| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
၆. ဧဠကလောမသိက္ခာပဒဝဏ္ဏနာ
6. Eḷakalomasikkhāpadavaṇṇanā
၅၇၂. ဆဋ္ဌေ ပာဠိယံ ‘‘အဒ္ဓာနမဂ္ဂပ္ပဋိပန္နသ္သာ’’တိ ဣဒံ ဝတ္ထုဝသေန ဝုတ္တံ။ နိဝာသဋ္ဌာနေ လဒ္ဓာနိပိ တိယောဇနတော ပရံ ဟရိတုံ န ဝဋ္ဋတိ ဧဝ။ အသန္တေ ဟာရကေတိ အနုရူပတော ဝုတ္တံ။ သန္တေပိ ဟာရကေ ဟရတော နတ္ထိ ဒောသော။ အာပတ္တိယေဝာတိ အနာဏတ္တေန ဟဋတ္တာ။ ပက္ခဒ္ဝယသ္သပိ ကာရဏမာဟ ‘‘သဥသ္သာဟတ္တာ’’တိ, အနုပရတဂမနိစ္ဆတ္တာတိ အတ္ထော။ သုဒ္ဓစိတ္တပက္ခသ္သေဝ ကာရဏမာဟ ‘‘အစိတ္တကတ္တာ’’တိ။ န သမေတီတိ ‘‘အနာပတ္တိ, အညံ ဟရာပေတီ’’တိ ဧတ္တကသ္သေဝ ပရိဟရဏေ ဝုတ္တတ္တာ။ အဂစ္ဆန္တေတိ ဌိတေ။ ဟေဋ္ဌာတိ ဘူမိယာ။
572. Chaṭṭhe pāḷiyaṃ ‘‘addhānamaggappaṭipannassā’’ti idaṃ vatthuvasena vuttaṃ. Nivāsaṭṭhāne laddhānipi tiyojanato paraṃ harituṃ na vaṭṭati eva. Asante hāraketi anurūpato vuttaṃ. Santepi hārake harato natthi doso. Āpattiyevāti anāṇattena haṭattā. Pakkhadvayassapi kāraṇamāha ‘‘saussāhattā’’ti, anuparatagamanicchattāti attho. Suddhacittapakkhasseva kāraṇamāha ‘‘acittakattā’’ti. Na sametīti ‘‘anāpatti, aññaṃ harāpetī’’ti ettakasseva pariharaṇe vuttattā. Agacchanteti ṭhite. Heṭṭhāti bhūmiyā.
၅၇၅. တံ ဟရန္တသ္သာတိ ပဌမံ ပဋိလာဘဋ္ဌာနတော ပဋ္ဌာယ တိယောဇနတော ဥဒ္ဓံ ဟရန္တသ္သာတိ အတ္ထော။ တထာ ဟရန္တသ္သ ဟိ စောရေဟိ အစ္ဆိန္ဒိတ္ဝာ ပုန ဒိန္နဋ္ဌာနတော တိယောဇနံ ဟရိတုံ ဝဋ္ဋတိ။ ကေစိ ပန ‘‘မာတိကာဋ္ဌကထာယံ အင္ဂေသု ‘ပဌမပ္ပဋိလာဘော’တိ ဝုတ္တတ္တာ ဒုတိယပဋိလာဘဋ္ဌာနတော တိယောဇနာတိက္ကမေပိ အနာပတ္တီ’’တိ ဝဒန္တိ, တံ န ယုတ္တံ, ဒုတိယပဋိလာဘသ္သာပိ ပဋိလာဘဋ္ဌာနေ ပဝိသနတော ဝာသတ္ထာယ ဂမနဋ္ဌာနတော ပုန ဂမနေ ဝိယ။ ကာယဗန္ဓနာဒီနန္တိ ဒ္ဝိပဋလကာယဗန္ဓနာဒီနံ အန္တရေ ပက္ခိတ္တံ ပသိဗ္ဗကေ ပက္ခိတ္တသဒိသံ, န ကတဘဏ္ဍန္တိ ဝုတ္တံ, တထာ နိဓာနမုခန္တိ။ အကတဘဏ္ဍတာ, ပဌမပ္ပဋိလာဘော, တိယောဇနာတိက္ကမနံ, အာဟရဏပစ္စာဟရဏံ, အဝာသာဓိပ္ပာယတာတိ ဣမာနေတ္ထ ပဉ္စ အင္ဂာနိ။
575.Taṃ harantassāti paṭhamaṃ paṭilābhaṭṭhānato paṭṭhāya tiyojanato uddhaṃ harantassāti attho. Tathā harantassa hi corehi acchinditvā puna dinnaṭṭhānato tiyojanaṃ harituṃ vaṭṭati. Keci pana ‘‘mātikāṭṭhakathāyaṃ aṅgesu ‘paṭhamappaṭilābho’ti vuttattā dutiyapaṭilābhaṭṭhānato tiyojanātikkamepi anāpattī’’ti vadanti, taṃ na yuttaṃ, dutiyapaṭilābhassāpi paṭilābhaṭṭhāne pavisanato vāsatthāya gamanaṭṭhānato puna gamane viya. Kāyabandhanādīnanti dvipaṭalakāyabandhanādīnaṃ antare pakkhittaṃ pasibbake pakkhittasadisaṃ, na katabhaṇḍanti vuttaṃ, tathā nidhānamukhanti. Akatabhaṇḍatā, paṭhamappaṭilābho, tiyojanātikkamanaṃ, āharaṇapaccāharaṇaṃ, avāsādhippāyatāti imānettha pañca aṅgāni.
ဧဠကလောမသိက္ခာပဒဝဏ္ဏနာ နိဋ္ဌိတာ။
Eḷakalomasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၆. ဧဠကလောမသိက္ခာပဒံ • 6. Eḷakalomasikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၆. ဧဠကလောမသိက္ခာပဒဝဏ္ဏနာ • 6. Eḷakalomasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၆. ဧဠကလောမသိက္ခာပဒဝဏ္ဏနာ • 6. Eḷakalomasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၆. ဧဠကလောမသိက္ခာပဒဝဏ္ဏနာ • 6. Eḷakalomasikkhāpadavaṇṇanā
