| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৬. এল়কলোমসিক্খাপদৰণ্ণনা
6. Eḷakalomasikkhāpadavaṇṇanā
৫৭১. তেন সমযেনাতি এল়কলোমসিক্খাপদং। তত্থ উপ্পণ্ডেসুন্তি ‘‘কিত্তকেন, ভন্তে, কীতানী’’তিআদীনি ৰদন্তা অৰহসিংসু। ঠিতকোৰ আসুম্ভীতি যথা মনুস্সা অরঞ্ঞতো মহন্তং দারুভারং আনেত্ৰা কিলন্তা ঠিতকাৰ পাতেন্তি, এৰং পাতেসীতি অত্থো।
571.Tenasamayenāti eḷakalomasikkhāpadaṃ. Tattha uppaṇḍesunti ‘‘kittakena, bhante, kītānī’’tiādīni vadantā avahasiṃsu. Ṭhitakova āsumbhīti yathā manussā araññato mahantaṃ dārubhāraṃ ānetvā kilantā ṭhitakāva pātenti, evaṃ pātesīti attho.
৫৭২. সহত্থাতি সহত্থেন, অত্তনা হরিতব্বানীতি ৰুত্তং হোতি। বহিতিযোজনং পাতেতীতি তিযোজনতো বহি পাতেতি। অনন্তরাযেন পতনকে হত্থতো মুত্তমত্তে লোমগণনায নিস্সগ্গিযপাচিত্তিযানি। সচে বহিতিযোজনে রুক্খে ৰা থম্ভে ৰা পটিহঞ্ঞিত্ৰা পুন অন্তো পতন্তি, অনাপত্তি । ভূমিযং পতিত্ৰা ঠত্ৰা ঠত্ৰা ৰট্টমানা এল়কলোমভণ্ডিকা পুন অন্তো পৰিসতি, আপত্তিযেৰ। অন্তো ঠত্ৰা হত্থেন ৰা পাদেন ৰা যট্ঠিযা ৰা ৰট্টেতি ঠত্ৰা ৰা অঠত্ৰা ৰা ৰট্টমানা ভণ্ডিকা গচ্ছতু, আপত্তিযেৰ। ‘‘অঞ্ঞো হরিস্সতী’’তি ঠপেতি, তেন হরিতেপি আপত্তিযেৰ। সুদ্ধচিত্তেন ঠপিতং ৰাতো ৰা অঞ্ঞো ৰা অত্তনো ধম্মতায বহি পাতেতি, আপত্তিযেৰ। সউস্সাহত্তা অচিত্তকত্তা চ সিক্খাপদস্স। কুরুন্দিযাদীসু পন ‘‘এত্থ অনাপত্তী’’তি ৰুত্তা, সা অনাপত্তি পাল়িযা ন সমেতি। উভতোভণ্ডিকং একাবদ্ধং কত্ৰা একং ভণ্ডিকং অন্তোসীমায একং বহিসীমায করোন্তো ঠপেতি, রক্খতি তাৰ। একাবদ্ধে কাজেপি এসেৰ নযো। যদি পন অবন্ধিত্ৰা কাজকোটিযং ঠপিতমত্তমেৰ হোতি, ন রক্খতি। একাবদ্ধেপি পরিৰত্তেত্ৰা ঠপিতে আপত্তিযেৰ।
572.Sahatthāti sahatthena, attanā haritabbānīti vuttaṃ hoti. Bahitiyojanaṃ pātetīti tiyojanato bahi pāteti. Anantarāyena patanake hatthato muttamatte lomagaṇanāya nissaggiyapācittiyāni. Sace bahitiyojane rukkhe vā thambhe vā paṭihaññitvā puna anto patanti, anāpatti . Bhūmiyaṃ patitvā ṭhatvā ṭhatvā vaṭṭamānā eḷakalomabhaṇḍikā puna anto pavisati, āpattiyeva. Anto ṭhatvā hatthena vā pādena vā yaṭṭhiyā vā vaṭṭeti ṭhatvā vā aṭhatvā vā vaṭṭamānā bhaṇḍikā gacchatu, āpattiyeva. ‘‘Añño harissatī’’ti ṭhapeti, tena haritepi āpattiyeva. Suddhacittena ṭhapitaṃ vāto vā añño vā attano dhammatāya bahi pāteti, āpattiyeva. Saussāhattā acittakattā ca sikkhāpadassa. Kurundiyādīsu pana ‘‘ettha anāpattī’’ti vuttā, sā anāpatti pāḷiyā na sameti. Ubhatobhaṇḍikaṃ ekābaddhaṃ katvā ekaṃ bhaṇḍikaṃ antosīmāya ekaṃ bahisīmāya karonto ṭhapeti, rakkhati tāva. Ekābaddhe kājepi eseva nayo. Yadi pana abandhitvā kājakoṭiyaṃ ṭhapitamattameva hoti, na rakkhati. Ekābaddhepi parivattetvā ṭhapite āpattiyeva.
অঞ্ঞস্স যানে ৰাতি এত্থ গচ্ছন্তে যানে ৰা হত্থিপিট্ঠিআদীসু ৰা সামিকস্স অজানন্তস্সেৰ হরিস্সতীতি ঠপেতি, তস্মিং তিযোজনং অতিক্কন্তে আপত্তি। অগচ্ছন্তেপি এসেৰ নযো। সচে পন অগচ্ছন্তে যানে ৰা হত্থিপিট্ঠিযাদীসু ৰা ঠপেত্ৰা অভিরুহিত্ৰা সারেতি, হেট্ঠা ৰা গচ্ছন্তো চোদেতি, পক্কোসন্তো ৰা অনুবন্ধাপেতি, ‘‘অঞ্ঞং হরাপেতী’’তি ৰচনতো অনাপত্তি। কুরুন্দিযাদীসু পন ‘‘আপত্তী’’তি ৰুত্তং, তং ‘‘অঞ্ঞং হরাপেতী’’তি ইমিনা ন সমেতি। অদিন্নাদানে পন সুঙ্কঘাতে আপত্তি হোতি। যা হি তত্থ আপত্তি, সা ইধ অনাপত্তি। যা ইধ আপত্তি, সা তত্থ অনাপত্তি। তং ঠানং পত্ৰা অঞ্ঞৰিহিতো ৰা চোরাদীহি ৰা উপদ্দুতো গচ্ছতি, আপত্তিযেৰ। সব্বত্থ লোমগণনায আপত্তিপরিচ্ছেদো ৰেদিতব্বো।
Aññassa yāne vāti ettha gacchante yāne vā hatthipiṭṭhiādīsu vā sāmikassa ajānantasseva harissatīti ṭhapeti, tasmiṃ tiyojanaṃ atikkante āpatti. Agacchantepi eseva nayo. Sace pana agacchante yāne vā hatthipiṭṭhiyādīsu vā ṭhapetvā abhiruhitvā sāreti, heṭṭhā vā gacchanto codeti, pakkosanto vā anubandhāpeti, ‘‘aññaṃ harāpetī’’ti vacanato anāpatti. Kurundiyādīsu pana ‘‘āpattī’’ti vuttaṃ, taṃ ‘‘aññaṃ harāpetī’’ti iminā na sameti. Adinnādāne pana suṅkaghāte āpatti hoti. Yā hi tattha āpatti, sā idha anāpatti. Yā idha āpatti, sā tattha anāpatti. Taṃ ṭhānaṃ patvā aññavihito vā corādīhi vā upadduto gacchati, āpattiyeva. Sabbattha lomagaṇanāya āpattiparicchedo veditabbo.
৫৭৫. তিযোজনং ৰাসাধিপ্পাযো গন্ত্ৰা ততো পরং হরতীতি যত্থ গতো, তত্থ উদ্দেসপরিপুচ্ছাদীনং ৰা পচ্চযাদীনং ৰা অলাভেন ততো পরং অঞ্ঞত্থ গচ্ছতি, ততোপি অঞ্ঞত্থাতি এৰং যোজনসতম্পি হরন্তস্স অনাপত্তি। অচ্ছিন্নং পটিলভিত্ৰাতি চোরা অচ্ছিন্দিত্ৰা নিরত্থকভাৰং ঞত্ৰা পটিদেন্তি, তং হরন্তস্স অনাপত্তি। নিস্সট্ঠং পটিলভিত্ৰাতি ৰিনযকম্মকতং পটিলভিত্ৰাতি অত্থো।
575. Tiyojanaṃ vāsādhippāyo gantvā tato paraṃ haratīti yattha gato, tattha uddesaparipucchādīnaṃ vā paccayādīnaṃ vā alābhena tato paraṃ aññattha gacchati, tatopi aññatthāti evaṃ yojanasatampi harantassa anāpatti. Acchinnaṃ paṭilabhitvāti corā acchinditvā niratthakabhāvaṃ ñatvā paṭidenti, taṃ harantassa anāpatti. Nissaṭṭhaṃ paṭilabhitvāti vinayakammakataṃ paṭilabhitvāti attho.
কতভণ্ডন্তি কতংভণ্ডং কম্বলকোজৰসন্থতাদিং যং কিঞ্চি অন্তমসো সুত্তকেন বদ্ধমত্তম্পি। যো পন তনুকপত্তত্থৰিকন্তরে ৰা আযোগঅংসবদ্ধককাযবন্ধনাদীনং অন্তরেসু ৰা পিপ্ফলিকাদীনং মলরক্খণত্থং সিপাটিকায ৰা অন্তমসো ৰাতাবাধিকো কণ্ণচ্ছিদ্দেপি লোমানি পক্খিপিত্ৰা গচ্ছতি, আপত্তিযেৰ। সুত্তকেন পন বন্ধিত্ৰা পক্খিত্তং কতভণ্ডট্ঠানে তিট্ঠতি, ৰেণিং কত্ৰা হরতি, ইদং নিধানমুখং নাম, আপত্তিযেৰাতি। সেসং উত্তানত্থমেৰ।
Katabhaṇḍanti kataṃbhaṇḍaṃ kambalakojavasanthatādiṃ yaṃ kiñci antamaso suttakena baddhamattampi. Yo pana tanukapattatthavikantare vā āyogaaṃsabaddhakakāyabandhanādīnaṃ antaresu vā pipphalikādīnaṃ malarakkhaṇatthaṃ sipāṭikāya vā antamaso vātābādhiko kaṇṇacchiddepi lomāni pakkhipitvā gacchati, āpattiyeva. Suttakena pana bandhitvā pakkhittaṃ katabhaṇḍaṭṭhāne tiṭṭhati, veṇiṃ katvā harati, idaṃ nidhānamukhaṃ nāma, āpattiyevāti. Sesaṃ uttānatthameva.
সমুট্ঠানাদীসু ইদং এল়কলোমসমুট্ঠানং নাম, কাযতো চ কাযচিত্ততো চ সমুট্ঠাতি, কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি।
Samuṭṭhānādīsu idaṃ eḷakalomasamuṭṭhānaṃ nāma, kāyato ca kāyacittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
এল়কলোমসিক্খাপদৰণ্ণনা নিট্ঠিতা।
Eḷakalomasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৬. এল়কলোমসিক্খাপদং • 6. Eḷakalomasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৬. এল়কলোমসিক্খাপদৰণ্ণনা • 6. Eḷakalomasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৬. এল়কলোমসিক্খাপদৰণ্ণনা • 6. Eḷakalomasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৬. এল়কলোমসিক্খাপদৰণ্ণনা • 6. Eḷakalomasikkhāpadavaṇṇanā
