| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-པུརཱཎ-ཊཱིཀཱ • Kaṅkhāvitaraṇī-purāṇa-ṭīkā |
༦. ཨེལ༹ཀལོམསིཀྑཱཔདཝཎྞནཱ
6. Eḷakalomasikkhāpadavaṇṇanā
‘‘ཨདྡྷཱནམགྒཔྤཊིཔནྣསྶཱ’’ཏི ཨིམིནཱ པཀཏིཡཱ དཱིགྷམགྒཾ པཊིཔནྣསྶ ཨུཔྤནྣཱནིཔི ཏིཡོཛནཔརམམེཝ ཧརིཏབྦཱནི, པགེཝ ཨཔྤཊིཔནྣསྶཱཏི དསྶེཏི། པཊིཔནྣསྶ ཙེ, ཨདྡྷཱནཾ ནཱམ པཊིཔནྣསྶ ཨཀཱམཱ ཝསྶཾཝུཊྛབྷིཀྑུནིཡཱ མགྒཔྤཊིཔཏྟི ཝིཡཱཏི དསྶེཏི། ཨདྡྷཱནམགྒཔྤཊིཔནྣསྶ ནིསྶགྒིཡནྟི ཝཱ སམྦནྡྷོ། ཏེནེཝ ཝཱསཱདྷིཔྤཱཡསྶ པཊིཔྤསྶདྡྷགམནུསྶཱཧཏྟཱ ‘‘ཨཔྤཊིཔནྣོ’’ཏི སངྑཾ གཏསྶ ཨནཱཔཏྟཱིཏི སིདྡྷཾ། ཨིམསྨིཾ པན ཨཏྠཝིཀཔྤེ ‘‘བྷིཀྑུནོ པནེཝ ཨེལ༹ཀལོམཱནི ཨུཔྤཛྫེཡྻུཾ…པེ॰… ཨསནྟེཔི ཧཱརཀེ ཨདྡྷཱནམགྒཔྤཊིཔནྣསྶ ནིསྶགྒིཡཾ པཱཙིཏྟིཡ’’ནྟི ཡོཛནཱ ཝེདིཏབྦཱ། ཡསྨཱ ཝཱ ཨེལ༹ཀལོམཱནཾ ཨུཔྤཏྟིཊྛཱནཏོ པཊྛཱཡ ཏིཡོཛནཔརམཏཱ ཨདྷིཔྤེཏཱ, མགྒཾ ཨཔྤཊིཔནྣསྶ ཙ ཏིཡོཛནཔརམཏཱ ནཏྠི, ཏསྨཱ ‘‘ཨདྡྷཱནམགྒཔྤཊིཔནྣསྶ ཨུཔྤཛྫེཡྻུ’’ནྟི ཝུཏྟཾ། ཏེན ཨཙྪིནྣཾ པཊིལབྷིཏྭཱ ཧརཏོ ཙ ཨནཱཔཏྟཱིཏི སིདྡྷཾ། པཊིལཱབྷོ ཧི ཏེསཾ ཨུཔྤཏྟི ནཱམཱཏི།
‘‘Addhānamaggappaṭipannassā’’ti iminā pakatiyā dīghamaggaṃ paṭipannassa uppannānipi tiyojanaparamameva haritabbāni, pageva appaṭipannassāti dasseti. Paṭipannassa ce, addhānaṃ nāma paṭipannassa akāmā vassaṃvuṭṭhabhikkhuniyā maggappaṭipatti viyāti dasseti. Addhānamaggappaṭipannassa nissaggiyanti vā sambandho. Teneva vāsādhippāyassa paṭippassaddhagamanussāhattā ‘‘appaṭipanno’’ti saṅkhaṃ gatassa anāpattīti siddhaṃ. Imasmiṃ pana atthavikappe ‘‘bhikkhuno paneva eḷakalomāni uppajjeyyuṃ…pe… asantepi hārake addhānamaggappaṭipannassa nissaggiyaṃ pācittiya’’nti yojanā veditabbā. Yasmā vā eḷakalomānaṃ uppattiṭṭhānato paṭṭhāya tiyojanaparamatā adhippetā, maggaṃ appaṭipannassa ca tiyojanaparamatā natthi, tasmā ‘‘addhānamaggappaṭipannassa uppajjeyyu’’nti vuttaṃ. Tena acchinnaṃ paṭilabhitvā harato ca anāpattīti siddhaṃ. Paṭilābho hi tesaṃ uppatti nāmāti.
‘‘ཨཱཀངྑམཱནེན བྷིཀྑུནཱ པཊིགྒཧེཏབྦཱནཱི’’ཏི ཨིམིནཱ ཨཏྟནཱ པཊིགྒཧིཏཱནཾཡེཝ ཏིཡོཛནཱཏིཀྐམེ ཨཱཔཏྟཱིཏི དསྶེཏི། ཏེན ཨནཱཀངྑམཱནེན པརསནྟཀཱནི པཊིགྒཧིཏཱནི ཧརནྟསྶ ཨནཱཔཏྟཱིཏི སིདྡྷཾ།
‘‘Ākaṅkhamānena bhikkhunā paṭiggahetabbānī’’ti iminā attanā paṭiggahitānaṃyeva tiyojanātikkame āpattīti dasseti. Tena anākaṅkhamānena parasantakāni paṭiggahitāni harantassa anāpattīti siddhaṃ.
ཨངྒེསུ ‘‘ཨཏྟནོ སནྟཀཏཱ’’ཏི ནཏྠི, ཨཡམཏྠོ ‘‘བྷིཀྑུནོ ཨུཔྤཛྫེཡྻུ’’ནྟི ཨིམིནཱ, ‘‘ཨཙྪིནྣཾ པཊིལབྷིཏྭཱ’’ཏི ཨིམིནཱ ཙ དཱིཔིཏོ ཧོཏཱིཏི ཝེདིཏབྦོ། པོརཱཎགཎྛིཔདེ ཙ ‘‘ཨཉྙཾ བྷིཀྑུཾ ཧརཱཔེནྟོ གཙྪཏི ཙེ, དྭིནྣམྤི ཨནཱཔཏྟཱི’’ཏི ཝུཏྟཾ། ཏསྨཱ དྭེ བྷིཀྑཱུ ཏིཡོཛནཔརམཾ པཏྭཱ ཨཉྙམཉྙསྶ བྷཎྜཾ པརིཝཏྟེཏྭཱ ཙེ ཧརནྟི, ཨནཱཔཏྟཱིཏི སིདྡྷཾ།
Aṅgesu ‘‘attano santakatā’’ti natthi, ayamattho ‘‘bhikkhuno uppajjeyyu’’nti iminā, ‘‘acchinnaṃ paṭilabhitvā’’ti iminā ca dīpito hotīti veditabbo. Porāṇagaṇṭhipade ca ‘‘aññaṃ bhikkhuṃ harāpento gacchati ce, dvinnampi anāpattī’’ti vuttaṃ. Tasmā dve bhikkhū tiyojanaparamaṃ patvā aññamaññassa bhaṇḍaṃ parivattetvā ce haranti, anāpattīti siddhaṃ.
ཏིཡོཛནཔརམཾ སཧཏྠཱ ཧརིཏབྦཱནཱིཏི ཏིཡོཛནཔརམམེཝ ཨཏྟནཱ ཧརིཏབྦཱནི, ཏཾ ཀིམཏྠནྟི? སཱིམཱཡ ཨེཏཔརམཏོ། ཝུཏྟཉྷེཏཾ ‘‘ཨནུཛཱནཱམི, བྷིཀྑཝེ, ཏིཡོཛནཔརམཾ སཱིམཾ སམྨནྣིཏུ’’ནྟི (མཧཱཝ॰ ༡༤༠)། ཝཱསཱདྷིཔྤཱཡེན, པཙྩཱགམནཱདྷིཔྤཱཡེན ཝཱ གཙྪཏོ ཨེཏཔརམཏཱ ཙ། ཝུཏྟཉྷེཏཾ ‘‘ཚབྦགྒིཡཱ བྷིཀྑཱུ ཨཏིམཧཏིཡོ སཱིམཱཡོ སམྨནྣནྟི…པེ॰… བྷིཀྑཱུ ཨུཔོསཐཾ ཨཱགཙྪནྟཱ ཨུདྡིསྶམཱནེཔི པཱཏིམོཀྑེ ཨཱགཙྪནྟི, ཨུདྡིཊྛམཏྟེཔི ཨཱགཙྪནྟི, ཨནྟརཱཔི པརིཝསནྟཱི’’ཏི (མཧཱཝ॰ ༡༤༠)།
Tiyojanaparamaṃ sahatthā haritabbānīti tiyojanaparamameva attanā haritabbāni, taṃ kimatthanti? Sīmāya etaparamato. Vuttañhetaṃ ‘‘anujānāmi, bhikkhave, tiyojanaparamaṃ sīmaṃ sammannitu’’nti (mahāva. 140). Vāsādhippāyena, paccāgamanādhippāyena vā gacchato etaparamatā ca. Vuttañhetaṃ ‘‘chabbaggiyā bhikkhū atimahatiyo sīmāyo sammannanti…pe… bhikkhū uposathaṃ āgacchantā uddissamānepi pātimokkhe āgacchanti, uddiṭṭhamattepi āgacchanti, antarāpi parivasantī’’ti (mahāva. 140).
ཨསནྟེ ཧཱརཀེཏི ཨཱཎཏྟིཡཱ ཧཱརཀེ ཨསཏི། ཀམྦལསྶ ཨུཔརི ནིསཱིདིཏྭཱ གཙྪནྟསྶ སཙེ ཨེཀམྤི ལོམཾ ཙཱིཝརེ ལགྒཾ ཧོཏི, ཏིཡོཛནཱཏིཀྐམེ ཨཱཔཏྟི ཨེཝ ཀམྦལཏོ ཝིཛཊིཏཏྟཱཏི ལིཁིཏཾ། ཏཾ ཀམྦལསྶ པཊིགྒཧིཏཏྟཱ ཨཏྟནོ ཨཏྠཱཡ པཊིགྒཧིཏམེཝ ཧོཏཱིཏི ཡུཏྟཾ།
Asantehāraketi āṇattiyā hārake asati. Kambalassa upari nisīditvā gacchantassa sace ekampi lomaṃ cīvare laggaṃ hoti, tiyojanātikkame āpatti eva kambalato vijaṭitattāti likhitaṃ. Taṃ kambalassa paṭiggahitattā attano atthāya paṭiggahitameva hotīti yuttaṃ.
ཨེལ༹ཀལོམསིཀྑཱཔདཝཎྞནཱ ནིཊྛིཏཱ།
Eḷakalomasikkhāpadavaṇṇanā niṭṭhitā.
