| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. ஏணிஜங்க⁴ஸுத்தவண்ணனா
10. Eṇijaṅghasuttavaṇṇanā
30. த³ஸமே ஏணிஜங்க⁴ந்தி ஏணிமிக³ஸ்ஸ விய ஸுவட்டிதஜங்க⁴ங். கிஸந்தி அதூ²லங் ஸமஸரீரங். அத² வா ஆதபேன மிலாதங் மாலாக³ந்த⁴விலேபனேஹி அனுபப்³ரூஹிதஸரீரந்திபி அத்தோ². வீரந்தி வீரியவந்தங். அப்பாஹாரந்தி போ⁴ஜனே மத்தஞ்ஞுதாய மிதாஹாரங், விகாலபோ⁴ஜனபடிக்கே²பவஸேன வா பரித்தாஹாரங். அலோலுபந்தி சதூஸு பச்சயேஸு லோலுப்பவிரஹிதங். ரஸதண்ஹாபடிக்கே²போ வா ஏஸ. ஸீஹங்வேகசரங் நாக³ந்தி ஏகசரங் ஸீஹங் விய, ஏகசரங் நாக³ங் விய. க³ணவாஸினோ ஹி பமத்தா ஹொந்தி, ஏகசரா அப்பமத்தா, தஸ்மா ஏகசராவ க³ஹிதாதி. பவேதி³தாதி பகாஸிதா கதி²தா. எத்தா²தி ஏதஸ்மிங் நாமரூபே. பஞ்சகாமகு³ணவஸேன ஹி ரூபங் க³ஹிதங், மனேன நாமங், உப⁴யேஹி பன அவினிபு⁴த்தத⁴ம்மே க³ஹெத்வா பஞ்சக்க²ந்தா⁴தி³வஸேனபெத்த² பு⁴ம்மங் யோஜேதப்³ப³ந்தி. த³ஸமங்.
30. Dasame eṇijaṅghanti eṇimigassa viya suvaṭṭitajaṅghaṃ. Kisanti athūlaṃ samasarīraṃ. Atha vā ātapena milātaṃ mālāgandhavilepanehi anupabrūhitasarīrantipi attho. Vīranti vīriyavantaṃ. Appāhāranti bhojane mattaññutāya mitāhāraṃ, vikālabhojanapaṭikkhepavasena vā parittāhāraṃ. Alolupanti catūsu paccayesu loluppavirahitaṃ. Rasataṇhāpaṭikkhepo vā esa. Sīhaṃvekacaraṃ nāganti ekacaraṃ sīhaṃ viya, ekacaraṃ nāgaṃ viya. Gaṇavāsino hi pamattā honti, ekacarā appamattā, tasmā ekacarāva gahitāti. Paveditāti pakāsitā kathitā. Etthāti etasmiṃ nāmarūpe. Pañcakāmaguṇavasena hi rūpaṃ gahitaṃ, manena nāmaṃ, ubhayehi pana avinibhuttadhamme gahetvā pañcakkhandhādivasenapettha bhummaṃ yojetabbanti. Dasamaṃ.
ஸத்திவக்³கோ³ ததியோ.
Sattivaggo tatiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ஏணிஜங்க⁴ஸுத்தங் • 10. Eṇijaṅghasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ஏணிஜங்க⁴ஸுத்தவண்ணனா • 10. Eṇijaṅghasuttavaṇṇanā
