| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
6. ஏளகலோமஸிக்கா²பத³வண்ணனா
6. Eḷakalomasikkhāpadavaṇṇanā
அத்³தா⁴னமக்³க³ப்படிபன்னஸ்ஸாதி அத்³தா⁴னமேவ மக்³கோ³ அத்³தா⁴னமக்³கோ³, தங் படிபன்னஸ்ஸாதி அத்தோ². தேனாஹ ‘‘அத்³தா⁴னஸங்கா²த’’ந்திஆதி³. அத்³தா⁴னஸத்³தே³ன விஸேஸிதத்தா பன ‘‘தீ³க⁴மக்³க³’’ந்தி வுத்தங். அத்³தா⁴னக³மனஸமயஸ்ஸ விப⁴ங்கே³ ‘‘அத்³த⁴யோஜனங் க³ச்சி²ஸ்ஸாமீதி பு⁴ஞ்ஜிதப்³ப³’’ந்திஆதி³வசனதோ (பாசி॰ 218) அத்³த⁴யோஜனம்பி அத்³தா⁴னமக்³கோ³ ஹோதி. ஏளகலோமானி சேதானி அத்³தா⁴னமக்³க³தோ அஞ்ஞத்த² உப்பன்னானி படிக்³க³ஹேதுங் ந வட்டந்தி, யதோ ‘‘அத்³தா⁴னமக்³க³ப்படிபன்னஸ்ஸா’’திஆதி³கங் வுத்தந்தி அனுயோக³ங் ஸந்தா⁴யாஹ ‘‘ஸப்³ப³ஞ்சேத’’ந்திஆதி³. தத்த² ஸப்³ப³ஞ்சேதந்தி ‘‘பி⁴க்கு²னோ பனேவ அத்³தா⁴னமக்³க³ப்படிபன்னஸ்ஸ ஏளகலோமானி உப்பஜ்ஜெய்யு’’ந்திஆதி³கங் ஏதங் ஸப்³ப³ங். வத்து²மத்ததீ³பனமேவாதி ‘‘தேன கோ² பன ஸமயேன அஞ்ஞதரஸ்ஸ பி⁴க்கு²னோ கோஸலேஸு ஜனபதே³ ஸாவத்தி²ங் க³ச்ச²ந்தஸ்ஸ அந்தராமக்³கே³ ஏளகலோமானி உப்பஜ்ஜிங்ஸூ’’திஆதி³கஸ்ஸ (பாரா॰ 571) வத்து²மத்தஸ்ஸ தீ³பனமேவ. யத்த² கத்த²சீதி அத்³தா⁴னதோ அஞ்ஞத்தா²பி யத்த² கத்த²சி டா²னேஸு. ஸஹத்தா²தி கரணத்தே² நிஸ்ஸக்கவசனந்தி ஆஹ ‘‘ஸஹத்தே²னா’’தி. லக்க²ணவசனஞ்சேதங், தஸ்மா யேன கேனசி ஸரீராவயவேனாதி அத்தோ² த³ட்ட²ப்³போ³. தேனாஹ ‘‘அத்தனா ஹரிதப்³பா³னீதி அத்தோ²’’தி. அஸந்தே ஹாரகேதி எத்த² பதா³னங் அந்தோக³தா⁴வதா⁴ரணதோ அவதா⁴ரணத்தோ² லப்³ப⁴தீதி ஆஹ ‘‘அஸந்தேயேவா’’திஆதி³.
Addhānamaggappaṭipannassāti addhānameva maggo addhānamaggo, taṃ paṭipannassāti attho. Tenāha ‘‘addhānasaṅkhāta’’ntiādi. Addhānasaddena visesitattā pana ‘‘dīghamagga’’nti vuttaṃ. Addhānagamanasamayassa vibhaṅge ‘‘addhayojanaṃ gacchissāmīti bhuñjitabba’’ntiādivacanato (pāci. 218) addhayojanampi addhānamaggo hoti. Eḷakalomāni cetāni addhānamaggato aññattha uppannāni paṭiggahetuṃ na vaṭṭanti, yato ‘‘addhānamaggappaṭipannassā’’tiādikaṃ vuttanti anuyogaṃ sandhāyāha ‘‘sabbañceta’’ntiādi. Tattha sabbañcetanti ‘‘bhikkhuno paneva addhānamaggappaṭipannassa eḷakalomāni uppajjeyyu’’ntiādikaṃ etaṃ sabbaṃ. Vatthumattadīpanamevāti ‘‘tena kho pana samayena aññatarassa bhikkhuno kosalesu janapade sāvatthiṃ gacchantassa antarāmagge eḷakalomāni uppajjiṃsū’’tiādikassa (pārā. 571) vatthumattassa dīpanameva. Yattha katthacīti addhānato aññatthāpi yattha katthaci ṭhānesu. Sahatthāti karaṇatthe nissakkavacananti āha ‘‘sahatthenā’’ti. Lakkhaṇavacanañcetaṃ, tasmā yena kenaci sarīrāvayavenāti attho daṭṭhabbo. Tenāha ‘‘attanā haritabbānīti attho’’ti. Asante hāraketi ettha padānaṃ antogadhāvadhāraṇato avadhāraṇattho labbhatīti āha ‘‘asanteyevā’’tiādi.
எத்த² ச ‘‘இமானி மே, ப⁴ந்தே, ஏளகலோமானி தியோஜனங் அதிக்காமிதானி நிஸ்ஸக்³கி³யானீ’’திஆதி³னா (பாரா॰ 573) நிஸ்ஸஜ்ஜனவிதா⁴னங் வேதி³தப்³ப³ங். திகபாசித்தியந்தி அதிரேகதியோஜனே அதிரேகதியோஜனஸஞ்ஞிவேமதிகஊனகஸஞ்ஞீனங் வஸேன தீணி பாசித்தியானி. வாஸாதி⁴ப்பாயேன க³ந்த்வா ததோ பரங் ஹரணேதி யத்த² க³தோ, தத்த² உத்³தே³ஸபரிபுச்சா²தீ³னங் வா பச்சயாதீ³னங் வா அலாபே⁴ன ததோ பரங் அஞ்ஞத்த² ஹரணே, ததோபி அஞ்ஞத்தா²தி ஏவங் யோஜனஸதம்பி ஹரணே அனாபத்தி. அச்சி²ன்னங் வா நிஸ்ஸட்ட²ங் வாதி சோரேஹி அச்சி²ன்னங் வா வினயகம்மகதங் வா. கதப⁴ண்ட³ந்தி கதங் ப⁴ண்ட³ங் கம்ப³லகோஜவஸந்த²தாதி³ யங் கிஞ்சி அந்தமஸோ ஸுத்தகேன ப³த்³த⁴மத்தம்பி. தேனாஹ ‘‘அந்தமஸோ’’திஆதி³. யோ பன தனுகபத்தத்த²விகந்தரே (பாரா॰ அட்ட²॰ 2.575) வா ஆயோக³அங்ஸப³த்³த⁴ககாயப³ந்த⁴னாதீ³னங் அந்தரேஸு வா பிப்ப²லிகாதீ³னங் மலரக்க²ணத்த²ங் ஸிபாடிகாயங் வா அந்தமஸோ வாதாபா³தி⁴கோ கண்ணச்சி²த்³தே³பி லோமானி பக்கி²பித்வா க³ச்ச²தி , ஆபத்தியேவ. ஸுத்தகேன பன ப³ந்தி⁴த்வா பக்கி²த்தங் கதப⁴ண்ட³ட்டா²னே திட்ட²தி, வேணிங் கத்வா ஹரதி, இத³ங் நிதா⁴னமுக²ங் நாம, ஆபத்தியேவ.
Ettha ca ‘‘imāni me, bhante, eḷakalomāni tiyojanaṃ atikkāmitāni nissaggiyānī’’tiādinā (pārā. 573) nissajjanavidhānaṃ veditabbaṃ. Tikapācittiyanti atirekatiyojane atirekatiyojanasaññivematikaūnakasaññīnaṃ vasena tīṇi pācittiyāni. Vāsādhippāyena gantvā tato paraṃ haraṇeti yattha gato, tattha uddesaparipucchādīnaṃ vā paccayādīnaṃ vā alābhena tato paraṃ aññattha haraṇe, tatopi aññatthāti evaṃ yojanasatampi haraṇe anāpatti. Acchinnaṃ vā nissaṭṭhaṃ vāti corehi acchinnaṃ vā vinayakammakataṃ vā. Katabhaṇḍanti kataṃ bhaṇḍaṃ kambalakojavasanthatādi yaṃ kiñci antamaso suttakena baddhamattampi. Tenāha ‘‘antamaso’’tiādi. Yo pana tanukapattatthavikantare (pārā. aṭṭha. 2.575) vā āyogaaṃsabaddhakakāyabandhanādīnaṃ antaresu vā pipphalikādīnaṃ malarakkhaṇatthaṃ sipāṭikāyaṃ vā antamaso vātābādhiko kaṇṇacchiddepi lomāni pakkhipitvā gacchati , āpattiyeva. Suttakena pana bandhitvā pakkhittaṃ katabhaṇḍaṭṭhāne tiṭṭhati, veṇiṃ katvā harati, idaṃ nidhānamukhaṃ nāma, āpattiyeva.
பட²மப்படிலாபோ⁴தி அத்தனோ அத்தா²ய ஏளகலோமானங் பட²முப்பத்தி. ஏதேன அச்சி²ன்னநிஸ்ஸட்ட²ப்படிலத்³தா⁴னங் படிக்கே²போ. அஞ்ஞஸ்ஸ அஜானந்தஸ்ஸ யானே பக்கி²பித்வாதி (பாரா॰ அட்ட²॰ 2.572) க³ச்ச²ந்தே ரதா²தி³கே வா ஹத்தி²பிட்டி²ஆதீ³ஸு வா ஸாமிகஸ்ஸ அஜானந்தஸ்ஸேவ ‘‘ஹரிஸ்ஸதீ’’தி பக்கி²பித்வா. அக³ச்ச²ந்தேபி ஏஸேவ நயோ. ஸசே பன அக³ச்ச²ந்தே ரதா²தி³ம்ஹி வா ஹத்தி²பிட்டி²ஆதீ³ஸு வா ட²பெத்வா ஆரோஹித்வா ஸாரேதி, ஹெட்டா² வா க³ச்ச²ந்தோ சோதே³தி, பக்கோஸந்தோ வா அனுப³ந்தா⁴பேதி, ‘‘அஞ்ஞங் ஹராபேதீ’’தி (பாரா॰ 575) வசனதோ அனாபத்தி. எத்த² ச ‘‘அஜானந்தஸ்ஸ யானே’’தி இமினா ஜானந்தஸ்ஸ சே யானே பக்கி²பதி, அஞ்ஞங் ஹராபேதி நாமாதி த³ஸ்ஸேதி. அஹரணபச்சாஹரணந்தி ஹரணபச்சாஹரணானமபா⁴வோ.
Paṭhamappaṭilābhoti attano atthāya eḷakalomānaṃ paṭhamuppatti. Etena acchinnanissaṭṭhappaṭiladdhānaṃ paṭikkhepo. Aññassa ajānantassa yāne pakkhipitvāti (pārā. aṭṭha. 2.572) gacchante rathādike vā hatthipiṭṭhiādīsu vā sāmikassa ajānantasseva ‘‘harissatī’’ti pakkhipitvā. Agacchantepi eseva nayo. Sace pana agacchante rathādimhi vā hatthipiṭṭhiādīsu vā ṭhapetvā ārohitvā sāreti, heṭṭhā vā gacchanto codeti, pakkosanto vā anubandhāpeti, ‘‘aññaṃ harāpetī’’ti (pārā. 575) vacanato anāpatti. Ettha ca ‘‘ajānantassa yāne’’ti iminā jānantassa ce yāne pakkhipati, aññaṃ harāpeti nāmāti dasseti. Aharaṇapaccāharaṇanti haraṇapaccāharaṇānamabhāvo.
ஏளகலோமஸிக்கா²பத³வண்ணனா நிட்டி²தா.
Eḷakalomasikkhāpadavaṇṇanā niṭṭhitā.
