පක්‌ඛිපිත්‌වා තියොජනං අතික්‌කාමෙති, නිස්‌සග්‌ගියානි හොන්‌ති. නිස්‌සජ්‌ජිතබ්‌බානි සඞ්‌ඝස්‌ස වා ගණස්‌ස වා පුග්‌ගලස්‌ස වා. එවඤ්‌ච පන, භික්‌ඛවෙ, නිස්‌සජ්‌ජිතබ්‌බානි…පෙ.… ඉමානි මෙ, භන්‌තෙ, එළකලොමානි තියොජනං අතික්‌කාමිතානි නිස්‌සග්‌ගියානි. ඉමානාහං සඞ්‌ඝස්‌ස නිස්‌සජ්‌ජාමීති…පෙ.… දදෙය්‍යාති…පෙ.… දදෙය්‍යුන්‌ති…පෙ.… ආයස්‌මතො දම්‌මීති.
Tato ce uttari hareyya, asantepi hāraketi paṭhamaṃ pādaṃ tiyojanaṃ atikkāmeti, āpatti dukkaṭassa. Dutiyaṃ pādaṃ atikkāmeti, nissaggiyaṃ pācittiyaṃ 5. Antotiyojane ṭhito bahitiyojanaṃ pāteti, nissaggiyaṃ pācittiyaṃ 6. Aññassa yāne vā bhaṇḍe vā ajānantassa pakkhipitvā tiyojanaṃ atikkāmeti, nissaggiyāni honti. Nissajjitabbāni saṅghassa vā gaṇassa vā puggalassa vā. Evañca pana, bhikkhave, nissajjitabbāni…pe… imāni me, bhante, eḷakalomāni tiyojanaṃ atikkāmitāni nissaggiyāni. Imānāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
ඌනකතියොජනෙ අතිරෙකසඤ්‌ඤී, ආපත්‌ති දුක්‌කටස්‌ස. ඌනකතියොජනෙ වෙමතිකො, ආපත්‌ති දුක්‌කටස්‌ස. ඌනකතියොජනෙ ඌනකසඤ්‌ඤී, අනාපත්‌ති.
Ūnakatiyojane atirekasaññī, āpatti dukkaṭassa. Ūnakatiyojane vematiko, āpatti dukkaṭassa. Ūnakatiyojane ūnakasaññī, anāpatti.
575. අනාපත්‌ති තියොජනං හරති, ඌනකතියොජනං හරති, තියොජනං හරතිපි, පච්‌චාහරතිපි, තියොජනං වාසාධිප්‌පායො ගන්‌ත්‌වා තතො පරං හරති, අච්‌ඡින්‌නං පටිලභිත්‌වා හරති, නිස්‌සට්‌ඨං පටිලභිත්‌වා හරති, අඤ්‌ඤං හරාපෙති කතභණ්‌ඩං, උම්‌මත්‌තකස්‌ස, ආදිකම්‌මිකස්‌සාති.
575. Anāpatti tiyojanaṃ harati, ūnakatiyojanaṃ harati, tiyojanaṃ haratipi, paccāharatipi, tiyojanaṃ vāsādhippāyo gantvā tato paraṃ harati, acchinnaṃ paṭilabhitvā harati, nissaṭṭhaṃ paṭilabhitvā harati, aññaṃ harāpeti katabhaṇḍaṃ, ummattakassa, ādikammikassāti.
එළකලොමසික්‌ඛාපදං නිට්‌ඨිතං ඡට්‌ඨං.
Eḷakalomasikkhāpadaṃ niṭṭhitaṃ chaṭṭhaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 6. එළකලොමසික්‌ඛාපදවණ්‌ණනා • 6. Eḷakalomasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 6. එළකලොමසික්‌ඛාපදවණ්‌ණනා • 6. Eḷakalomasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. එළකලොමසික්‌ඛාපදවණ්‌ණනා • 6. Eḷakalomasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 6. එළකලොමසික්‌ඛාපදවණ්‌ණනා • 6. Eḷakalomasikkhāpadavaṇṇanā
