| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
6. ஏளகலோமஸிக்கா²பத³வண்ணனா
6. Eḷakalomasikkhāpadavaṇṇanā
‘‘அத்³தா⁴னமக்³க³ப்படிபன்னஸ்ஸா’’தி இமினா பகதியா தீ³க⁴மக்³க³ங் படிபன்னஸ்ஸ உப்பன்னானிபி தியோஜனபரமமேவ ஹரிதப்³பா³னி, பகே³வ அப்படிபன்னஸ்ஸாதி த³ஸ்ஸேதி. படிபன்னஸ்ஸ சே, அத்³தா⁴னங் நாம படிபன்னஸ்ஸ அகாமா வஸ்ஸங்வுட்ட²பி⁴க்கு²னியா மக்³க³ப்படிபத்தி வியாதி த³ஸ்ஸேதி. அத்³தா⁴னமக்³க³ப்படிபன்னஸ்ஸ நிஸ்ஸக்³கி³யந்தி வா ஸம்ப³ந்தோ⁴. தேனேவ வாஸாதி⁴ப்பாயஸ்ஸ படிப்பஸ்ஸத்³த⁴க³மனுஸ்ஸாஹத்தா ‘‘அப்படிபன்னோ’’தி ஸங்க²ங் க³தஸ்ஸ அனாபத்தீதி ஸித்³த⁴ங். இமஸ்மிங் பன அத்த²விகப்பே ‘‘பி⁴க்கு²னோ பனேவ ஏளகலோமானி உப்பஜ்ஜெய்யுங்…பே॰… அஸந்தேபி ஹாரகே அத்³தா⁴னமக்³க³ப்படிபன்னஸ்ஸ நிஸ்ஸக்³கி³யங் பாசித்திய’’ந்தி யோஜனா வேதி³தப்³பா³. யஸ்மா வா ஏளகலோமானங் உப்பத்திட்டா²னதோ பட்டா²ய தியோஜனபரமதா அதி⁴ப்பேதா, மக்³க³ங் அப்படிபன்னஸ்ஸ ச தியோஜனபரமதா நத்தி², தஸ்மா ‘‘அத்³தா⁴னமக்³க³ப்படிபன்னஸ்ஸ உப்பஜ்ஜெய்யு’’ந்தி வுத்தங். தேன அச்சி²ன்னங் படிலபி⁴த்வா ஹரதோ ச அனாபத்தீதி ஸித்³த⁴ங். படிலாபோ⁴ ஹி தேஸங் உப்பத்தி நாமாதி.
‘‘Addhānamaggappaṭipannassā’’ti iminā pakatiyā dīghamaggaṃ paṭipannassa uppannānipi tiyojanaparamameva haritabbāni, pageva appaṭipannassāti dasseti. Paṭipannassa ce, addhānaṃ nāma paṭipannassa akāmā vassaṃvuṭṭhabhikkhuniyā maggappaṭipatti viyāti dasseti. Addhānamaggappaṭipannassa nissaggiyanti vā sambandho. Teneva vāsādhippāyassa paṭippassaddhagamanussāhattā ‘‘appaṭipanno’’ti saṅkhaṃ gatassa anāpattīti siddhaṃ. Imasmiṃ pana atthavikappe ‘‘bhikkhuno paneva eḷakalomāni uppajjeyyuṃ…pe… asantepi hārake addhānamaggappaṭipannassa nissaggiyaṃ pācittiya’’nti yojanā veditabbā. Yasmā vā eḷakalomānaṃ uppattiṭṭhānato paṭṭhāya tiyojanaparamatā adhippetā, maggaṃ appaṭipannassa ca tiyojanaparamatā natthi, tasmā ‘‘addhānamaggappaṭipannassa uppajjeyyu’’nti vuttaṃ. Tena acchinnaṃ paṭilabhitvā harato ca anāpattīti siddhaṃ. Paṭilābho hi tesaṃ uppatti nāmāti.
‘‘ஆகங்க²மானேன பி⁴க்கு²னா படிக்³க³ஹேதப்³பா³னீ’’தி இமினா அத்தனா படிக்³க³ஹிதானங்யேவ தியோஜனாதிக்கமே ஆபத்தீதி த³ஸ்ஸேதி. தேன அனாகங்க²மானேன பரஸந்தகானி படிக்³க³ஹிதானி ஹரந்தஸ்ஸ அனாபத்தீதி ஸித்³த⁴ங்.
‘‘Ākaṅkhamānena bhikkhunā paṭiggahetabbānī’’ti iminā attanā paṭiggahitānaṃyeva tiyojanātikkame āpattīti dasseti. Tena anākaṅkhamānena parasantakāni paṭiggahitāni harantassa anāpattīti siddhaṃ.
அங்கே³ஸு ‘‘அத்தனோ ஸந்தகதா’’தி நத்தி², அயமத்தோ² ‘‘பி⁴க்கு²னோ உப்பஜ்ஜெய்யு’’ந்தி இமினா, ‘‘அச்சி²ன்னங் படிலபி⁴த்வா’’தி இமினா ச தீ³பிதோ ஹோதீதி வேதி³தப்³போ³. போராணக³ண்டி²பதே³ ச ‘‘அஞ்ஞங் பி⁴க்கு²ங் ஹராபெந்தோ க³ச்ச²தி சே, த்³வின்னம்பி அனாபத்தீ’’தி வுத்தங். தஸ்மா த்³வே பி⁴க்கூ² தியோஜனபரமங் பத்வா அஞ்ஞமஞ்ஞஸ்ஸ ப⁴ண்ட³ங் பரிவத்தெத்வா சே ஹரந்தி, அனாபத்தீதி ஸித்³த⁴ங்.
Aṅgesu ‘‘attano santakatā’’ti natthi, ayamattho ‘‘bhikkhuno uppajjeyyu’’nti iminā, ‘‘acchinnaṃ paṭilabhitvā’’ti iminā ca dīpito hotīti veditabbo. Porāṇagaṇṭhipade ca ‘‘aññaṃ bhikkhuṃ harāpento gacchati ce, dvinnampi anāpattī’’ti vuttaṃ. Tasmā dve bhikkhū tiyojanaparamaṃ patvā aññamaññassa bhaṇḍaṃ parivattetvā ce haranti, anāpattīti siddhaṃ.
தியோஜனபரமங் ஸஹத்தா² ஹரிதப்³பா³னீதி தியோஜனபரமமேவ அத்தனா ஹரிதப்³பா³னி, தங் கிமத்த²ந்தி? ஸீமாய ஏதபரமதோ. வுத்தஞ்ஹேதங் ‘‘அனுஜானாமி, பி⁴க்க²வே, தியோஜனபரமங் ஸீமங் ஸம்மன்னிது’’ந்தி (மஹாவ॰ 140). வாஸாதி⁴ப்பாயேன, பச்சாக³மனாதி⁴ப்பாயேன வா க³ச்ச²தோ ஏதபரமதா ச. வுத்தஞ்ஹேதங் ‘‘ச²ப்³ப³க்³கி³யா பி⁴க்கூ² அதிமஹதியோ ஸீமாயோ ஸம்மன்னந்தி…பே॰… பி⁴க்கூ² உபோஸத²ங் ஆக³ச்ச²ந்தா உத்³தி³ஸ்ஸமானேபி பாதிமொக்கே² ஆக³ச்ச²ந்தி, உத்³தி³ட்ட²மத்தேபி ஆக³ச்ச²ந்தி, அந்தராபி பரிவஸந்தீ’’தி (மஹாவ॰ 140).
Tiyojanaparamaṃ sahatthā haritabbānīti tiyojanaparamameva attanā haritabbāni, taṃ kimatthanti? Sīmāya etaparamato. Vuttañhetaṃ ‘‘anujānāmi, bhikkhave, tiyojanaparamaṃ sīmaṃ sammannitu’’nti (mahāva. 140). Vāsādhippāyena, paccāgamanādhippāyena vā gacchato etaparamatā ca. Vuttañhetaṃ ‘‘chabbaggiyā bhikkhū atimahatiyo sīmāyo sammannanti…pe… bhikkhū uposathaṃ āgacchantā uddissamānepi pātimokkhe āgacchanti, uddiṭṭhamattepi āgacchanti, antarāpi parivasantī’’ti (mahāva. 140).
அஸந்தே ஹாரகேதி ஆணத்தியா ஹாரகே அஸதி. கம்ப³லஸ்ஸ உபரி நிஸீதி³த்வா க³ச்ச²ந்தஸ்ஸ ஸசே ஏகம்பி லோமங் சீவரே லக்³க³ங் ஹோதி, தியோஜனாதிக்கமே ஆபத்தி ஏவ கம்ப³லதோ விஜடிதத்தாதி லிகி²தங். தங் கம்ப³லஸ்ஸ படிக்³க³ஹிதத்தா அத்தனோ அத்தா²ய படிக்³க³ஹிதமேவ ஹோதீதி யுத்தங்.
Asantehāraketi āṇattiyā hārake asati. Kambalassa upari nisīditvā gacchantassa sace ekampi lomaṃ cīvare laggaṃ hoti, tiyojanātikkame āpatti eva kambalato vijaṭitattāti likhitaṃ. Taṃ kambalassa paṭiggahitattā attano atthāya paṭiggahitameva hotīti yuttaṃ.
ஏளகலோமஸிக்கா²பத³வண்ணனா நிட்டி²தா.
Eḷakalomasikkhāpadavaṇṇanā niṭṭhitā.
