| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
6. ஏளகலோமஸிக்கா²பத³வண்ணனா
6. Eḷakalomasikkhāpadavaṇṇanā
571. தேன ஸமயேனாதி ஏளகலோமஸிக்கா²பத³ங். தத்த² உப்பண்டே³ஸுந்தி ‘‘கித்தகேன, ப⁴ந்தே, கீதானீ’’திஆதீ³னி வத³ந்தா அவஹஸிங்ஸு. டி²தகோவ ஆஸும்பீ⁴தி யதா² மனுஸ்ஸா அரஞ்ஞதோ மஹந்தங் தா³ருபா⁴ரங் ஆனெத்வா கிலந்தா டி²தகாவ பாதெந்தி, ஏவங் பாதேஸீதி அத்தோ².
571.Tenasamayenāti eḷakalomasikkhāpadaṃ. Tattha uppaṇḍesunti ‘‘kittakena, bhante, kītānī’’tiādīni vadantā avahasiṃsu. Ṭhitakova āsumbhīti yathā manussā araññato mahantaṃ dārubhāraṃ ānetvā kilantā ṭhitakāva pātenti, evaṃ pātesīti attho.
572. ஸஹத்தா²தி ஸஹத்தே²ன, அத்தனா ஹரிதப்³பா³னீதி வுத்தங் ஹோதி. ப³ஹிதியோஜனங் பாதேதீதி தியோஜனதோ ப³ஹி பாதேதி. அனந்தராயேன பதனகே ஹத்த²தோ முத்தமத்தே லோமக³ணனாய நிஸ்ஸக்³கி³யபாசித்தியானி. ஸசே ப³ஹிதியோஜனே ருக்கே² வா த²ம்பே⁴ வா படிஹஞ்ஞித்வா புன அந்தோ பதந்தி, அனாபத்தி . பூ⁴மியங் பதித்வா ட²த்வா ட²த்வா வட்டமானா ஏளகலோமப⁴ண்டி³கா புன அந்தோ பவிஸதி, ஆபத்தியேவ. அந்தோ ட²த்வா ஹத்தே²ன வா பாதே³ன வா யட்டி²யா வா வட்டேதி ட²த்வா வா அட²த்வா வா வட்டமானா ப⁴ண்டி³கா க³ச்ச²து, ஆபத்தியேவ. ‘‘அஞ்ஞோ ஹரிஸ்ஸதீ’’தி ட²பேதி, தேன ஹரிதேபி ஆபத்தியேவ. ஸுத்³த⁴சித்தேன ட²பிதங் வாதோ வா அஞ்ஞோ வா அத்தனோ த⁴ம்மதாய ப³ஹி பாதேதி, ஆபத்தியேவ. ஸஉஸ்ஸாஹத்தா அசித்தகத்தா ச ஸிக்கா²பத³ஸ்ஸ. குருந்தி³யாதீ³ஸு பன ‘‘எத்த² அனாபத்தீ’’தி வுத்தா, ஸா அனாபத்தி பாளியா ந ஸமேதி. உப⁴தோப⁴ண்டி³கங் ஏகாப³த்³த⁴ங் கத்வா ஏகங் ப⁴ண்டி³கங் அந்தோஸீமாய ஏகங் ப³ஹிஸீமாய கரொந்தோ ட²பேதி, ரக்க²தி தாவ. ஏகாப³த்³தே⁴ காஜேபி ஏஸேவ நயோ. யதி³ பன அப³ந்தி⁴த்வா காஜகோடியங் ட²பிதமத்தமேவ ஹோதி, ந ரக்க²தி. ஏகாப³த்³தே⁴பி பரிவத்தெத்வா ட²பிதே ஆபத்தியேவ.
572.Sahatthāti sahatthena, attanā haritabbānīti vuttaṃ hoti. Bahitiyojanaṃ pātetīti tiyojanato bahi pāteti. Anantarāyena patanake hatthato muttamatte lomagaṇanāya nissaggiyapācittiyāni. Sace bahitiyojane rukkhe vā thambhe vā paṭihaññitvā puna anto patanti, anāpatti . Bhūmiyaṃ patitvā ṭhatvā ṭhatvā vaṭṭamānā eḷakalomabhaṇḍikā puna anto pavisati, āpattiyeva. Anto ṭhatvā hatthena vā pādena vā yaṭṭhiyā vā vaṭṭeti ṭhatvā vā aṭhatvā vā vaṭṭamānā bhaṇḍikā gacchatu, āpattiyeva. ‘‘Añño harissatī’’ti ṭhapeti, tena haritepi āpattiyeva. Suddhacittena ṭhapitaṃ vāto vā añño vā attano dhammatāya bahi pāteti, āpattiyeva. Saussāhattā acittakattā ca sikkhāpadassa. Kurundiyādīsu pana ‘‘ettha anāpattī’’ti vuttā, sā anāpatti pāḷiyā na sameti. Ubhatobhaṇḍikaṃ ekābaddhaṃ katvā ekaṃ bhaṇḍikaṃ antosīmāya ekaṃ bahisīmāya karonto ṭhapeti, rakkhati tāva. Ekābaddhe kājepi eseva nayo. Yadi pana abandhitvā kājakoṭiyaṃ ṭhapitamattameva hoti, na rakkhati. Ekābaddhepi parivattetvā ṭhapite āpattiyeva.
அஞ்ஞஸ்ஸ யானே வாதி எத்த² க³ச்ச²ந்தே யானே வா ஹத்தி²பிட்டி²ஆதீ³ஸு வா ஸாமிகஸ்ஸ அஜானந்தஸ்ஸேவ ஹரிஸ்ஸதீதி ட²பேதி, தஸ்மிங் தியோஜனங் அதிக்கந்தே ஆபத்தி. அக³ச்ச²ந்தேபி ஏஸேவ நயோ. ஸசே பன அக³ச்ச²ந்தே யானே வா ஹத்தி²பிட்டி²யாதீ³ஸு வா ட²பெத்வா அபி⁴ருஹித்வா ஸாரேதி, ஹெட்டா² வா க³ச்ச²ந்தோ சோதே³தி, பக்கோஸந்தோ வா அனுப³ந்தா⁴பேதி, ‘‘அஞ்ஞங் ஹராபேதீ’’தி வசனதோ அனாபத்தி. குருந்தி³யாதீ³ஸு பன ‘‘ஆபத்தீ’’தி வுத்தங், தங் ‘‘அஞ்ஞங் ஹராபேதீ’’தி இமினா ந ஸமேதி. அதி³ன்னாதா³னே பன ஸுங்ககா⁴தே ஆபத்தி ஹோதி. யா ஹி தத்த² ஆபத்தி, ஸா இத⁴ அனாபத்தி. யா இத⁴ ஆபத்தி, ஸா தத்த² அனாபத்தி. தங் டா²னங் பத்வா அஞ்ஞவிஹிதோ வா சோராதீ³ஹி வா உபத்³து³தோ க³ச்ச²தி, ஆபத்தியேவ. ஸப்³ப³த்த² லோமக³ணனாய ஆபத்திபரிச்சே²தோ³ வேதி³தப்³போ³.
Aññassa yāne vāti ettha gacchante yāne vā hatthipiṭṭhiādīsu vā sāmikassa ajānantasseva harissatīti ṭhapeti, tasmiṃ tiyojanaṃ atikkante āpatti. Agacchantepi eseva nayo. Sace pana agacchante yāne vā hatthipiṭṭhiyādīsu vā ṭhapetvā abhiruhitvā sāreti, heṭṭhā vā gacchanto codeti, pakkosanto vā anubandhāpeti, ‘‘aññaṃ harāpetī’’ti vacanato anāpatti. Kurundiyādīsu pana ‘‘āpattī’’ti vuttaṃ, taṃ ‘‘aññaṃ harāpetī’’ti iminā na sameti. Adinnādāne pana suṅkaghāte āpatti hoti. Yā hi tattha āpatti, sā idha anāpatti. Yā idha āpatti, sā tattha anāpatti. Taṃ ṭhānaṃ patvā aññavihito vā corādīhi vā upadduto gacchati, āpattiyeva. Sabbattha lomagaṇanāya āpattiparicchedo veditabbo.
575. தியோஜனங் வாஸாதி⁴ப்பாயோ க³ந்த்வா ததோ பரங் ஹரதீதி யத்த² க³தோ, தத்த² உத்³தே³ஸபரிபுச்சா²தீ³னங் வா பச்சயாதீ³னங் வா அலாபே⁴ன ததோ பரங் அஞ்ஞத்த² க³ச்ச²தி, ததோபி அஞ்ஞத்தா²தி ஏவங் யோஜனஸதம்பி ஹரந்தஸ்ஸ அனாபத்தி. அச்சி²ன்னங் படிலபி⁴த்வாதி சோரா அச்சி²ந்தி³த்வா நிரத்த²கபா⁴வங் ஞத்வா படிதெ³ந்தி, தங் ஹரந்தஸ்ஸ அனாபத்தி. நிஸ்ஸட்ட²ங் படிலபி⁴த்வாதி வினயகம்மகதங் படிலபி⁴த்வாதி அத்தோ².
575. Tiyojanaṃ vāsādhippāyo gantvā tato paraṃ haratīti yattha gato, tattha uddesaparipucchādīnaṃ vā paccayādīnaṃ vā alābhena tato paraṃ aññattha gacchati, tatopi aññatthāti evaṃ yojanasatampi harantassa anāpatti. Acchinnaṃ paṭilabhitvāti corā acchinditvā niratthakabhāvaṃ ñatvā paṭidenti, taṃ harantassa anāpatti. Nissaṭṭhaṃ paṭilabhitvāti vinayakammakataṃ paṭilabhitvāti attho.
கதப⁴ண்ட³ந்தி கதங்ப⁴ண்ட³ங் கம்ப³லகோஜவஸந்த²தாதி³ங் யங் கிஞ்சி அந்தமஸோ ஸுத்தகேன ப³த்³த⁴மத்தம்பி. யோ பன தனுகபத்தத்த²விகந்தரே வா ஆயோக³அங்ஸப³த்³த⁴ககாயப³ந்த⁴னாதீ³னங் அந்தரேஸு வா பிப்ப²லிகாதீ³னங் மலரக்க²ணத்த²ங் ஸிபாடிகாய வா அந்தமஸோ வாதாபா³தி⁴கோ கண்ணச்சி²த்³தே³பி லோமானி பக்கி²பித்வா க³ச்ச²தி, ஆபத்தியேவ. ஸுத்தகேன பன ப³ந்தி⁴த்வா பக்கி²த்தங் கதப⁴ண்ட³ட்டா²னே திட்ட²தி, வேணிங் கத்வா ஹரதி, இத³ங் நிதா⁴னமுக²ங் நாம, ஆபத்தியேவாதி. ஸேஸங் உத்தானத்த²மேவ.
Katabhaṇḍanti kataṃbhaṇḍaṃ kambalakojavasanthatādiṃ yaṃ kiñci antamaso suttakena baddhamattampi. Yo pana tanukapattatthavikantare vā āyogaaṃsabaddhakakāyabandhanādīnaṃ antaresu vā pipphalikādīnaṃ malarakkhaṇatthaṃ sipāṭikāya vā antamaso vātābādhiko kaṇṇacchiddepi lomāni pakkhipitvā gacchati, āpattiyeva. Suttakena pana bandhitvā pakkhittaṃ katabhaṇḍaṭṭhāne tiṭṭhati, veṇiṃ katvā harati, idaṃ nidhānamukhaṃ nāma, āpattiyevāti. Sesaṃ uttānatthameva.
ஸமுட்டா²னாதீ³ஸு இத³ங் ஏளகலோமஸமுட்டா²னங் நாம, காயதோ ச காயசித்ததோ ச ஸமுட்டா²தி, கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், திசித்தங், திவேத³னந்தி.
Samuṭṭhānādīsu idaṃ eḷakalomasamuṭṭhānaṃ nāma, kāyato ca kāyacittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
ஏளகலோமஸிக்கா²பத³வண்ணனா நிட்டி²தா.
Eḷakalomasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. ஏளகலோமஸிக்கா²பத³ங் • 6. Eḷakalomasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. ஏளகலோமஸிக்கா²பத³வண்ணனா • 6. Eḷakalomasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. ஏளகலோமஸிக்கா²பத³வண்ணனா • 6. Eḷakalomasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. ஏளகலோமஸிக்கா²பத³வண்ணனா • 6. Eḷakalomasikkhāpadavaṇṇanā
