| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. এণিজঙ্ঘসুত্তৰণ্ণনা
10. Eṇijaṅghasuttavaṇṇanā
৩০. এণিমিগস্স ৰিযাতি এণিমিগস্স জঙ্ঘা ৰিয। অৰযৰীসম্বন্ধে হি ইদং সামিৰচনং। পিণ্ডিমংসস্স পরিতো সমসণ্ঠিতত্তা সুৰট্টীতজঙ্ঘো। কিসন্তি থূলভাৰপটিক্খেপপরাজোতনা, ন সুট্ঠু কিসভাৰদীপনপরাতি আহ ‘‘অথূলং সমসরীর’’ন্তি। আতপেন মিলাতন্তি তপসা মিলাতকাযং ইন্দ্রিযসন্তাপনভাৰতো। তেনেৰাহ – ‘‘তপো মিলাত’’ন্তিআদি, তথা চাহ পাল়িযং ‘‘অপ্পাহারং অলোলুপ’’ন্তি। যথা ‘‘ৰীরস্স ভাৰো ৰীরিয’’ন্তি ৰীরভাৰেন ৰীরিযং লক্খীযতি, এৰং ৰীরিযসম্ভৰেন ৰীরভাৰোতি আহ ‘‘ৰীরন্তি ৰীরিযৰন্ত’’ন্তি। ‘‘চত্তারো পঞ্চ আলোপে, অভুত্ৰা উদকং পিৰে’’তি (থেরগা॰ ৯৮৩; মি॰ প॰ ৬.৫.১০) ধম্মসেনাপতিৰুত্তনিযামেন পরিমিতভোজিতায অপ্পাহারতা ভোজনে মত্তঞ্ঞুতা। ‘‘মিতাহার’’ন্তি ৰত্ৰা পুন পরিচ্ছিন্নকালভোজিতাযপি অপ্পাহারতং দস্সেন্তো ‘‘ৰিকাল…পে॰… পরিত্তাহার’’ন্তি আহ। চতূসু পচ্চযেসু লোলুপ্পৰিরহিতং বোধিমূলে এৰ সব্বসো লোলুপ্পস্স পহীনত্তা। ‘‘চতূসু পচ্চযেসূ’’তি হি ইমিনাৰ সব্বত্থ লোলুপ্পৰিগমো দীপিতোৰাতি। রসতণ্হাপটিক্খেপো ৰা এস ‘‘অপ্পাহার’’ন্তি ৰত্ৰা ‘‘অলোলুপ’’ন্তি ৰুত্তত্তা। ‘‘সীহং ৰা’’তি এত্থ একচরসদ্দো ৰিয ইৰ-সদ্দো অত্থতো ‘‘নাগ’’ন্তি এত্থাপি আনেত্ৰা, সম্বন্ধিতব্বোতি আহ – ‘‘একচরং সীহং ৰিয, একচরং নাগং ৰিযা’’তি। একচরা অপ্পমত্তা একীকতায।
30.Eṇimigassa viyāti eṇimigassa jaṅghā viya. Avayavīsambandhe hi idaṃ sāmivacanaṃ. Piṇḍimaṃsassa parito samasaṇṭhitattā suvaṭṭītajaṅgho. Kisanti thūlabhāvapaṭikkhepaparājotanā, na suṭṭhu kisabhāvadīpanaparāti āha ‘‘athūlaṃ samasarīra’’nti. Ātapena milātanti tapasā milātakāyaṃ indriyasantāpanabhāvato. Tenevāha – ‘‘tapo milāta’’ntiādi, tathā cāha pāḷiyaṃ ‘‘appāhāraṃ alolupa’’nti. Yathā ‘‘vīrassa bhāvo vīriya’’nti vīrabhāvena vīriyaṃ lakkhīyati, evaṃ vīriyasambhavena vīrabhāvoti āha ‘‘vīranti vīriyavanta’’nti. ‘‘Cattāro pañca ālope, abhutvā udakaṃ pive’’ti (theragā. 983; mi. pa. 6.5.10) dhammasenāpativuttaniyāmena parimitabhojitāya appāhāratā bhojane mattaññutā. ‘‘Mitāhāra’’nti vatvā puna paricchinnakālabhojitāyapi appāhārataṃ dassento ‘‘vikāla…pe… parittāhāra’’nti āha. Catūsu paccayesu loluppavirahitaṃ bodhimūle eva sabbaso loluppassa pahīnattā. ‘‘Catūsu paccayesū’’ti hi imināva sabbattha loluppavigamo dīpitovāti. Rasataṇhāpaṭikkhepo vā esa ‘‘appāhāra’’nti vatvā ‘‘alolupa’’nti vuttattā. ‘‘Sīhaṃ vā’’ti ettha ekacarasaddo viya iva-saddo atthato ‘‘nāga’’nti etthāpi ānetvā, sambandhitabboti āha – ‘‘ekacaraṃ sīhaṃ viya, ekacaraṃ nāgaṃ viyā’’ti. Ekacarā appamattā ekīkatāya.
পঞ্চকামগুণৰসেন রূপং গহিতং তেসং রূপসভাৰত্তা। মনেন নামং গহিতং মনস্স নামসভাৰত্তা। অৰিনিভুত্তধম্মেতি অৰিনাভাৰধম্মে গহেত্ৰা। আদি-সদ্দেন আযতনধাতুআদযো গহিতা। কামগুণগ্গহণেন হেত্থ রূপভাৰসামঞ্ঞেন পঞ্চ ৰত্থূনি গহিতানেৰ হোন্তি, মনোগহণেন ধম্মাযতনং, এৰং দ্ৰাদসাযতনানি গহিতানি হোন্তি। ইমিনা নযেন ধাতুআদীনম্পি গহিততা যোজেতব্বা। তেনাহ ‘‘পঞ্চক্খন্ধাদিৰসেনপেত্থ ভুম্মং যোজেতব্ব’’ন্তি। এত্থাতি পাল়িযং। কামৰত্থু ভুম্মং।
Pañcakāmaguṇavasena rūpaṃ gahitaṃ tesaṃ rūpasabhāvattā. Manena nāmaṃ gahitaṃ manassa nāmasabhāvattā. Avinibhuttadhammeti avinābhāvadhamme gahetvā. Ādi-saddena āyatanadhātuādayo gahitā. Kāmaguṇaggahaṇena hettha rūpabhāvasāmaññena pañca vatthūni gahitāneva honti, manogahaṇena dhammāyatanaṃ, evaṃ dvādasāyatanāni gahitāni honti. Iminā nayena dhātuādīnampi gahitatā yojetabbā. Tenāha ‘‘pañcakkhandhādivasenapettha bhummaṃ yojetabba’’nti. Etthāti pāḷiyaṃ. Kāmavatthu bhummaṃ.
এণিজঙ্ঘসুত্তৰণ্ণনা নিট্ঠিতা।
Eṇijaṅghasuttavaṇṇanā niṭṭhitā.
সত্তিৰগ্গৰণ্ণনা নিট্ঠিতা।
Sattivaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. এণিজঙ্ঘসুত্তং • 10. Eṇijaṅghasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. এণিজঙ্ঘসুত্তৰণ্ণনা • 10. Eṇijaṅghasuttavaṇṇanā
