| Library / Literary Works |
Enrico Fruch
Aquilee
Contadin che tu rompis la tiare di Aquilee,
ferme i bûs un moment:
sot il cjamp che la uarzine 'e are,
sot la man che semene el forment,
tal soreli e ta l'ombre dal nûl,
je une impronte di Rome , la storie, la glorie
dal nestri Friûl
Barcjarûl che tu vens di Barbane,
Cuant ch'al sune l'antic cjampanîl,
no tu sintis un glon di cjampane,
ma une vôs che ti rive dal cîl,
e l'eterne peraule ti dîs,
una vôs che traviarse la storie
e la glorie
dal nestri paîs
Pelegrine de ultime uere,
mari sante dal nestri soldât,
che bessole tu jentris la sere
a preâ sot i pins dal sagrât,
scolte, scolte, lajù il rusignûl
che ti puarte cun tante dolcezze
la cjarezze
dal nestri Friûl
Tal serèn di une clare matine,
e co'e rît la marine là in fonz:
alze i voi, o gjarnazie latine
su che blancje corone di monz,
sul Friûl!
E ten fede a l' idee
che no mûr: a la grande memorie.
E a la glorie
de nestre Aquilee
POTRESTI ANCHE ESSERE INTERESSATO A
