| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
10. එණිජඞ්‌ඝසුත්‌තවණ්‌ණනා
10. Eṇijaṅghasuttavaṇṇanā
30. දසමෙ එණිජඞ්‌ඝන්‌ති එණිමිගස්‌ස විය සුවට්‌ටිතජඞ්‌ඝං. කිසන්‌ති අථූලං සමසරීරං. අථ වා ආතපෙන මිලාතං මාලාගන්‌ධවිලෙපනෙහි අනුපබ්‍රූහිතසරීරන්‌තිපි අත්‌ථො. වීරන්‌ති වීරියවන්‌තං. අප්‌පාහාරන්‌ති භොජනෙ මත්‌තඤ්‌ඤුතාය මිතාහාරං, විකාලභොජනපටික්‌ඛෙපවසෙන වා පරිත්‌තාහාරං. අලොලුපන්‌ති චතූසු පච්‌චයෙසු ලොලුප්‌පවිරහිතං. රසතණ්‌හාපටික්‌ඛෙපො වා එස. සීහංවෙකචරං නාගන්‌ති එකචරං සීහං විය, එකචරං නාගං විය. ගණවාසිනො හි පමත්‌තා හොන්‌ති, එකචරා අප්‌පමත්‌තා, තස්‌මා එකචරාව ගහිතාති. පවෙදිතාති පකාසිතා කථිතා. එත්‌ථාති එතස්‌මිං නාමරූපෙ. පඤ්‌චකාමගුණවසෙන හි රූපං ගහිතං, මනෙන නාමං, උභයෙහි පන අවිනිභුත්‌තධම්‌මෙ ගහෙත්‌වා පඤ්‌චක්‌ඛන්‌ධාදිවසෙනපෙත්‌ථ භුම්‌මං යොජෙතබ්‌බන්‌ති. දසමං.
30. Dasame eṇijaṅghanti eṇimigassa viya suvaṭṭitajaṅghaṃ. Kisanti athūlaṃ samasarīraṃ. Atha vā ātapena milātaṃ mālāgandhavilepanehi anupabrūhitasarīrantipi attho. Vīranti vīriyavantaṃ. Appāhāranti bhojane mattaññutāya mitāhāraṃ, vikālabhojanapaṭikkhepavasena vā parittāhāraṃ. Alolupanti catūsu paccayesu loluppavirahitaṃ. Rasataṇhāpaṭikkhepo vā esa. Sīhaṃvekacaraṃ nāganti ekacaraṃ sīhaṃ viya, ekacaraṃ nāgaṃ viya. Gaṇavāsino hi pamattā honti, ekacarā appamattā, tasmā ekacarāva gahitāti. Paveditāti pakāsitā kathitā. Etthāti etasmiṃ nāmarūpe. Pañcakāmaguṇavasena hi rūpaṃ gahitaṃ, manena nāmaṃ, ubhayehi pana avinibhuttadhamme gahetvā pañcakkhandhādivasenapettha bhummaṃ yojetabbanti. Dasamaṃ.
සත්‌තිවග්‌ගො තතියො.
Sattivaggo tatiyo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 10. එණිජඞ්‌ඝසුත්‌තං • 10. Eṇijaṅghasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. එණිජඞ්‌ඝසුත්‌තවණ්‌ණනා • 10. Eṇijaṅghasuttavaṇṇanā
